Tech

باشترین پرۆگرامی دژەڤایرۆس بۆ ئەپڵ

دەسەڵاتی تاقیکردنەوەی کاڵا و بەرهەمەکانی ئەڵمانیا ڕایگەیاندووە، ڕەنگە بەرنامە زیانبەخشەکان بتوانن بچنە ناو کۆمپیوتەرەکانەوە، یان خۆیان لەناو کۆمپیوتەرەکاندا بشارنەوە، یان بە خێرایی بڵاوببنەوە بۆ ئەوەی زانیاری گرنگ و زانیارییە هەستیارەکان بدزن.

بۆیە باشتر وایە کۆمپیوتەری سەر مێز و لاپتۆپ بە پرۆگرامی باشی دژەڤایرۆس و دژە بەرنامەی زیانبەخش پارێزراو بێت و ئەمەش تەنها بۆ ئەو کۆمپیوتەرانە سنووردار نییە کە سیستەمی کارپێکردنی مایکرۆسۆفت ویندۆزیان تێدایە.

ئامێرەکانی ئەپڵ
هەرچەندە هیچ ڤایرۆسێک نییە کە ئامێرەکانی ئەپڵ بکاتە ئامانج، بەڵام باشترە ئەم ئامێرانە بە پرۆگرامی دژەڤایرۆس پارێزراو بن، چونکە نەک تەنها بەرەنگاربوونەوەی ڤایرۆسەکان، بەڵکو بەرەنگاری هێرشی مەترسیداری داتا فیشینگ دەبنەوە.

دەسەڵاتی ئەڵمانی ڕوونی کردەوە کە 19 پرۆگرامی دژە ڤایرۆسی بۆ ئامێرەکانی مایکرۆسۆفت ویندۆز تاقیکردۆتەوە، هەروەها 9 پرۆگرامی بۆ کۆمپیوتەرەکانی ماک ئۆ ئێس تەیار کردووە. ئەنجامی تاقیکردنەوەکە دەریخست کە بەرنامەی دژەڤایرۆسی دیفێندەر کە لە سیستەمی کارپێکردنی مایکرۆسۆفت ویندۆز ١٠ و ١١دا دروستکراوە، زیاتر لە ڕیزبەندی گشتیی “قبووڵکراو” وەرنەگرتووە. شارەزایانی ئەڵمانی پشتڕاستیان کردەوە کە ئامێرە ئەمنییەکانی سەر کۆمپیوتەرەکانی ویندۆز و ئەپڵ خراپ نین، بەڵام دەتوانرێت بە پشتبەستن بە بەرنامەکانی دژە ڤایرۆس باشتر بکرێن.

بەرنامەی “BitDefender Antivirus for Mac” بە باشترین بەرنامەی دژەڤایرۆس دادەنرێت بۆ ئامێرەکانی ماک، لە کاتێکدا باشترین بەرنامەی دژەڤایرۆسی خۆڕایی بۆ کۆمپیوتەرەکانی ویندۆز بەرنامەی “BitDefender Antivirus Free” ە. لە باشترین بەرنامە بێبەرامبەرەکان بۆ ئامێرەکانی ماک بریتین لە AVG Antivirus و Avast One Essential.

نەرمەکاڵایەکی ئازاد
نەرمەکاڵا ئازادەکان پاراستنی هاوشێوەی وەشانی پارەدار دابین دەکات. تا ئەو کۆمپانیایە کە ئەم بەرنامانە پەرەپێدەدات کڕیاری زیاتری هەبێت، دەتوانرێت زانیاری زیاتر لەسەر وەشانی ئەو بەرنامە زیانبەخشانە کۆبکرێتەوە کە وەشانی پارەدار سوودی لێ وەردەگرن.

هەواڵ

کێ دەبێتە سەرۆکی پەرلەمانی کوردستان؟

چاوەکان لەسەر دانیشتنی داهاتوویی پەرلەمانی کوردستانن کە ئاخۆ کێ دەبێتە سەرۆکی پەرلەمانی کوردستان؟ لەکاتێکدا سێ لایەنە سەرەکییەکە کانیدیان بۆ پۆستەکە هەیە

رۆژی دووشەممە، یەکەمین دانیشتنی خولی شەشەمی پەرلەمانی کوردستان بەڕێوەچوو، دانیشتنەکە بە کراوەیی هێڵدرایەوە و چەند کەسێکیش خۆیان بۆ دەستەی سەرۆکایەتی پەرلەمان کاندید کرد. سەرۆکی دیوانی پەرلەمانی کوردستان دەڵێت، لە ئەمڕۆوە دەبێت پەرلەمانتارەکان دەوام بکەن و جارێکی دیکەش دەرگەی خۆپاڵاوتن بۆ بەربژێری سەرۆکایەتی ناکرێتەوە.

لەگەڵ کردنەوەی دەرگای خۆ کاندیدکردن بۆ دەستەی سەرۆکایەتی پەرلەمانی کوردستان، هەریەکە لە فرکسیۆنەکانی پارتی دیموکراتی کوردستان، یەکێتی نیشتمانیی کوردستان، نەوەی نوێ و پێکهاتەکان کاندیدی خۆیان تۆمار کرد.

بۆ پۆستی سەرۆکی پەرلەمانی کوردستان پارتی دیموکراتی کوردستان دوو کاندیدیان هەبوون، ئەوانیش ڤالا فەرید و هەڵگورد شێخ نەجیب. یەکێتی نیشتمانی کوردستانیش بە هەمان شێوە دوو کەسی بۆ پۆستەکە کاندید کرد، کە میران محەممەد و شاڵاو کۆسرەت رەسووڵ بوون. نەوەی نوێش کاندیدێکی بۆ سەرۆکی پەرلەمان هەیە، کە کوردەوان جەمالە.

بۆ جێگری سەرۆکی پەرلەمانیش هەریەکە لە بەهجەت عەلی و مەرد عەلی رەسووڵ لە پارتی دیموکراتی کوردستان، ئومێد حەمەساڵح و ئازاد حەمەئەمین لە یەکێتی نیشتمانیی کوردستان، هەروەها عەدنان حوسێن لە نەوەی نوێ خۆیان کاندیدی کرد.

بۆ پۆستی سکرتێری پەرلەمانیش لە یەکێتی شیرین یونس و شلێر غەفوور. هاڤین سەعید لە پارتی، سەوسەن کاکەمەند، لە نەوەی نوێ، نەجدەت نووری پێکهاتەی تورکمان لە سلێمانی و رامی نووری لە پێکهاتەی کریستیانەکان لە هەولێر، بەربژێرن.

هیوا نەسرەدین، جێگری سەرۆکی دیوانی پەرلەمانی کوردستان دەڵێت: "بەگوێرەی پەیڕەی نێوخۆی پەرلەمان، جارێکی دیکە دەرگەی خۆپاڵاوتن بۆ دەستەی سەرۆکایەتی پەرلەمانی کوردستان ناکرێتەوە و دەبێت ئەوانەی دوێنێ خۆیان بەربژێر کرد، یەکێک لەوانە هەڵبژێردرێت بۆ پۆستەکانی سەرۆک، سکرتێر و جێگری سەرۆکی پەرلەمانی کوردستان".

لە هەڵبژاردنی پەرلەمانی کوردستاندا کە 20-10-2024 بەڕێوەچوو، پارتی دیموکراتی کوردستان زۆرترین کورسی بەدەستهێنا کە 39 کورسی بوو. دوای ئەویش یەکێتیی نیشتمانیی کوردستان 23 کورسی و نەوەی نوێ 15 کورسییان بەدەستهێنا.