هەواڵ

شێوازی ناڕەزایەتی هاوڵاتیان دەگۆڕێت

Mic
2023-01-17

ئێستا بەشێك لەهاوڵاتیان بۆ دەربڕینی ناڕەزایەتی لەبەرامبەر بڕیارەكانی حكومەت لەبری خۆپیشاندان و رێپێوان پەنا بۆ مانگرتن و پەكخستنی كاروباری خۆیان یاخود ناوبازاڕ و شوێنە گشتیەكان دەبەن.
ئەمرۆ بەهۆی زیادكردنی باجی سەرقوفڵانە لەسەریان، بەشێك لەدووكاندار و كاسبكارانی بازاڕی عەسری لەسلێمانی دووكانەكانیان داخست و گردبوونەوە.
وەك خۆیان باسی دەكەن بەهۆی زۆری كرێی سەرقوفڵانە، دووكانەكانیان داخستووە و باس لەوەشدەكەن، ساڵانە باجیان لەسەر زیاد دەكرێت، ئەو دووكاندارانە ئەوەش ئاشكرادەكەن ئەو بازاڕە موڵكی حكومەتە و بە كرێ دراوە بەو دووكاندارانە.
دەشڵێن ساڵانە بە رێژەی لە ٪20 باجیان لەسەر زیاد دەكرێت و كڕیاریشیان كەمبووەتەوە، داهاتیشیان وەك پێویست نییە.
دووكاندارەكان پەنایان بۆ پارێزگای سلێمانی بردووە و دەیانەوێت كێشەكانیان چارەسەر بكرێت، هاوكات هەر ئەمرۆ بەهۆی دروستبوونی كێشە لە كاركردنیاندا هێڵی پاسەكانی (مەجید بەگ، ڕزگاری، بەختیاری ) دەستیان بەمانگرتن كرد و دەڵێن پێیان وتوون لەگەڵ هێڵەكانی نزیك لە خۆیان تێكەڵ ببن و كاركردنیان رێك بخەنەوە، لەكاتێكدا هێڵەكانی دیكەش ڕەزامەند نین بەو تێكەڵ كردنە.
بەوتەی ئەو شۆفێرانە پێشتریش ناڕەزاییان دەربڕیوە بەهۆی ئەوەی بەشێك لەهێڵەكانی دیكە ناوچەی كاركردنیان نزیكە لێیانەوە و بەهۆیەوە كاریان نەماوە.
چەند رۆژێك لەمەوبەر دانیشتوانی قەزای پێنجوێن لەپارێزگای سلێمانی دەستیان بە گردبوونەوە و داخستنی رێگای مەرزی باشماخ كرد، دوای پێنج رۆژ لەبەردەوامبوونیان لەناڕەزایەتی دەربڕین و داخستنی رێگای بازرگانی باشماخ حكومەت ناچاربوو داواكاریەكەیان جێبەجێ بكات كە دابینكردنی ئەو سێ كاتژمێرە كارەبایە بوو كە حكومەت پێشتر لێی بڕیبوون، هاوكات دابینكردنی بەرمیلێك نەوتی دیكە بۆیان لەلایەن حكومەتەوە.
حكومەتی ماوەبەسەرچووی هەرێم باجێكی زۆری خستووەتەسەر هاوڵاتیان كاسبكاران و ئەوەش ناڕەزایەتی لێكەوتووەتەوە، جگە لەوەی خزمەتگوزاریەكان وەك پێویست نین بەتایبەتیش كارەبا و ئاو و نرخی سوتەمەنیش گرانە.

More News

Most Popular

هەواڵ

وردەكاری دواخستنی دانیشتنێكی دادگای فیدراڵی عێراق لەبارەی درێژكردنەوەی تەمەنی پەرلەمانی كوردستان

Mic
2023-01-31

دانیشتنی دادگای باڵای فیدراڵیی عێراق لەبارەی درێژکردنەوەی تەمەنی پەرلەمانی کوردستان بۆ حەوتی شوبات دواخرا، نوێنەرانی هەرێم پاساوی ئامادەنەبوونیان  خراپیی کەشوهەواوە بووە.
 بڕیار بوو ئەمڕۆ سێشەممە، 31-01-2023، دادگای باڵای فیدراڵیی عێراق لەبارەی سکاڵایەک کۆببێتەوە کە لە دژی درێژکردنەوەی تەمەنی ئەم خولەی پەرلەمانی کوردستان تۆمارکراوە، بەڵام رێبوار ئەوڕەحمان وتەبێژی فراكسیۆنی نەوەی نوێ لەپەرلەمانی عێراق رایگەیاند: ئەمڕۆ لە دانیشتنی دادگای فیدراڵی تایبەت بە درێژكردنەوەی نایاسایی پەرلەمان و سەرۆكایەتییەكان كە لەلایەن سەرۆكی جوڵانەوەی نەوەی نوێ و سروە عەبدولواحید سەرۆكی فراكسیۆنی نەوەی نوێ تۆماركرابوو دواخرا بۆ حەوتی مانگی دوو كرایە دانیشتنێكی كراوە.
 بڕیاربوو ئەمڕۆ دادگای باڵای فیدراڵیی عێراق لەبارەی دوو سکاڵا کۆببێتەوە کە ئەوانیش یەكەمیان ئەو سكاڵایەی لەسەر درێژکردنەوەی تەمەنی پەرلەمانی کوردستان تۆمارکرابوو، دووەمیش سکاڵا لەسەر هەرسێ سەرۆکایەتییەکەی عێراق تۆمارکرابوو و سکاڵاکار داوا دەکات راسپاردنی محەممەد شیاع سوودانی بۆ پێکهێنانی حکومەت هەڵبوەشێندرێتەوە.
 سکاڵای یەكەم بە ناوی سروە عەبدولواحید، سەرۆکی فراکسیۆنی نەوەی نوێ لە پەرلەمانی عێراق پێشکەشکراوە، لە پاش ئەوەی لەگەڵ سێ سکاڵای دیکەدا یەکخران، کە لەلایەن یوسف محەممەد، سەرۆکی پێشووی پەرلەمانی کوردستان؛ شاسوار عەبدولواحید، سەرۆکی جووڵانەوەی نەوەی نوێ و کاوە عەبدولقادر، سەرۆکی فراکسیۆنی نەوەی نوێ لە پەرلەمانی کوردستان پێشکەش کرابوون و 18ـی کانوونی یەکەمی 2022، یەکەم دانیشتن لەبارەی سکاڵاکان کرا.
 سکاڵاکار لەو سکاڵایەدا داوای پووچەڵکردنەوەی یاسای ژمارە 12ـی رۆژی 9-10-2022ـی تایبەت بە درێژکردنەوەی خولی پێنجەمی پەرلەمانی کوردستان دەکات بەهۆی دژایەتیی لەگەڵ هەردوو ماددەی 5 و 20ـی دەستووری عێراق، جگە لەوەش لە داواکەدا هاتووە: مافی دەستووریی دیاریکراو لە ماددەی 51ـی یاسای هەڵبژاردنی پەرلەمانی کوردستان ژمارە 1ـی ساڵی 1992 پێشێل دەکات.
رۆژی 9ـی تشرینی یەکەمی 2022، پەرلەمانتارانی پارتی و یەكێتی و بەشێك لەفراكسیۆنی گۆڕان و پێكهاتەكان تەمەنی ئەم خولەی پەرلەمانیان تاوەکو کۆتایی ساڵی 2023 درێژکردەوە، خولی پێنجەم رۆژی 06-11-2022 کۆتایی هات، درێژکردنەوەی تەمەنی پەرلەمان  هێزەکانی ئۆپۆزیسیۆنی تووڕەکرد و لەنێوان بەشدارینەکردن لە کۆبوونەوەکانی پەرلەمان و بایکۆتکردنی و هەڵپەساردنی ئەندامێتی خۆیانهێشتەوە.