هەواڵ

رێککەوتنی هەولێر و بەغداد یان رێککەوتنی فشۆڵ

حکومەتی هەرێمی کوردستان ئومێد لەسەر ڕێککەوتنەکەی لەگەڵ بەغداد هەڵدەچنێت بەڵام بەرپرسانی حکومەتی عێراق رێککەوتنەکە بە فشۆڵ ناودەبەن.

ئەمڕۆ ئەنجومەنی وەزیرانی عێراق کۆدەبێتەوە و دەنگ لەسەر پێشنیار و داواکارییەکانی هەرێمی کورستان دەدات لەسەر موچە و پشکی هەرێمی کوردستان, حکومەتی هەرێمی کوردستان و وەزیرە کوردەکانی کابینەکەی سودانی زۆر ئومێدییان بەم رێککەوتنە  و بڕیارەکەی ئەنجومەنی وەزیرانی هەیە، خالید شوانی وەزیری دادی عێراق بە گەشبینیەوە رایگەیاند، بڕی ئەو پارەیە دیار نییە کە بڕیارە بۆ ناردنی مووچەی فەرمانبەرانی هەرێمی کوردستان بڕیاری لەبارەوە بدرێت بەڵام گەشبینە لە ئەنجومەنی وەزیرانەوە بڕیارێک بە ئاراستەی ناردنی شایستەی فەرمانبەرانی هەرێمی کوردستان دەربچێت.
رۆژی پێنجشەممە 14-9-2023 شاندێکی هەرێمی کوردستان بە سەرۆکایەتیی مەسرور بارزانی سەرۆکوەزیران چووە بەغدا و ژمارەیەک کۆبوونەوەی لەگەڵ بەرپرسانی هەرە باڵای عێراق و پارتە سیاسییەکان کرد، بەشێک لە تەوەری کۆبوونەوەکانیش شایستە داراییەکانی هەرێمی کوردستان، لەنێویشیدا مووچەخۆرانی هەرێمی کوردستان بوو. 

شاندەکەی هەرێمی کوردستان دوو پێشنیارییان بە بەرپرسانی حکومەت و لایەنە سیاسیەکانی عێراق داوە، هەرێمی کوردستان، پێشنیازی کردووە لە مانگەکانی (7 بۆ 12ـی ئەمساڵ) حکومەتی عێراق مانگانە بڕی 800 ملیار دینار بۆ دابینکردنی مووچەی مووچەخۆرانی هەرێمی کوردستان بنێرێت. هەروەها پێشنیازی هەموارکردنەوەی چەند بڕگەیەکی یاسای بودجە تایبەت بە پشکی هەرێمی کوردستانیان خستووەتەڕوو، لەنێویاندا مادده‌كانی 12 و 13.

ئەم رێککەوتن و لێکتێگەشتنەی نێوان هەولێر و بەغداد بۆ ئەمڕۆ یەکشەممە 17-9-2023 رۆژنامەی شەرقولئەوسەت راپۆرتێکی لەبارەوە ئامادەکردوە و  رۆژنامەکە لە زاری بەرپرسانی حکومەتی عێراقییەوە ئاماژەی بۆ ئەوەکردوە، حكومەتی سودانی بەرامبەر شاندەکەی هەرێم نەرمی و نیازپاكی پیشانداوە، کە ئەوە دەستپێشخەری دەبێت بۆ سوككردنی قەیرانی دارایی لەسەر هەرێم بەڵام ئەمە بەردەوام نابێت ئەگەر كوردستان پابەندی رێككەوتنەكە نەبێت.
هەر لە زاری ئەو بەرپرسەی حکومەتی عێراقەوە لە بەشێکی دیکەی راپۆرتەکەی رۆژنامەی شەرقولئەوسەتدا هاتووە،  رێوشوێنەكانی ئێستا كێشە چارەسەر ناكات چونکە لەبەردەم رێككەوتنێكی فشۆڵ و كاتیداین.
بەپێی رۆژنامەی شەرقولئەوسەت قەیرانەکان لەوە قوڵترن دەبینرێن، بۆیە بەغداد تەنها پارە نانێرێت بەڵکو چاودێری هەرێم دەکەن تا بزانن هەولێر پابەندی بڕگەکانی بودجە دەبێت یان نا. 

سەرکردەیەکی چوارچێوەی هەماهەنگی بە رۆژنامەکەی وتوە، هێزە شیعیەكان فشار دەكەن بە ئاڕاستەی هەڵوەشاندنەوەی ئەو مامەڵە سیاسیەی پێشتر هەبووە لەگەڵ هەرێمی كوردستان و دەیانەوێت هەولێر ناچار بكەن بەشێوەیەك مامەڵە لەگەڵ بەغداد بكات كە تاكە دەسەڵاتە لە عێراق.

مووچەخۆرانی هەرێمی کوردستان مووچەی مانگەکانی تەمموز و ئابیان وەرنەگرتووە، ئەوە لە کاتێکدایە چەند رۆژێکی دیکە دەست بە دابەشکردنی مووچەی مانگی ئەیلوول لە ناوچەکانی ژێر دەسەڵاتی حکومەتی عێراق دەکرێت. حکومەتی هەرێمی کوردستان دەڵێت، ناردنی مووچە ئەرکی حکومەتی عێراقە.

تەندروستی

بێ دەنگی تەواو، هۆکارێکە بۆ گەشەکردنی خانەکانی مێشک

بە پێی توێژینەوەیەک کە کۆمەلێک زانای ئەلمانی و ئەمرێکی ئەنجامیان داوەو لە گۆڤاری بەناوبانگی Brain Structure and Function بڵاوکراوەتەوە، زاناکان ئاماژەیان بەوە داوە بێ دەنگی یەکێک لەو هۆکارانەی دەتوانێت ببێتە هۆی گەشەکردنی خانەکانی مێشک.

لە توێژینەوەکەدا، توێژەران کۆمەلێک مشکیان هێنا، و کۆمەلێک دەنگی جیاوازیان لەسەریان تاقیکردەوە هەر لە ژاوەژاو و مۆسیقا و بیدەنگی تەواو، بۆ ئەوەی بزانن کارێگەرییان چۆنە، ئەنجامەکان ئەوەیان دەرخست کە تەنها بێدەنگی تەواو بووەتە هۆی گەشەکردنی بەرچاوی دەمارە نوێیەکانی ناو مێشک کە ڕاستەوخۆ بەشدارە لە بیرەوەری و فێربوون و هەست و سۆزدا.

هەروەها ئاماژەش بەوە کراوە تەنانەت مۆسیقای کلاسیکیش کە بە شێوەیەکی نەریتی پەیوەستە بە باشتربوونی کارکردی مەعریفیەوە، وەک بێدەنگی کاریگەر نەبوو. توێژەران تێبینیان کردووە کە خانە تازە بەرهەم هێنراوەکان لە بێدەنگیدا نەک هەر ژمارەیان زیاترە، بەڵکو چانسی مانەوە و گەشەکردنیان بۆ دەمارەخانە چالاکەکان باشترە. 

ئەم دۆزینەوە ئەوەمان بۆ پێشنیار دەکات ڕەنگە کاتی ئەوە هاتبێت کە ڕۆژانە تەنها دوو کاتژمێر بێدەنگی بە خۆمان بدەین، لەناو پەلەقاژەی ژاوەژاوی دیجیتاڵی و میدیا و فشاری ڕۆژانە و کارکردندا؛ نەک وەک تەنیایی، بەڵکو وەک دەرمانێکی ڕاستەقینە بۆ گەشەکردن و بنیاتنانەوەی دەروون.