هەڵبژاردنی پەرلەمانی كوردستان بۆ ساڵی داهاتوو دوادەخرێت

بەگوێرەی ئەو زانیاریانەی مایك لەسەرچاوەیەكەوە دەستیكەوتووە، هەڵبژاردنی خولی شەشەمی پەرلەمان لەهەرێم دوادەخرێت‌و لەمانگی 10ی ئەمساڵدا ئەنجامنادرێت، بەپێی زانیاریەكانیش حزبەكان بەمەبدەئی رێككەوتوون كە هەڵبژاردن ساڵێك دوابخرێت.
بەوتەی سەرچاوەیەك لەناو كۆبوونەوەی دوێنێی بەرپرسی هەڵبژاردنی حزبەكان :" هەڵبژاردن بۆ ساڵێكی دیكە دواخراوەو لەمساڵدا هیچ هەڵبژاردنێك لەهەرێم ئەنجامنادرێت، بەوتەی سەرچاوەكە بەشێك لەلایەنەكان بەتایبەتیش یەكێتی و گۆڕان، پێیان وایە ئەگەر بەمشێوەیەی ئێستاو بەخواستی پارتی بچنە هەڵبژاردنەوە، ئەوا پارتی 11 خاوەنی كورسی پەرلەمانە بەبێئەوەی هیچ حزبێك دەستی بەجوڵەو بانگەشەی خۆی كردبێت.
ئەو لایەنانە بەتایبەتیش یەكێتی، پێیان وایە بەمشێوەیەی ئێستا هەڵبژاردن لەبەرژەوەندی پارتییە و وتیشی  " وەك یەكێتی نیشتیمانی كوردستان لەگەڵ دواخستنی هەڵبژاردنی پەرلەمانی كوردستانین بۆ ساڵێكی دیكەو لەگەڵ ئەوەدا نین بەو شێوازەی پارتی داوایدەكات‌و چارەنوسی كورسی كۆتاكان ئەو دیاری بكات ئەنجامبدرێت."
ئەمساڵ خولی پێنجەمی پەرلەمانی كوردستان كۆتایی دێت‌و پێویستە هەڵبژاردنی پەرلەمانی كوردستان ئەنجامبدرێت، بەهۆی سەرقاڵی لایەنەكان بەپێكهێنانی حكومەتی نوێی عێراق‌و ناكۆكییان لەسەر شێوازو میكانیزمی هەڵبژاردن‌و پێكهاتەی كۆمسیۆن‌و یاسای هەڵبژاردن، لایەنەكان كەمترین قسەوباسیان كردووە، لەكاتێكدا بەپێی مەرسومێك كە سەرۆكی هەرێم واژۆی لەسەركردووە، پێویستە 1-10-2022  هەڵبژاردنی پەرلەمانی كوردستان ئەنجامبدرێت.
پێشتر مایك لەراپۆرتێكدا بڵاویكردەوە، هەڵبژاردنی پەرلەمانی كوردستان لە شەش مانگ بۆ ساڵێك دوادەخرێت و چوار بازنەیی جێگیر دەكرێت، هەر ئەوكاتیش هۆشیار سیوەیلی بەرپرسی پەیوەندیەكانی پارتی پشتڕاستیكردەوە كە پارتی نەرمی نواندووە لەوبارەیەوە.
لەكۆبوونەوەی سێ هەفتە لەمەوبەری لیژنەی هەڵبژاردنی پارتی و یەكێتی، قسە لەبارەی چوار بازنەیی بۆ هەڵبژاردنەكانی پەرلەمان كراوە، هەروەها پرسی كاتی هەڵبژاردنەكانی پەرلەمان خراوەتە بەردەم لایەنەكان، لەكۆبوونەوەی پێشتریش هەردوو مەكتەبی هەڵبژاردنی پارتی و یەكێتی  شەش مانگ بۆ ساڵێكیان دیاری كردووە بۆ دواخستنی هەڵبژاردنەكان.
پێشتر پارتی و یەكێتی و گۆڕان لەسەر ئەوە رێككەوتبوون پێكهاتەكان كوردسییەكانیان وەك خۆیان دەمێنێتەوەو تۆماری دەنگدانیشیان لەناو تۆماری گشتی دەبێت، بەڵام دوو كورسی پێكهاتەكان دەدرێتە سلێمانی و هەڵەبجە، بەڵام یەكێتی داوای كردووە دوو كورسی بۆ سلێمانی و دوو كوررسی بۆ پارێزگای هەڵەبجە دیاری بكرێت، ئەمەش هێشتا رێككەوتنی كۆتایی لەسەر نەكراوە.
لەبارەی ئەنجومەنی كۆمیسیارانیش زۆرینەی لایەنەكان لەگەڵ ئەوەدان نوێنەری ئێستای حزبەكانیان لە كۆمیسیۆن بمێنێتەوەو نوێنەرێكی بزوتنەوەی گۆڕان لاببرێت و نوێنەرێكی نەوەی نوێ بخرێتە شوێنی چونكە نەوەی نوێ نوێنەری نییە لە كۆمسیۆن، ئەگەر رەزامەندی لەسەر ئەوە نەدرێت دادوەران هاوشێوەی كۆمسیۆنی بەغدا دادەنرێت، ئەوەش لەلایەن كۆمەڵ و یەكگرتوو و بزوتنەوەی گۆڕان تێبینی لەسەرە.
رێككەوتنی پارتی و یەكێتی و گۆڕان لەسەر دواخستنی هەڵبژاردن لەكاتێكدایە، پێشتر لە بینای سەرۆكایەتی هەرێم، نێچیرڤان بارزانی سەرۆكی هەرێم لەگەڵ سەرجەم لایەنەكان كۆبوەوە، كە پلاسخارت نوێنەری یوئێن لە عێراق بەشداربوو، لەپێناو لێكتێگەیشت و پەلە كردن لە ئەنجامدانی هەڵبژاردنەكانی پەرلەمان، بەڵام كۆمسیۆنی باڵای هەڵبژاردنەكانی هەرێم چەند جارێك  ئەوەی راگەیاندووە كە شەش مانگی تەواویان پێویستە بۆ ئەنجامدانی هەڵبژاردن، ئەو وادەیەش دوای یەكلاكردنەوەی ئەنجومەنی كۆمیسیاران و پەسەندكردنی هەمواری یاسای هەڵبژاردن دەبێت.

هەواڵ

وردەكاری گیانلەدەستدانی 46 كۆچبەر لەئەمریكا

لە شاری سان ئەنتینۆی ویلایەتی تەکساس لە هەوڵێکی قاچاخیدا لەنێوان سنوری ئەمریکا و مەکسیک نزیکەی 46 کەس بە مردوویی دۆزرانەوە.

لە شاری سان ئەنتینۆی  ویلایەتی تەکساس لەنا ترێلەیەکدا 46 کەس بەمردوویی دۆزرانەوە، کە پێدەچێت هەوڵێکی قاچاخچێتی بێت لە نێوان ئەمریکا ومەکسیک، لەگەڵ ئەوەشدا چارڵز هود بەڕێوبەری ئاگرکوژینەوەی سان ئەنتۆنیۆ ڕایگەیاندووە کە 16 کەسی دیکە هەر لەو ترێلەیەدا ڕۆژی دووشەممە دۆزراونەتەوە کە بەهۆی جەڵدەی گەرما تەندروستیان تێکچووە وگەیەنراونەتە نەخۆشخانە، کە لە نێوانیاندا چوار کەسیان تەمەنیکی کەمیان هەبووە.
بەهۆی ڕووداوەکەوە سێ کەس دەستگیرکراون 
ئە و بارهەڵگرە بارهەڵگرێکی ساردکەرەوە بوو، بەڵام هیچ یەکەیەکی تەندرووستی تیدا نەبووە، لە تەنیشت هێڵی شەمەندەفەر لە ناوچەیەکی دوور لە بەشی باشوری شارەکە دۆزرایەوە.
بەڕێوەبەری ئاگرکوژێنەوەی سان ئەنتۆنیۆپ وتیشی:  لەناو کوژراوەکاندا دوو هاوڵاتی گواتیمالای تێدا بووە کە بە ناسنامەی ساختەی یەکێتی ئەوروپا هاتوونەتە سان ئەنتۆنیۆ.
ڕووداوەکە لە ڕۆژی دووشەمەدا روویداوە کە پلەکانی گەرما لە سان ئەنتۆنیۆ کە نزیکەی 260 کیلۆمەتر لە سنوری مەکسیکەوو ودوورە بۆ نزیکەی  39 پلەی سیلیزی بەربۆتەوە لەگەڵ شێداریەکی زۆر.
ڕۆن نیربێرگ سەرۆکی شارەوانی سان ئەنتۆنیۆ ڕوداوەکەی رۆژی دووشەممەی بە کارەساتیکی ترسناك و مرۆیی ناوبرد، هەروەها وتیشی کە کوژراوەکان خێزانیان هەبووە و پێدەچیت بۆ ژیانیکی باشتر هەوڵیان دابێت.
 ڕەنگە کارەساتەکە یەکێک بێت لە کوشندەترین ڕووداوەکانی قاچاخکردنی مرۆڤ لە سنوری ئەمریکا ومەکسیک لە دەیەکانی ڕابردوودا.
هاوکات لە ساڵی 2017 شدا 10 کەس لەناو بارهەڵگرێکدا گیریان خواردبوو لە سان ئەنتۆنیۆ وەستابوو، گیانیان لەدەست دا، لە ساڵی 2019شدا 19کەسی دیکە لە بارهەڵگرێکی دیکەدا لەبەشی باشووری ڕۆژهەڵاتی شارەکە بە مردوویی دۆزرانەوە.