هەواڵ

Mic Exclusive : دەسەڵاتی تەمویلی مووچە لە بانکی ناوەندی هەرێم/ سلێمانی سەندرایەوە

وەزارەتی دارایی و ئابوری دەسەڵاتی تەمویلی مووچە لە بانکی ناوەندی هەرێم/ سلێمانی سەندەوە و وەزیری دارایی دەڵێت، "نابێت لە ژێر هیچ بیانوویەکدا پارەی تەرخانکراو بۆ مووچە بۆ هیچ بوارێکی تر بەکاربهێنرێت"

 بەپێی ئەو زانیارییانەی دەست دیجیتاڵ میدیای Mic کەوتوون، بە بڕیاری ئاوات شێخ جەناب وەزیری دارایی و ئابوری هەرێمی کوردستان دەسەڵاتی تەمویلی مووچە لە بانکی ناوەندی هەرێم/ سلێمانی وەرگیراوەتەوە.

هەر بەپێی زانیارییەکان، تەمویلی مووچە لە بانکی ناوەندی هەرێم/ سلێمانی-ـەوە گواستراوەتەوە بۆ بانکی ئاشتی لە سلێمانی لەمەودوا لەو بانکەوە تەمویلی پارەی مووچەخۆرانی سلێمانی دەکرێت.
دیجیتاڵ میدیای Mic، قسەی لەگەڵ بەرپرسانی بانکی ناوەندی هەرێم/ سلێمانی کردووە، لەگەڵ پشتراستکردنەوەی هەواڵەکەدا پابەندی خۆشیان بە بڕیارەکانی وەزارەتیی دارایی و ئابورییەوە راگەیاند.

بەپێی بڕیارەکەی وەزارەتی دارایی و ئابوری، تەمویلی موچەی موچەخۆران و فەرمانبەران راستەوخۆ لە بانكی منارەوە دەنێردرێت بۆ بانكی ئاشتی لەوێشەوە بۆ بانكەكانی سنوری پارێزگای سلێمانی و هەڵەبجە و ئیدارەكانی راپەڕین و گەرمیان.

بەپێی بەدواداچوونەکان، هۆکاری بڕیارەکەی وەزارەتی دارایی و ئابوری هەرێمی کوردستان بۆ ئەو کێشانەی رابردووی دەگەڕێتەوە کە لە بانکی ناوەندی هەرێم/ سلێمانی بۆ دابەشکردنی مووچە دروست بووە، لەناویاندا دەستکاریکردنی پارەی نەختینەیی مووچە. 

رۆژی 18ـی ئازاری 2025، ئاوات شێخ جەناب وەزیری دارایی و ئابوری لە کۆبونەوەی لەگەڵ بەڕێوەبەری بانکەکان و گەنجینەکانی سنوری پارێزگای سلێمانی و هەڵەبجەو ئیدارەی گەرمیان و ڕاپەڕین رایگەیاند، نابێت لە هیچ بانکێک کێشە و گرفت بۆ هاووڵاتیان و فەرمانگەکان و بەڵێندەران دروست بکرێت، بەپێچەوانەوە هەر کێشەیەکی نەخوازراو بەدەر لە یاسا و ڕێنماییەکان دروست بکرێت ئیجرائاتی پێویست لەگەڵ بەڕێوەبەری بانکەکان دەکرێت.                

هەر لەو کۆبونەوەیەدا بڕیاردرا نابێت لە هیچ بانکێک دەستکاری پارەی هاووڵاتیان ( ئەمانات، وەدائیع، توفیر، هتد) بکرێت بەپێچەوانەوە ڕووبەڕووی لێپرسینەوەی یاسایی دەبنەوە.      
بڕیاردریش درا، بەهیچ جۆرێک نابێت لە ژێر هیچ بیانوویەکدا پارەی تەرخانکراو بۆ مووچە بۆ هیچ بوارێکی تر بەکاربهێنرێت، لە حاڵەتی دووبارە بوونەوەی سەرپێچیەکان و هەرکەس و لایەنێک پێچەوانەی ئەم ڕێنماییانە جوڵایەوە،ڕێکاری پێویستی لە دژ دەگیرێتبەر بگرینەبەر.   

پێشتر، بانکەکان دەسەڵاتیان هەبووە بڕی دیاریکراو خەرج بکەن، بەڵام ئێستا ئەو دەسەڵاتە لێیان سەندراوەتەوە و دەبێت راپۆرتی هەفتانە رادەستی وەزارەتی دارایی بکەن.

هەواڵ

هەشت ساڵە دوکان یەکەمجارە کۆبوونەوەی یەکێتی و پارتی بە خۆوە ببینێت

دوای 8 ساڵ جارێکی دیکە هاوینەهەواری دووکان دەبێتە شوێنی بەیەک گەیشتن و کۆبوونەوەی پارتی و یەکێتی. پێشتر دوا کۆبونەوەی دوو حزبەکە هەشت ساڵ لەمەوبەر و تەنها رۆژێک پێش روداوەکانی 16ـی ئۆکتۆبەر بەڕێوەچوو. ئەنجامی ئەو کۆبونەوەیە بەشێوەیەک پەیوەندییەکانی پارتی و یەکێتی تێکدا کە هیچ نەمایەوە لەسەر "خیانەت و خاکفرۆشی" بەرامبەر یەکتر بەکارینەهێن.

دوای 8 ساڵ لە ڕێکەوتی کۆبوونەوەیان لە دوکان، ئەمڕۆ جارێکی دیکە شاندی باڵای پارتی دیموکراتی کوردستان و یەکێتی نیشتمانی کوردستان لە میوانخانەکەی مام جەلال لە هاوینەهەواری دووکان کۆبونەوە. 

جیاواز لە 8 ساڵ لەمەوبەر کۆبونەوەکەی ئەمڕۆ بەبێ ئامادەبوونی مەسعود بارزانی، هێرۆ ئیبراهیم ئەحمەد، کۆسرەت رەسوڵ بەڕێوەچوو، بەڵکو مەسرور بارزانی و بافڵ تاڵەبانی وەک نەوەی دووەمی بارزانی و تاڵەبانی سەرۆکایەتی کۆبونەوەکانیان دەکرد.

ئەو شوێنەی کۆبونەوەکەی پارتی و یەکێتی تێدا ئەنجام درا،  8 ساڵ بوو دوو حزبەکە هیچ کۆبونەوەیەکیان تێدا ئەنجام نەدابوو، چونکە ئەنجامی دوا کۆبونەوەیان لە دووکان ملمانێیەکی سەختی بەدوای خۆیدا هێنا. 

دوایین کۆبوونەوەی پارتی و یەکێتی لە دووکان کە رۆژی 15ـی ئۆکتۆبەری 2017 بەڕێوەچوو، بە ئامانجی راگەیاندنی یەک هەڵوێستی لەسەر گەڕانەوەی سوپای عێراق بۆ ناوچە دابڕێنراوەکان بەڕێوەچوو، بەڵام دوای رۆژێک و لە 16ـی ئۆکتۆبەردا رەیسەکەیان بووەوە خوری. 

ئەو کۆبوونەوەیە بووە مێژوێکی تاڵ لە پەیوەندییەکانی دوو حزبەکەدا و تا ئێستاش زۆر کات وەک "تانە" دژی یەکتر بەکاریدەهێننەوە، چونکە بە جۆرێک پەیوەندییەکانی تێکدان کە گەڕانەوە سەر فەرهەنگی " تەشهیر و جوێن".

پارتی و یەکێتی لەسەر روداوەکانی 16ـی ئۆکتۆبەر و پاشەکشەی پێشمەرگە لە کەرکووک و ناوچە جێناکۆکەکان، کەوتنە یەکتر تۆمەتبارکردن بە "خیانەت و خاکفرۆش" ـی و ساڵانەش میدیاکانیان بە هەمان ئاواز یادی دەکەنەوە. 

ئێستا و دوایی هەشت ساڵ میوانخانەکەی مام جەلال بووەتە شوێنی دانوستانێکی نوێی دووحزبەکە، بەڵام روو نییە کە پەیوەندییەکانیان بەرەو کەناری ئارامی دەبات یاخود وشەی " خیانەت" بۆ فەرهەنگی سیاسییان دەگەڕێنتەوە.

ئەگەرچی ئامانجی کۆبونەوە نوێیەکەی پارتی و یەکێتی رێککەوتنە لەسەر پێکهێنانی کابینەی دەیەمی حکومەتی هەرێمی کوردستانە، بەڵام  بێدەنگی دوو حزبەکە لەسەر کۆبونەوەکە وەک ئاماژەی ئەرێنی نابینرێت.