هەواڵ

لە سلێمانی تەقینەوەیەک روویدا و 14 کەس برینداربوون

درەنگانی شەوی ڕابردوو لە باڵەخانەی کافتریایەکی شەقامی سەهۆڵەکە لە سلێمانی تەقینەوەیەک ڕوویدا بەو هۆیەوە ژمارەیەک هاوڵاتی کەوتنە ژێر دار و پەردووی باڵەخانەکە و بریندار بوون.

چەند سەرچاوەیەک لە تەندروستیی سلێمانییەوە رایانگەیاند لە تەقینەوەکەدا 14 کەس برینداربوون و بەشێک لە بریندارەکان لە نەخۆشخانە چارەسەریان وەرگرتووە و ڕەوانەی ماڵەوە کراون.

لەکاتی تەقینەوەکە دەیان کەس لەنێو کافتریاکە بوون و لەدوای نزیکەی شەش کاتژمێر لە کنە و پشکنین، هەموو ئەو هاوڵاتییانەی کە کەوتبوونە ژێر دار و پەردووی باڵەخانەکە رزگار کران.

جگە لە خاپوربوونی کافتریاکە خۆی، چەند خانویەکی نزیکی شوێنی رووداوەکە زیانیان بەرکەوتوە و داڕووخاون.

بەرگری شارستانی سلێمانیش رایگەیاند تەقینەوەکە لە سیستەمی خەزانی غازی باڵەخانەی کافتریاکەدا روویداوە و دوای زیاتر لە شەش کاتژمێر گەڕان توانیویانە سەرجەم هاوڵاتییەکان لەژێر دارو پەردوو رزگار بکەن.

لە ئێستادا تیمەکانی بەرگری شارستانی و پاککەرەوەکان کاری لابردنی پاشماوەی تەقینەوەکە و پاککردنەوەی شەقامەکە ئەنجام دەدەن.

هەواڵ

مووچە زامنکرا.. بەستەڵەکی نێوان هەرێم و بەغدا توایەوە

دوای چەندین کۆبونەوە، لە کۆتایی کۆبونەوەی ئەمڕۆی ئەنجومەنی وەزیرانی عێراقدا، رێککەوتنی هەرێم و بەغدا لەسەر هەناردەکردنەوەی نەوتی هەرێم پەسەندکرا، بەمەش بەستەڵەکی کێشەکانی نێوان هەرێم و بەغدا توایەوە و هیچ بیانویەک بەدەست عێراقەوە نەما بۆ ناردنی مووچە.

لە کۆتایی کۆبوونەوەی ئەمڕۆیدا، ئەنجومەنی وەزیرانی عێراق دەنگی لەسەر دوو بڕیاردا سەبارەت بە میکانیزمی مامەڵەکردن لەگەڵ کۆمپانیا نەوتییە بیانییەکان و پرسی نەوتی هەرێمی کوردستان.


یەکەم: ئەنجومەنی وەزیران بڕیاریدا کە کرێی دەرهێنانی نەوت بۆ کۆمپانیا بیانییەکان، کە بۆ هەر بەرمیلێک بە 16 دۆلار دیاریکراوە، چیتر بە پارەی کاش نەدرێت.
بەپێی بڕیارەکە، لە بری پێدانی پارە، بڕی ئەو نەوتەیان پێدەدرێت کە هاوتای شایستە داراییەکانیانە و کۆمپانیاکان خۆیان بەرپرس دەبن لە فرۆشتنی ئەو نەوتە لە بازاڕەکاندا.

دووەم: ئەنجومەنی وەزیرانی عێراق رەزامەندیی سەرەتایی نیشاندا لەسەر ئەنجامدانی گرێبەستێکی سێقۆڵی لەنێوان (حکومەتی هەرێمی کوردستان - حکومەتی فیدراڵی عێراق - کۆمپانیا نەوتییە بیانییەکان).

مەرجی جێبەجێکردنی ئەم بڕیارە ئەوەیە کە حکومەتی عێراق گرێبەستەکە بەرز بکاتەوە بۆ لیژنەی راوێژکاریی وەزارەتی نەوتی عیراق.

چاوەڕوان دەکرێت لیژنەکە لە ماوەی 48 کاتژمێری داهاتوودا وەڵامی کۆتایی خۆی بداتەوە، تاوەکو گرێبەستە سێ لایەنییەکە بە فەرمی ئەنجام بدرێت و بچێتە بواری جێبەجێکردنەوە.

ئەم دوو بڕیارە بە هەنگاوی گرنگ دادەنرێن بۆ کردنەوەی گرێکوێرەی هەناردەکردنەوەی نەوتی هەرێمی کوردستان و چارەسەرکردنی کێشە هەڵپەسێردراوەکانی نێوان هەولێر و بەغدا.

بە جێبەجێکردنی بڕیارەکان، حکومەتی عێراق هیچ بیانویەکی بەدەستەوە نامێنێت بۆ نەناردنی مووچەی هەرێم و دەبێت قۆناغ بەقۆناغ موچەی مانگەکانی مووچە خۆرانی هەرێم بنێرێت، کە تا کۆتایی ئەمساڵ دەکاتە شەش مووچە.