ژیان

دایكان و باوكان چۆن كه‌شێكی گونجاوی كۆششكردن بۆ منداڵه‌كانیان دابین بكه‌ن؟

Mic Mdeia
2021-07-17

كۆششكردن و هه‌وڵدان له‌ وانه‌كانی خوێندنگه‌دا ڕێگایه‌كی گرنگی گه‌یشتنه‌ به‌ ئاستێكی به‌رز له‌ خوێندنگه‌ و له‌ داهاتووشدا، له‌ هه‌مانكاتدا بۆ خوێندكاران بێزاركه‌رترین شته‌ و له‌ ماوه‌ی خوێندنگه‌دا خوێندكاران هه‌مووشتێك ده‌كه‌ن له‌پێناو ئه‌وه‌ی خۆیان له‌ كۆششكردن بدزنه‌وه‌.

هەندێکجار كۆشش نه‌كردنی خوێندكار ناکۆکییەکی زۆر لە نێوان منداڵەکان و دایک و باوکان دروستدەکات، بەهۆی ئەوەی منداڵەکان ئەرکەکانی ماڵەوەیان دەشارنەوە و نایکەن، یاخود هەڵی دەگرن بۆ خولەکەکانی کۆتایی، ئەمەش وا لە دایک و باوکان دەکات خەم بخۆن و ترسی دەرنەچونی منداڵەکانیان هەبێت.

هه‌روه‌ها ئەرکەکانی ماڵەوە زۆرکات ناکۆکی بۆ دایک و باوکان دروستدەکات چونکە پێویستە لێی تێبگەن و هاوکاربن لە شیکارکردنیدا، لێره‌دا چه‌ند ڕێنماییه‌ك بۆ دایكان و باوكان ده‌خه‌ینه‌ڕوو تا بتوانن یارمه‌تیده‌ری منداڵه‌كانیان بن له‌ جێبه‌جێكردنی ئه‌ركه‌كانی ماڵه‌وه‌یاندا. 

یه‌كه‌م: ئەرکی ماڵەوە بکرێت بە بەشێک لە ڕۆتین
هەلێک بدە بە منداڵەکان بۆ ئەوەی باسی وانەکانیان و قوتابخانەکانیان بکەن، لەگەڵیان بدوێن لە کێشەکانیان بپرسنه‌وه‌، ئه‌گەر هاتوو لە بابەتێکیشیان نەزانی هەوڵبدە یارمەتییان بدەیت.

ئەگەر ئەرکی پێدرابوو هاوکاری بکە، ئەگەر زانیاریت نەبوو لە بارەی ئەرکەکەیەوە پرسیار لە کەسێکی دیکەی خێزانەکەت یاخود هاورێیەکت بکە یاخود لە ئینتەرنێتدا بەدوای وەڵامەکەیدا بگەڕێ، چونکە ئەمە پاڵپشتییەکی زۆرە بۆ منداڵه‌كه‌ت.

یارمەتی منداڵەکانتان بدەن لە ڕێکخستنی ئەرکەکانی ماڵەوەیان و ستایشیان بکەن بۆ ئەو ئەرکانەی کە کردوویانە، چونکە زۆربەی قوتابخانەکان پەڕاوی لێپرسینەوەیان هەیە لە نێوان قوتابخانە و دایک وباوکەکان، ئەمەش دەریدەخات کە تا چەندێک دایک و باوکان ئاگایان لە منداڵەکانیانە و یارمەتی منداڵەکانیان دەدەن لە ئەرکی ڕۆژانەیاندا و چاودێری دەکرێن.

دووه‌م: جێگه‌یه‌كی باش دروستبکریت بۆ كۆششكردنی منداڵان
هاوکاری منداڵه‌كانت بكه‌ ڕۆتینەکانیان بپارێزن، هەندێک لە منداڵان ڕاستەوخۆ دوای قوتابخانە ئەرکەکانیان ئەنجام دەدەن، وە هەندێکێشیان پاش پشوودان، بەڵام پێویستە دایک و باوکان ژینگەیەکی لەبار بڕەخسێنن بۆ خوێندنەکەیان لە مێزیکی خونێدنەوە بگرە تاوەکو شوێنێکی هێمن و ڕووناکیەکی باش، بەڵام هەندێک لە منداڵان حەز دەکەن لەگەڵ خێزانەکانیان ئەرکەکانیان بکەن و هەندێکیان حەزدەکەن بە تەنها.

ئەگەر شوێنێکی گونجاوت نییە بۆ خوێندنی منداڵەکەت ئەوە دەتوانیت بیبەتە کتێبخانەیەک یاخود سەنتەرێکی خوێندنه‌وه‌ کە لەوێدا شوێنێکی ئارامە و کۆمپیوتەر و ئینتەرنیتی لێیە کە دەتوانێ باشتر لە بابەتەکان تێبگات بە مەرجێک ئەو وێبسایتانە بەکار نەهێنێت کە لە لایەنی پەروەردەییەوە قەدەغەکراون.

سێیه‌م: ژینگه‌یه‌كی خێزانی گونجاو دابین بكرێت
منداڵان پێویستیان به‌وه‌یه‌ كه‌ له‌ ماڵه‌وه‌ هه‌ست به‌ ئاسووده‌یی و ئارامی ده‌روونی بكه‌ن، تا بتوانن ده‌ستبكه‌ن به‌ خوێندن و كۆششكردن، ئه‌گه‌ر تۆی دایك و باوك به‌رده‌وام ژینگه‌یه‌كی پڕ له‌ هات و هاوار و ده‌نگه‌ده‌نگ له‌ ماڵه‌وه‌ بخولقێنی ئه‌وا منداڵان ناتوانن به‌ وردی خوێندنه‌كه‌یان ئه‌نجامبده‌ن، هه‌روه‌ها ناكۆكی نێوان دایك و باوك بۆ منداڵان مایه‌ی نیگه‌رانییه‌و دووریان ده‌خاته‌وه‌ له‌ كۆششكردن. 

چواره‌م: داوای هاوکاری لە قوتابخانەکەت بکە
هەندێک لە قوتابخانەکان هۆڵی خوێندنه‌وه‌یان هه‌یه‌ كه‌ ڕێگه‌ به‌ خوێندكاران ده‌ده‌ن زیاتر له‌ كاتی خوێندنگه‌ بمێننه‌وه‌ بۆ كۆششكردن، ئەمەش یارمەتی کەمکردنەوەی ناکۆکیەکانیان دەدات لە ماڵەوە.

هەندێک لە قوتابخانەکان دەیانەوێت خوێندکارەکان بە شێوەی ئۆنڵاین ئەرکەکانیان بنێرن، ئەگەر زانیاریت نییە لە بارەیەوە ئەوە بە زووترین کات پەیوەندی بە قوتابخانەکانیانەوە بکە، یاخود ئەگەر ئینتەرنێتت نییە لە ماڵەوە دەتوانیت لە کتێبخانەیەک کۆمپیوته‌رێکی تایبەت بگریت، ئەگەر منداڵەکەت حاڵەتێکی تایبەتی هەیە و هەستدەکەیت لە ئەرکەکانی ماڵەوەدا کێشەی بۆ دروستدەکات ئەوە ڕاستەوخۆ سەردانی قوتابخانەکەی بکە تا بتوانن هاوکاریبن لە ئەنجامدانی ئەرکەکانی و بەمەش ئەو فشارەی لە ماڵەوە کەمدەبێتەوە لە سەر هه‌ردوولاتانه‌.

More News

Most Popular

هەواڵ

هێزێکی کۆماندۆ کارمەندانی کارگەی چیمەنتۆی گاسنیان لەسلێمانی بە بارمتەگرت

Mic
2021-09-09

 کارمەندانی کارگەی چیمەنتۆی گاسن دەڵێن، هێزێکی کۆماندۆی چەکدار، بە چەکی قورس و سوکەوە کە دەیان چەکداربوون، هەڵیانکوتاوەتە سەریان و بۆ ماوەی 45 خولەک لەگۆڕەپانێکی کارگەکەدا بە بارمتە گیراون. 

کارمەندێکی کارگەی چیمەنتۆی گاسن لە تاسڵوجە، بە MIC وت کە کاتژمێر 11:45 خولەکی ئەمرۆ پێنجشەممە، هێزێکی چەکداری پڕچەکی راهێنراو، کە جلوبەرگەکانیان لۆگۆی هێزەکانی کۆماندۆی هەرێمی کوردستانیان لەسەر بووە، بەبێ هیچ ئاگادارکردنەوەیەک و بەشێوەیەکی زۆر توندوتیژ هەڵیانکوتاوەتە سەر کارگەکە و سەرجەم کارمەند و بەڕیوەبەرانی کارگەکەیان دەستبەسەرکردوە و بۆ ماوەیە 45 خولەکیش لەگۆڕەپانی کارگەکە لەبەر هەتاو، بەبارمتەیانگرتوون.

سەرچاوەکە وتیشی کە هێزەکە پەلاماری چەند کارمەندێکیان داوە، بە زەبری هێز سەرجەم کارمەندانی کارگەیەیان لەشوێنی خۆیان دەرهێنا و لە گۆڕەپانی کارگەکە کۆیانکردنەوە و چەند کۆمپیوتەر و کەلوپەلێکیشیان شکاندوە.

بەگوێرەی زانیارییەکان، هێزەکە بە نزیکەی 20 ئۆتۆمبیلی جۆری گوللە نەبڕ و بە چەکی سوک و قورسی وەک دۆشکە و بیکەسی هەڵیانکوتاوەتە سەر کارگەکە و دواتر بێ هیچ روونکرندنەوەیەک جێیانهێشتوە.

کارگەری چیمەنتۆی گاسن دەکەوێتە ناوچەی تاسڵوجەی شاری سلێمانی و خاوەندارێتییەکەی بۆ فاروقی مەلا مستەفا، گەورە بازرگان و سەرمایەداری کوردستان دەگەڕێتەوە، هەروەها چەند پشکێکیشی بەناوی چیاو نما کوڕەکانی نەوشیروان مستەفا ئەمینەوەیە.

تائێستا لایەنە ئەمنییەکان و بەڕێوەبەرانی کارگەکەش، هیچ روونکردنەوەیەکیان لەبارەی رووداوەکەوە بڵاونەکردۆتەوە.