هەواڵ

تۆمەتبارێك لەسلێمانی دەستگیركرا هەڕەشەی بڵاوكردنەوەی وێنەی لەژنان كردووە

پۆلیسی سلێمانی دەستگیركردنی تۆمەتبارێكی راگەیاند كە حەوت فەرمانی دەستگیركردنی هەبووە،  وتەبێژی پۆلیسی سلێمانیش دەڵێت زۆرینەی فەرمانەكان لە بەڕێوەبەرایەتیی بەرەنگاربوونەوەی تووندوتیژی دژی ژنان و خێزان بوون، پێشتریش چەند ڕوداوێكی هاوشێوە لەشارەكانی هەرێمی كوردستان تۆماركراون هەر بەوهۆیەشەوە كچێك لەهەولێر خۆی كوشت.

حەوت فەرمانی دەستگیركردنی هەبووە
سەركەوت ئەحمەد، وتەبێژی پۆلیسی  سلێمانی بە مایكی راگەیاند: مەفرەزەكانی‌ بنكەی پۆلیسی‌ رزگاری تۆمەتبارێكیان دەستگیركردووە كە حەوت فەرمانی دەستگیركردنی هەبووە، وتیشی پێنج لەو فەرمانانە لە بەڕێوەبەرایەتیی بەرەنگاربوونەوەی تووندوتیژی دژی ژنان و خێزان بووە. 

 وەك وتەبێژی پۆلیسی سلێمانی دەڵێت: تۆمەتبارەكە لە پێشتردا دەستگیرنەكرابوو چونكە شوێنی نادیار بوو، تاوەكو لەلایەن مەفرەزەكانی بەڕێوەبەرایەتیی پۆلیسی پارێزگای سلێمانییەوە زانیاریمان لەسەر كۆكردەوە، دواجار شوێنی تۆمەتبار لەلایەن مەفرەزەكانی بنكەی پۆلیسی رزگارییەوە ئاشكرا كراو و دەستگیركرا.

لەگەڵ هاوسەرەكەیدا كێشەیان هەبووە
 لەبارەی تۆمەتەكانی لە بەرەنگاربوونەوەی تووندوتیژی دژی ئافرەتان و خێزان، سەركەوت ئەحمەد باسی لەوەكرد: ئەو كەسە كە ناوی (ئـ، ع، ع)ـە، لەگەڵ هاوسەرەكەیدا كێشەیان هەبووە، هەروەها لە رێگەی ئامێرەكانی پەیوەندییەوە هەڕەشەی بڵاوكردنەوەی وێنە و ڤیدیۆی نەشیاوی ژنانی كردووە بەرامبەر وەرگرتنی بڕێك پارە. 
 سەركەوت ئەحمەد دەشڵێت: بە بڕیاری دادوەر تۆمەتبار راگیراوە و لێكۆڵینەوە لە دۆسییەكان دەستیپێكردووە.

پێشتریش لەهەولێر كچێك بەهۆی ئەوەی هەڕەشەی بڵاوكردنەوەی وێنەی لێكرابوو، خۆی كوشت
پێشتریش لەهەولێر كچێك بەناوی ئاریان بەهۆی ئەوەی هەڕەشەی بڵاوكردنەوەی وێنەی لێكرابوو، خۆی كوشت.
چیرۆكی خۆكوشتنی ئاریان بەشێوەیەكە رۆژی 19ی نیسانی 2022، محەمەد خەلیل، باوكی ئاریان پۆلیسی لە دیارنەبوونی كچەكەی ئاگادار كردووەتەوە دواتر رۆژی 21ی نیسان، تەرمی ئاریان لە هەیكەلێكی تەواو نەكراودا دۆزرایەوە و راگەیەندرا، حاڵەتەكەی خۆكوشتن بووە.

ئاریان محەمەد خەلیل خوێندكاری بەشی كتێبخانە و زانیاری بوو لە زانكۆی پۆلیتەكنیكی هەولێر و تەمەنی 20 ساڵ بوو.
ئەوكات پۆلیسی هەولێر رایگەیاند: ئەو كەسەی كە هەڕەشەی بڵاوكردنەوەی چەند وێنەیەكی ئاسایی ئاریان محەمەد خەلیل كرد و بووە هۆكاری ئەوەی ئاریان لەسەر بینایەك خۆی بخاتەخوارەوە و گیان لەدەستبدات وێنەی چەندین كچی تر لەنێو مۆبایلەكەیدا هەبووە و هەڕەشەی لێكردوون.

لەهەرێمی كوردستان بەهۆی خراپ بەكارهێنانی مۆبایل و ئامێرەكانی پەیوەندی، هاوكات بەهۆی سكاڵا تۆمارنەكردن لەلایەن ژنان و كچانەوە چەندین رووداوی هاوشێوە ڕوویانداوە و ژنان و كچان تێیدا بونەتە قوربانی.

هەواڵ

موقتەدا سەدر هەڵبژاردن رەتدەکاتەوە و چاوەڕێی دوو ئەگەرە

سەرەڕای کشانەوەی لە پرۆسەی سیاسی و بەشدارینەکردنی لە هەڵبژاردنی داهاتووی پەرلەمانی عێراق، بەڵام موقتەدا سەدر هێشتا مۆتەکەی دەسەڵاتدارانی عێراقە، ئەمەش وایکردووە لەلایەک چاویان لەسەر هەڵبژاردن بێت و لەلایەکیش چاویان لەسەر سەدر بێت، خودی موقتەدا سەدریش چاوەڕێی روودانی دوو ئەگەرە لە عێراق.

موقتەدا سەدر سەرکردەی ڕەوتی سەدر، هێشتا یەکێکە لە گەورەترین مەتەڵە سیاسییەکان، کە ڕووبەڕووی نەیارەکانی دەبێتەوە لە چوارچێوەی هەماهەنگیدا، یان تەنانەت لایەنگران و هاوپەیمانە نزیکەکانی.

لەدوای بڕیارە بەناوبانگەکەی سەدر بۆ کشانەوەی کوتلە پەرلەمانییەکەی کە خاوەنی 72 کورسی پەرلەمانی بوو، لە هاوینی 2022 و راگەیاندنی ڕەتکردنەوەی کارکردن لەگەڵ "گەندەڵکاران" کە مەبەستی چوارچێوەی هەماهەنگی بوو، پێشبینیەکان سەبارەت بە هەنگاوی داهاتووی سەدر بەردەوام مشتومڕی لە نێوان سیاسەتمەداران و شیکەرەوەکان و تەنانەت هاوڵاتیانی ئاسایی دروستکردووە.

موقتەدا سەدر لە هەموو پەیامەکانیدا سەبارەت بە کشانەوەی لە پرۆسەی سیاسی و هەڵبژارد، تەنها ئاماژەی بە چینێکی گەندەڵی دەسەڵاتدار کردووە، بەبێ ئەوەی هیچ نیازێکی تری خۆی بخاتەڕوو، بەڵام سەرکردەویەکەی چوارچێوەی هەماهەنگی خواستی سەدر ئاشکرا دەکات.

سەرکردەیەک لە چوارچێوەی هەماهەنگی کە نەیویست ناوی ئاشکرا بکرێت، بە ڕۆژنامەی «الشرق الأوسط»ـى راگەیاندووە، سەدر سیستەمێکی دەوێت کە لەگەڵ تێڕوانینی خۆیدا بگونجێت، کە لەوانەیە لەگەڵ تێڕوانینی ئەوانی تردا نەگونجێت.

ئەو سەرکردەیەی چوارچێوەی هەماهەنگی پێیوایە، کشانەوەی ئێستای موقتەدا سەدر لە پرۆسەی سیاسی و بایکۆتی هەڵبژاردن، لەم دیدگایەوە سەرچاوە دەگرێت نەک ڕق لە کاری سیاسی.

ئاماژە بە پێگە و بەهێزی سەدر دەکات لە دەرەوەی پرۆسەی سیاسی و دەڵێت: لەوانەیە یارییەکە بە تەواوی بگۆڕێت تەنانەت ئەگەر لە پێشبڕکێی هەڵبژاردنیش دوور بێت، هەر بۆیە، چوارچێوەی هەماهەنگی چاوێکیان لەسەر هەڵبژاردنەکان و چاوەکەی دیکەش لەسەر سەدرە.

لەگەڵ ئەوەی لایەنەسیاسییەکان و چاودێرانی سیاسی پێیانوابوو، سەدر لە چوار ساڵی رابروودا، شەقامی لە بەرژەوەندی خۆی ساز و ئامادەکردووە بۆ چوونە سەر سندوقەکانی دەنگدان، بەڵام لە بڕیارێکی چاوەڕواننەکراودا، سەدر بایکۆتکردنی هەڵبژاردنی راگەیاند، هەرچەندە سەرۆک کۆماری عێراق بە فەرمی داوای لێکرد بە بڕیارەکەیدا بچێتەوە، بەڵام ئەو سوربوو لەسەر بڕیارەکەی.

لە ناوەڕاستی مانگی تەمووزی ساڵی ڕابردوودا، موقتەدا سەدر بڕیارێکی دەرکرد بۆ دوورخستنەوەی 31 کەس لە بزووتنەوەکە و باڵی سەربازی سەرایا سەلام، بەهۆی ئاماەکارییان بۆ بەشداریکردنیان لە هەڵبژاردنەکانی داهاتوودا.

سەرکردەیەکی رەوتی سەر بە رۆژنامەی «الشرق الأوسط»ـى وتووە، ڕەوتی سەدر پشتگیری لە هیچ لیست و کاندیدێک ناکات لە هەڵبژاردنەکانی داهاتوودا، ئەو سەرکردەیە ڕەتی دەکاتەوە پێشبینی هەنگاوەکانی داهاتووی سەدر بکات و دەڵێت: هەموو شتێک دەگونجێت، بەڵام کەس نازانێت چۆن و کەی ڕوودەدات.

ئەو سەرکردەیە ئاماژەی بەوەکردووە، کە سەدر درکپێدەکات و گرەو لەسەر ئەگەری داڕمانی چوارچێوەی هەماهەنگی دەکات بە تێپەڕبوونی کات، چونکە بڕوا وایە سیستەمی سیاسی ئێستا بە ئاسانی چاکسازی ناکرێت.

دەشڵێت: سەدر هەموو جۆرە کارێکی سیاسی تاقیکردۆتەوە. بەشداری کردن لە پەرلەمان و کشانەوەی لێی و بەشداریکردن لە حکومەت و کشانەوەی لێی و هەروەها دژایەتیکردنی چالاکی لە شەقامدا و پێدەچێت گەیشتووەتە ئەو ئەنجامەی کە ئەم سیستەمە توانای چاکسازی نییە.

یەکێکی تر لەو ئەگەرانەی کە سەدر چاوەڕێی دەکات، شوێنگرتنەوەی عەلی سیستانی مەرجەعی باڵای شیعەکانە لە عێراق، خودی سەدریش خواستی خۆی بۆ جێگرتنەوەی نەشاردووەتەوە و بەپێی بنەماکانی مەزهەبی شیعە، موقتەدا سەدر هەموو مەرجەکانی تێدایە.