هەواڵ

هەڕەشەی کوشتن لە ژینێ ئه‌تروشی دەکرێت

لێدوانێکی هونەرمەند ژینێ ئەتروشی لەبارەی "سەگی بێلانە"وە کاردانەوەی لێدەکەوێتەوە و دەڵێت، هەڕەشەی کوشتنم لێ دەکرێت، بەڵام پەشیمان نیم. 

پرسی قەڵاچۆکردنی سەگی بێلانە لە دهۆک، کاردانەوەی جیاوازی دروستکردووە، یەکێک لەو کەسانەی نیگەرانی لەسەر لەناوبردنی ئەو سەگە دەربڕیووە هونەرمەندی گۆرانیبێژ ژینێ ئەتروشییە. 
ژینێ لە لێدوانەکانی بۆ کەناڵەکانی ڕاگەیاندن لەگەڵ ئیدانەکردنی لەناوبردنی سەگی بێلانە، باسی لە مافی ئاژەڵان لەناویاندا سەگ لە وڵاتی ئەوروپا کرد و ڕایگەیاند،" لە کۆمەڵگای دەرەوە ژن یەکەم شتە دواتر منداڵ پاشان سەگ ئینجا پیاو". 

ئەم لێدوانە هەرزوو کاردانەوەی لێکەوتەوە و نیگەرانی لەناو بەشێک لە بەکارهێنەرانی تۆڕە کۆمەڵایەتییەکاندا دروست کرد و بەشێک لە بەکارهێنەرانی ئەو تۆڕانە بە "زمانی زبر" هێرشیانە کردە سەر ئەو خانمە هونەرمەندە. 
بەپێی ئەو کۆمێنتانەی لە ژێر پۆستی وتەکانی ژینێ دا نوسراون لەگەڵ ئەوەی سوکایەتی و بێڕزی بەو هونەرمەندە تێیاندا دەبینرێت و هەڕەشەی جۆراوجۆریشیان لەناودا بەدیدەرکرێت. 

بەپێی وتەی ژینێ ئەتروشی بۆ کەناڵەکانی ڕاگەیاندن، بەهۆی ئەو لێدوانەوە ڕوبەڕوی هەڕەشەی کوشتن بووتەوە، بەکارهێنەرانی تۆڕە کۆمەڵایەتییەکان بە نامە و کۆمێنێت هەڕەشەکانیان بۆ ناردووە، وەک خۆشی باسی کردووە،" چه‌ند مامۆستایه‌كی ئاینی له‌ بڵندگۆی مزگه‌وته‌وه‌ ناویان زڕاندوم، بەڵام من پەشیمان نیم و سکاڵا تۆمار دەکەم".

داوای پاراستنی ژینێ دەکرێت
هەڕەشە و هێرشەکانی سەر ژینێ ئەتروشی، ڕێکخراوەکانی تایبەت بە مافی مرۆڤی هێناوەتە سەر هێڵ، تۆڕی هاوپەیمانی 19 لە ڕاگەیەندراوێکدا داوای لە کار بەدەستانی دهۆک کردووە، ژیانی ئەو خانمە هونەرمەندە بپارێزن.
تۆڕەکە لەگەڵ پشتیوانیکردندا، سەرجەمی ئەو هێرش و هەڕەشانەی پشتراستکردوەتەوە کە ڕوبەڕووی ئەو هونەرمەندە دەبنەوە و ئیدانەی کردوون. 

تۆڕی هاوپەیمانی19 لە نیسانی ساڵی 2024 دامەزراوە، پێك دێت لە كۆمەڵێك داكۆكیكارانی مافەكانی مرۆڤ، رێكخراوەكانی كۆمەڵگەی مەدەنی، دامەزراوەكانی میدیا، لە هەرێمی كوردستان، هەروەها كاردەكات، بۆ چاودێری و بەرەوپێشبردن و پاراستنی ئازادی ڕادەربڕین، ناوی تۆڕەكە لە بەندی 19 لە جاڕنامەی گەردوونی مافی مرڤەوە وەریگیراوە

 ژینێ ئه‌تروشی
ژینێ ئەتروشی لە 1998 لەدایكبووە، خەڵکی دهۆکە، بەڵام لە نەرویج ژیاوە، چەند ساڵێکە دەستی بە کاری هونەری کردووە و خاوەنی چەند گۆرانی و ڤیدیۆکلیپێکە.
ژینێ لە سێ ساڵی ڕابردوو، توشی شێرپەنجەی مەمک بوو، بەڵام توانی بەسەر نەخۆشیەکەدا زاڵ بێت و دۆخی تەندورستی ناجێگیر تێپەڕێنێت. 

هەواڵ

موقتەدا سەدر هەڵبژاردن رەتدەکاتەوە و چاوەڕێی دوو ئەگەرە

سەرەڕای کشانەوەی لە پرۆسەی سیاسی و بەشدارینەکردنی لە هەڵبژاردنی داهاتووی پەرلەمانی عێراق، بەڵام موقتەدا سەدر هێشتا مۆتەکەی دەسەڵاتدارانی عێراقە، ئەمەش وایکردووە لەلایەک چاویان لەسەر هەڵبژاردن بێت و لەلایەکیش چاویان لەسەر سەدر بێت، خودی موقتەدا سەدریش چاوەڕێی روودانی دوو ئەگەرە لە عێراق.

موقتەدا سەدر سەرکردەی ڕەوتی سەدر، هێشتا یەکێکە لە گەورەترین مەتەڵە سیاسییەکان، کە ڕووبەڕووی نەیارەکانی دەبێتەوە لە چوارچێوەی هەماهەنگیدا، یان تەنانەت لایەنگران و هاوپەیمانە نزیکەکانی.

لەدوای بڕیارە بەناوبانگەکەی سەدر بۆ کشانەوەی کوتلە پەرلەمانییەکەی کە خاوەنی 72 کورسی پەرلەمانی بوو، لە هاوینی 2022 و راگەیاندنی ڕەتکردنەوەی کارکردن لەگەڵ "گەندەڵکاران" کە مەبەستی چوارچێوەی هەماهەنگی بوو، پێشبینیەکان سەبارەت بە هەنگاوی داهاتووی سەدر بەردەوام مشتومڕی لە نێوان سیاسەتمەداران و شیکەرەوەکان و تەنانەت هاوڵاتیانی ئاسایی دروستکردووە.

موقتەدا سەدر لە هەموو پەیامەکانیدا سەبارەت بە کشانەوەی لە پرۆسەی سیاسی و هەڵبژارد، تەنها ئاماژەی بە چینێکی گەندەڵی دەسەڵاتدار کردووە، بەبێ ئەوەی هیچ نیازێکی تری خۆی بخاتەڕوو، بەڵام سەرکردەویەکەی چوارچێوەی هەماهەنگی خواستی سەدر ئاشکرا دەکات.

سەرکردەیەک لە چوارچێوەی هەماهەنگی کە نەیویست ناوی ئاشکرا بکرێت، بە ڕۆژنامەی «الشرق الأوسط»ـى راگەیاندووە، سەدر سیستەمێکی دەوێت کە لەگەڵ تێڕوانینی خۆیدا بگونجێت، کە لەوانەیە لەگەڵ تێڕوانینی ئەوانی تردا نەگونجێت.

ئەو سەرکردەیەی چوارچێوەی هەماهەنگی پێیوایە، کشانەوەی ئێستای موقتەدا سەدر لە پرۆسەی سیاسی و بایکۆتی هەڵبژاردن، لەم دیدگایەوە سەرچاوە دەگرێت نەک ڕق لە کاری سیاسی.

ئاماژە بە پێگە و بەهێزی سەدر دەکات لە دەرەوەی پرۆسەی سیاسی و دەڵێت: لەوانەیە یارییەکە بە تەواوی بگۆڕێت تەنانەت ئەگەر لە پێشبڕکێی هەڵبژاردنیش دوور بێت، هەر بۆیە، چوارچێوەی هەماهەنگی چاوێکیان لەسەر هەڵبژاردنەکان و چاوەکەی دیکەش لەسەر سەدرە.

لەگەڵ ئەوەی لایەنەسیاسییەکان و چاودێرانی سیاسی پێیانوابوو، سەدر لە چوار ساڵی رابروودا، شەقامی لە بەرژەوەندی خۆی ساز و ئامادەکردووە بۆ چوونە سەر سندوقەکانی دەنگدان، بەڵام لە بڕیارێکی چاوەڕواننەکراودا، سەدر بایکۆتکردنی هەڵبژاردنی راگەیاند، هەرچەندە سەرۆک کۆماری عێراق بە فەرمی داوای لێکرد بە بڕیارەکەیدا بچێتەوە، بەڵام ئەو سوربوو لەسەر بڕیارەکەی.

لە ناوەڕاستی مانگی تەمووزی ساڵی ڕابردوودا، موقتەدا سەدر بڕیارێکی دەرکرد بۆ دوورخستنەوەی 31 کەس لە بزووتنەوەکە و باڵی سەربازی سەرایا سەلام، بەهۆی ئاماەکارییان بۆ بەشداریکردنیان لە هەڵبژاردنەکانی داهاتوودا.

سەرکردەیەکی رەوتی سەر بە رۆژنامەی «الشرق الأوسط»ـى وتووە، ڕەوتی سەدر پشتگیری لە هیچ لیست و کاندیدێک ناکات لە هەڵبژاردنەکانی داهاتوودا، ئەو سەرکردەیە ڕەتی دەکاتەوە پێشبینی هەنگاوەکانی داهاتووی سەدر بکات و دەڵێت: هەموو شتێک دەگونجێت، بەڵام کەس نازانێت چۆن و کەی ڕوودەدات.

ئەو سەرکردەیە ئاماژەی بەوەکردووە، کە سەدر درکپێدەکات و گرەو لەسەر ئەگەری داڕمانی چوارچێوەی هەماهەنگی دەکات بە تێپەڕبوونی کات، چونکە بڕوا وایە سیستەمی سیاسی ئێستا بە ئاسانی چاکسازی ناکرێت.

دەشڵێت: سەدر هەموو جۆرە کارێکی سیاسی تاقیکردۆتەوە. بەشداری کردن لە پەرلەمان و کشانەوەی لێی و بەشداریکردن لە حکومەت و کشانەوەی لێی و هەروەها دژایەتیکردنی چالاکی لە شەقامدا و پێدەچێت گەیشتووەتە ئەو ئەنجامەی کە ئەم سیستەمە توانای چاکسازی نییە.

یەکێکی تر لەو ئەگەرانەی کە سەدر چاوەڕێی دەکات، شوێنگرتنەوەی عەلی سیستانی مەرجەعی باڵای شیعەکانە لە عێراق، خودی سەدریش خواستی خۆی بۆ جێگرتنەوەی نەشاردووەتەوە و بەپێی بنەماکانی مەزهەبی شیعە، موقتەدا سەدر هەموو مەرجەکانی تێدایە.