هەواڵ
سێ رۆژە درۆن بەسەر چەند ناوچەیەكی هەرێمی كوردستاندا دەسورێتەوە
2022-11-29
لە ماوەی سێ رۆژی رابردوودا چەند جارێك درۆن بە ئاسمانی شارەزوور و چەمچەماڵ لەپارێزگای سلێمانی لەهەرێمی كوردستان سووڕاونەتەوە و دڵەڕاوكێیان لای هاوڵاتیان دروستكردووە، بەرپرسانی ئەمنیش دەڵێن ئەو درۆنانە نەناسراون.
لە سێ رۆژی رابردوودا چەند جارێك درۆن بە ئاسمانی شارەزوور و بەتایبەت شارۆچكەی وارماوادا سووڕاونەتەوە، بەڵام بەوتەی ئاوارە حەمەشەریف، بەڕێوەبەری شارۆچكەی وارماوا بۆ ئەوان ئاشكرا نەبووە درۆنی چ وڵاتێكن دەسووڕێنەوە.
وتیشی: ئێمە پارێزگای سلێمانی و سەرجەم لایەنە پەیوەندیدارەكانمان ئاگاداركردووەتەوە و پێمانوتوون، كە درۆن دەسووڕێتەوە و دڵەڕاوكێی دروستكردووە، چاوەڕوانی وەڵامی ئەوانین بزانین درۆنی چ وڵاتێكن و بۆچی لە سنوورەكەمان دەسووڕێنەوە.
لە نزیك شارۆچكەی وارماوا و لە كۆمەڵگەی باریكە، كەمپێكی ئاوارەكانی رۆژهەڵاتی كوردستان هەیە، كە پێش رووخانی دەسەڵاتی بەعس لە شاری روومادی لە عێراق ژیاون و دواتر لە سنووری پارێزگای سلێمانی و لەو كەمپە نیشتەجێكراون.
لە دوو مانگی رابردووشدا كۆماری ئیسلامیی ئێران چەند جارێك بارەگای حیزبەكانی رۆژهەڵاتی كوردستان و كەمپی پەنابەرانی رۆژهەڵاتی لە كۆیە، جێژنیكان و زڕگوێز لە سنووری پارێزگاكانی هەولێر و سلێمانی كردووەتە ئامانج.
چەمچەماڵ یەكێكی دیكەیە لەو ناوچانەی درۆن بە ئاسمانەكەیدا سووڕاوەتەوە و دیمەنەكەشی لە تۆڕە كۆمەڵایەتییەكان بڵاوكراوەتەوە.
بەوتەی رەمك رەمەزان، قایمقامی قەزای چەمچەماڵ هاوڵاتیان و دەزگا ئەمنییەكان ئاگاداریان كردوونەتەوە، درۆن سووڕاوەتەوە، بەڵام وەك ئەو دەڵێت "هیچ مەترسییەكیان دروست نەكردووە".
پێشتر و لەرۆژی رۆژی 21-5-2022 ئۆتۆمبێلێك لە گوندی "تووتەقەڵ"ی سەر بە ناحیەی ئاغجەلەر كە دەكەوێتە سنووری قەزای چەمچەماڵەوە لەلایەن فڕۆكە بێفڕۆكەوانەكانەوە كرایە ئامانج؛ دواتر ئاشكرابوو ئۆتۆمبێلەكە هی ئەنجوومەنی گوندی تووتەقەڵانە، دوو هاوڵاتی گوندەكانی تووتەقەڵان و سەرچنار لەگەڵ سێ گەریلای پەكەكە كە لەناو ئۆتۆمبێلەكەدا بوون كرانە ئامانج و گیانیان لەدەستدا.
هەرچەندە لە تۆڕە كۆمەڵایەتییەكاندا وابڵاوكراوەتەوە، كە درۆن بە ئاسمانیدا دەڤەری هەورامان و شارۆچكەی بیارەشدا سووڕاوەتەوە، بەڵام حەمید بارام، بەڕێوەبەری ناحیەی بیارە دەڵێت : "هیچ درۆنێك لە ئاسمانی هەورامان و ناوچەكەمان نەسووڕاوەتەوە، هیچ كەسێكیش شتێكی بەو شێوەیەی نەبینیوە تا ئێمە ئاگادار بكاتەوە".
More News
.jpg)
.jpg)
 copy.jpg)
Most Popular
هەواڵ
هێزيکی ئاسایش وێنەگری دیجیتاڵ میدیایی 'مایک'یان دەستبەسەرکرد
2024-03-25
سلێمانی ـ MIC
لەکاتی ڕووماڵی خۆپیشاندانی مامۆستایان و فەرمانبەرانی ناڕازیی ئەمڕۆ دووشەممە، هێزێکی ئاسایشی سلێمانی، گریڤان فەرمان یان بۆ ماوەیەک دەستبەسەرکرد و دەستیان بەسەر کەلوپەلە رۆننامەوانیەکدا گرت.
گریڤان فەرمان بە دیجیتاڵمیدیای MIC وت”هێزەکەی ئاسایش سەرجەم ئەو وێنە و دیمەنانەی خۆپیشاندانەکە، کە تۆمارم کردبوون سڕییانەوە و رێگەشیان نەدا رووماڵەکە بکەین.”
وتیشی” پاش سڕینەوەی دیمەنەکان ناچاریان کردین شوێنی خۆپیشاندانە جێبهێڵین.”
مامۆستایان و فەرمانبەرانی ناڕازی ئەمڕۆ لەدژی نەدانی مووچەکانیان و پرۆژەی هەژماری من، خۆپیشاندانیان ئەنجامدا و هەوڵیاندا بچنە دەباشان وچاویان بە بافڵ تاڵەبانی سەرۆکی یەکێتی بکەوێت، بەڵام لەلایەن هێزە ئەمنییەکانەوە رێگری کرا لە خۆپیشاندانەکە.
هەروەها رێگری کرا لە چەند کەناڵێکی میدیایی کە رووماڵی خۆپیشاندانەکە بکەن.
