تەندروستی

ڕێکخراوی تەندروستی جیهانی: مەترسی گەڕانەوەی سوورێژە هەیە.

ڕاپۆرتێکی هاوبەشی ڕێکخراوی تەندروستی جیهانی (WHO) و ڕێکخراوی یونیسێف (UNICEF) باسیان لەوە کردووە ژمارەی حاڵەتەکانی سوورێژە لە ئەورووپادا دوو هێندە بووە بە بەراورد بە ساڵی ڕابردوو، کە منداڵانی خوار تەمەنی پێنج ساڵ زیاتر لە ٤٠٪ ی حاڵەتەکانی ڕاپۆرت کراو لە ئەورووپا و ئاسیای ناوەندی پێکهێناوە.

هانس هێنری کلوگ، لە ڕێکخراوی تەندروستی جیهانی باس لەوە دەکات : ژمارەی نەخۆشانی سوورێژە لە زیادبووندایە کە پێویستە وڵاتانی ئەورووپا و ئاسیا ئاگادار بن بەوەی تەواوی منداڵان ڤاکسینی سوورێژە وەربگرن. چونکە گرنگترین ڕێگایە بۆ خۆپاراستن لە نەخۆشی سوورێژە. ڤاکسینی MMR – کە منداڵ دەپارێزێت بەرامبەر بە هەر یەک لە نەخۆشییەکانی ملەخڕە و سوورێژە و سوورێژەی ئەلمانی– بە ڕێژەی لە ٩٧٪ کاریگەرە بۆ پاراستنی منداڵ لەم نەخۆشییە.

هەواڵ

کورد دانیشتنەکانی پەرلەمانی عێراق پەکدەخات

ئەندامێکی پەرلەمانی عێراق رایدەگەیەنێت، کە فراکسیۆنە کوردییەکان سورن لەسەر بایکۆتکردنی دانیشتنەکانی پەرلەمانی عێراق، تا ئەو کاتی پرۆژەیاسای بە پارێزگابوونی هەڵەبجە پەسەند دەکرێت.

چرۆ حەمە شەریف، ئەندامی پەرلەمانی عێراق بە MICـى راگەیاند، هەموو فراکسیۆنە کوردییەکان یەک هەڵوێستین لەسەر بایکۆتکردنی دانیشتەکانی پەرلەمانی عێراق، تا ئەوکاتەی پرۆژە یاسای بە پارێزگابوونی هەڵەبجە دەنگی لەسەر دەدرێت و پەسەند دەکرێت.

ئەو پەرلەمانتارە باسی لەوەکرد، کە فراکسۆنە کوردییەکان بایکۆتی دانیشتنەکانی پەرلەمان بکەن رێژەی یاسایی تەواونابێت و پەرلەمان ناتوانێت هیچ دانیشتنێک ئەنجامبدات، بەو پێیەی بەشێکی زۆر لە پەرلەمانتاران پابەندی دەوام نین.

بە وتەی چرۆ حەمە شەریف، هەرکاتێک دانیشتنی پەرلەمان بکرێت، پرۆژەیاسای بە پارێزگابوونی هەڵەبجە لە بەرنامەی کاردایە و وتیشی: جێگری دووەمی سەرۆکی پەرلەمان دڵنایی پێداون کە هەرکاتێک دانیشتنی پەرلەمان بکرێت، تەنها پرۆژە یاسای بە پارێزگابوونی هەڵەبجە دەخەنە بەرنامەی کارەوە.

ئەو پەرلەمانتارە جەختدەکاتەوە، کە تێپەڕاندنی پرۆژە یاسای بە پارێزگابوونی هەڵەبجە پێویستی بە ڕێککەوتنی سیاسی پێشوەختەیە و وتی: ئەو پرۆژە یاسایە بۆ ئەوەی بەبێ کێشە پەسەند بکرێت، پێویستی بەوەیە فراکسیۆنەکان پێش دانیشتنی پەرلەمان رێکبکەن و لە دانیشتەکەدا ئەندامانی پەرلەمان پابەندبکرێن بە پەسەندکردنی.

پرۆژەی بەپارێزگابوونی هەڵەبجە، ساڵی ڕابردوو خرایە دانیشتنەکانی پەرلەمانەوەو توانرا خوێندنەوەی یەکەم و دووەمی بۆ بکرێت، بەڵام بە هۆی تەواونەبوونی رێژەی یاسایی و خۆدزینەوەی ئەندامانی پەرلەمان بە بیانوی جیاواز بۆ دەنگدان بە پرۆژە یاساکە، تائێستا نەتوانراوە پرۆژە یاساکە لەلایەن پەرلەمانەوە پەسەند بکرێت.