هەواڵ

بەڵێنە گەورەکە… قوباد تاڵەبانی دەتوانێت جێبەجێی بکات؟

هيشتا قوباد تاڵەبانی کۆتایی بە وتارەکەی نەهێنابوو کە وەک بەشێک لە بانگەشەی حزبەکەی لەبارەی ئازادی رادەربڕین لەسلێمانی پيشکەشی دەکرد، بە چەند سەد مەترێک لە دووری شوێنی وتارەکە، گروپيک چەکدار بە ئاشکرا هەڵیانکوتایە سەر ئەفسەرێکی پێشمەرگە و دوای لێدان و بریندارکردنی، فڕاندیان.

رووداوەکە و هاوشێوەکانی رۆژانی دوایی، بەتەواوی پێچەوانەی ئەو بانگەشەیە کە قوباد تاڵەبانی، بۆ دوو هەڵبژاردنە، وەک درووشم هەڵیگرتوون، کە ئەوانیش "ئارامی و سەقامگیرییە."
یەک دوو رۆژێک دوای هەڵبژاردن، چەند رووداوێکی کوشتن، بریندارکردن، دەستگیرکردن لەسەر نوسینی ووتار و رادەربڕین، لەزۆنی ژێر حوکمڕانی یەکێتی روویاندا، کە بەتەواوەتی بانگەشەکانی قوباد تاڵەبانی، لەبارەی سەقامگیری و ئارامییەوە، بەتاڵکردنەوە.

کە دواینیان دەستگیرکردنی ئەفسەرێکی پۆلیسی دارستانە، لەسەر نوسینی وتارێک لە تۆری کۆمەڵایەتی فەیسبوک دەستگیرکرابوو.
ئەفسەرەکە رەخنەی لە قوباد تاڵەبانی گرتبوو بەوەی کە بەشێکی سەرەکی لە کەبوونەوەی دەنگی یەکێتی، دەکەوێتە ئەستۆی ئەو.

قوباد تاڵەبانی، سێ کابینەیە لەناو حکومەتی هەرێمی کوردستاندا دەسەڵاتدارە، بەتەواوەتی لە دووکابینەدا جێگری سەرۆکوەزیرانە، کە بەگوێرەی عورفی حوکمڕانی لە کوردستانی عێراق، دەکاتە سەرۆکی حکومەت لە ئیدارەی سلێمانی و زۆنی سەوزدا.

لەو ماوانەدا، دیارترین بەرپرسی باڵای حکومەتە، کە زۆرترین لێدوانی بۆ پشتیوانیکردن لە ئازادی رۆژنامەوانی و بەڵێنی پاراستنی"ئارامی و سەقامگیری" داوە.

لە 10 مانگی رابردوودا، زنجیرەیەک رووداوی کوشتن، دەستگیرکردن،هەڵکوتانە سەر چەند کۆمپانیا و کارگەیەک، هەڵکوتانە سەر چەند دەزگایەکی میدیایی و بێکارکردنی دەیان رۆژنامەوان، لە زۆنی سەوزدا روویانداوە.

تائێستا بەشێکی زۆری بکەری ئەو رووداوانە، ئاشکرا نەکراون، وەک، کوشتنی کادیرەکەی حزبێکی رۆژهەڵات لەهوانە، تیرۆرکردنی بەرپرسی دەزگای شەهیدانی پەکەکە لەگەڕەکی چوارچرای سلێمانی و بریندارکردنی کادرێکی دیکەی پەکەکە لەسلێمانی.

دواین دوو ڕووداویش کە کوشتنی پاسەوانێک لە دەروازە سیتی و بریندارکردنی کرێکارێکی نانەوا لە رانیە، کە بکەرانی هەردوو رووداوەکە کوڕی دوو بەرپرسی یەکێتی ئەنجامیاندا، هێشتا هەردوو دۆسێکە یەکلایی نەکراونەتەوە و بکەرانیان رادەستی پۆلیس نەکراون.

یەکلاییکردنەوەی ئەم دۆسێیانە، بەپلەی یەکەم ئەرکی قوباد تاڵەبانییە کە وەک جێگری سەرۆکوەزیران چاودێریان بکات.
دوای رووداوەکانی 8 تەموزیش کە لەنێوان هاوسەرۆکانی یەکێتدا روویدا، دەسەڵاتەکانی مامی بچووک لەناو حزبدا باڵاتربوون، حاڵی حازر دەستکراوەترین بەرپرسی باڵای یەکێتییە کە بتوانێت لەیەککاتدا بڕیار دەربکات و جێبەجێشبکرێت.

بەر لەڕووداوەکانی 8 تەمووز، قوباد تاڵەبانی نیگەرانی ئەوەی پیشاندەدات کە لەسنوری ئیدارەی سلێمانی، رێگری دەکرێت لەجێبەجێکردنی بڕیارەکانی، بەڵام دوای 8 تەمووز، تاڕادەیەکی زۆر، دەستکراوەتر بوو.
ئەمەش وادەکات کە بەردەوام چاوەکان لەسەر قوباد تاڵەبانی بن، بۆ بەرگریکردن لەو درووشمانەی کە لەبانگەشەی هەڵبژاردندا بەرزیاندەکاتەوە، کە سەقامگیری و ئازادی رادەربڕین و کاری رۆژنامەوانییە.

رەخنەیەکی دیکە کە لەقوباد تاڵەبانی دەگیرێت ئەوەیە کە لە دۆسێیەی گیراوانی باندیاندا، هیچ بۆچونيکی فەرمی خۆی وەک جێگری سەرۆکوەزیران دەرنەبڕیوە.

بەڵام لەکەمپینی هەڵبژاردنی پەرلەمانی عێراقدا وەک سەرۆک لیست چەند جارێک ئاماژەی بە دۆسێیەکەداو بانگەشەی ئەوەیکرد رێگری دەکەن لە دووبارەبوونەوەی دۆخی بادینان لەسلێمانی.لەکاتێکدا قوباد تاڵەبانی جێگری سەرۆکوەزیرانە و پارێزگای دهۆکیش یەکێکە لە پاريزگا سەرەکییەکانی هەرێمی کوردستان.

رێکخراوەکانی پشتیوانی کاری میدایی دەڵێن، لەسەر ئاستی هەرێمی کوردستان، پاشەکشەی گەورە هەیە لەڕووی دەستگەیشتن بەزانیاری و ئازادی رادەربڕین و کاری رۆژنامەوانی. مەترسیدارترینان دەستگیرکردن و دادگایکردنی رۆژنامەوان و چالاکانی مەدەنییە، بەگوێرەی یاسای تیرۆری تایبەت بە ئەنجوومەنی ئاسایشی هەرێم کە راستەوخۆ لەلایەن پارتی دیموکراتی کوردستانەوە سەرۆکایەتی دەکرێت.

ساڵی رابردوو زیاتر لە 70 رۆژنامەوان و چالاکی مەدەنی، لەچوارچێوەی ئەو یاساییەدا دەستگیرکران و دادگایشدەکرێن، پێنج لەوانە 6 ساڵ زیندانیان بەسەردا سەپێنرا، کە لەناویاندا هەردوو رۆژنامەوان، ئەیاز ئەکرەم و شێروان شێروانی هەن.
بەگوێرەی ئامارەکان، دۆسێیەکانی کوشتن و فڕاندن و هەڵکوتانەسەر، روویان لەبەرزبوونەوەکردوە، بێ ئەوەی بەشێکی زۆریان بکەرەکانیان ئاشکرابکرێن، کە زۆربەی جار لەلایەن گرووپە چەکدراییە حزبییەکان و بەرپرسە حزبییەکانەوە ئەنجامدەدرێن.

هەواڵ

دامەزراوەی ڤیژن و ناوەندی نەهرین یاداشتنامەیەکیان واژۆکرد

دامەزراوەی ڤیژن لە بڵاوکراوەیەکدا رایگەیاندووە، دامەزراوەی ڤیژن و ناوەندی نەهرین یاداشتنامەیەکیان بۆ کاریی هاوبەش و پێکەوەیی واژۆکرد.

لە بڵاوکراوەکەدا ئەوەش هاتووە، رۆژی دووشەممە 15ـی ئەیلوولی 2025 یاداشتنامەیەکی لێکتێگەشتن لە نێوان دامەزراوەی ڤیژن بۆ لێکۆڵینەوەی ستراتیجی و ناوەندی نەهرەین بۆ لێکۆڵینەوەی ستراتیجی لە شاری بەغدا واژۆکرا.

ئەوەشی خستووەتەڕوو، بە گوێرەی یاداشتنامەکە، هەردوو دامەزراوەکە وەک دوو خانەی بیری گرنگ و کاریگەر، هەماهەنگی و هاوبەشی دەکەن دەربارەی ئەنجامدانی توێژینەوە و پڕۆژە و چالاکی هاوبەش لە سەرتاسەری عێراقدا.

باسی لەوەشکردووە، ئامانجی یاداشتنامەکە دەستنیشانکردنی کێشە و گرفتەکان لە هەرێمی کوردستان و عێراق و خستنەڕووی چارەسەرەکان.