هەواڵ

بەغدا سنورەکانی هەرێمی کوردستان لەگەڵ ئێران تەلبەند دەکات

 حکومەتی عێراق پلانی گەورەترین بەربەستی تەلبەندیی لەسەر سنوورەکانی لەگەڵ ئێران جێبەجێ دەکاو سنورەکانی هەرێمی کوردستانیش لەگەڵ رۆژهەڵاتی کوردستان دەگرێتەوە.

رۆژنامەی شەرق ئەلئەوسەت، بڵاویکردەوە کە بڕیارەکە لە رۆژی یەکشەممەوە دەستبەجێبەجێکردنی کراوە و لە پارێزگای دیالە، خانەقین و مەندەلیەوە دەستپێدەکات تاوەکو سنورەکانی هەرێمی کوردستان لە سنوری پارێزگای سلێمانی و هەولێر.

جێبەجێکردنی پلانەکە دوێنێ یەکشەممە دەستیپێکردووە، تەلبەندکردنی سنووری نێوان عێراق و ئێران لە ڕۆژهەڵاتی پارێزگای دیالە لە مەندەلی و قەزانیەوە دەستپێدەکات تاوەکو پارێزگاکانی سلێمانی و واست.

بەوتەی سەرچاوەیەکی ئەمنی بۆ ڕۆژنامەی شەرقولئەوسەت، لە سنوورەکان تاوەری چاودێری دادەنرێن و کامێرای پێشکەوتوویان بۆ دابین دەکرێت.

پرۆسەکە بەمەبەستی هاوکاریکردنی هێزەکانی پاسەوانی سنوورە لە کۆنترۆڵکردنی سنوورەکان لە هەر حاڵەتێکی قاچاخی و دزەکردن.هەندێکیش پێیانوایە مەبەستی سیاسی لەپشتەوەیە و بۆ رێگریکردنە لەجوڵای ئەو هێزانەی کە نەیاری کۆماری ئیسلامی ئێرانن.

ئەمە بۆ یەکەمجارە لەدوای ساڵی 2003 ەوە حکومەتی عێراق سنوورەکانی بە تەلبەند لەگەڵ ئێران تووند دەکات.

هەواڵ

پەرلەمانی کوردستان دەخرێتەوە ژێر رەحمی چەکوشی دادگای فیدراڵی عێراق

دوو سکاڵا بۆ هەڵوەشاندنەوەی ئەم خولەی پەرلەمانی کوردستان لە دادگای فیدراڵی تۆمار دەکرێت، کە ئەنجامدانی هەڵبژاردنەکەی بە بڕیاری هەمان دادگا بووە.  

 هەڵبژاردنی خولی شەشەمی  پەرلەمانی کوردستان دوای دوو ساڵ دواخستن لە وادەی خۆی، دواجار بە بڕیاری دادگای فیدراڵی کۆتایی ساڵی رابردوو ئەنجام درا.

دادگای فیدراڵی بەشێکی چیرۆکی دواخستنی هەڵبژاردنی پەرلەمانی کوردستان بوو، نزیکەی ساڵێک تاتوێی سکاڵایەکی لەبارەی هەڵبژاردنەکەوە کرد، کە دواجار بە هەڵوەشاندنەوە و دواتر کەمکردنەوەی ژمارەی کورسی کۆتایی پێکهاتەکان کۆتاییهات.

ئێستا جارێکی دیکە ئەنجامی ئەو هەڵبژاردنە خراوەتەوە بەر دەستی دادگای فیدراڵی عێراق، کۆمەڵی دادگەری کوردستان و جوڵانەوەی نەوێ نوێ رایگەیاندووە، لە دادگای فیدراڵی سکاڵایان بۆ هەڵوەشاندنەوەی خولی شەشەمی پەرلەمانی کوردستان تۆمارکردووە.
سکاڵاکەی کۆمەڵی دادگەری کە یەکەم سکاڵایە بۆ هەڵوەشاندنەوەی خولی شەشەم لەلایەن عومەر گوڵپی کاندیدی سەرکەتووی حزبەکە دژی پەرلەمانی کوردستان تۆمار کراوە.

عومەر گوڵپى سەبارەت بە تۆمارکردنی ئەو سکاڵایە رایگەیاندووە،"داوامان لە دادگاى فیدراڵی کردووە، خولەکە هەڵوەشێندرێتەوە و هەڵبژاردن دووبارە بکرێتەوە، هەروەها هەموو ئەو ئیمتیازە ماددییانەى لە پێنج مانگى ڕابردوودا پەرلەمانتاران وەریان گرتووە، لێیان وەربگیرێتەوە".

کۆمەڵى دادگەرى کە لە هەڵبژاردنى خولى شەشەمى پەرلەمانى کوردستاندا سێ کورسیى بەدەستهێنا، دواتر هەڵبژاردنەکەی بە" دیزاینکراو" وەسفکرد و بڕیاریدا بایکۆتی خولەکە بکات.

دوای چوار رۆژ لە سکاڵاکەی کۆمەڵی دادگەری، جوڵانەوەی نەوەی نوێش رایگەیاند، سکاڵایان بۆ هەڵوەشاندنەوەی پەرلەمانی کوردستان تۆمار کردووە. 

نەوەی نوێ رایگەیاندووە، سکاڵاکەی ئەوان دژی سەرۆکی هەرێمی کوردستان، ئەوەیش بەهۆی ئەوەی تا ئێستا بڕیاری هەڵوەشاندنەوەی پەرلەمانی کوردستانی دەرنەکردووە.

ڕۆژی 20ـی تشرینی یەکەمی 2024، هەڵبژاردنی خولی شەشەمی پەرلەمانی کوردستان ئەنجام درا، بەپێی ئەنجامی کۆتایی هەڵبژاردن کە لەلایەن کۆمسیۆنەوە بڵاوکراوەتەوە، پارتی 39 کورسی، یەکێتی 23 کورسی، نەوەی نوێ 15 کورسی، یەکگرتوو 7 کورسی، هەڵوێست 4 کورسی، کۆمەڵ 3 کورسی، بەرەی گەل 2 کورسی و هەریەک لە گۆڕان و هاوپەیمانی کوردستانیش یەکی کورسییەکیان بەدەستهێناوە.

دوای نزیکەی حەوت مانگ لە ئەنجامدانی هەڵبژاردن، تا ئێستا پەرلەمانی کوردستان کارا نەبووە و تەنها پەرلەمانتاران سوێندی یاسایان خواردووە، بەڵام هەموو مانگێک مووچە وەردەرگن.