هەواڵ

کۆسرەت رەسوڵ، دوورە پەرێزی سیاسی بەهۆی دۆخی تەندروستییەوە

بڵاوکردنەوەی نوێترین وێنەی کۆسرەت رەسوڵ، سەرۆکی ئەنجوومەنی باڵای سیاسی و بەرژەوەندی یەکێتی نیشتیمانی کوردستان، ئەوەی یەکلاکردەوە کە ئەگەر دوورە پەرێزی پێشتری بەهۆی بەراوێزخستنی دوای کۆنگرەوە بوبێت،ئەوا دوورە پەرێزی ئێستای لەسەر گۆڕەپانی سیاسی، بەهۆی باری تەندرووستیەوەتی.

لەچەند مانگی رابردوودا زنجیرەیەک رووداو و گۆڕانکاری کتوپڕ لەناو خۆی یەکێتتدا روویدا، بەتایبەت کاتێک لە ٨ی تەمووزدا، ناکۆکییەکانی هاوسەرۆکان، پاڤڵ تاڵەبانی و لاهور شێخ جەنگی گەیشتە ئاستێک چاوەڕوانی پێکادانی چەکداری لێبکرێت، لەدۆخێکی وادا کۆسرەت رەسوڵ وەک سەرۆکی بەرزترین دامەزراوەی حزبەکە، بێدەنگ بوو. 

کە زیاتر دەرنەکەوتن و بێدەنگییەکەی ئەوکاتەی بۆ دۆخی تەندروستی دەگەڕێندرێتەوە، بەتایبەت کە بۆ چارەسەر رووی لە دەرەوە کردبوو.

وێنە نوێکەی کۆسرەت رەسوڵ، لەڕواڵەتدا ئەوە پشاندەدات بەجۆرێک جێگیرە کە توانا و تاقەتی بۆ خوێندنەوەی رۆژنامە هەیە، کە رۆژنامەکەش رۆژنامەی کوردستانی نوێیە.

بەڵام لە ناوەرۆکدا وێنەکە هەمان ئەو دۆخە تەندروستییەی جەلال تاڵەبانی سەرۆککۆماری کۆچکردووی عێراق دهێنێتەوە پێش چاو کە لەدوای نەخۆشکەوتن و مانەوەی چەند مانگ لەنەخۆشخانە، وێنەیەکی بڵاوکرایەوە کە بەزردەخەنەیەکەوە سەرقاڵی خوێندنەوەی رۆژنامەی کوردستانی نوێ بوو، ئەوکات کەسە نزیکەکانی تاڵەبانی بە بڵاوکردنەوەی وێنەکە هەواڵی ئەوەیاندا کە تەندروستی جێگیرە.

هەرچۆنێکبێت، کۆسرەت رەسوڵ، لەدواین وێنەیدا بەڕوونی دابەزینی کێشی و لاوازیی جەستەی پێوەدیارە.

کۆسرەت رەسوڵ بە یەکێیک لەسەرکردە دیار و کاریگەرەکانی گۆڕەپانی سیاسی هەرێمی کوردستان دادەنرێت، لە کۆتایی ساڵی ١٩٧٥ دا پەیوەندیی بە ڕیزەکانی کۆمەڵەی ڕەنجدەرانی کوردستانەوە دەکات و دەبێت بە سەرپەرشتکاری ڕێکخستن و کاروچالاکییەکانی خوێندکاران.

لە ساڵی ١٩٩١ دا بووە بەلێپرسراوی بەرەی کوردستانیی سنوری پارێزگای ھەولێر، ساڵی ١٩٩٢ بووە بە ئەندامی پەرلەمانی کوردستان و لە ساڵی ١٩٩٣ تاکو ساڵی ١٩٩٦ دەبێتە سەرۆکی دووەم کابینەی ئەنجومەنی وەزیرانی حکوومەتی ھەرێمی کوردستان، دواتریش بووە بە سەرۆکی ئەنجومەنی وەزیرانی حکوومەتی ھەرێمی کوردستان-ئیدارەی سلێمانی تاکوو ساڵی ٢٠٠١.

لە حوزەیرانی ٢٠٠٦ کۆسرەت رەسوڵ، وەک جێگری سەرۆکی ھەرێمی کوردستان دەستنیشان دەکرێت، لەهەمانکاتیشدا جێگری سکرتێری گشتی ئەوکاتی یەکێتی بوو.
لە ساڵی ١٩٧٧ ھاوسەری گرتووە و دەبێتە خاوەنی شەش کوڕ و یەک کچ، کە دواتر سێ کوڕی شەھید دەبێت.
کۆسرەت ڕەسول زمانەکانی کوردی، عەرەبی و فارسی بە باشی دەزانێت.

هەواڵ

ئاسمانی عێراق جمەی دێت و ئاستی پێوانەیی تۆمارکرد

بەپێی راگەیاندراوێکی وەزارەتی گواستنەوەی عێراق، ئاسمانی عێراق بەشێوەیەکی کارا لەلایەن کۆمپانیاکانی بواری گەشتی ئاسمانیی مەدەنییەوە بەکاردەهێنرێت و ژمارەی پێوانەیی تۆمارکردووە، پاشئەوەی بەهۆی جەنگی ئیسرائیل و ئێرانەوە کەرتی گەشتی ئاسمانی عێراق بەتەواوی داخرابوو.

بەپێی زانیارییەکانی وەزارەتی گواستنەوەی عێراق، رۆژانە بەگشتی 300 بۆ زیاتر لە 700 فڕۆکەی مەدەنی بە ئاسمانی عێراقدا تێدەپەڕن، ئەوەش پێوانەیەکی نوێیە.

بەگشتی ئاسمانی عێراق بە سێ چین لە بەرزترینەوە بۆ کەمتر بەرز، رێچکەی تێپەڕینی فڕۆکەی دیارییکردووە، ترافیکێکی زۆر بەهێز لە ئاسمانی عێراق هەیە و حەوت رۆژی هەفتە و رۆژانە 24 کاتژمێر فشارێکی زۆر لەسەر ئاسمانی عێراق هەیە و کۆمپانیاکانی گواستەوە خۆیان تۆماردەکەن.

 فاریس ئەلجیواری، توێژەر و راوێژکاری فڕۆکەوانی رایگەیاند؛ داهاتی دارایی لە فڕینی ئاسمانی فڕۆکەکان 450 دۆلارە بۆ هەر فڕۆکەیە، هەروەها هەر فڕۆکەیەک کە لە هەر فڕۆکەخانەیەکی عێراق بنیشێتەوە دەبێت 4 هەزار دۆلار بدات بۆ ئەو خزمەتگوزارییانەی پێشکەشی دەکریت، بە مەرجێک کە کاتیكی زۆر لەناو فڕۆکەخانەکەدا نەمێنێتەوە.

ئەلجیواری ئاماژە بەوەدەکات لە 12 رۆژی جەنگی ئێران و ئیسرائلدا، زیانی رۆژانەی عێراق بەهۆی داخستنی فڕۆکەخانەکانەوە گەیشتبوە ملیۆنێک و 500 هەزار دۆلار.

عەباس بەیزانى، بەڕێوەبەری کۆمپانیای گشتی بۆ خزمەتگوزاریی گەشتى ئاسمانى عێراق، "سەرەڕاى ئاڵنگارییە ئەمنییەکانى ناوچەکە، بەڵام ئاسمانی عێراق متمانەی کۆمپانیاکانى فڕۆکەوانیى بەدەستهێناوەتەوە و ژمارەیەک زۆر لە کۆمپانیا ناوچەیى و نێودەوڵەتییەکان گەڕاونەتەوە بۆ بەکارهێنانى ئاسمانى عێراق وەک رێڕەوێکى سەرەکى بۆ گەشتەکانیان".