هەواڵ

سوتاندنی لەچك، ناڕەزایی مامۆستایانی ئاینی لێدەكەوێتەوە

Mic
2022-09-20

دوێنێ ژمارەیەك لەرێكخراوەكانی ژنان و ژمارەیەك چالاكوان لەشاری سلێمانی گردبوونەوە وەك ناڕەزایی نیشاندان لە كوشتنی كچێكی كورد كە خەڵكی سەقزی رۆژهەڵاتی كوردستانە لەلایەن پۆلیسی ڕەوشتی ئێران، بەپاساوی نەگونجاوی جلوبەرگەكەی بەتایبەت ئەو لەچكەی لەسەریدا بووە.
لەگردبوونەوەكەدا ژمارەیەك لەژنان وەك ناڕەزایی نیشاندان لەچكیان سوتاند، ئەوەش ناڕەزایی بەشێك لەهاوڵاتیان و بەتایبەتیش مامۆستایانی ئاینی لێكەوتەوە، بەوهۆیەوە ئەمڕۆ رێكخراوی پێكەوە ژیان لەسلێمانی لەبەردەم باخی گشتی هەمان ئەو شوێنەی دوێنێ لەچكی تێدا سوتێندرا ناڕەزاییان دەربڕی.
لەوبارەیەوە مامۆستا نیاز هەورامی رایگەیاند:ئێوە بەناو داكۆكی لە مافی ژنان دەكەن، ئەگینا دین مافی تەواوی بە ژن داوە، بەدرێژایی مێژوو بیستوتانە مامۆستایەكی ئاینی ژنەكەی بكوژێت و كچەكەی بخنكێنێت، ئەو كەسانەی ئەو كارانە دەكەن لە دین و ئەخلاق نەگەیشتوون، بۆیە هەڵمەتەكانتان بەبێ مامۆستای ئاینی خەلەلی تیایە.
وتیشی: بەڵام ناكرێت لەژێر هەر بیانویەك بێت لەچك و سەرپۆش بسوتێنن.
ژینا ئەمینی (مەهسا ئەمینی) تەمەن 22 ساڵ و خەڵكی سەقز،  ئێوارەی ڕۆژی 13ی سێپتەمبەری 2022 لەلایەن هێزەكانی گەشتی ئیرشادی تاران درایە بەر لێدان و چووبووە دۆخی كۆماوە، نیوەڕۆی هەینی رابردوو لە نەخۆشخانەی كەسرای شاری تاران بە هۆی قورسی برینەكانییەوە گیانی لە دەست دا.
گیان لەدەستدانی ژینا نەك تەنها كاردانەوەی ناوخۆیی بەڵكو كاردانەوەی جیهانیشی بەدوای خۆیدا هێنا و ئەمریكا و رێكخراوی لێبوردنی نێودەوڵەتی سەركۆنەی شێوازی مامەڵەكردنیان لەگەڵ ژینا كرد.
تائێستاش لەشارەكانی رۆژهەڵاتی كوردستان هاوڵاتیان ناڕەزایی بۆ گیان لەدەستدانی ژینا ئەمینی دەردەبڕن، هەرچەندە حكومەتی ئێران رایگەیاندووە لێكۆڵینەوە لەڕووداوەكە دەكات و حەسەن رۆحانی سەرۆك كۆماری ئێرانیش پەیوەندی بە باوكی ژینا ئەمینییەوە كرد، بەڵام دەنگی ناڕەزایی بۆ گیان لەدەستدانی ژینا ئەمینی هێشتا كپ نەبووەتەوە.

More News

Most Popular

هەواڵ

ئێران و توركیا بە درۆن و تۆپخانەكانیان بەردەوامن لە بۆردوومانكردنی چەند ناوچەیەكی هەرێم

Mic
2022-10-06

كاتژمێر 11:00ی پێشنیوەڕۆی ئەمڕۆ فڕۆكەی بێفڕۆكەوانی سوپای توركیا گوندی بادانەیان لە سنووری ناحیەی ناڵپارێز لە قەزای پێنجوێنی هەرێمی كوردستان بۆردوومان كردەوە و ترس و دڵەڕاوكێی زۆری لەناو گوندنشینان بڵاوكردووەتەوە، ئەمەش سێیەم جارە لەدوو رۆژی ڕابردوودا توركیا ئەو سنوورە بۆردوومان دەكات و دوێنێش گوندی شێخەلمارێنیان لە قەزای شارباژێر بۆردوومانكرد و ئۆتۆمبێلێكیان كردە ئامانج كە بەهۆیەوە كەسێك برینداربوو.
لەلایەن خۆشیانەوە فەرماندەیی یەكینەكانی ڕۆژهەڵاتی كوردستان – یەرەكە كە باڵی سەربازی پارتی ژیانی ئازادی كوردستانە ڕایگەیاند: لە ناوچەی پێنجوێن و شارباژێڕ كە لەلایەن دەوڵەتی توركیاوە بۆردومان كراوە، هیچ هێزێكی ئێمە لەو ناوچانەدا نییە.
لە ڕاگەیەندراوەكەی یەرەكەدا هاتووە: لە ڕۆژانی سێ تا شەشی ئەیلول، فڕۆكەی چاودێری بەسەر ئاسمانی چوارتا و ئاسۆس و پێنجوێندا سوڕاوەتەوە، لە كاتژمێر دووی پاش نیوەڕۆ، فڕۆكەیەكی بێفڕۆكەوان هێرشی كردە سەر ئۆتۆمبێلێكی مەدەنی لە گوندی شێخەڵمارێن.
یەرەكە دەشڵێت: لەو ناوچانەی دەوڵەتی توركیا هێرشی تێدا ئەنجامداوە هێزی ئێمەی تێدانییە و هیچ بنەكەیەكمان لەو ناوچانەدا نییە، بەهۆی ئەو هێرشانەوە هاوڵاتیان زیانیان پێگەیشتووه.
یەرەكە لەڕاگەیەندراوەكەدا دەشڵێت: هەندێك دەزگای ڕاگەیاندن بۆ ئەوەی ڕەوایەتی بە هێرشەكانی دەوڵەتی توركیا بدەن، پەكەكە و ئێمە دەكەنە ئامانج، ئێمە داوا لە دەزگاكانی ڕاگەیاندن دەكەین، لەسەر ئەو هێرشانە ڕاستییەكان بگەیەنن.
هاوكات دوێنێ ناوەندی ڕاگەیاندن و چاپەمەنیی هێزەكانی پاراستنی گەل-هەپەگە كە باڵی سەربازی پەكەكەیە ڕوونكردنەوەیەكی لەسەر بۆردوومانكردنی ئۆتۆمبێلێك لە سنووری شارباژێڕی سەر بە پارێزگای سلێمانی بڵاوكردەوە و رایگەیاند:لە هەندێك دەزگای ڕاگەیاندنی باشووری كوردستان بڵاوكرایەوە، كە لە چواری تشرینی یەكەمدا لە ناوچەی شارباژێڕی سلێمانی دەوڵەتی توركیا هێرشێكی ئاسمانی ئەنجامداوە و بانگەشەی ئەوە كرا، كە لە ئۆتۆمبێلێكدا كە هێرشی كراوەتە، سەر دوو كەسی سەر بە پەكەكە تێدابوون.
هەپەگە دەشڵێت: لەو شوێنەی هێرشەكەی تێدا ئەنجامدراوە هێزەكانی ئێمەی لێنییە و دەبێت بزانرێت، كە ئەوە هیچ پەیوەندییەكی بە ئێمەوە نییە.
پێشتریش هێمن ئیبراهیم بەڕێوەبەری ناحیەی ناڵپارێز رایگەیاند: بەهۆی مەترسی بۆردوومانەكەوە كە لەلایەن فڕۆكەوە ئەنجامدراوە، چەندین خێزان گوندەكەیان بەجێهێشتووە و روویان لە سەنتەری شاری سلێمانی كردووە.
خەڵكی ناوچەكە داوا دەكەن لایەنە پەیوەندیدارەكان بێنە سەر خەت بەهۆی مەترسیداری بۆردوومانی ناوچەكە و بەهۆی دژواری دۆخەكەوە خوێندن لە بەشێك لە ناوچەكانی سنوری پەروەردەی شارباژێڕ تا رۆژی یەكشەممە راگیراوە.
ئەمەش لەكاتێكدایە، ماوەی چەندین رۆژە بەشێوەیەكی بەردەوام فڕۆكە و درۆن بە ئاسمانی سنوری شارباژێرو پێنجوێن و چەندین ناوچەی دیكەی هەرێمدا دەسوڕێتەوە و بۆردوومانی چەندین ناوچەیان كردووە، تۆپبارانكردنی برادۆست و باڵەكایەتی لە سنووری ئیدارەی سۆرانیش لەلایەن ئێرانەوە پێینایە 13یەمین ڕۆژەوە.
بەیانی ئەمڕۆش تۆپخانەكانی ئێران لە سنووری برادۆست، كوێستانی ناوڕوبار و گوندی گۆڕێ سایە و گوندی كەتینەی تۆپباران كرد، هاوكات لە سنوری باڵەكایەتی، تۆپخانەكانی ئیران، گوندی بەردەخڕ و هاوینەهەواری بێرمەسارد و كوێستانەكانی سەرچاڵ و بناری هەڵگۆردی تۆپباران دەكەن.