هەواڵ

مانگرتنی سەرتاسەری بۆ مووچە دەستیپێکرد

دەیان بەڕێوەبەرایەتی، دەستە و بەش لە فەرمانگە و دامەزراوە حکومییەکان، لەسنوری پارێزگای سلێمانی و ئیدارەی گەرمیان و راپەڕین، دەستیان بەمانگرتن کرد.

مانگرتنەکە، مامۆستایان و فەرمانبەرانی زانکۆکانیشی گرتەوە، ئەوەش بەهۆی دواکەوتنی مووچەکانی مانگی 3 ئەمساڵیان کە هێشتا وەریان نەگرتوە.

ئەمڕۆ 8-مانگی ئایارەو بەشێکی زۆر لە مووچەخۆرانی سنوری ژێر ئیدارەی یەکێتی، تائیستا مووچەی مانگی 3 یان وەرنەگرتوە، بەهۆی ئەوەی پارە لەبانکەکاندا نییە.

چەند مانگێکە بەهۆی ناکۆکی سیاسی نێوان پارتی دیموکراتی کوردستان و یەکێتی نیشتیمانی کوردستان، مووچەی مووچەخۆران لەژیر دەسەڵاتی یەکێتی دوادەکەوێت و یەکێتی پارتی تۆمەتباردەکات بەوەی پارە بۆ مووچەخۆرانی ناوچەکە رەوانە ناکات.

هەرچی پارتیشە، یەکێتی تۆمەتبار دەکات بە نەگەڕانەوەی داهاتی خاڵە سنورییەکان بۆ خەزێنەی حکومەت.

هەواڵ

لە قەڵادزێ بەڕێکەوت و لە فەرەنسا خنکا

لە قەڵادزێ بەڕێکەوت و لە فەرەنسا خنکا
سلێمانی - MIC
ژیلان محەمەد ئەمین، کچە کوردێکی تەمەن 24 ساڵە و یەکێکە لە قوربانییەکانی رووداوەکەی دوێنێ سێشەممەی نێوان فەرەنسا و بەریتانیا.
ژیلان لەگەڵ چەند کەسێکی دیکەدا و یەکێک بووە لەو 100 سەرنشینەی کە لەناو بەلەمێکی پەڕینەوەدابوون لە فەرەنساوە بۆ بەریانیا.
بەڵام پێش گەیشتنیان چەند کەسێک دەکەونە ناو ئاوەکەوەو دەخنکێن کە یەکێکیان ژینایە.
زانیاری ئەوە هەیە، رووداوەکە بەهۆی زۆری ژمارەی سەرنشینانی سەر بەلەمەکەوە بوبێت، بەتایبەت کاتێک کە بەلەمەکە کەوتوەتە ڕێ، ژمارەیەک کۆچبەری ئەفریقیش لەڕێگەی بەکارهێنانی فشارەوە چونەتە ناو بەلەمەکەوە و هەندێکیش دەڵێن شەڕ و ئاڵۆزی روویداوە.
هێشتا بەتەواوی هۆکاری خنکانی ژیلان و ئەوانی دیکە نییە، روونیش نییە کە ئاخۆ جگە لە ژیلان لەناو خنکاوەکاندا کوردی دیکە هەیە یان نا، بەڵام ئەوەی دەزانرێت کە بەشێکی زۆری کۆچبەرەکانی سەر بەلەمەکە عێراقی بوون و لەناو عێراقیەکانیشدا ژمارەیەک کورد هەبوون.
تائێستا نازانرێت کە ئاخۆ ژیلان محەمەد بەتەنها کۆچیکردوە یان خزم و کەسوکاری لەگەڵدا بووە.
ساڵانە لەکاتی پەڕێنەوەی کۆچبەران لەنێوان فەرەنسا بۆ بەریتانیا دەیان کۆچبەر دەخنکێن، ئەوەش لەپێناو گەیشتنیان بۆ ئەو وڵاتە و مافی بەدەستهێنانی مانەوەیان.
هەرچەندە لەچەند رۆژی رابردوودا پەرلەمانی بەریتانیا یاسای ناردنی کۆچبەرانی نایاسایی وڵاتەکەی بۆ رواندا پەسەند کرد ئەوەش وەک هەولیک بۆ رێگریکردن لە چوونی کۆچبەران بۆ ئەو وڵاتە، بەڵام لەگەڵ ئەوەشدا هێشتا کۆچبەران بە یەکێک لە وڵاتە دڵخوازەکەی خۆیان دەزانن بۆ مانەوەیان و وەرگرتنی مافی پەنابەری.