زانست

زیرەکی دەستکرد هاک دەکرێت

هاککەرەکان توانیویانە بچنە ناو سیستەمی نامە ناردنی ناوخۆیی کۆمپانیای OpenAI و زانیاری لەسەر تەکنەلۆژیاکانی AI ی کۆمپانیاکە بدزن.
ڕۆژنامەی نیویۆرک تایمز لە ڕاپۆرتێکدا  ڕایگەیاندووە کە، کۆمپانیاکە ڕووداوەکەی لە کڕیارەکانی و لایەنە پەیوەندیدارەکانی شاردووەتەوە و تەنها کارمەندەکانی ئاگادارکردووەتەوە.
کارگێڕان بڕیاریاندا ئەو هەواڵە بە ئاشکرا بڵاونەکەنەوە، چونکە هیچ زانیارییەک لەسەر کڕیاران یان هاوبەشەکانیان نەدزراوە، هەروەها ڕووداوەکەیان بە مەترسی بۆ سەر ئاسایشی نیشتمانی نەزانیوە، چونکە پێیانوابوو هاککەرەکە کەسێکی تایبەتە و هیچ پەیوەندییەکی ناسراوی لەگەڵ حکومەتێکی بیانیدا نییە.
هاککەرەکە توانیویەتی دەستی بە گفتوگۆکان بگات لە میانی کۆڕێکی ئەلیکترۆنی بۆ کارمەندانی OpenAI، کە تیایدا باسیان لە نوێترین تەکنەلۆژیای زیرەکی دەستکرد کردووە، کە لەلایەن کۆمپانیاکە پەرەی پێدراوە.
ڕۆژنامەکە بە پشتبەستن بە دوو سەرچاوەی ناو کۆمپانیاکە بڵاویکردەوە، کە هەندێک لە کارمەندانی OpenAI پێشتر هۆشدارییان دابوو لە ئەگەری قۆستنەوەی وڵاتانی وەک چین لەو جۆرە هێرشانە بۆ دزینی تەکنەلۆژیای زیرەکی دەستکرد، ئەمەش دەتوانێت ئاسایشی نیشتمانی ئەمریکا بخاتە مەترسییەوە.

هەواڵ

کێ دەبێتە سەرۆکی پەرلەمانی کوردستان؟

چاوەکان لەسەر دانیشتنی داهاتوویی پەرلەمانی کوردستانن کە ئاخۆ کێ دەبێتە سەرۆکی پەرلەمانی کوردستان؟ لەکاتێکدا سێ لایەنە سەرەکییەکە کانیدیان بۆ پۆستەکە هەیە

رۆژی دووشەممە، یەکەمین دانیشتنی خولی شەشەمی پەرلەمانی کوردستان بەڕێوەچوو، دانیشتنەکە بە کراوەیی هێڵدرایەوە و چەند کەسێکیش خۆیان بۆ دەستەی سەرۆکایەتی پەرلەمان کاندید کرد. سەرۆکی دیوانی پەرلەمانی کوردستان دەڵێت، لە ئەمڕۆوە دەبێت پەرلەمانتارەکان دەوام بکەن و جارێکی دیکەش دەرگەی خۆپاڵاوتن بۆ بەربژێری سەرۆکایەتی ناکرێتەوە.

لەگەڵ کردنەوەی دەرگای خۆ کاندیدکردن بۆ دەستەی سەرۆکایەتی پەرلەمانی کوردستان، هەریەکە لە فرکسیۆنەکانی پارتی دیموکراتی کوردستان، یەکێتی نیشتمانیی کوردستان، نەوەی نوێ و پێکهاتەکان کاندیدی خۆیان تۆمار کرد.

بۆ پۆستی سەرۆکی پەرلەمانی کوردستان پارتی دیموکراتی کوردستان دوو کاندیدیان هەبوون، ئەوانیش ڤالا فەرید و هەڵگورد شێخ نەجیب. یەکێتی نیشتمانی کوردستانیش بە هەمان شێوە دوو کەسی بۆ پۆستەکە کاندید کرد، کە میران محەممەد و شاڵاو کۆسرەت رەسووڵ بوون. نەوەی نوێش کاندیدێکی بۆ سەرۆکی پەرلەمان هەیە، کە کوردەوان جەمالە.

بۆ جێگری سەرۆکی پەرلەمانیش هەریەکە لە بەهجەت عەلی و مەرد عەلی رەسووڵ لە پارتی دیموکراتی کوردستان، ئومێد حەمەساڵح و ئازاد حەمەئەمین لە یەکێتی نیشتمانیی کوردستان، هەروەها عەدنان حوسێن لە نەوەی نوێ خۆیان کاندیدی کرد.

بۆ پۆستی سکرتێری پەرلەمانیش لە یەکێتی شیرین یونس و شلێر غەفوور. هاڤین سەعید لە پارتی، سەوسەن کاکەمەند، لە نەوەی نوێ، نەجدەت نووری پێکهاتەی تورکمان لە سلێمانی و رامی نووری لە پێکهاتەی کریستیانەکان لە هەولێر، بەربژێرن.

هیوا نەسرەدین، جێگری سەرۆکی دیوانی پەرلەمانی کوردستان دەڵێت: "بەگوێرەی پەیڕەی نێوخۆی پەرلەمان، جارێکی دیکە دەرگەی خۆپاڵاوتن بۆ دەستەی سەرۆکایەتی پەرلەمانی کوردستان ناکرێتەوە و دەبێت ئەوانەی دوێنێ خۆیان بەربژێر کرد، یەکێک لەوانە هەڵبژێردرێت بۆ پۆستەکانی سەرۆک، سکرتێر و جێگری سەرۆکی پەرلەمانی کوردستان".

لە هەڵبژاردنی پەرلەمانی کوردستاندا کە 20-10-2024 بەڕێوەچوو، پارتی دیموکراتی کوردستان زۆرترین کورسی بەدەستهێنا کە 39 کورسی بوو. دوای ئەویش یەکێتیی نیشتمانیی کوردستان 23 کورسی و نەوەی نوێ 15 کورسییان بەدەستهێنا.