بنکۆڵکاری

Mic Exclusive : کۆبونەوەکانی پارتی و یەکێتی چەقیان بەستووە

کۆبونەوەکانی پارتی و یەکێتی بۆ پێکهێنانی حکومەت چەقدەبەستن و وەفدە دانوستانکارەکان چاوەڕوانی کۆبونەوەی لوتکەی حزبەکانیان دەکەن. وتەبێژی یەکێتی دەڵێت،" وادەی کۆبونەوەی لوتکە دیار نییە". 

 بەپێی ئەو زانیارییە تایبەتانەی لە ئەندامانی شاندی دانوستانکاری پارتی دیموکراتی کوردستان و یەکێتیی نیشتمانی کوردستانەوە بە Mic دراون، کۆبونەوەکانی پارتی و یەکێتی لەسەر پێکهێنانی حکومەت چەقیان بەستووە.
ئەندامانی شاندی دانوستانکاری هەردوو حزبەکە، هۆکاری چەقبەستنی کۆبونەوەکان بۆ ئەنجامنەدانی کۆبونەوەی لوتکە بۆ چارەسەرکردنی تەواوی کێشەکان دەگەڕێننەوە. 
وەفدی دانوستانکاری پارتی و یەکێتی رەشنوسێکیان بۆ پێکهێنانی حکومەت ئامادەکردووە، بەڵام تا ئێستا واژۆی رەشنوسەکەیان نەکردووە. 
دوو حزبەکە لە دوای ئامادەکردنی رەشنووسێکەوە بۆ یەکەمجار، 22ـی شوبات، پارتی دیموکراتی کوردستان و یەکێتیی نیشتمانیی کوردستان لە سلێمانی کۆبوونەوە و رایانگەیاند،"کۆبوونەوەکانیان بەردەوام دەبن "بۆ زیاتر لێکتێگەیشتن و داڕشتنی بەرنامەیەکی هاوبەشی پەسەندکراو لەپێناو بەرژەوەندیی هاووڵاتییانی هەرێمی کوردستان". 
پارتی و یەکێتی لە دوای ئەو راگەیەندراوەوە، جارێکی دیکە لە 26ـی شوبات لە هەولێر کۆبوونەوە، بەڵام لەو کاتەوە تا ئێستا هیچ کۆبونەوەیەکیان ئەنجام نەداوە. 
سەعدی ئەحمەد پیرە وتەبێژی یەکێتی نیشتمانی کوردستان بە Micـی راگەیاند،"هەندێک بابەتی گرنگ لەسەر رێککەوتنی یەکێتی و پارتی بۆ پێکهێنانی حکومەت هەڵگیراون بۆ کۆبوونەوەی لوتکەی نێوان کاک بافڵ و کاک مەسعود، بەڵام تائێستا هیچ وادەیەک بۆ ئەنجامدانی ئەو کۆبوونەوەیە دیاری نەکراوە". 
سەبارەت بە گفتوگۆکانی نێوان هەردوو حزبەکە، وتەبێژی یەکێتی وتی،" یەکێتی و پارتی بۆ پێکهێنانی حکومەت لەسەر 90%ـی خاڵەکان رێککەوتوون و نزیکی 10%ـی  ماوە و ئەوەش هەڵگیراوە بۆ کۆبوونەوەی لوتکە یەکلایی بکاتەوە". 
پێشتر، رۆژنامەی (العربي الجدید) بڵاویکردەوە، کۆبونەوەکانی یەکێتی و پارتی لەبارەی بەرنامەی داهاتوی حکومەت و میکانیزمی دابەشکردنی پۆستە حكومیەكان، هیچ ئەنجامێکی لێنەکەوتوەتەوە.
یەکێتی پێداگرە لە بەدەستهێنانی یەکێک لە سەرۆکایەتییەکان سەرۆکایەتی هەرێم و سەرۆک وەزیران وەک بەشێک لە شایستەی هەڵبژاردن، بەڵام پارتی ئەمە رەتدەکاتەوە، دەیەوێت دەست بەسەر سەرۆکایەتییەکان بگرێت و دۆخەکە وەک خۆی بمێنێتەوە بەبێ هیچ گۆڕانکارییەک.
بەپێی رۆژنامەی (العربي الجدید)، لە چەند رۆژی داهاتووشدا کۆبونەوەی نوێی مەکتەبی سیاسی پارتی و یەکێتی، بە بەشداری لیژنە تەکنیکیەکانی دانوستاندن ئەنجامدەدرێت، بۆ یەکلایكردنەوەی ئەو دۆسیەیە.
ڕۆنامەکە بە پشتبەستن بە سەرچاوەکانی ڕایگەیاندووە، بەم نزیکانە کۆبونەوەیەکی گرنگ لەنێوان بافڵ تاڵەبانی سەرۆکی یەکێتی و مەسعود بارزانی سەرۆکی پارتی ئەنجام دەدرێت، پێشبینی دەکرێت رێککەوتنی دواین هەنگاوەكانی پێکهێنانی حکومەتی نوێی هەرێمی کوردستان تیادا ئەنجامبدرێت، لەگەڵ چۆنیەتی دابەشکردنی پۆستەکان لەنێوان هەردوو لایەن.
لیژنەیەکی تەکنیکی لەنێوان پارتی و یەکێتی پێکهێنراوە بۆ شێوازی بەڕێوەبردنی کابینەی نوێی حکومەت. لیژنەکە دوای پێنج کۆبوونەوە، رەشنووسێکیان ئامادەکرد بۆ پێکهێنانی کابینەی دەیەمی حکومەتی هەرێمی کوردستان.
لیژنەی تەکنیکیی پارتی بەسەرۆکایەتیی پشتیوان سادق و ئەندامیێتیی دڵشاد شەهاب و ئومێد سەباح بوو. شاندی یەکێتیش بە سەرۆکایەتیی رێواز فایەق و ئەندامیێتی هەریەک لە شاڵاو شێخ سەلاح و ئامانج رەحیم بوو.
نزیکەی پێنج مانگ بەسەر هەڵبژاردن و زیاتر لە سێ مانگیش بەسەر یەکەم دانیشتنی خولی شەشەمی پەرلەمان تێپەڕیوە، بەڵام هێشتا لایەنە سیاسییەکان نەگەیشتوونەتە رێککەوتن بۆ هەڵبژاردنی سەرۆکایەتیی پەرلەمان و سەرۆکی هەرێمی کوردستان و پێکهێنانی کابینەی دەیەمی حکومەت.

هەواڵ

"بەبێ رێککەوتن لەسەر پۆستەکان کۆبوونەوەی پەرلەمان لە مانگی ئەیلول ئەگەرێکی دورە"

مانگی ئەیلول پەرلەمانی کوردستان دانیشتنەکانی دەستپێدەکات و بەڕێوەبەری راگەیاندنی پەرلەمان-یش دەڵێت: ئامادەکاریی تەواویان کردووە، بۆچونێکیش پێیوایە قورسە بەبێ رێککەوتن دانیشتنەکانی پەرلەمان دەستپێبکات، پێکهاتەکانیش داوا دەکەن لە سەرۆکایەتیی پەرلەمان پشکیان پێ بدرێت.

لە کۆبوونەوەی هەفتەی رابردووی یەکێتی و پارتی رێککەوتوون لە سەر ئەوەی لە مانگی ئەیلول دانیشتنەکانی پەرلەمان دەستپێبکات و تێیدا دەستەی سەرۆکایەتیی هەڵبژێردرێت.

ڤالا فەرید، سەرۆکی فراکسیۆنی پارتی دیموکراتی کوردستان، لە کۆنگرەیەکی رۆژنامەوانیدا رایگەیاند، مانگی داهاتوو دانیشتنەکانی پەرلەمانی کوردستان دەستپێدەکات و پەرلەمان کارا دەکرێتەوە.

تەنها سێ ڕۆژ ماوە بۆ تێپەڕبوونی 10 مانگ بەسەر هەڵبژاردنی پەرلەمانی کوردستان، کە لە 20ـی تشرین یەکەمی 2024 بەڕێوەچوو، بەهۆی ململانێکانی نێوان یەکێتیی نیشتمانیی کوردستان و پارتی دیموکراتی کوردستان تائێستا نەتوانراوە دەستەی سەرۆکایەتیی پەرلەمان هەڵبژێردرێت.

سەرۆکی فراکسیۆنی پارتی زیاتری وت و ئاماژەی بەوەکرد، یەکەم کاریان لە کۆبوونەوەی مانگی ئەیلول هەڵبژاردنی دەستەی سەرۆکایەتیی پەرلەمان دەبێت و بەشێوەیەکی هەمیشەیی و دواتر لیژنە بەردەوامەکان پێکدەهێنرێت.

 پەیکەری سەرۆکایەتیی پەرلەمانی کوردستان لە سەرۆک، جێگر و سکرتێری پەرلەمان پێکدێت، لە خولی پێشوو سەرۆک لای یەکێتی و جێگری سەرۆک لای پارتی بوو، سکرتێری پەرلەمانیش لای پێکهاتەی تورکمان بوو.

 سامان ئەحمەد، بەڕێوەبەری راگەیاندنی پەرلەمانی کوردستان بە دیجیتاڵ میدیای MICـی  راگەیاند، ستافی پەرلەمان ئامادەکاریی تەواویان کردووە بۆ بەڕێوەچوونی دانیشتنی پەرلەمان لە مانگی ئەیلول.

ئەگەر دانیشتنەکەی پەرلەمان لە مانگی ئەیلول بەڕێوەبچێت، بەتەمەنترین ئەندام سەرۆکایەتیی دانیشتنەکە دەکات و لە فراکسیۆنی یەکێتی دەبێت، کە ئەویش ئازاد حەمەئەمین-ە.

بەڕێوەبەری راگەیاندنی پەرلەمانی کوردستان ئەوەشی خستەڕوو،  دیوانی پەرلەمان ئامادەیە بۆ کۆبوونەوە، بەڵام ئەوەی گرنگە هاوهەڵوێستی لایەنەکانە بۆ ئەو کۆبوونەوەیەی باسی لێوەکراوە.

بۆچونێکیش هەیە پێیوایە، کۆبوونەوەی پەرلەمانی کوردستان لە مانگی ئەیلول ئەگەرێکی دوورە و ناکرێت، چونکە پێویستی بە رێککەوتنی پێشوەختە هەیە لەسەر یەکلاکردنەوەی پۆستەکان و تائێستا ئەو رێککەوتنە نەکراوە.

هێشتا دیارنییە کۆبوونەوەکەی پەرلەمانی کوردستان لە مانگی ئەیلول دەکرێت یان نا، مونا قەهوەچی، سکرتێری پێشووی پەرلەمان داوا دەکات لە پۆستەکانی سەرۆکایەتیی پێکهاتەکان بێبەش نەکرێت و پۆستیان پێ بدرێت.

ئەوە لە کاتێکدایە، ئەم دانیشتنەی پەرلەمانی کوردستان ئەگەر بکرێت، لەدوای نزیکەی هەشت مانگ و 15 رۆژ دێت لە یەکەم دانیشتنی خولی شەشەمی پەرلەمانی کوردستان کە لە 2-12-2024 بەڕێوەچوو و تائێستا هیچ کۆبوونەوەیەکی دیکەی نەکردووە.