هەواڵ

سەرەڕای گرتنە بەری چەند رێوشوێنێك لەسلێمانی خانەنشینێكی دیكە گیانی لەدەستدا

بەیانی ئەمڕۆ لەبانكی بەختیاری لەشاری سلێمانی خانەنشینێكی دیكە گیانی لەدەستدا، لەكاتی وەرگرتنی موچەكەیدا كە موچەی مانگی سێ یە و فەرمانبەران موچەی مانگی چواریان وەرگرتوە،ئەوەش لەكاتێكدایە لەسلێمانی چەند رێوشوێنێك گیرایەبەر تا رێگری بكرێت لەگیان لەدەستدانی خانەنشینان.

سامان نادر، بەڕێوەبەری سەنتەری فریاكەوتنی خێرای سلێمانی رایگەیاند: سە‌ر لە‌بە‌یانی ئە‌مرۆ خانە‌نشینێك بە‌ناوی "عەلی مەجید " لە بانكی بەختیاری لە كاتی وەرگرتنی مووچەی خانەنشینییەكەی بە كتوپڕ گیانی لەدەستدا.

وتیشی: خانەنشینەكە لە‌ دایك بووی 1947ەو لە ئێستادا تە‌رمە‌كە‌ی گوازراوە‌تە‌وە‌ بۆ پزیشكی دادی سلێمانی.

لە ماوەی رابردوودا لەكاتی دابەشكردنی موچەی خانەنشینان، بەهۆكاری دواكەوتن و نەبوونی پارە لە بانكەكاندا و سەرەگرتنی خانەنشینان و لەكاتی دەرەنگانی شەوەوە لەبەردەم بانكەكان و دروستبوونی قەرەباڵغی پێنج خانەنشین لەهەرێمی كوردستان گیانیانلەدەستداوە.

لەهەرێمی كوردستان بەهۆی نەبوونی سیستەمی بانكی لەكاتی دابەشكردنی مووچەی خانەنشینی و ئەو وەزارەتانەی فەرمانبەری زۆریان هەیە قەرەباڵغی دروست دەبێت و زۆرجار بەهۆیەوە ڕووداوی نەخوازراو ڕوودەدات، لەكاتێكدا حكومەتی عێراق مووچەی فەرمانبەرانی لەڕێگەی سیستەمی بانكیەوە دابەش دەكات و تائێستا لەسەرەی وەرگرتنی موچەدا هیچ فەرمانبەرێك گیانی لەدەست نەداوە.

هەواڵ

راپرسییەک بۆ پێوانەکردنی ئاستی دابڕانی کلتوریی لە هەرێمی کوردستان

دامەزراوەی ڤیژن فاوندەیشن، بۆ لێکۆڵینەوەی ستراتیژی، کار لەسەر پرۆژەیەک دەکات بۆ پێوانەکردنی ئاستی دابڕانی کلتوریی لە ناوچە جیاجیاکانی لە هەرێمی کوردستان، بۆ ئەومەبەستە فۆرمێکی ئەلیکترۆنی بڵاودەکاتەوە.

لە پێناسەی پرۆژەکەدا دامەزراوەی ڤیژن ئاماژە بەوەدەکەن، "کۆمەڵگای کوردستانی لە هەرێمی کوردستان سەرەڕای بوونی ژێرخانێکی دەوڵەمەندی کلتووری و تۆڕێک پەیوەندی هەمەجۆر لەناو کۆمەڵگاکەماندا، بەڵام هێشتا بەربەست و گرفتی گەورەی ناوخۆیی و بگرە جۆرێک لەدابڕانی کلتوریش هەیە، کە دەکرێ وەکو مەترسی سەیر بکرێ، بۆ هاوبەشی و یەکگرتویی کۆمەڵگا".

ئاماژە بەوەکراوە کە ئەو ناوچانەی هەرێمی کوردستان کە بە "شێوەزاری بادینی" دەدوێن و دەنوسن و دەخوێننەوە، لەگەڵ ئەو ناوچانەی کە بە "سۆرانی" دەدوێن و دەنوسن و دەخوێننەوە دابڕانە کلتورییەکە زیاتر بەدیدەکرێت.

ئامانجی پرۆژەکە دەرخستنی راستی و روونی و قەبارەی ئەو دابڕانە کلتووریەی لە نێوان ناوچە جیاوازەکانی هەرێمی کوردستاندا هەن، بۆ دەستنیشانکردنی بەربەست و رێگرییەکانی بەردەم ئاڵوگۆڕی کلتوورییە.

بەپێی پرۆژەکەی دامەزراوەی ڤیژن، لەکۆتاییدا پەڕاوێکی پێشنیاز بۆ حکومەتی هەرێمی کوردستان و پەرلەمان ئامادەدەکرێت و لەپێناوی "گەشەپێدانی کلتووری و چارەسەرکردنی گرفت و لابردنی بەربەستەکان". 

لێرە دەتوانیت فۆرمەکە پڕبکەیتەوە:

https://docs.google.com/forms/d/e/1FAIpQLSdJmmTCgpRhFI-5XhJlNMNmci6tLRQdgDAm7DtiRf_pbr5sHw/viewform?pli=1