بنکۆڵکاری

قاچاخچێتی ڤیزا لەکوردستان، بردنەدەرەوەی ملیۆنان دۆلار

 ژمارەیەكی زۆر لە هاوڵاتیانی هەرێم لەپێناو وەرگرتنی ڤیزەی شنگن و ئەمریكا و كەنەدا و بەشێك لە وڵاتانی كاریبی، پارەیەكی زۆر خەرج دەكەن، بەڵام هەندێكیان بێ ئەوەی ڤیزە وەربگرن گیرفانیان بەتاڵ كراوەتەوە.

زۆرێك بۆ كێشانەوەی پارە لە خەڵك بوونەتە قاچاخچی و پارەیەكی زۆری هاوڵاتیانیان بردووە، یەكێك لەو پاڵنەرانەی وایكردووە هاوڵاتیان فێڵیان لێ بكرێت پەیجەكانی سۆشیال میدیایە، بەشێك لە پەیجەكان بە ئاشكرا بانگەشە بۆ ڤیزای كەنەدا و شنگن و ئەمریكا و وڵاتانی ئەمریكای ناوەڕاست (كاریبی) دەكەن، ئەو پارانەی هاوڵاتیان دەیدەنە ئەو ڤیزانە بۆ توركیا و ئێران و بەشێك لە وڵاتانی دیكە حەواڵە كراون، واتە لەو رێگەیەوە پارەیەكی زۆر لە هەرێمەوە دەچێتە وڵاتان.

بەپێی بەدواداچوونێكی MIC لە ماوەی زیاتر لە دوو ساڵدا نزیكەی یەك ملیۆن دۆلار بۆ ڤیزای شنگن و ئەمریكا و بەشێك لە وڵاتان حەواڵەی دەرەوە كراوە، ئەمە تەنها لە نوسینگەكانی هەولێر، بەشێك لەو پەیجانەشی كە بانگەشە بۆ ڤیزا دەكەن ئێستا داخراون و خاوەنەكانیشیان ونن.

هاوڵاتییەكی هەرێمی كوردستان كە دانیشتووی هەولێرە، لە بەدواداچوونەكەی MIC قسەیكرد و وتی "لەماوەی هەشت مانگدا 70 هەزار دۆلارم داوە بۆ ڤیزا، ئەو كەسەی بەنیازبوو كارەكەم بۆ ئەنجام بدات وتی دۆخەكە تێكچووە و زیاتری پێدەچێت، بە گشتی 95 هەزار دۆلارم خەرج كردووە بەناوی وەرگرتنی كرێی باج و خانوو چەندین شتی دیكە كە دواتر زیایدكردووە، ئەمە لەماوەی 10 مانگ كە بڕیاربوو گەشت بكەم بەڵام گەشتیشم نەكرد".

كێشانەوەی پارەیەكی زۆر لە خەڵك بەناوی وەرگرتنی ڤیزاوە لەكاتێكدایە، وەرگرتنی ڤیزا ئەگەر هاوڵاتییەك خۆی مامەڵەكانی ئەنجام بدات 500 دۆلاری تێدەچێت، بەشێك لە نوسینگەكان ئەو ڤیزایە بە پارەیەكی خەیاڵی دەفرۆشنەوە.

بەوتەی سالار مەرزانی، كە خاوەنی كۆمپانیایەكی گەشتیارییە، هیچ كۆمپانیایەك ناتوانێت بە گرەنتی ڤیزە وەربگرێت و هیچ كۆمپانیایەكیش پەیوەندی ڕاستەوخۆی لەگەڵ كونسوڵخانەكان نییە.

لەدرێژەی بەدواداچوونەكەی یەكێك لە كوردانی دانیشتووی كەنەدا، بە MIC ی وت "هەندێك كەس بەناوی پەسەندكردنی خوێندن لە كەنەدا و ئەمریكا هەڵدەخەڵەتێنرێن، بەڵام ئەوە تەنها پارچە وەرەقەیەكە، كەسانێك لە كەنەداوە خۆیان وەكو پارێزەر ناساندووە، بەڵام من بەدواداچوونم كردووە تەنها وەرەقەیەكە و دروستكراوە و دواتریش ئەو كەسانەی داوای ڤیزەیان پێكردووە ڕەتكراونەتەوە".

لە دادگاكانی هەرێم سكاڵایەكی زۆر لەسەر دۆسیەی فێڵ كردن لە هاوڵاتیان بۆ وەرگرتنی ڤیزا تۆماركراوە، پارێزەر سۆران جەلال دەڵێت  "كەسانێكی زۆر هەستاون بە ساختەكردنی ڤیزا بۆ فێڵكردن لە كەسانی تر، ئەمەش بەپێی ماددەی 456 لەیاسای سزادانی عێراقی دەبێتە فێڵكردن كە سزای زیندانیكردنی بۆ دانراوە".

وەك غازی رەسوڵ، سەرۆكی ئەنجومەنی بۆرسەی هەولێر دەڵێت خەڵكێكی زۆر بۆ ماوەیەك نوسینگەیان كردووەتەوە و پارەیەكی زۆریان لە خەڵك وەرگرتووە، پاشانیش نوسینگەكانیان داخستووە و هیچ ناونیشانێكیان نەماوە".

خاوەن كۆمپانیایەكی ئاڵوگۆڕی دراو، ئامۆژگاری خەڵك دەكات كە "نابێت بەهیچ شێوەیەك متمانە بە نوسینگەكانی دەرەوەی بازاڕ بكەن كە پاش ماوەیەك دایدەخەن".

سالار مەرزانی، خاوەنی یەكێك لەو كۆمپانیایانەی پاسپۆڕتی وڵاتانی كاریبی بۆ خەڵك وەردەگرن دەڵێت "وەرگرتنی ئەو پاسپۆڕتانە لە 120 هەزار دۆلارەوە دەستپێدەكات.

بەگوێرەی ئامارە نافەرمیەكان لەهەرێمی كوردستان نزیكەی هەزار خێزان پاسپۆڕتی وڵاتانی ئەمریكای ناوەڕاست و كاریبییان كڕیوە.

هەواڵ

هەرێمی کوردستان بە یاساکەی عێراق زیاتر لە 35 هەزار کەس پێکەوە خانەنشین دەکات

ئەمساڵ هەرێمی کوردستان زیاتر لە 35 هەزار کەس پێکەوە خانەشین دەکات، هەر کەسێکیشیان تەمەنی خزمەتی 25 ساڵ بێت 18 مووچەی پێکەوە پێدەدرێت. پێشبینی دەکرێت، بە خانەنشینی بوونی ئەو ژمارە فەرمانبەرە دەرگای دامەزراندنی نوێ بەڕوی بەشێک لە گەنجاندا بکرێتەوە.

حکومەتی هەرێمی کوردستان بڕیاریداوە، تەنها لە مانگی کانوونی دووەمی ئەمساڵدا زیاتر لە 35 هەزار فەرمانبەر خانەنشین بکات. 

بەشی کارگێڕی سەرجەم فەرمانگەکانی حکومەتی هەرێمی کوردستان ماوەی دوو ڕۆژە سەرقاڵی ئامادەکردن و رێکخستنی لیستی ئەو فەرمانبەرانەن کە خانەنشین دەکرێن.

بەپێی ڕێکارەکان، ئەو کەسانەی لەم قۆناغەدا خانەشین دەکرێن، لەدایکبووانی ساڵەکانی 1962،1963،1964ن لەگەڵ لەدایکبووانی مانگی یەکی ساڵی 1965 کە تەمەنیان بووەتە 60 ساڵ خانەنشین دەکرێن.

یاساکەی عێراق بۆ خانەشینکردنی فەرمانبەران بەکاردەهێنرێت
کۆتایی مانگی تشرینی دووەمی 2022، دادگاى باڵاى فیدراڵى عێراق، بڕیاریدا بە پابەندکردنی حکومەتى هەرێمى کوردستان بە کارکردن بە یاسای ژمارە 9ـی ساڵی 2014ـی تایبەت بە یاسای یەکگرتوی خانەنشینی عێراق، بەگوێرەى یاساکە کەمترین موچەى خانەنشینى 400 هەزار دینار دەبێت.

تەموزی 2024، حکومەتی هەرێمی کوردستان پابەندبوونی خۆی بە بڕیارەکەی دادگای فیدراڵیەوە ڕاگەیاند و بڕیاریدا ئەو یاسایە بۆ خانەنشینکردنی فەرمانبەرانی بەکاربهێنێت. 

حکومەتی هەرێمی کوردستان لە خانەنشینکردنی ئەم فەرمانبەرە نوێیانەشدا پشت بە هەمان یاسا دەبەستێت، بەڵام بڕیاریداوە، تەمەنی خانەنشینیی لە 63 ساڵەوە بۆ 60 ساڵی كەم بکرێتەوە. 

بەپێی یاسای خانەنشینی عێراق کە هەرێمی کوردستان بۆ خانەنیشینی بوونی فەرمانبەران بەکاریدەهینێت، هەر فەرمانبەرێک لە کاتی خانەنشینیدا ئەگەر 25 ساڵ خزمەتی هەبێت، 12 مووچە وەک پاداشتی ساڵانی خزمەت پێدەدرێت لەگەڵ شەش مووچەی مۆڵەتی کۆکراوە.

کەسوکاری شەهیدان دەتوانن خانەنشین نەبن
وەزارەتی دارایی و ئابوریی هەرێمی کوردستان مافی بەردەوامبوون بەو کەسانە دەدات کە خاوەن شەهیدی پلە یەک و دوون و تەمەنی خانەشینیان تەواو کردووە. 

بەپێی ڕاگەیەندراوی وەزارەتەکە، ئەو کەسانەی کەسی پلە یەک و پلە دوویان شەهیدە، فۆڕمێکی تایبەتی وەزارەتی دارایی عێراقییان پڕکردوەتەوە، بە مەبەستی "ئەنجامدانی کاری پێویست و بەردەوامبوونیان لە خزمەت".

ژمارەی خانەنشیان 
بەپێی دوایین ڕاپۆرتی وەزارەتی دارایی و ئابوری بۆ ئەنجومەنی وەزیرانی هەرێمی کوردستان، 277 هەزار و 541 کەس لە هەرێمی کوردستان خانەنشینن.

بەپێی داتاکانی وەزارەتی دارایی و ئابوری هەرێمی کوردستان، مووچەی یەک مانگی خانەشینان پێویستی بە زیاتر لە 180 ملیار دیناری مانگانە هەیە. 

دامەزراندن دەکرێتەوە؟ 
خانەنشین بوون، ڕێگەیەکە بۆ نوێکردنەوەی فەرمانگە و دامەزراوە حکومییەکان بە گەنجان و لاوان، چونکە پێویستە لەگەڵ خانەشینبوونی توێژێکدا توێژێکی نوێ دابمەزرێت. 
تا ئێستا حکومەتی هەرێمی کوردستان هیچ، ڕێکار و ڕێنماییەکی بڵاونەکردوەتەوە کە تایبەت بێت بە دامەزراندنی فەرمانبەری نوێ لە شوێنی ئەو فەرمانبەرانەی خانەنشین دەکرێن، بەڵام  پێشبینی دەکرێت، بە خانەنشینی بوونی ئەو ژمارە فەرمانبەرە دەرگای دامەزراندنی نوێ بەڕوی بەشێک لە گەنجاندا بکرێتەوە.