هەواڵ

دژی نەدانی مووچە بایکۆت لە فەرمانگەکان دەستیپێکرد

حکومەتی عێراق دەستیکرد بە دابەشکردنی مووچەی مانگی نۆ، بەڵام لە هەرێمی کوردستان هێشتا مووچەی مانگی حەوت دابەشنەکراوە، ئەوەش وایکرد کە ئەمڕۆ بەشێک لە فەرمانگە حکومییەکان لەسنوری سلێمانی مانبگرن.

مانگرتنی ئەو فەرمانگانە کاروباری هاوڵاتیانی راگرتووە، بەڵام فەرامبەرەکانی دەڵێن تاوەکو مووچەیان پێنەدرێت بایکۆت ناشکێنن چونکە بۆ 60 رۆژ دەچێت هیچ مووچەیەکیان وەرنەگرتووە.

حکومەتی عێراق بۆ مووچەی مانگی حەوت و هەشت پێنج جەردە پارەی بۆ هەرێمی کوردستان ناردووە کەچی تائیستا حکومەتی هەرێم مووچەی مانگی حەوتی دابەشنەکردووە.

جگە لەو پارەیەی کە بەغدا مانگانە بۆ مووچە رەوانەی دەکات، حکومەتی هەرێم لەڕێگەی باج و داهاتی ناوخۆیی و فرۆشتنی نەوتەوە نزیکەی 500 ملیۆن دۆلاری دەستدەکەوێت، بەڵام هیچ کات لەو پارەیە مووچە دابەشناکات.

دواکەوتنی مووچەی ئەمجارە پەیوەندی بە 30 هەزار ناوی زیادکراوەوە هەبوو لە لسیتی مووچەدا لەلایەن پارتی و یەکێتییەوە، بەجۆرێک یەکێتی 13 هەزار و پارتشی 17 هەزار ناوی نوێی وەهمییان لە لیستی مووچەدا زیاد کردبوو، بەڵام وەزارەتی دارایی عێراق ئەو ناوانەی رەتکردوە و دەڵێت "ناوەکان وەهمین و ئەسڵ و ئەساسیان نییە."

هەواڵ

دامەزراوەی ڤیژن و ناوەندی نەهرین یاداشتنامەیەکیان واژۆکرد

دامەزراوەی ڤیژن لە بڵاوکراوەیەکدا رایگەیاندووە، دامەزراوەی ڤیژن و ناوەندی نەهرین یاداشتنامەیەکیان بۆ کاریی هاوبەش و پێکەوەیی واژۆکرد.

لە بڵاوکراوەکەدا ئەوەش هاتووە، رۆژی دووشەممە 15ـی ئەیلوولی 2025 یاداشتنامەیەکی لێکتێگەشتن لە نێوان دامەزراوەی ڤیژن بۆ لێکۆڵینەوەی ستراتیجی و ناوەندی نەهرەین بۆ لێکۆڵینەوەی ستراتیجی لە شاری بەغدا واژۆکرا.

ئەوەشی خستووەتەڕوو، بە گوێرەی یاداشتنامەکە، هەردوو دامەزراوەکە وەک دوو خانەی بیری گرنگ و کاریگەر، هەماهەنگی و هاوبەشی دەکەن دەربارەی ئەنجامدانی توێژینەوە و پڕۆژە و چالاکی هاوبەش لە سەرتاسەری عێراقدا.

باسی لەوەشکردووە، ئامانجی یاداشتنامەکە دەستنیشانکردنی کێشە و گرفتەکان لە هەرێمی کوردستان و عێراق و خستنەڕووی چارەسەرەکان.