هەواڵ

خۆپیشاندانی خوێندكاران بەردەوامی هەیە و چەند خوێندكارێكیش دەستگیركران

Mic
2022-11-21

لەسلێمانی چەند خوێندكارێكی زانكۆ لەلایەن هێزە ئەمنیەكانەوە دەستگیركران، دوای ئەوەی دوێنێ بڕیاریاندا ئەمرۆ دەست بە خۆپیشاندان بكەنەوە.
ئەمڕۆ بۆ دووەم ڕۆژی لەسەریەك خۆپیشاندانی خوێندكارانی زانكۆ و پەیمانگاكانی سنوری سلێمانی و هەڵەبجە و گەرمیان بە مەبەستی داواكردنی دەرماڵە و كەمكردنەوەی كرێی خوێندنی پارالێل درێژەی هەیە، خوێندكاران دەڵێن تا داواكارییەكانیان جێ بەجێ نەكرێت، بەردەوام دەبن لە بایكۆتكردنی هۆڵەكانی خوێندن.
ئەمڕۆ بۆ دووەم ڕۆژی لەسەر یەك خۆپیشاندانی خوێندكارانی زانكۆ و پەیمانگاكانی سلێمانی لەبارەی پێدانی دەرماڵە و كەمكردنەوەی كرێی خوێندنی پارالێل درێژەی پێدرا و خوێندكاران بایكۆتی هۆڵەكانی خوێندنیان كرد.
هەر ئەمڕۆ خوێندكارانی زانكۆ و پەیمانگاكانی سنوری پارێزگای هەڵەبجە بە مەبەستی داواكردنی دەرماڵە و كەمكردنەوەی كرێی خوێندنی پارالێل درێژەیان بە خۆپیشاندان و بایكۆتكردنی هۆڵەكانی خوێندن دا.
هاوكات بەیانی ئەمڕۆ، لەبەردەم زانكۆی گەرمیان لە شارۆچكەی كەلاری ناوەندی ئیدارەی گەرمیان و لەبەردەم كولێژی زانستە مرۆڤایەتیەكان لەشارۆچكەی خانەقین، خۆپیشاندانی خوێندكاران دەستی پێكردەوە، خەرجكردنی دەرماڵە و بە سیستەمكردنی دەرماڵە و زیادكردنی داشكاندنی خویندنی پارالێل و ئێواران، دان پێدانانی زانكۆی گەرمیان لە لایەن حكومەتی عێراقەوە، داواكاری خوێنداكارانی زانكۆی گەرمیانە.
لەلایەكی دیكەوە، خوێندكارانی بەشی  زانستە مرۆڤایەتیەكانی سەر بە زانكۆی گەرمیان، لەبەردەم كولێژەكەیان لەشارۆچكەی خانەقین، گردبونەوەیەكیان ئەنجامداوە و بایكۆتی خوێندنیان ڕاگەیاندووە و دەڵێن: بەردەوام دەبین تا داواكانمان جێبەجێ دەكەن.
حكومەتی هەرێم بەپاساوی قەیرانی دارایی لەساڵی 2014 ەوە دەرماڵەی خوێندكارانی بڕیوە، ساڵی رابردوو بەهۆی فشاری خوێندكاران چەند مانگێك دەرماڵەی بەسەردا دابەش كردن، بەڵام ئەمساڵ لەوەرزی نوێی خوێندنەوە خوێندكاران تەنها دەرماڵەی مانگی شەشیان وەرگرتووە و هیچ دەرماڵەیەكی دیكەیان پێنەدراوە.
دوێنێ لەكاتی خۆپیشاندانی خوێندكارانی زانكۆی سلێمانی هێزە ئەمنیەكان توندوتیژییان بەرامبەر خوێندكاران بەكارهێنا و بەهۆیەوە چەندین خوێندكار تەندروستییان تێكچوو، گازی فرمێسكڕێژیش هەڵدرایە قوتابخانەیەكی بنەڕەتی و بەهۆیەوە 100 قوتابی تەندروستییان تێكچوو.

بابەتی لێکچو

More News

Most Popular

هەواڵ

موقتەدا سەدر هەڵبژاردن رەتدەکاتەوە و چاوەڕێی دوو ئەگەرە

Mic
2025-09-17


سەرەڕای کشانەوەی لە پرۆسەی سیاسی و بەشدارینەکردنی لە هەڵبژاردنی داهاتووی پەرلەمانی عێراق، بەڵام موقتەدا سەدر هێشتا مۆتەکەی دەسەڵاتدارانی عێراقە، ئەمەش وایکردووە لەلایەک چاویان لەسەر هەڵبژاردن بێت و لەلایەکیش چاویان لەسەر سەدر بێت، خودی موقتەدا سەدریش چاوەڕێی روودانی دوو ئەگەرە لە عێراق.

موقتەدا سەدر سەرکردەی ڕەوتی سەدر، هێشتا یەکێکە لە گەورەترین مەتەڵە سیاسییەکان، کە ڕووبەڕووی نەیارەکانی دەبێتەوە لە چوارچێوەی هەماهەنگیدا، یان تەنانەت لایەنگران و هاوپەیمانە نزیکەکانی.

لەدوای بڕیارە بەناوبانگەکەی سەدر بۆ کشانەوەی کوتلە پەرلەمانییەکەی کە خاوەنی 72 کورسی پەرلەمانی بوو، لە هاوینی 2022 و راگەیاندنی ڕەتکردنەوەی کارکردن لەگەڵ "گەندەڵکاران" کە مەبەستی چوارچێوەی هەماهەنگی بوو، پێشبینیەکان سەبارەت بە هەنگاوی داهاتووی سەدر بەردەوام مشتومڕی لە نێوان سیاسەتمەداران و شیکەرەوەکان و تەنانەت هاوڵاتیانی ئاسایی دروستکردووە.

موقتەدا سەدر لە هەموو پەیامەکانیدا سەبارەت بە کشانەوەی لە پرۆسەی سیاسی و هەڵبژارد، تەنها ئاماژەی بە چینێکی گەندەڵی دەسەڵاتدار کردووە، بەبێ ئەوەی هیچ نیازێکی تری خۆی بخاتەڕوو، بەڵام سەرکردەویەکەی چوارچێوەی هەماهەنگی خواستی سەدر ئاشکرا دەکات.

سەرکردەیەک لە چوارچێوەی هەماهەنگی کە نەیویست ناوی ئاشکرا بکرێت، بە ڕۆژنامەی «الشرق الأوسط»ـى راگەیاندووە، سەدر سیستەمێکی دەوێت کە لەگەڵ تێڕوانینی خۆیدا بگونجێت، کە لەوانەیە لەگەڵ تێڕوانینی ئەوانی تردا نەگونجێت.

ئەو سەرکردەیەی چوارچێوەی هەماهەنگی پێیوایە، کشانەوەی ئێستای موقتەدا سەدر لە پرۆسەی سیاسی و بایکۆتی هەڵبژاردن، لەم دیدگایەوە سەرچاوە دەگرێت نەک ڕق لە کاری سیاسی.

ئاماژە بە پێگە و بەهێزی سەدر دەکات لە دەرەوەی پرۆسەی سیاسی و دەڵێت: لەوانەیە یارییەکە بە تەواوی بگۆڕێت تەنانەت ئەگەر لە پێشبڕکێی هەڵبژاردنیش دوور بێت، هەر بۆیە، چوارچێوەی هەماهەنگی چاوێکیان لەسەر هەڵبژاردنەکان و چاوەکەی دیکەش لەسەر سەدرە.

لەگەڵ ئەوەی لایەنەسیاسییەکان و چاودێرانی سیاسی پێیانوابوو، سەدر لە چوار ساڵی رابروودا، شەقامی لە بەرژەوەندی خۆی ساز و ئامادەکردووە بۆ چوونە سەر سندوقەکانی دەنگدان، بەڵام لە بڕیارێکی چاوەڕواننەکراودا، سەدر بایکۆتکردنی هەڵبژاردنی راگەیاند، هەرچەندە سەرۆک کۆماری عێراق بە فەرمی داوای لێکرد بە بڕیارەکەیدا بچێتەوە، بەڵام ئەو سوربوو لەسەر بڕیارەکەی.

لە ناوەڕاستی مانگی تەمووزی ساڵی ڕابردوودا، موقتەدا سەدر بڕیارێکی دەرکرد بۆ دوورخستنەوەی 31 کەس لە بزووتنەوەکە و باڵی سەربازی سەرایا سەلام، بەهۆی ئاماەکارییان بۆ بەشداریکردنیان لە هەڵبژاردنەکانی داهاتوودا.

سەرکردەیەکی رەوتی سەر بە رۆژنامەی «الشرق الأوسط»ـى وتووە، ڕەوتی سەدر پشتگیری لە هیچ لیست و کاندیدێک ناکات لە هەڵبژاردنەکانی داهاتوودا، ئەو سەرکردەیە ڕەتی دەکاتەوە پێشبینی هەنگاوەکانی داهاتووی سەدر بکات و دەڵێت: هەموو شتێک دەگونجێت، بەڵام کەس نازانێت چۆن و کەی ڕوودەدات.

ئەو سەرکردەیە ئاماژەی بەوەکردووە، کە سەدر درکپێدەکات و گرەو لەسەر ئەگەری داڕمانی چوارچێوەی هەماهەنگی دەکات بە تێپەڕبوونی کات، چونکە بڕوا وایە سیستەمی سیاسی ئێستا بە ئاسانی چاکسازی ناکرێت.

دەشڵێت: سەدر هەموو جۆرە کارێکی سیاسی تاقیکردۆتەوە. بەشداری کردن لە پەرلەمان و کشانەوەی لێی و بەشداریکردن لە حکومەت و کشانەوەی لێی و هەروەها دژایەتیکردنی چالاکی لە شەقامدا و پێدەچێت گەیشتووەتە ئەو ئەنجامەی کە ئەم سیستەمە توانای چاکسازی نییە.

یەکێکی تر لەو ئەگەرانەی کە سەدر چاوەڕێی دەکات، شوێنگرتنەوەی عەلی سیستانی مەرجەعی باڵای شیعەکانە لە عێراق، خودی سەدریش خواستی خۆی بۆ جێگرتنەوەی نەشاردووەتەوە و بەپێی بنەماکانی مەزهەبی شیعە، موقتەدا سەدر هەموو مەرجەکانی تێدایە.

TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved