هەواڵ

ئەم با بەهێزە تا کەی بەردەوام دەبێت؟

ئاسۆ کەمال، بەڕێوەبەرایەتی کەشناسی و بومەلەرزەزانی سلێمانی ڕایگەیاند، ئەم با بەهێزەی ئێستا بای ڕۆژهەڵات و باکووری ڕۆژهەڵاتە، کە لەناوچەیەکی ساردەوە هەڵدەکات، بۆیە لەگەڵ هەڵکردنی با دا، پلەکانی گەرما دابەزیبوون.
ئەمڕۆ خێرایی با ١٢ مەترە لە چرکەیەکدا، دەکاتە ٤٠ بۆ ٤٥ کیلۆمەتردایە لە کاتژمێرێکدا، پلەکانی گەرماش لەنێوان ١٩ بۆ ٣١ پلەی سەدی بێت، ئەمەش نزیکە لە ئاستی تێکڕایی بۆ ئەم وەرزە.
ئەم با بەهێزە تا درەنگی ئەمشەو بەردەوام دەبێت، لە سبەینێوە خێراییەکەی کەمتر دەبێتەوە.

هەواڵ

دامەزراوەی ڤیژن و ناوەندی نەهرین یاداشتنامەیەکیان واژۆکرد

دامەزراوەی ڤیژن لە بڵاوکراوەیەکدا رایگەیاندووە، دامەزراوەی ڤیژن و ناوەندی نەهرین یاداشتنامەیەکیان بۆ کاریی هاوبەش و پێکەوەیی واژۆکرد.

لە بڵاوکراوەکەدا ئەوەش هاتووە، رۆژی دووشەممە 15ـی ئەیلوولی 2025 یاداشتنامەیەکی لێکتێگەشتن لە نێوان دامەزراوەی ڤیژن بۆ لێکۆڵینەوەی ستراتیجی و ناوەندی نەهرەین بۆ لێکۆڵینەوەی ستراتیجی لە شاری بەغدا واژۆکرا.

ئەوەشی خستووەتەڕوو، بە گوێرەی یاداشتنامەکە، هەردوو دامەزراوەکە وەک دوو خانەی بیری گرنگ و کاریگەر، هەماهەنگی و هاوبەشی دەکەن دەربارەی ئەنجامدانی توێژینەوە و پڕۆژە و چالاکی هاوبەش لە سەرتاسەری عێراقدا.

باسی لەوەشکردووە، ئامانجی یاداشتنامەکە دەستنیشانکردنی کێشە و گرفتەکان لە هەرێمی کوردستان و عێراق و خستنەڕووی چارەسەرەکان.