هەواڵ

دەستەی نەزاهە: هەولێر تۆمەتبارێكی دزيی سەدە ڕادەست ناكات

عالیە نوسێف جێگری سەرۆكی لیژنەی نەزاهەی پەرلەمانی عیراق ئاشكرایكرد، هەولێر رەتیدەكاتەوە حسێن كاوە رادەست بكات، كە تۆمەتبارە بە دزینی 680 ملیار دینار، ئەوەش دەیسەلمێنێت كە كەسانی گەورە لە پشتیەوەن.
عالیە نوسێف لە لێدوانێكی تەلەفزیۆنیدا باسی لەوەشكردووە، لیژنەكەی فەریقی یەكەم ئەحمەد ئەبو رەغیف رێكەوتن لەگەڵ ئەو كەسانەدا دەكات كە تێوەگلاون لە گەندەڵییەوە، داوای پارەیان لێ دەكات و هەڕەشەی دەستدرێژی سێكسی و هێنانی ژنەكانیان بۆ گرتووخانە دەكات.
ئەو پەرلەمانتارە وتیشی:  هەروەها ئیحسان عەبدولجەبار دوای ئەوەی كە نەیتوانی لە دوبەی لەگەڵ دزەكان رێكەوێت و پارەی دەستكەوێت، ئەو كاتە هات دزییە گەورەكەی ئاشكرا كرد، ناشتوانێت ئەوە رەتبكاتەوە.
نوسێف هەر بەوەوە نەوەستاوە و هەولێرشی تۆمەتبار كردووە بەوەی رەتیدەكاتەوە حسێن كاوە كە لە دایكبووی ساڵی 2000 و تۆمەتبار بە دزینی 680 ملیار دینار رادەست بكات، ئەوەش دەیسەلمێنێت كە كەسانی گەورە و باڵادەست لە دزییەكەوە تێوەگلاون و هەولێر پاڵپشتی كردوون.
شەوی رابردوو بەشێك لەمیدیاكانی عێراق هەواڵی ئەوەیان بڵاوكردەوە: نور زوهێر ئەو كەسەی تۆمەتباری سەرەكییە بە دزینی زیاتر لە دوو ملیار و نیو دۆلارئازادكراوە.
هاوكات ئاژانسی ئەسۆشێتد پرێس-ی ئەمریكی وردەكارییەكانی تێوەگلانی تۆمەتبار، نور زوهەیر جاسمی لە دۆسیەی گەندەڵی ئاشكرا كردووە كە بە "دزیی سەدە" ناسراوە بەڵام تۆمەتبارەكە رەتیدەكاتەوە، زانیاری لەسەر ئەو لایەنانە ئاشكرابكات كە كاری لەگەڵ كردون و پاڵپشتی بون بۆ ئەنجامدانی ئەو تاوانە.
بەگوێرەی ئاژانسی ئەسۆشێتد پرێس-ی ئەمریكی، پشكی تۆمەتبار نور زوهەیر جاسم لە پارەی دزراو كە كۆی گشتی دو ملیار و 800 هەزار دۆلارە، "یەك ملیار دۆلاری ئەمریكی" بووە.
ئاژانسەكە شێوازەكانی كۆكردنەوەی پارەی تۆمەتبارەكەی ڕونكردەوە، كە لەڕێگەی ڕۆڵی چالاكانەی خۆی لە گواستنەوەی پارە و بەكارهێنانی كۆمپانیا وەهمی كە بە هاوكاری لەگەڵ "لایەنە كاریگەرەكان" دایمەزراندووە، بەدەستیهێناوە.
ئاژانسەكە ئاماژەی بەوەشكردووە، تۆمەتبارەكە ئەو پارەیەی بۆ ئەو لایەنانەش گواستوەتەوە كە كاری لەگەڵ كردوون، لەلێكۆڵینەوەكانیش رەتیكردوەتەوە ناوی هیچ لایەنێك ئاشكرابكات كە پاڵپشتیان كردوە و كاریان لەگەڵدا كردووە بۆ دزینی ئەو پارانە. 
ئاژانسی ئەسۆشێتد پرێس دوپاتیكردەوە، تیمی پارێزەری تۆمەتبار نور زوهەیر جاسم ڕەتیكردۆتەوە وەڵامی ئەو پرسیارانە بداتەوە كە دەزگای لێكۆڵینەوە بۆ وەرگرتنی زانیاری زیاتر سەبارەت بە شێوازی ڕێككەوتنەكە ئاڕاستەی كردووە، ئەوەش بوەتە هۆی ئەوەی بەكەفالەت ئازاد بكرێت تا ئەوكاتەی بەشێك لەپارەكە لەو لایەنانە وەردەگرێتەوە و رادەستی حكومەتی دەكاتەوە. 
رۆژی دووشەممە، محەمەد شیاع سودانی سەرۆك وەزیرانی عێراق لەكۆنگرەیەكی رۆژنامەوانیدا رایگەیاند: لایەنە پەیوەندیدارەكان توانیان قۆناغی یەكەمی دزینی پارەی سەدە وەربگرنەوە، كە بڕی زیاتر لە 182 ملیار دینارە، كۆی گشتی پارە دزراوەكانیش سێ ترلیۆن و 754 ملیار و 642 ملیۆن و 664 هەزار دینارە.
وتیشی: لیژنەكانی لێكۆڵینەوە گەیشتنە ئەنجامێك كە 114 چەك بۆ تۆمەتبار، نور زوهەیر خەرجكراوە كە بڕەكەی یەك ترلیۆن دینارە، لەئێستاشدا رێكەوتنێك لە نێوان دادگای لێكۆڵینەوەی دوەمی كەرخ و ئەو تۆمەتبارە كراوە بۆ وەرگرتنەوەی تەواوی ئەو بڕە پارەیەی كە لەبەردەستیدایە.

هەواڵ

راپرسییەک بۆ پێوانەکردنی ئاستی دابڕانی کلتوریی لە هەرێمی کوردستان

دامەزراوەی ڤیژن فاوندەیشن، بۆ لێکۆڵینەوەی ستراتیژی، کار لەسەر پرۆژەیەک دەکات بۆ پێوانەکردنی ئاستی دابڕانی کلتوریی لە ناوچە جیاجیاکانی لە هەرێمی کوردستان، بۆ ئەومەبەستە فۆرمێکی ئەلیکترۆنی بڵاودەکاتەوە.

لە پێناسەی پرۆژەکەدا دامەزراوەی ڤیژن ئاماژە بەوەدەکەن، "کۆمەڵگای کوردستانی لە هەرێمی کوردستان سەرەڕای بوونی ژێرخانێکی دەوڵەمەندی کلتووری و تۆڕێک پەیوەندی هەمەجۆر لەناو کۆمەڵگاکەماندا، بەڵام هێشتا بەربەست و گرفتی گەورەی ناوخۆیی و بگرە جۆرێک لەدابڕانی کلتوریش هەیە، کە دەکرێ وەکو مەترسی سەیر بکرێ، بۆ هاوبەشی و یەکگرتویی کۆمەڵگا".

ئاماژە بەوەکراوە کە ئەو ناوچانەی هەرێمی کوردستان کە بە "شێوەزاری بادینی" دەدوێن و دەنوسن و دەخوێننەوە، لەگەڵ ئەو ناوچانەی کە بە "سۆرانی" دەدوێن و دەنوسن و دەخوێننەوە دابڕانە کلتورییەکە زیاتر بەدیدەکرێت.

ئامانجی پرۆژەکە دەرخستنی راستی و روونی و قەبارەی ئەو دابڕانە کلتووریەی لە نێوان ناوچە جیاوازەکانی هەرێمی کوردستاندا هەن، بۆ دەستنیشانکردنی بەربەست و رێگرییەکانی بەردەم ئاڵوگۆڕی کلتوورییە.

بەپێی پرۆژەکەی دامەزراوەی ڤیژن، لەکۆتاییدا پەڕاوێکی پێشنیاز بۆ حکومەتی هەرێمی کوردستان و پەرلەمان ئامادەدەکرێت و لەپێناوی "گەشەپێدانی کلتووری و چارەسەرکردنی گرفت و لابردنی بەربەستەکان". 

لێرە دەتوانیت فۆرمەکە پڕبکەیتەوە:

https://docs.google.com/forms/d/e/1FAIpQLSdJmmTCgpRhFI-5XhJlNMNmci6tLRQdgDAm7DtiRf_pbr5sHw/viewform?pli=1