هەواڵ

وەزارەتی ناوخۆ كامێرای پۆینت توو پۆینت لەسەرجەم شارەكان دادەنێت

Mic
2022-11-27

وەزارەتی ناوخۆی هەرێمی كوردستان و بەڕێوەبەرایەتی هاتووچۆی سلێمانی سورن لەسەر ئەوەی كامێرای پۆینت توو پۆینت جێبەجێ بكەن و تەنانەت هاتوچۆی سلێمانی بەشێك لەزیانی تەقەكردن لەكامێراكان دەژمێرێت و چاوەڕێیە بۆ دەستبەكاربوونی كامێراكان.
لیژنەیەکی باڵا لە بەڕێوەبەرایەتی هاتوچۆی سلێمانی سەرپەرشتی پڕۆژەی کامێرای تیژرەوی پۆینت تو پۆینت دەکات، بەوتەی سەرچاوەیەك لە وەزارەتی ناوخۆ  کەی ئەوان ڕاپۆرتی کۆتایی  بنوسن کە لە ڕووی تەکنیکییەوە هەموو ئامادەکارییەکان تەواو بوون، ئەو کاتە کامێراکان دەکەوێتە کار.
پرۆژەكە تەنها لەسلێمانی نییە، بەڵكو لەهەولێر و دهۆكیش گرێبەستێك ئامادەیە تا ئەو كامێرایە بخەنەكار كە هەردوو كۆمپانیاكە حزبین و قازانجەكەشی هەر بۆ ئەوانە، بەوتەی سەرچاوەكە پرۆژەی کامێرای پۆینت تو پۆینت  لە لایەن دوو کۆمپانیا لەسەر ئاستی کوردستان بە شێوەی هاوبەشی نێوان کەرتی گشتی و تایبەت جێبەجێ دەکرێت و تایبەت نیە بە هیچ ناوچەیەک.
وتیشی: لە هەموو شارەکان پڕۆژەکە لە قۆناغی ئامادەکردنی تەکنیکی و دامەزراندنی کامێراکانە و کەی و لە چ شار و ناوچەیەک زووتر تەواو بوو  سیستمەکە دەکەوێتە کار.
وەك ئەو سەرچاوەیە دەڵێت کامێرای پۆینت تو پۆینت تەنیا لە شەقامە خێراکانی دەرەوەی شار دادەندرێت بۆ ئەوەی شوفێر لەخێرایی دیاریكراو كە ١١٠ کیلۆمەترە لە کاتژمێرێک تێپەڕ نەکات. 
سەبارەت بەپرسیاری هاوڵاتیان كە ئایا ئەو كامێرایانەی لەناو شار و لەترافیكەكان بە دارتێلەكانەوە هەڵواسراون كە ئایا كامێرای پۆینت توو پۆینتن، سەرچاوەكە وتی "هەندێ لایەن بە ئەنقەست تەنانەت کامێراکانی ئەمنی ناوشاریشیان بە کامێرای پۆینت تو پۆینت بە خەڵک ناساندووە".
لە سەرەتایی مانگی ١٠ دا بە وتەی کۆمپانیای جێبەجیکاری کامێرای پۆینت تو پۆینت   دوو جار تەقە لە کامیراکانیان کراوە  لە ڕێگەی دووکان- سلێمانی ، بەوتەی سەرچاوەیەك لەكۆمپانیاكە زیانێکی زۆر بەر کامێراکانی تیژرەوی کەوتووە و بەهاوبەشی لەگەڵ وەزارەتی ناوخۆ زیانەكان دەژمێردرێن.
 لەبارەی زیانەکانی تەقە کردن لە کامێراکان سەرچاوەكەی وەزارەتی ناوخۆ وتی: بە گوێرەی گرێبەست هەندێ لە زیانەکان کۆمپانیای جێبەجێکار دەیدات و هەندێ جۆری زیانیش حکومەتی هەرێم دواجار ئەوە پرۆژەی حکومەتە و پاراستنی لە ئەستۆی حکومەت خۆیەتی تا ئەو لایەنە دەدۆزرێتەوە كە زیانی پێگەیاندووە و زیانەكەی پێ دەژمێردرێت.

هاوكات سەبارەت بە جێبەجێكردنی سیستەمی كامێرای پۆینت توو پۆینت و قەرەبووكردنەوەی زیانەكان هێمن میرانی بەرێوەبەری گشتی دیوانی وەزارەتی ناوخۆ بەمایكی وت:" بێگومان هەر زیانێك بەر پرۆژەیەكی حكومەت بكەوێت دەبێت حكومەت خۆی قەرەبووی بكاتەوە، ئەگەر ڕووداوەكە بەدەر لەویستی ئەو كۆمپانیایە یان حكومەت بێت كە جێبەجێی دەكات، بۆیە كامێراكانی سلێمانیش كە تەقەیان لێكراوە تا لایەنی تۆمەتبار دەدۆزرێتەوە حكومەت خۆی قەرەبووی زیانەكان دەكاتەوە".
وتیشی:"سیستەمی پۆینت توو پۆینت لەسەرجەم ناوچەكانی هەرێمی كوردستان جێبەجێ دەكرێت و تەنها سلێمانی ناگرێتەوە".
لە ماوەی رابردوو دوای ئەوەی بەرێوبەرایەتی هاتۆچۆی سلیمانی رایگەیاند، لەلایەن کۆمپانیایەکی ناوخۆ سەرجەم رێگاکانی دەرەوەی شاری سلێمانی سیستمیکی کامێرای تیژرەوی بۆ دادەنڕێت کە ناسراوە بە " پۆینت تو ۆینت" ئەمەش نارەزایەتی بەشێکی هاوڵاتیانی لێکەوتەوە دواتر داواكاری گشتی و ئەنجومەنی پارێزگای سلێمانی پرۆژەكەیان ڕەتكردەوە بەڵام وەزارەتی ناوخۆ گوێی بەناڕەزایەتیەكان نەدا.


More News

Most Popular

هەواڵ

وردەكاری دواخستنی دانیشتنێكی دادگای فیدراڵی عێراق لەبارەی درێژكردنەوەی تەمەنی پەرلەمانی كوردستان

Mic
2023-01-31

دانیشتنی دادگای باڵای فیدراڵیی عێراق لەبارەی درێژکردنەوەی تەمەنی پەرلەمانی کوردستان بۆ حەوتی شوبات دواخرا، نوێنەرانی هەرێم پاساوی ئامادەنەبوونیان  خراپیی کەشوهەواوە بووە.
 بڕیار بوو ئەمڕۆ سێشەممە، 31-01-2023، دادگای باڵای فیدراڵیی عێراق لەبارەی سکاڵایەک کۆببێتەوە کە لە دژی درێژکردنەوەی تەمەنی ئەم خولەی پەرلەمانی کوردستان تۆمارکراوە، بەڵام رێبوار ئەوڕەحمان وتەبێژی فراكسیۆنی نەوەی نوێ لەپەرلەمانی عێراق رایگەیاند: ئەمڕۆ لە دانیشتنی دادگای فیدراڵی تایبەت بە درێژكردنەوەی نایاسایی پەرلەمان و سەرۆكایەتییەكان كە لەلایەن سەرۆكی جوڵانەوەی نەوەی نوێ و سروە عەبدولواحید سەرۆكی فراكسیۆنی نەوەی نوێ تۆماركرابوو دواخرا بۆ حەوتی مانگی دوو كرایە دانیشتنێكی كراوە.
 بڕیاربوو ئەمڕۆ دادگای باڵای فیدراڵیی عێراق لەبارەی دوو سکاڵا کۆببێتەوە کە ئەوانیش یەكەمیان ئەو سكاڵایەی لەسەر درێژکردنەوەی تەمەنی پەرلەمانی کوردستان تۆمارکرابوو، دووەمیش سکاڵا لەسەر هەرسێ سەرۆکایەتییەکەی عێراق تۆمارکرابوو و سکاڵاکار داوا دەکات راسپاردنی محەممەد شیاع سوودانی بۆ پێکهێنانی حکومەت هەڵبوەشێندرێتەوە.
 سکاڵای یەكەم بە ناوی سروە عەبدولواحید، سەرۆکی فراکسیۆنی نەوەی نوێ لە پەرلەمانی عێراق پێشکەشکراوە، لە پاش ئەوەی لەگەڵ سێ سکاڵای دیکەدا یەکخران، کە لەلایەن یوسف محەممەد، سەرۆکی پێشووی پەرلەمانی کوردستان؛ شاسوار عەبدولواحید، سەرۆکی جووڵانەوەی نەوەی نوێ و کاوە عەبدولقادر، سەرۆکی فراکسیۆنی نەوەی نوێ لە پەرلەمانی کوردستان پێشکەش کرابوون و 18ـی کانوونی یەکەمی 2022، یەکەم دانیشتن لەبارەی سکاڵاکان کرا.
 سکاڵاکار لەو سکاڵایەدا داوای پووچەڵکردنەوەی یاسای ژمارە 12ـی رۆژی 9-10-2022ـی تایبەت بە درێژکردنەوەی خولی پێنجەمی پەرلەمانی کوردستان دەکات بەهۆی دژایەتیی لەگەڵ هەردوو ماددەی 5 و 20ـی دەستووری عێراق، جگە لەوەش لە داواکەدا هاتووە: مافی دەستووریی دیاریکراو لە ماددەی 51ـی یاسای هەڵبژاردنی پەرلەمانی کوردستان ژمارە 1ـی ساڵی 1992 پێشێل دەکات.
رۆژی 9ـی تشرینی یەکەمی 2022، پەرلەمانتارانی پارتی و یەكێتی و بەشێك لەفراكسیۆنی گۆڕان و پێكهاتەكان تەمەنی ئەم خولەی پەرلەمانیان تاوەکو کۆتایی ساڵی 2023 درێژکردەوە، خولی پێنجەم رۆژی 06-11-2022 کۆتایی هات، درێژکردنەوەی تەمەنی پەرلەمان  هێزەکانی ئۆپۆزیسیۆنی تووڕەکرد و لەنێوان بەشدارینەکردن لە کۆبوونەوەکانی پەرلەمان و بایکۆتکردنی و هەڵپەساردنی ئەندامێتی خۆیانهێشتەوە.