بنکۆڵکاری

40 ڕۆژ تێپەڕ دەبێت.. دوو دۆسیە لەبارەی گیانلەدەستدانی وریا حەمەکەریم کراونەتەوە

40 رۆژ بەسەر کۆچیی دوایی رۆژنامەنوس وریا حەمەکەریم تێپەڕ دەبێت، دوو دۆسیە لەبارەی گیانلەدەستدانی کراونەتەوە و دادگا دەیەوێت لایەنی کەمتەرخەم سزا بدات.

40 رۆژ بەسەر کۆچیی دوایی رۆژنامەنوس وریا حەمەکەریم و وەرزشوانێک لە روداوێکی هاتوچۆدا لەسەر رێگای سلێمانی - عەربەت تێپەڕ دەبێت. 
دادگا دوو دۆسیەی جیاوازی لەسەر روداوەکە کردوەتەوە، یەکێکیان تایبەتە بەو بارە قاچاخەى ئۆتۆمبێلە بارهەڵگرەکە هەڵیگرتبوو، ئەوەى دیکەش تایبەتە بە سکاڵاى کەسوکارى وریا حەمەکەریم لەسەر شۆفێرەکە. 

دۆسیەی روداوەکە
بەپێی ئەو زانیارییانەی دەست Mic کەوتوون، لە رۆژی روداوەکەوە بە بڕیاری دادوەر شۆفێری ئەو بارهەڵگرەی بووەتە هۆکاری روداوەکە دەستگیرکراوە و لێکۆڵینەوە لەگەڵیدا بەردەوامە.
بە بڕیاری دادوەر، "پشکنینى جەستەیی بۆ خوێنى شۆفێرەکە کراوە کە ئایا لەکاتى شۆفێریەکەیدا هیچ ماددەیەکى هۆشبەرى خواردووە کە بووبێتە هۆى لەدەستدانى کۆنتڕۆڵ یاخود نا، بەڵام دەرکەوتووە کە هیچ ماددەیەکى هۆشبەر یان کحول لەجەستەیدا نەبووە".
بەپێی زانیارییەکان شۆفێرەکە لە لێکۆڵینەوەکاندا هۆکارى رووداوەکەى بۆ لەدەستدانى کۆنتڕۆڵ گەڕاندووەتەوە، بەڵام گومان دەکرێت خەوی لێکەوتبێت. 

ڕۆژی 6ـی شوباتی 2025، وریا حەمەکەریم و وەرزشوانێک بەهۆی روداوێکی هاتوچۆوە لە سەر رێگای سلێمانی - عەربەت کە بارهەڵگرێک هۆکارەکەی بوو گیانی لەدەستدا، هەر ئەو کات Mic لە زاری سەرچاوەیەکی ئەمنییەوە ئاشكرای کرد، شۆفێری ئەو بارهەڵگرەی لەگەڵ ئۆتۆمبێلی ڕۆژنامەنوس وریا حەمە کەریم توشی ڕوداوی هاتووچۆ بووە هەڵگری ڕەگەزنامەی ئێرانییە و ئۆمبێلەکەشی هەڵگری ژمارەی هەمان وڵاتە.

دۆسیەی بارە تەماتەکە
دۆسیەی دووەم لەسەر روداوی گیانلەدەستدانی وریا حەمەکەریم تایبەتە بە ئەو بارهەڵگرەی بارەکەی هەڵگرتووە، بەپێی ئەو زانیارییانەی دیجیتاڵ میدیای MIC لە دادگای کەلاری وەرگرتووە، داواکاری گشتی شارەزور دۆسیەیەکی ئاڕاستەی دادگای دەستپاکی کەلار کردووە، لەبارەی ئەو بارە تەماتەیەی کە بارهەڵگرەکەی بووە هۆی گیانلەدەستدانی وریا حەمە کەریم. 

ئەگەرچی بەپێی ئەو زانیارییانەی کە Mic لە هێزە ئەمنییەکانی وەرگرتووە، شۆفێری بارهەڵگرەکە لە بەردەم دادوەری لێکۆڵینەوەدا لە یەکەم وتەیدا رایگەیاندووە، "بەشێوەیەکی فەرمی لە مەرزی نێودەوڵەتی پەروێزخانەوە هاتووەتە هەەرێمی کوردستان"، بەڵام 
بەپێی زانیارییەکانی Mic، دۆسیەکە دژی دەروازەی مونزرییەی خانەقینە و ئەو دەرەوازەیە وەک دەرەوازەی هێنانی تەماتەکە دیاریکراوە. 

MIC دەزانێت بەشێکی دۆسیە یاسایەکە، دژی ئەو بازرگانەی عەلوەی سلێمانییە کە بارە تەماتەکەی بۆ هاتووە کە دوای رودوەکەش خۆی نەکردوەتە خاوەنی. 
هۆکاریکردنەوەی ئەم سکاڵا یاساییە بۆ ئەوە دەگەرێتەوە، ڕوداوی گیانلەدەستدانی وریا حەمە کەریم لە روداوە هاتوچۆیەدا کە بارهەڵگرێکی تەمامەت هۆکاری روداوەکە بووە تەنها دوای 10 ڕۆژ لە بڕیارێکی وەزارەتی کشتوکاڵی هەرێمی کوردستان بوو بۆ قەدەغەکردنی هاوردەی تەماتە لە دەرەوەی وڵاتەوە. 
بەپێی نوسراوێکی وەزارەتی کشتوکاڵی هەرێمی کوردستان کە ڕۆژی 22ـی کانوونی دووەمی 2025 دەرچووە، لە 26ـی کانوونی دووەمی 2025 تا کاتێکی نادیار هاوردەکردنی تەماتە قەدەغە دەکرێت.

وریا حەمە کەریم 
وریا حەمە کەریم لە ساڵی 1987 لە دایکبووە، باوکی خۆی نەبینووە و بەهۆی کیمیابارانکردنی هەڵەبجەوە گیانی لەدەستداوە. 
وریا تاقانەی خێزانەکەی بووە، لە دوای کۆچیی دوایی باوکییەوە لەگەڵ دایکی ژیاوە، ژیانی هاوسەری پێکهێناوە و خاوەنی دوو منداڵ بووە.   
وریا حەمە کەریم ماوەی 12 ساڵە لە کەناڵی ئێن ئاڕتی کار دەکات کە لەلایەن جوڵانەوەی نەوەی نوێوە خاوەندارێتی دەکرێت.              

هەواڵ

دوو رۆژە درۆنی خۆکوژ هێرش دەکاتە سەر پێشمەرگە

دوو رۆژە درۆنی بۆمبڕێژکراو نزیکی سەنگەرەکانی پێشمەرگە دەبنەوە لە سنوری ئامێدی و دەتەقنەوە، بەو هۆیەوە پێنج پێشمەرگە بریندرابوون، هەرچەندە دەوترێت درۆنەکانی هی پەکەکەیە، بەڵام تائێستا هیچ لایەنێک خۆی نەکردووە بە خاوەنی ئەو درۆنانە.

رۆژی 28ـى نیسان درۆنێکی خۆکوژ نزیکی یەکێک لە سەنگەرەکانی پێشمەرگە بووەوە لە سنوری ئامێدی، پاش ئەوەی چووە سەر ئەو سەنگەرە تەقیەوە ئەمڕۆیش، جارێکی تر درۆنێک بەسەر بارەگایەکی پێشمەرگەدا کەوتە خوارەوە و دوو پێشمەرگە برینداربوون.

بەوتەی کامەران عوسمان، ئەندامی رێکخراوی سی پی تی ئەمریکی رایگەیاند، درۆنەکەی 28ـى مانگ کە بەسەر سەنگەرێکی پێشمەرگەوە لە سنوری ئامێدی تەقیەوە، لەلایەن پەکەکەوە نێردراوە، بەڵام لەلایەن تورکیاوە تەقەی لێکراوە و تەقێنراوەتەوە.

هەرچەندە دەوترێت خاوەنی درۆنەکەی دوێنێ پەکەکەیە، بەڵام تائێستا پەکەکە هیچ لێدوانێکی لەسەر رووداوەکەی دوێنێ و ئەمڕۆ بڵاونەکردووەتەوە، هەروەها روون نییە درۆنەکەی ئەمڕۆ کێ ئاراستەی کردووە.

لەسەر ئەو درۆنە خۆکوژیانەی ئاراستەی سەنگەرەکانی پێشمەرگە دەکرێن، ئەنجومەنی ئاسایشی هەرێمی کوردستان رایگەیاند، گرووپێکی "تیرۆریست"ی، لە دوو هێرشی جیاوازدا، بە درۆن بنکەکانی هێزی پێشمەرگەیان لە سنووری پارێزگای دهۆک کردووەتە ئامانج

ئەنجومەنی ئاسایش بەبێ ئەوەی ناوی هیچ لایەنێک بهێنێت دەڵێت: هەندێ لایەن و گرووپ هەوڵ دەدەن پرۆسەی ئاشتی و سەقامگیری لە دەڤەرەکەدا پەک بخەن.

هەر لەسەر ئەو رووداوە، رێبەر ئەحمەد، وەزیری ناوخۆی حکومەتی هەرێم لە لێدوانێکی رۆژنامەوانیدا رایگەیاند، ئەوەی روویداوە تێکدانی ئاسایش و سەقامگیری ناچەکەیە و پێویستە سنورێکی بۆ دابنرێت.

لە ساڵی 2015 بەدواوە، شەڕ و پێکدادانی نێوان گەریلاکانی پەکەکە و سوپای تورکیا و هەروەها هێرشە ئاسمانییەکانی تورکیا بۆسەر سنوری دهۆک و ناوچەی برادۆست لە سنوری ئیدارەی سۆران، زیانی گەورەی بە سروشتی ناوچەکە گایاندووە و بووەتەهۆی چۆڵبوونی دەیان گوند.