هەواڵ

گەنجەكەی كەركوك لەپێناو چی دوو هاورێی كوشتیان و هەڵیاندایە ناو بیرەوە؟

پۆلیسی كەركوك تەرمی گەنجێكی دۆزییەوە كە بەوتەی پۆلیسی شارەكە، ئەو گەنجە لەلایەن دوو هاوڕێی خۆیەوە كوژراوە لەپێناو ئەوەی ئۆتۆمبێلەكەی بدزن، ڕووداوەكەش چەند ڕۆژێك لەمەوبەر بووە.

بەیانی ئەمڕۆ تەرمی گەنجێكی تەمەن 29 ساڵ بەناوی قەحتان سەباح لەناو بیری زێرابێكدا لە گەڕەكی سەرچناری كەركوك دۆزرایەوە و پۆلیس بكوژەكانی دەستگیر كرد ، بەوتەی سەرچاوەیەك لەپۆلیسی كەركوك بۆ مایك: ماوەی 11 ڕۆژ بووە  ئەو گەنجە بێ سەروشوێن بووە و كەسوكاری سكاڵایان تۆمار كردووە، پۆلیس توانیویەتی تەرمەكەی لەناو بیری زێرابێكدا لەسەر چەمی خاسە لە گەڕەكی سەرچنار بدۆزێتەوە .

سەرچاوەكە وتیشی: دوای دیارنەمانی گەنجەكە لیژنەیەكی لێكۆڵینەوە پێكهێنرا و دوو هاوڕێی بە تۆمەتی كوشتنی دەستگیر كران و تۆمەتباران دانیان بەتاوەنەكەیاندا ناوە .

لەبارەی هۆكاری تاوانەكەوە سەرچاوەكەی پۆلیسی كەركوك بەمایكی وت: بەهۆی كێشەی پارەوە تاوانەكەیان ئەنجامداوە، لەپێناو كوشتنی و دزینی ئۆتۆمبیلەكەی كە ئۆتۆمبیلێكی جۆری نیسان سەنی بووە، هەروەها دوای كوشتنی گەنجەكە فڕێیان داوەتە ناو بیرەكەوە و ئۆتۆمبیلەكەیان دزیوە .

ئێستا ئەو دوو تۆمەتبارە بە مادەی 406ی یاسای سزادانی عێراقی دەستگیر كراون كە كوشتنی بە ئەنقەستە، تەرمی گەنجەكەش بۆ توێكاری گواستراوەتەوە بۆ پزیشكی دادی كەركوك.

تەندروستی

بەکارهێنانی مەیکەپی دژە ئاو مەترسیدارە؟

توێژینەوەیەک کە لە گۆڤاری زانستی ژینگە و تەکنۆلۆژیادا بڵاو کراوەتەوە ئاماژەی بەوە داوە، بەشێک لە بابەتی جوانکارییەکان کە ئەمڕۆ بەکار دێت، ڕێژەیەکی زۆر لە ماددە کیمیایییە ژەهراوییەکان لە پێکهاتەیاندا هەیە وەک پۆڵی فلۆرۆ ئەڵکیل (PFAS ) . کە بەداخەوە لە پێکهاتەی ماددە جوانکارییەکاندا ئەم ماددە نانووسرێت بۆ ئەوەی خەڵک هۆشیار بێت.

ئیدارەی خۆراک و دەرمانی ئەمریکی (FDA) باس لەوە دەکات، بەشێک لە بابەتە جوانکارییەکانی وەکوو بۆیەی نینۆک و کرێمەکان و سوراو و قەڵەم چاو و ماسکەرا، دەکرێت ئەم ماددانەی تێ بکرێت بۆ ئەوەی زۆرتر بە درەوشاوەیی دەربکەوێت. بۆیە زۆر گرنگە ئەو بابەتە جوانکارییانە بەکار دێت کە دڵنیان لەوەی ئۆریجیناڵە و کوالێتی بەرزە.