بەڵگەی ئەشكەنجەدانی ژینا ئەمینی پێش گیان لەدەستدانی بڵاوكرایەوە

ژمارەیەك لەمیدیاكانی ئۆپۆزسیۆنی ئێران، بەڵگەی نوێ لەسەر كوژرانی ژینا (مەهسا) ئەمینی بڵاودەكەنەوە، بەڵگەكان دەیسەلمێنێت لەبەشی ڕاستی كاسەی سەری بەهۆی لێدانەوە شكاوی درووست بووە.
ئەمڕۆ لە میدیاكانی ناوەوە و دەرەوەی ئێران و بەشێك لەتۆڕە كۆمەڵایەتیەكان، بەشێوەیەكی بەرفراوان وێنەی تیشكی تەنووری بڵاوكرایەوە، كە دەوترێت تایبەتە بە سەری ژینا ئەمینیی.
بەپێی ئەو بەڵگەیەی بڵاوكراوەتەوە، لە بەشی ڕاستی كاسەی سەری ژینا شكان هەیە، كە وەك شارەزایانی بواری پزیشكی دەڵێن ئەو شكانە بەهۆی بەركەوتنی ڕاستەوخۆی تەنێك بەر سەری دروست بووە.
ئەو شارەزاییانە هەروەها بە پشت بەستن بەو بەڵگانە ئاماژەیان بە كۆبوونەوەی خوێن و شلەمەنی لە سییەكانی ژینا كردووە، كە بەوتەی پزیشكان كۆبوونەوەی خوێن و شلەمەنی لەناو سییەكان، ئاماژەیە بە چوونە ناو كۆما بەهۆی بەركەوتنی تەنێكی قورس كە بەر سەر دەكەوێت.
ئەمەش لەكاتێكدایە تائێستا هیچ لایەنەكی پەیوەندیداری كۆماری ئیسلامی ئێران ڕاستی ئەو بەڵگانەی پست ڕاست نەكردووەتەوە.

هەروەها، بڵاوبوونەوەی ئەو بەڵگانە لەكاتێكدایە، ئەمڕۆ لە شارەكانی ڕۆژهەڵاتی كوردستان مانگرتنی سەرتاسەری بەشێوەی بەرفراوان بەڕێوەدەچێت، هەروەها لە شارەكانی تاران و چەند شارێكی تری ئێران و شارەكانی ڕۆژهەڵاتی كوردستان خۆپیشاندان دەستی پێكردووە و لەهەندێك لەشارەكانی وەك سەقز و دیواندەرە توندوتیژی بەرامبەر خۆپیشاندەرانی كورد بەكاردەهێنرێت، هەر لەشاری سەقز هێزەكانی ئێران تەقە لە ماڵی هاوڵاتیان دەكەن و گازی فرمێسك ڕێژ هەڵدەدەنە ناو ماڵەكانەوە.
ژینا ئەمینی (مەهسا ئەمینی) تەمەن 22 ساڵ و خەڵكی سەقز،  ئێوارەی ڕۆژی سێشەممە 22ی خەرمانانی 2722 (13ی سێپتەمبەری 2022) لەلایەن هێزەكانی گەشتی ئیرشادی تاران درایە بەر لێدان و چووبووە دۆخی كۆماوە، نیوەڕۆی هەینی رابردوو لە نەخۆشخانەی كەسرای شاری تاران بە هۆی قورسی برینەكانییەوە گیانی لە دەست دا.
گیان لەدەستدانی ژینا نەك تەنها كاردانەوەی ناوخۆیی بەڵكو كاردانەوەی جیهانیشی بەدوای خۆیدا هێنا و ئەمریكا و رێكخراوی لێبوردنی نێودەوڵەتی سەركۆنەی شێوازی مامەڵەكردنیان لەگەڵ ژینا كرد.

هەر ئەمرۆ بارەگای بارزانی بڵاویكردەوە: ئێوارەی ڕۆژی یەکشەممە 18ی ئەیلوولی 2022 مەسعود بارزانی لەڕێی تەلەفۆنەوە پەیوەندیی بە خانەوادەی ژینا ئەمینی کردووەو هاوخەمیی خۆی بۆ گیانلەدەستدانی ژینا ئەمینی پێ ڕاگەیاندن و هیوای سەبر و ئارامی و جێبەجێبوونی دادپەروەری بۆ خواستن.

هەواڵ

ئێران و توركیا بە درۆن و تۆپخانەكانیان بەردەوامن لە بۆردوومانكردنی چەند ناوچەیەكی هەرێم

كاتژمێر 11:00ی پێشنیوەڕۆی ئەمڕۆ فڕۆكەی بێفڕۆكەوانی سوپای توركیا گوندی بادانەیان لە سنووری ناحیەی ناڵپارێز لە قەزای پێنجوێنی هەرێمی كوردستان بۆردوومان كردەوە و ترس و دڵەڕاوكێی زۆری لەناو گوندنشینان بڵاوكردووەتەوە، ئەمەش سێیەم جارە لەدوو رۆژی ڕابردوودا توركیا ئەو سنوورە بۆردوومان دەكات و دوێنێش گوندی شێخەلمارێنیان لە قەزای شارباژێر بۆردوومانكرد و ئۆتۆمبێلێكیان كردە ئامانج كە بەهۆیەوە كەسێك برینداربوو.
لەلایەن خۆشیانەوە فەرماندەیی یەكینەكانی ڕۆژهەڵاتی كوردستان – یەرەكە كە باڵی سەربازی پارتی ژیانی ئازادی كوردستانە ڕایگەیاند: لە ناوچەی پێنجوێن و شارباژێڕ كە لەلایەن دەوڵەتی توركیاوە بۆردومان كراوە، هیچ هێزێكی ئێمە لەو ناوچانەدا نییە.
لە ڕاگەیەندراوەكەی یەرەكەدا هاتووە: لە ڕۆژانی سێ تا شەشی ئەیلول، فڕۆكەی چاودێری بەسەر ئاسمانی چوارتا و ئاسۆس و پێنجوێندا سوڕاوەتەوە، لە كاتژمێر دووی پاش نیوەڕۆ، فڕۆكەیەكی بێفڕۆكەوان هێرشی كردە سەر ئۆتۆمبێلێكی مەدەنی لە گوندی شێخەڵمارێن.
یەرەكە دەشڵێت: لەو ناوچانەی دەوڵەتی توركیا هێرشی تێدا ئەنجامداوە هێزی ئێمەی تێدانییە و هیچ بنەكەیەكمان لەو ناوچانەدا نییە، بەهۆی ئەو هێرشانەوە هاوڵاتیان زیانیان پێگەیشتووه.
یەرەكە لەڕاگەیەندراوەكەدا دەشڵێت: هەندێك دەزگای ڕاگەیاندن بۆ ئەوەی ڕەوایەتی بە هێرشەكانی دەوڵەتی توركیا بدەن، پەكەكە و ئێمە دەكەنە ئامانج، ئێمە داوا لە دەزگاكانی ڕاگەیاندن دەكەین، لەسەر ئەو هێرشانە ڕاستییەكان بگەیەنن.
هاوكات دوێنێ ناوەندی ڕاگەیاندن و چاپەمەنیی هێزەكانی پاراستنی گەل-هەپەگە كە باڵی سەربازی پەكەكەیە ڕوونكردنەوەیەكی لەسەر بۆردوومانكردنی ئۆتۆمبێلێك لە سنووری شارباژێڕی سەر بە پارێزگای سلێمانی بڵاوكردەوە و رایگەیاند:لە هەندێك دەزگای ڕاگەیاندنی باشووری كوردستان بڵاوكرایەوە، كە لە چواری تشرینی یەكەمدا لە ناوچەی شارباژێڕی سلێمانی دەوڵەتی توركیا هێرشێكی ئاسمانی ئەنجامداوە و بانگەشەی ئەوە كرا، كە لە ئۆتۆمبێلێكدا كە هێرشی كراوەتە، سەر دوو كەسی سەر بە پەكەكە تێدابوون.
هەپەگە دەشڵێت: لەو شوێنەی هێرشەكەی تێدا ئەنجامدراوە هێزەكانی ئێمەی لێنییە و دەبێت بزانرێت، كە ئەوە هیچ پەیوەندییەكی بە ئێمەوە نییە.
پێشتریش هێمن ئیبراهیم بەڕێوەبەری ناحیەی ناڵپارێز رایگەیاند: بەهۆی مەترسی بۆردوومانەكەوە كە لەلایەن فڕۆكەوە ئەنجامدراوە، چەندین خێزان گوندەكەیان بەجێهێشتووە و روویان لە سەنتەری شاری سلێمانی كردووە.
خەڵكی ناوچەكە داوا دەكەن لایەنە پەیوەندیدارەكان بێنە سەر خەت بەهۆی مەترسیداری بۆردوومانی ناوچەكە و بەهۆی دژواری دۆخەكەوە خوێندن لە بەشێك لە ناوچەكانی سنوری پەروەردەی شارباژێڕ تا رۆژی یەكشەممە راگیراوە.
ئەمەش لەكاتێكدایە، ماوەی چەندین رۆژە بەشێوەیەكی بەردەوام فڕۆكە و درۆن بە ئاسمانی سنوری شارباژێرو پێنجوێن و چەندین ناوچەی دیكەی هەرێمدا دەسوڕێتەوە و بۆردوومانی چەندین ناوچەیان كردووە، تۆپبارانكردنی برادۆست و باڵەكایەتی لە سنووری ئیدارەی سۆرانیش لەلایەن ئێرانەوە پێینایە 13یەمین ڕۆژەوە.
بەیانی ئەمڕۆش تۆپخانەكانی ئێران لە سنووری برادۆست، كوێستانی ناوڕوبار و گوندی گۆڕێ سایە و گوندی كەتینەی تۆپباران كرد، هاوكات لە سنوری باڵەكایەتی، تۆپخانەكانی ئیران، گوندی بەردەخڕ و هاوینەهەواری بێرمەسارد و كوێستانەكانی سەرچاڵ و بناری هەڵگۆردی تۆپباران دەكەن.