هەواڵ

سپیكردنەوەی پارە و بەقاچاغ بردنی دۆلار، فشارەكەی ئەمریكا بۆسەر عێراق، هەرێمیش دەگرێتەوە

Mic
2023-01-22

بەیانی ئەمرۆ بۆرسەی كیفاح لەبازاڕی ئاڵوگۆڕی دراوی بەغدا داخرا، ئەوەش لەچوارچێوەی هەڵمەتی ئاسایشی نیشتیمانی عێراق بۆ سەر ئەو نوسینگە و كۆمپانیایانەی یاری بەنرخی دۆلار دەكەن و بەقاچاغ دەیبەنە دەرەوەی عێراق و پارەش سپی دەكەنەوە، هەر دوێنێ لەبازاڕی دۆلارەكەی هەولێر چەند كەسێك دەستگیركراون و بڕیاریشە لەهەرێمی كوردستان لەژێر فشاری ئەمریكا بڕیارەكەی عێراق جێبەجێ بكرێت و چەند كۆمپانیا و نوسینگەیەكی ئاڵوگۆڕی دراو بڕیارەكە بیانگرێتەوە.
دوێنێ نوسراوێک لە ئاسایشی ئابوری عێراقەوە ئاڕاستەی هەرێم کراوە بۆ داخستنی چەند نوسینگە و کۆمپانیایەکی دراو لە شارەکانی هەولێر و سلێمانی، ئەویش بەپێی ئەو زانیاریانەی مایك لەوەزارەتی دارایی و چەند سەرچاوەیەك دەستیكەوتوون، نوسراوەکە بۆ کۆنترۆڵکردنی بازاڕە و بەمەبەستی رێگرییە لە یارییکردن بە نرخی دینار بەرامبەر بە دۆلاری ئەمریکییەوە.
هاوکات، ناوی نوسینگەکان دراوە بە لایەنە ئەمنییەکان بەمەبەستی داخستن و بەشێكی زۆری نوسینگەكانیش لەشاری سلێمانین، هەرچەندە جەبار گۆران وتەبێژی بازاڕی ئاڵوگۆڕی دراو لەسلێمانی بۆ مایك دوا و ڕەتیكردەوە هیچ كۆمپانیا و نوسینگەیەك داخرابێت.
دوێنێ شەممە وەزارەتی ناوخۆی عێراق رایگەیاند: بە هەماهەنگی لەگەڵ وەزارەتی ناوخۆی هەرێم بۆ سنوردارکردنی بەقاچاخبردنی دراو ئامێری ئاشکراکەری سۆنەر لە بازگەی نێوان پارێزگاکان جێگیر دەکرێت، ئەوەش لەكاتێكدایە ئاسایشی نیشتیمانی عێراق دوێنێ دوو ناوەندی بۆرسەیان لە شاری بەغدا داخستووە بەهۆی ئەوەی دەستیان هەبووە لە ناسەقامگیری بەهای دۆلار و مامەڵەی نایاساییان بە دۆلارەوە کردووە، دوو ناوەندەکە "کفاح و حارسییە" بوون کە بە شێوەی نایاسایی حەواڵەی دۆلاریان کردووە لە بازاڕی رەشدا و کارەکەیان بەشێک بووە لە هۆکاری بەرزبوونەوەی نرخی دۆلار لە بازاڕە ناوخۆییەکاندا.
نزیكەی مانگێكە بەهای دۆلار لەعێراق بەرامبەر دیناری عێراقی بەرزبووەتەوە و هۆكارەكەش ئەو رێوشوێنانەن كە ئەمریكا بەرامبەر عێراق گرتوویەتیە بەر و بەشێك لەكۆمپانیا و لایەنە سیاسیەكانی عێراق بەوە تۆمەتبار دەكات دۆلاری ئەمریكی دەبەنە عێراق و سوریا و چەند وڵاتێكی دیكە، هاوكات دوێنێ ماڵپەڕی میدڵ ئێست ئای بەریتانی ئاشكرایكرد چوار بانك  ( بانكی ئەلئەنساری ئیسلامی بۆ وەبەرهێنان و دارایی، بانكی ئیسلامیی ئەلقابید بۆ دارایی و وەبەرهێنان، بانكی ئیسلامی ئاسیا ئەلعراق بۆ وەبەرهێنان و دارایی لە ڕۆژهەڵاتی ناوەڕاست و عێراق) ئەو چوار بانكەن كە ئەمریكا خستوونیەتە لیستی ڕەشەوە.
بەپێی زانیاریەكانی مایك دۆسیەی سپیكردنەوەی دۆلار لەلایەن ئەمریكاوە گەیشتوەتە دادگاكانی هەرێم و لەسلێمانیش چەند كەسێك بەو تۆمەتە دادگایی دەكرێن و كاری سپی كردنەوەی پارە و بەقاچاغ بردنی دۆلار دەكەن.

More News

Most Popular

هەواڵ

وردەكاری دواخستنی دانیشتنێكی دادگای فیدراڵی عێراق لەبارەی درێژكردنەوەی تەمەنی پەرلەمانی كوردستان

Mic
2023-01-31

دانیشتنی دادگای باڵای فیدراڵیی عێراق لەبارەی درێژکردنەوەی تەمەنی پەرلەمانی کوردستان بۆ حەوتی شوبات دواخرا، نوێنەرانی هەرێم پاساوی ئامادەنەبوونیان  خراپیی کەشوهەواوە بووە.
 بڕیار بوو ئەمڕۆ سێشەممە، 31-01-2023، دادگای باڵای فیدراڵیی عێراق لەبارەی سکاڵایەک کۆببێتەوە کە لە دژی درێژکردنەوەی تەمەنی ئەم خولەی پەرلەمانی کوردستان تۆمارکراوە، بەڵام رێبوار ئەوڕەحمان وتەبێژی فراكسیۆنی نەوەی نوێ لەپەرلەمانی عێراق رایگەیاند: ئەمڕۆ لە دانیشتنی دادگای فیدراڵی تایبەت بە درێژكردنەوەی نایاسایی پەرلەمان و سەرۆكایەتییەكان كە لەلایەن سەرۆكی جوڵانەوەی نەوەی نوێ و سروە عەبدولواحید سەرۆكی فراكسیۆنی نەوەی نوێ تۆماركرابوو دواخرا بۆ حەوتی مانگی دوو كرایە دانیشتنێكی كراوە.
 بڕیاربوو ئەمڕۆ دادگای باڵای فیدراڵیی عێراق لەبارەی دوو سکاڵا کۆببێتەوە کە ئەوانیش یەكەمیان ئەو سكاڵایەی لەسەر درێژکردنەوەی تەمەنی پەرلەمانی کوردستان تۆمارکرابوو، دووەمیش سکاڵا لەسەر هەرسێ سەرۆکایەتییەکەی عێراق تۆمارکرابوو و سکاڵاکار داوا دەکات راسپاردنی محەممەد شیاع سوودانی بۆ پێکهێنانی حکومەت هەڵبوەشێندرێتەوە.
 سکاڵای یەكەم بە ناوی سروە عەبدولواحید، سەرۆکی فراکسیۆنی نەوەی نوێ لە پەرلەمانی عێراق پێشکەشکراوە، لە پاش ئەوەی لەگەڵ سێ سکاڵای دیکەدا یەکخران، کە لەلایەن یوسف محەممەد، سەرۆکی پێشووی پەرلەمانی کوردستان؛ شاسوار عەبدولواحید، سەرۆکی جووڵانەوەی نەوەی نوێ و کاوە عەبدولقادر، سەرۆکی فراکسیۆنی نەوەی نوێ لە پەرلەمانی کوردستان پێشکەش کرابوون و 18ـی کانوونی یەکەمی 2022، یەکەم دانیشتن لەبارەی سکاڵاکان کرا.
 سکاڵاکار لەو سکاڵایەدا داوای پووچەڵکردنەوەی یاسای ژمارە 12ـی رۆژی 9-10-2022ـی تایبەت بە درێژکردنەوەی خولی پێنجەمی پەرلەمانی کوردستان دەکات بەهۆی دژایەتیی لەگەڵ هەردوو ماددەی 5 و 20ـی دەستووری عێراق، جگە لەوەش لە داواکەدا هاتووە: مافی دەستووریی دیاریکراو لە ماددەی 51ـی یاسای هەڵبژاردنی پەرلەمانی کوردستان ژمارە 1ـی ساڵی 1992 پێشێل دەکات.
رۆژی 9ـی تشرینی یەکەمی 2022، پەرلەمانتارانی پارتی و یەكێتی و بەشێك لەفراكسیۆنی گۆڕان و پێكهاتەكان تەمەنی ئەم خولەی پەرلەمانیان تاوەکو کۆتایی ساڵی 2023 درێژکردەوە، خولی پێنجەم رۆژی 06-11-2022 کۆتایی هات، درێژکردنەوەی تەمەنی پەرلەمان  هێزەکانی ئۆپۆزیسیۆنی تووڕەکرد و لەنێوان بەشدارینەکردن لە کۆبوونەوەکانی پەرلەمان و بایکۆتکردنی و هەڵپەساردنی ئەندامێتی خۆیانهێشتەوە.