هەواڵ

هەولێر.. لەسەر کێشەی زەوی و زار 5 کەس کوژران

لە قەزای خەبات لە هەولێر شەڕ لەنێو چەند ئەندامێکی یەک بنەماڵە روویدا و بەهۆیەوە پێنج کەس کوژران و دوو کەسی دیکەش بریندار بوون.

پۆلیسی هەولێر رایگایەند شەڕە تەقە لەنێو ئەندامانی یەک بنەماڵە روویداوە و بەو هۆیەوە کەسێک برایەکی خۆی و سێ برازای کوشتووە، هەروەها لایەنی بەرامبەریش وەڵامیان داوەتەوە کوڕێکی ئەمیان کوشتووە.

بە وتەی پۆلیسی هەولێر شەڕەکە لەسەر کێشەی زەوی و زار بووە و لە گوندی کەوڕەبەن لە شارۆچکەی رزگاری لە قەزای خەبات لە پارێزگای هەولێر روویداوە.

موقەدەم هۆگر عەزیز، گوتەبێژی پۆلیسی هەولێر لە روونکردنەوەیەکدا لەبارەی رووداوەکە رایگەیاند، رووداوەکە کاژێر 7:30 خولەکی ئێوارەی رۆژی هەینی روویداوە و دواتر بەڕێوەبەرایەتی پۆلیسی پارێزگای هەولێر لە رووداوەکە ئاگادارکراونەتەوە.

موقەدەم هۆگر عەزیز راشیگەیاند ئەو دوو کەسەی لە رووداوەکەدا برینداربوون بڕیاری دەستگیرکردنیان بۆ دەرچووە و دەستگیرکراون.

موقەدەم هۆگر عەزیز گوتیشی "شەڕەکە لە نێوان دوو برا بەناوەکانی (ا. ر. پ.) و (ح. ر. پ.) بووە، دواتر دەرکەوتووە کێشەکە لەسەر زەویوزار بووە لە نێوان مام و سێ برازا بەناوەکانی (ا. ر. پ.) و (ن. ح.) و (ف. ح.) و (ف. ح.)، دواتر دەبێتە دەمەقاڵێ و لەم نێوەندەدا لە لایەنی یەکەم (ا. ر. پ.)، (ا. ا. ر.) ، (ز. ا. ر.) و (س. ا. ر.) و لەلایەنی دووەم (ف. ح.) کوژراون، دوو تۆمەتباریش بەناوەکانی (ف. ح.) و (ن. ح.) کە برینداربوون لەلایەن پۆلیسەوە دەستگیرکراون."

هەواڵ

راپرسییەک بۆ پێوانەکردنی ئاستی دابڕانی کلتوریی لە هەرێمی کوردستان

دامەزراوەی ڤیژن فاوندەیشن، بۆ لێکۆڵینەوەی ستراتیژی، کار لەسەر پرۆژەیەک دەکات بۆ پێوانەکردنی ئاستی دابڕانی کلتوریی لە ناوچە جیاجیاکانی لە هەرێمی کوردستان، بۆ ئەومەبەستە فۆرمێکی ئەلیکترۆنی بڵاودەکاتەوە.

لە پێناسەی پرۆژەکەدا دامەزراوەی ڤیژن ئاماژە بەوەدەکەن، "کۆمەڵگای کوردستانی لە هەرێمی کوردستان سەرەڕای بوونی ژێرخانێکی دەوڵەمەندی کلتووری و تۆڕێک پەیوەندی هەمەجۆر لەناو کۆمەڵگاکەماندا، بەڵام هێشتا بەربەست و گرفتی گەورەی ناوخۆیی و بگرە جۆرێک لەدابڕانی کلتوریش هەیە، کە دەکرێ وەکو مەترسی سەیر بکرێ، بۆ هاوبەشی و یەکگرتویی کۆمەڵگا".

ئاماژە بەوەکراوە کە ئەو ناوچانەی هەرێمی کوردستان کە بە "شێوەزاری بادینی" دەدوێن و دەنوسن و دەخوێننەوە، لەگەڵ ئەو ناوچانەی کە بە "سۆرانی" دەدوێن و دەنوسن و دەخوێننەوە دابڕانە کلتورییەکە زیاتر بەدیدەکرێت.

ئامانجی پرۆژەکە دەرخستنی راستی و روونی و قەبارەی ئەو دابڕانە کلتووریەی لە نێوان ناوچە جیاوازەکانی هەرێمی کوردستاندا هەن، بۆ دەستنیشانکردنی بەربەست و رێگرییەکانی بەردەم ئاڵوگۆڕی کلتوورییە.

بەپێی پرۆژەکەی دامەزراوەی ڤیژن، لەکۆتاییدا پەڕاوێکی پێشنیاز بۆ حکومەتی هەرێمی کوردستان و پەرلەمان ئامادەدەکرێت و لەپێناوی "گەشەپێدانی کلتووری و چارەسەرکردنی گرفت و لابردنی بەربەستەکان". 

لێرە دەتوانیت فۆرمەکە پڕبکەیتەوە:

https://docs.google.com/forms/d/e/1FAIpQLSdJmmTCgpRhFI-5XhJlNMNmci6tLRQdgDAm7DtiRf_pbr5sHw/viewform?pli=1