هەواڵ

ئێران و ئەمریکا، دوژمن بەتامی دۆست

ئەرسەلان رەحمان - زانیار بەهادین

ئێران و ئەمریکا، وەکو دوو وڵاتی دژبەر و ناکۆک، بە پەردەپۆشکراویی و دوور لە چاوی میدیاکان دانوستانی دیپلۆماسی ئەنجام دەدەن، ئەگەرچی هەڕەشەکانی هەڵگیرساندنی شەڕ و هێرشی ئەمریکا بۆسەر ئێران، لە 46 ساڵی رابردوودا بەردەوام ئەگەرێکی بەهێزبووە، بەڵام هێشتا باسی ئەوە دەکرێت ئێران و ئەمریکا چەندێک دژی یەکترین، ئەوەندەش پێویستیان بەیەکتریی هەیە و هەرگیز ناگەنە ئاستی جەنگ.

بەرنامە ئەتۆمییەکەی ئێران و پرۆگرامی موشەکی دورهاوێژ، دەستوەردانی ئێران لە کاروباری وڵاتانی دیکەی رۆژهەڵاتی ناوەڕاست و پرسی گروپە چەکدارەکان، تەوەری سەرەکی دانوستانەکانە، عومان وەک نێوەندگیری سەرەکی بۆ نزیککردنەوەی دوو وڵاتەکەدا رۆڵ دەگێڕێت.

تائێستا سێ خولی دانوستان لە نێوان ئەمریکا و ئێران بەڕێوەچوو، یەکەم خولی دانوستانەکان لە عومان بوون و دواتر لە باڵەخانەی باڵیۆزخانەی عومان لە رۆمای پایتەخی ئیتاڵیا بەڕێوەچوو.

دانوستانەکانی ئێران و ئەمریکا بەشێوەیەک بەرەو پێشچوون، وەک ئەسۆشیەیتد پرێس بڵاویکردوەتەوە، واشنتن تەلئەبیبی ئاگادارکردووەتەوە، دانوستان لەگەڵ ئێران بەردەوامە، بۆیە پشتیوانی لە هیچ هێرشێکی سەربازی ناکات.

بەپێی ئەو زانیارییانەی ئاژانسی رۆیتەرزی بەریتانی بڵاویکردوەتەوە، دانوستانەکان سەبارەت بە پرسی ئەتۆمی ئێران پەرەسەندنێکی بەرچاوى بەخۆوە بینیووە، چوارچێوەی سەرەتایی بۆ رێککەوتنی ئەتۆمی نێوان واشنتن و تاران دانراوە، کە ئەم چوارچێوەیە لە بنەڕەتدا لەسەر بنەمای رێککەوتنی ساڵی 2015 دانراوە، لەگەڵ چەند هەموارکردنەوەیەک بۆ ئەو رێککەوتنە.

گۆڕینی زمانی هەڕەشە بۆ دانوستان، ئەو تیۆرەی رابردووی بە بیر هێنایەوە کە ئەمریکا و ئێران تەواوکەری یەکترن و بەرژەوەندی هاوبەش کۆیان دەکاتەوە. 

واشنتن و تاران وەک دوو وڵاتی دژبەر زۆر کات دانیان بە بەرژوەندییە هاوبەشەکانی یەکتردا ناوە، هەندێک کاتیش جوڵەکانیان بە خزمەتکردنی یەکتر ناوبردووە.

لەوبارەیەوە ڕاوێژکارێکی باڵای ئایەتوڵڵا خامنەیی ڕابەری باڵای شۆڕشی ئیسلامی ئێران ڕایگەیاند، ئۆپەراسیۆنە سەربازییەکانی ئەمریکا لە عێراق و ئەفغانستان سوودی بە ئێران گەیاندووە ئەویش بە دوورخستنەوەی دوژمنەکانی ئێران لە ناوچەکەدا. 

جەنڕاڵ یەحیا ڕەحیم سەفەوی، ڕاوێژکاری باڵای ئایەتوڵڵا خامنەیی ئاماژەی بەوەکرد ئەمریکییەکان لەو دوو ئۆپەراسیۆنەدا "دوژمنەکانمانی لە ڕۆژهەڵات و ڕۆژئاوا ئێران ڕووخاندووە"، کە سوودی بۆ ئێران هەبووە.

وێڕای هەموو ئەو نزیکیانە، بەڵام زۆر کاتیش دوو وڵاتەکە بوونەتە هەڕەشە بۆ سەر یەکتر و زیانیان بە بەرژوەندییەکانی یەکتر گەیاندووە، کە سەرجەمیان لە وڵاتانی سیێەمدا بووە و روبەڕوبوونەوەی راستەخۆ لە نێوان دووڵاتەکەدا نەبووە.

مێژوی بەرژەوەندییە هاوبەشەکانی ئەمریکا و ئێران

بەرژەوەندی هاوبەشی سەرکردایەتی سیاسی ئێران لەگەڵ ئەمەریکییەکان شتێکی نوێ نییە، بەڵکو بەڵکو مێژوی ئەو پەیوەندییە دەگەڕێتەوە بۆ سەرەتای دروستبونی کۆماری ئیسلامی ئێران لەسەر دەستی ئایەتوڵا خومەینی بە هاوکاریی ئەمەریکییەکان.
ئایەتوڵڵا خومەینی، دامەزرێنەری کۆماری ئیسلامی ئێران، ئەو کەسەی کە ئەمریکای بە "شەیتانی گەورە" ناودەبرد، لە ڕۆژی 6ی نۆڤەمبەری 1979 پەیامێکی نهێنی بۆ واشنتن نارد.

بەپێی ڕاپۆتێکی BBC و بە پشتبەستن بە بەڵگەنامە نهێنییەکانی دەزگای هەواڵگری ئەمریکا کە لە ساڵی 2008دا بەشێکیان بۆ ڕایگشتی ئاشکرا کران، خومەینی لە ماڵەکەی خۆیەوە کە لە دەرەوەی پاریس بوو، ڕێکەوتنێکی پێشکەش بە ئیدارەی جیمی کارتەر سەرۆکی ئەوکاتەی ئەمریکا کرد و بە کارتەری وتووە، “سەرکردە سەربازییەکانی ئێران گوێتان لێدەگرن، بەڵام خەڵکی ئێران فەرمانەکانی من جێبەجێ دەکەن.” هەربۆیە خومەینی پێشنیاری ئەوەی بۆ کارتەرکرد ئەگەر ئەو بتوانێت کاریگەری خۆی لەسەر ئاستی سەربازی لە ناوخۆی ئێراندا بەکاربهێنێت بۆ ئەوەی بەبێ شەڕ خومەینی دەسەڵات بگرێتەدەست ئەوا ئەمیش میللەت ئارام دەکاتەوە و بەوجۆرە دەتوانرێت سەقامگیری بگەڕێتەوە و بەرژەوەندییەکانی ئەمریکا و هاووڵاتییانیش لە ئێران بپارێزرێن.

تشرینی یەکەمی 1978 کە پشێوی باڵی بەسەر ئێراندا کێشابوو خۆپیشاندەران لەگەڵ سەربازەکان تێکهەڵچوبون، دوکان و بازاڕەکان داخرابون، خزمەتگوزارییە گشتیەکان ڕاگیران. لەم نێوەندەدا مانگرتنی کرێکاران لە ئێران، ڕۆیشتنی نەوتی ڕاگرتبوو کە ئەوەش بەرژەوەندییەکی گرنگی ڕۆژئاوای خستبووە مەترسییەوە.

بەگوێرەی ڕاپۆرتێکی ڕۆژنامەی گاردیانی بەریتانی خومەینی "هەوڵی زۆری داوە بۆ ئەوەی دڵنیابێت لەوەی ئەمریکییەکان پلانەکانی بۆ گەڕانەوەی بۆ ئێران نەخەنە مەترسییەوە - تەنانەت بەشێوەیەکی شەخسیش بۆ بەرپرسانی ئەمەریکی نووسیوە و دڵنیای کردووەتەوە کە خەمی بەرژەوەندییەکانیان لە ئێراندا نەبێت، “بە تایبەتی نەوت”. 

خومەینی وتی، دەبینن ئێمە لە هیچ دوژمنایەتییەکی تایبەتدا نین لەگەڵ ئەمریکییەکان، بەڵێنیدا کۆمارە ئیسلامیەکەی کۆماری مرۆڤدۆستانە دەبێت، کە سوودی بۆ دۆزی ئاشتی و ئارامی بۆ هەموو مرۆڤایەتی دەبێت". 

بەپێی ڕاپۆرتەکە، لە بەرامبەردا کارتەر و ئیدارەکەی یارمەتی خومەینییان داوە و دڵنیابوون لەوەی کە سوپای ئێران کودەتای سەربازی بەسەر خومەینیدا ناکات.

بەپێی ئەو بەڵگەنامانەی دەزگای هەواڵگری ئەمریکا بڵاویکردوونەوە، پەیوەندی نهێنی سەرانی ئەمریکا لەگەڵ ئایەتوڵلا خومەینی رابەری شۆڕشی ئیسلامی ئێران رۆژێک بەر لە راکردنی شا لە ئێران دەستیپێکرد. بەرەبەیانی 15 تەموزی 1979، واشنتن سوپاسی فەڕەنسا دەکات بۆ گەیاندنی پەیامەکانیان بە رابەری شۆڕشی ئێران و رایدەگەیەنن “بە هۆی چەند هۆکارێکەوە پێویستە راستەوخۆ لەگەڵ ئەو گروپە پەیوەندیان هەبێت.”

بە پێی شیکارییەکی سی ئای ئەی لە ساڵی 1980 کە بەشێکی لە ساڵی 2008 بۆ ڕای گشتی بڵاوکرایەوە، "خومەینی ڕوونی کردەوە کە دژایەتی بەرژەوەندییەکانی ئەمریکا لە ئێراندا ناکات". خومەینی بە ئەمریکای وت بە پێچەوانەوە، بۆ بەرەنگاربوونەوەی نفوزی سۆڤیەت و بەریتانیا، بوونی ئەمریکا لە ئێران پێویستە.

پەیوەندییە دیپلۆماسییەکان
لە ئەنجامی دەستبەسەرداگرتنی باڵوێزخانەی ئەمریکا لەلایەن ئێرانەوە لە ٤ی تشرینی دووەمی 1979، ئەمریکا و ئێران لە مانگی نیسانی 1980دا پەیوەندییە دیپلۆماسییەکانیان پچڕاند. 

ئێران و ئەمریکا لە دوای 7ی نیسانی 1980ەوە هیچ پەیوەندییەکی دیپلۆماسی فەرمییان نەبووە، ئێران هیچ باڵیۆزخانەیەکی لە واشنتن دی سی نییە بەڵکو پاکستان وەک دەسەڵاتی پاراستنی بەرژەوەندییەکان ئێران لە ئەمریکادا کاردەکات، لە کاتێکدا سویسرا وەک دەسەڵاتی پاراستنی بەرژەوەندییەکانی ئەمریکا لە ئێراندا کاردەکات و خزمەتگوزاری کونسوڵگەری سنووردار پێشکەش بە هاووڵاتیانی ئەمریکی لە ئێران دەکات.

رۆژنامەی گاردیانی بەریتانی لە ڕاپۆرتێکیدا دەڵێت هەڵوێستی ئێران بەرامبەر بەئەمریکا وەک ئەوە وایە کەسێک دژایەتی بۆ یەکەمین خۆشەویستی خۆی دەرببرێت و سوکایەتی پێبکات کە ڕەنگە لەگەڵیدا توندوتیژ بوبێت، بەڵام لەگەڵ ئەوەدا تامەزرۆشە بۆ ئەوەی دووبارە ببێتەوە هاوبەشی. زۆرجاریش ئەو هێڵەی ڕق و خۆشەویستی دابەش دەکات، هێڵێکی تەنکە.

بۆ نموونە ئەگەر قەیرانی بارمتەکان لە ساڵی 1979 وەربگرین، کاتێک خوێندکارە چەکدارەکان هێرشیان کردە سەر باڵیۆزخانەی ئەمریکا و دیپلۆماتکارەکانیان لە ئێران بۆ ماوەی 444 ڕۆژ زیندانی کرد. 

هەرچەندە بووە هۆی تێکچوونی پەیوەندییە دیپلۆماسییەکان، بەڵام هەردوولا لە پشت دەرگا داخراوەکانەوە دەستیان بە قسەکردن کرد بۆ چارەسەرکردنی قەیرانەکە.

ئەو دانوستانە دووقۆڵییە نهێنییانە لە جەزائیر بەڕێوەدەچوو بوە هۆی ئەوەی لە ساڵی 1981دا ڕێککەوتنێک بکرێت بۆ دامەزراندنی دادگای داواکارییەکانی ئەمریکا و ئێران لە لاهای بۆ گەیشتن بە چارەسەر بۆ یەکلاییکردنەوەی سەروەت و سامانی ئەمریکا کە لەلایەن شۆڕشگێڕانەوە دەستی بەسەردا گیرابوو.

ئێران ئەو دادگایەی وەک ئامرازێک بۆ کەمکردنەوەی گرژییەکان دەبینی. لە کاتێکدا ئەمریکا هێشتا نەیتوانیوە سەروەت و سامانی بلۆککراوی ئێران ئازاد بکات، کە لەوکاتەدا تاران بە زیاتر لە یەک ملیار دۆلار خەمڵاندویەتی، بەڵام ئەمریکا بەڵێنی داوە کە ئەو کارە بکات کاتێک هەموو کەیسەکان یەکلایی دەکرێنەوە.

هاوکاری سەربازی و ئەمنی نێوان ئێران و ئەمریکا
عەلی ئەکبەر ڕەفسەنجانی، سەرۆک کۆمار پێشوتری ئێران لە کاتی شەڕی ئێران و عێراق لە ساڵی 1980-1988 دەستی بە پەیوەندی نهێنی لەگەڵ ئەمریکییەکان کرد بۆ وەرگرتنی چەک. ئەوەش دوای ئاشکرابوونی بووەهۆی ئابڕوچونێکی گەورە بۆ ئیدارەی ئەوکاتەی حکومەتی ئەمریکا. کە زۆرجار بە ئابڕوچونی ئێران-کۆنترا ناودەبرێت، ئابڕوچونێکی سیاسی بوو لە ئەمریکا کە لە خولی دووەمی ئیدارەی ڕیگان ڕوویدا. لە نێوان ساڵانی 1981 بۆ 1986 بەرپرسانی باڵای ئەمریکا بە نهێنی ئاسانکارییان بۆ فرۆشتنی چەک بە نایاسایی بە ئێران کرد کە لەو کاتەدا گەمارۆی چەکی لەسەر بوو.

دواتر لە کۆبونەوەیەکدا لە تاران لەگەڵ ژمارەیەک شارەزایانی ئەمنیی بیانی ڕەفسەنجانی بە ئامادەبووانی وتووە کە “ئێران دەیتوانی بوونی هێزە سەربازییەکانی ئمەریکا لە کەنداوی فارس قبوڵ بکات”. بەڵام لەبەردەم خەڵکدا بە تەواوی دژایەتی خۆی بۆ بونی ئەو هێزانە نیشانداوە.

نزیکەی 35 ساڵە ئەمریکا و ئیسرائیل هەڕەشە لە ئێران دەکەن، بەڵام تا ئێستا هەڕەشەکانیان نەچۆتە بواری جێ بەجێ کردنەوە لە کاتێکدا لە ماوەی ئەو چەند ساڵەدا چەندین وڵاتی عەرەبی و ئیسلامی تریان کاولکردووە بە جۆرێک زۆرێک لەو وڵاتانە هاوپەیمانی ئەمریکا و خۆرئاوا بوون .

تەنانەت راپۆرتەکان ئاماژە بە بەردەوامی پەیوەنییە هەواڵگرییەکان دەدەن بە جۆرێک بەر لە هەر هێرشێک بۆ سەر بەرژەوەندییەکانی ئێران تەنانەت لە ناو خاکی عێراق و سوریاش، ئەمریکا بەرپرسانی ئێران ئاگادار دەکاتەوە.
بەگوێری راپۆرتێکی رۆژنامەی وۆلستریت جۆرناڵی ئەمەریکی، بەر لە هێرشە ئاسمانییەکانی ئەمریکا بۆ سەر پێگە و جبەخانەکانی گرووپە میلیشیاکانی سەر بە سوپای پاسدارانی ئێران لە عێراق و سووریا، واشنتن کاتی پێویستی دابوو بە تاران بۆ ئەوەی بتوانێت شوێنی راوێژکارەکان و بەرپرسە سەربازییەکانی بگۆڕێت.

بە گوێرەی راپۆرتەکە، حکومەتی ئەمریکا بەهۆی ئاگادرییەکانەوە هەفتەیەک بەر لە هێرشەکان کاتی پێوستی دابوو بە ئێران بۆ ئەوەی ئامانجەکانی لە مووشەکەکانی ئەمریکا دووربخاتەوە.

رۆژنامەکە نووسیویەتی ئێران پێشتر راگەیاندووە، نایەوێت راستەوخۆ لەگەڵ ئەمریکا رووبەڕوو بێتەوە، یان بەشێک بێت لە قوڵترکردنەی قەیران و ئاڵۆزییەکان لە رۆژهەڵاتی ناوەڕاست، بۆیە دوای هێرشە درۆنییەکەی گرووپە میلیشیاکان بۆ سەر بنکەی تاوەر22ی سەربازانی ئەمەریکی لە ئوردن، بەرپرسانی ئێران سەردانی گروپەکانی عێراقیان کردووە و پێیانڕاگەیاندوون، کە "هێڵی سووریان" بەزاندووە.

پێشتریش دۆناڵد ترمپ، سەرۆکی ئەمریکا، ئەوەی ئاشکراکردبوو کە بەر لە هێرشەکانی ئێران بۆ سەر بنکەی ئاسمانی هەریر لە هەولێر و بنکەی ئاسمانی عەین ئەسەد لە پارێزگای ئەنبار، بەرپرسانی ئێران ئیدارەی ترمپیان ئاگادارکردوەتەوە لە کاتی هیرشەکان و ترەمپیش بە مەرجی ئەوەی زیان بە هیچ سەربازێکی ئەمەریکی نەگات گڵۆپی سەوزی بۆ ئێران هەڵکردبوو بۆ ئەنجامدانی هێرشەکان.

حوسێن ئەمیر عەبدوڵڵاهیان، وەزیری دەرەوەی ئێرانیش باسی لەوەکردبوو، وڵاتەکەی و ئەمریکا لەماوەی جەنگی نێوان حەماس و ئیسرائیلدا چەند جارێک نامەیان گۆڕیوەتەوە.

لەبارەی ناوەڕۆکی نامەکانەوە ئەو وەزیرەی ئێران بە رۆژنامەنوسانی وت، "ئەمریکا داوای لە ئێران کردوە بە حیزبوڵڵای لوبنان بڵێت زۆر لە جەنگی غەززە نەچێتە پێشەوە و لە دژی ئیسرائیل نەوەستێتەوە."

هەواڵ

پرۆسەی "ئاشتی" لای کوردەکان و "نەهێشتنی تیرۆر" لە تورکیا

ئۆجەلان بانگەواز دەکات بۆ ئاشتی لە تورکیا و رۆژهەڵاتی ناوەڕاست، بەڵام دەوڵەتی تورکیا پرۆسەکە بە "تورکیایەکی بێ تیرۆر" دەناسێنێت، پرۆسەکە بە هەر ناوێک بناسرێت، بەڵام لەم هەنگاوەدا کورد چ دەستکەوتێک بەدەستدەهێنێت و چی لەدەست دەدات؟
یەکەم گروپی 40 چەکداریی،چەکەکانیان لە ناوچەیەکی شاری سلێمانی دانا، ئەوەش وەکو وەڵامێک بۆ بانگەوازی ئاشتی عەبدوڵا ئۆجەلان، رێبەری زیندانییکراوی پارتی کرێکارانی کوردستان.

بەپێی پێدوانەکانی بەرپرسە باڵاکانی تورکیا، ئەو چەک و تەقەمەنییانەی لە گەریلاکانی پەکەکە وەردەگیرێنەوە، ناهێڵن بکەوێتە دەستی هیچ هێزێکی دیکە و دەسوتنێرێت.

ئۆجەلان لە پەیامەکەیدا بە روونی ئاماژە بەوەدەکات کە ئیتر سەردەمی خەباتی چەکداریی و دامەزراندنی دەوڵەتی نەتەوەیی نەماوە بۆ کورد، رۆژهەڵاتی ناوەڕاست بە گشتیی و تورکیا بەتایبەتی دەتوانێت ئایندەیەکی رۆشنتر و گەشتری هەبێت دوور لە پێکدادانی چەکداریی و رشتنی خوێنی یەکتریی.

لە پەیامێکی 40 لاپەڕەیی ئۆجەلاندا، کە رۆژی (27ی شوباتی 2025) لە کۆنگرەی پەکەکە خوێندرایەوە، رێبەری پەکەکە بۆ قۆناغی داهاتوو پابەندبوونی تورکیا بە بنەما دیموکراتییەکان و رێگەدان بە بەشداریی هەموو پێکهاتەکان لە دەسەڵات، بە گرەنتی چارەسەرکردنی قەیرانەکان دەزانێت.

کۆنگرەی 12ی پەکەکە، بە کۆی دەنگ پرۆژەکەی ئۆجەلانی پەسەندکرد بۆ هەڵوەشاندنەوەی رێکخستنە چەکدارییەکەی پارتی کرێکارانی کوردستان و دانانی چەک و بوار بەخشین بە سیاسەت و پرۆسەی دیموکراتی کە گرفتەکان چارەسەر بکەن.

موراد قەرەیلان، سەرۆکی پارتی کرێکارانی کوردستان و ژمارەیەک لە سەرکردەکانی پارتەکە لە کۆنگرەی گشتییدا بەشدارییانکرد و گروپێکی دیکە لەڕێگەی ئینتەرنێتەوە بەشێوەی راستەوخۆ لە شوێنێکی دیکەوە بەشدارییانکرد و وەڵامی بانگەوازەکەی ئۆجەلانیان دایەوە.

کۆنگرەی 12 لە پەیامێکدا رایگەیاند: "پارتەکەمان لە سەرەتای 'پرۆسەی نوێی هەڵوەشاندنەوە'دایە و لە داهاتوودا لەڕێگەی چەند گروپێکەوە دەستدەکات بە دانانی چەک، بەمەبەستی بەدەمەوەچوونی بانگەوازەکەی ئۆجەلان.

هەروەها ئۆجەلان رۆژی 9ی تەموز، بۆیەکەمجار پەیامێکی ڤیدیۆیی بڵاوکردەوە لەگەڵ ژمارەیەک لە هاوڕێ زیندانیکراوەکانی خۆیدا بانگەوازی ئاڕاستەی ئەندامانی پەکەکە و دەوڵەتی تورکیا کرد کە پلان و پرۆژەی ئاشتی وەکو خۆی جێبەجێ بکەن.

لەناو تورکیادا، رەجەب تەیب ئەردۆغان، سەرۆکی تورکیا و سەرۆکی پارتی داد و گەشەپێدان، جەختی لەسەر هەوڵەکان بۆ بەدیهاتنی ئاشتیی و نەماتی تیرۆرکرد لە تورکیا و بە ئەندامانی پارتەکەی راگەیاند، خۆیان ئامادە بکەن بۆ قۆناغی سەختی داهاتوو، بۆئەوەی پرسەکان بەلاڕێدا نەبرێت و بەرپرسیارێتی مێژویی بڕیارەکە هەڵدەگرن.

ئاژانسی فرانس پرێس ئاشکرایکردووە، ئەردۆغان، پلانێکی هەیە بۆئەوەی لە هەڵبژاردنی 2028 بۆ جارێکی دیکە پۆستی سەرۆککۆماری تورکیا بەدەستبهێنێتەوە و ریزەکانی ئۆپۆزسیۆن لەبەریەکهەڵوەشێنێت و هێزە کوردییەکان بخاتە بەرەی خۆیەوە.

بەگشتی کوردەکان بەشدارییان نەکرد لە خۆپیشاندانەکانی 19ی ئازاری ئۆپۆزسیۆن دژی دەستگیرکردنی ئەکرەم ئیمام ئۆغڵو، سەرۆکی گەورە شارەوانی ئیستانبوڵ و سەرکردەی پارتی کۆماریخوازی گەلی تورکیا، ئەوەش وەکو سەرکەوتنێک بۆ سیاسەت و بڕیاری نوێی ئەردۆغان لێکدرایەوە بۆ نزیکبوونەوە لە کوردەکان و بەڕێوەچوونی پرۆسەی ئاشتی.

پارتی کرێکارانی کوردستان (پەکەکە) لە ساڵی 1984 دامەزرا، بەڵام عەبدوڵڵا ئۆجەلان، رێبەری پارەتەکە کە لە ساڵی 1999 لە کینیا لە ئۆپەراسیۆنێکی میتی تورکیا دەستگیرکرا و هێنرایەوە بۆ تورکیا و زیندانیی هەتاهەتایی بەسەردا سەپێنرا.
بەڵام پرۆژە نوێیەکەی ئۆجەلان زەمینەی بۆ کۆتایی هاتنی ململانێی چل ساڵەی نێوان چەکدارانی کورد و دەوڵەتی تورکیا سازکرد.

چاوەڕوانکراوەکان:
چارەنوسی ئۆجەلان: هێشتا چارەنوسی ئۆجەلان بە هەڵپەسێدراوی ماوەتەوە و لێدوانی جیاجیا بەدیدەکرێن، بۆ نمونە، پارتی داد و گەشەپێدان لە رۆژنامەی "تورکیا"ی زمانحاڵی حکومەت، ئاشکرایکردووە کە سیستمی بەندکردنی ئۆجەلان پاش هەڵوەشاندنەوەی پەکەکە، "هێوردەکرێتەوە"، بەبێ ئەوەی ئاماژە بە ئازادکردنی بدات.

یەکەمجار دەوڵەت باخچەلی، سەرۆکی حیزبی نەتەوەپەرستی تورکیا، لە مانگی تشرینی یەکەمی 2024، دەستپێشخەری ئاشتی کرد، بۆئەوەی لە پەرلەمانەوە بە یاسا گۆڕانکاریی لە بڕیاری سزای سەر ئۆجەلاندا بکرێت و ئاشتی بەرقەراربکرێت و کۆتایی بە تیرۆربهێنرێت.

هەر بۆیە شاندێکی دەم پارتی کە سری سورەیا ئۆندەر سەرپەرشتیی دەکرد، سەردانی دورگە ئیمرالیان کرد و لەگەڵ ئۆجەلان کۆبوونەوە و پرۆسەی ئاشتییان گەیاندە قۆناغێکی زۆر پێشکەوتوو.

شاندی دانوستانکاری ئیمرالی، چەندینجار ئەوەیان راگەیاندووە کە ئیتر تۆپەکە لە گۆڕەپانی پەرلەمانی تورکیادایە کە هەنگاو هەڵگرێت بۆ دەرکردنی یاسایەک کە کۆتایی بە دۆسیەی تیرۆر بهێنێت لە وڵاتەکەیان و ئۆجەلان ئازادبکرێت.

کوژراو یان شەهید؟
لەو یاسایەدا کە پەرلەمانی تورکیا دەریدەکات، دەبێت ئەو تێڕوانینەش راست بکرێتەوە کە 41 ساڵە هێزی خێر و شەڕی لەیەکتریی جیاکردووەتەوە.

لەمەودوا هەردوو لایەنی ناکۆکیی و بەشەڕهاتوو (پەکەکە و سوپای تورکیا) دەبنەوە یەک هێز و کۆتایی بە خوێنڕشتن دەهێنرێت، هەروەها ئەو خوێنەی کەڕژاوە دەبێت مامەڵەیەکی دیکەی لەگەڵ بکرێت و کەسوکاری شەهیدەکانی پارتی کرێکارانی کوردستانیش خۆیان بە هاوبەشی پرۆسەی ئاشتی بزانن و بە چاوی دوژمن لە شەهیدەکان و کەسوکاریان نەڕوانرێت.

تۆڕە کۆمەڵایەتییەکان:
هەڵوەشاندنەوەی پەکەکە کاریگەریی لەسەر رێسا جێبەجێکراوەکانی تۆڕە کۆمەڵایەتییەکانیش دەبێت، لەمەودوا بڵاوکردنەوەی ناو و وێنەی ئۆجەلان و سەرکردەکانی دیکەی پەکەکە، نابێت سزای لەسەربێت، بۆ ئەو مەبەستەش حكومەتی تورکیا ئەو سکاڵا و داخوازاییانەی خۆی لە کۆمپانیاکانی سۆشیاڵ میدیا دەکێشێتەوە.
ئەگەر ئەم هەنگاوە بنرێت، زۆرێک لەو سزایانەی لە نێو تۆڕە کۆمەڵایەتییەکان و تۆڕی ئینتەرنێت، بەپێی یاسا کارپێکراوەکانی ئەوروپا و ئەمریکا سەپێنرابوون بەسەر زاراوە کوردییەکاندا، هەڵدەگیرێن و قۆناغێکی نوێ لەو بوارەدا دەستپێدەکات.

نەمانی کەیسی تیرۆر 
دۆزی کورد زۆر زیانی پێگەیشتووە بەهۆی تۆمارکردنی پەکەکە لە ریزی گروپ و رێکخراوە تیرۆریستییەکاندا.

لەنێو کۆمەڵگەی نێودەوڵەتیدا بەربەستی زۆر بۆ دیپلۆماسیەت و دۆزی کوردی دروستدەبوو، بەهۆی بوونی گروپێکی تیرۆری نێودەوڵەتی بەناوی پارتی کرێکارانی کوردستانەوە.

لەمەودوا کورد لە تورکیا دەتوانن وەکو هێزێکی سیاسی کاریگەر بەشداریی لە پرۆسەی سیاسییدا بکەن و پەیوەندیی بە گەلانی دونیاوە بکەن.

زیندانییەکان:
بەپێی خەمڵاندنە سەرەتاییەکان، لەمەودوا دەبێت بە زیاتر لە 40 هەزار زیندانییکراو و بەندکراو لە تورکیا ئازادبکرێن، ئەوەش ئومێد دەگێڕێتەوە بۆ دەیان هەزار خێزانی کورد لە باکوری کوردستان و کۆتایی بە گۆشەگیرییان دەهێنرێت.

کاتێکیش زیندانییکراوەکان ئازاد دەکرێن، زۆرینەیان دەتوانن بگەڕێنەوە سەر کار و پۆست و پیشەکانی پێشووی خۆیان، کە بەشێکی زۆریان کاربەدەست و سەرۆکی شارەوانی و کەسانی ئیداریی و کارگێڕیی و وەبەرهێنەربوون.

لابردنی قەیومەکان
دەیان شارەوانی لە تورکیا بەهۆی تۆمەتبارکردنی سەرۆکی شارەوانییەکان کە بە هەڵبژاردن دەرچووبوون، لەلارەکانیان لادراون و قەیوم لە جێگایان دانراون، دەبێت ئەم پرۆسەی ئاشتییە ئاسۆیەک لەوبارەیەوە بکاتەوە بۆ گێڕانەوەی بەها بۆ بەشدارییکردنی سیاسی کورد لە تورکیا.

لە بەیاننامەکەی کۆنگرەی پەکەکە، بەهیچ شێوەیەک داوای خۆسەریی، فیدراڵیی و کۆنفیدراڵیی نەکراوە، بەڵکو تەنها نوسراوە "چارەسەری دیموکراتی"، ئەوەش ئەو خاڵەیە کە لە چەقی بەیاننامەکەدا جەختی لێکراوەتەوە.

هەربۆیە گێڕانەوەی بەها بۆ بەشداریی سیاسی و پابەندبوون بە بنەما دیموکراتییەکان، دەبێت لە نەخشەڕێی پرۆسەی ئاشتیدابێت لە تورکیا و کاروباری قەیومەکان بەتەواویی رابگیرێن.

کورد لە ئەوروپا:
تورکیا لەبەرئەوەی ئەندامی هاوپەیمانی ناتۆیە و گرێدراوە بە ئەوروپا، لەمەودوا کارتی سیاسی کورد لە ئەوروپا بەهێزتر دەبێت، بەوپێیەی زۆرینەی رەهای رەوەندی کوردی خەڵکی باکوری کوردستانن.

هەروەها دەیان هەزار کورد بەهۆی دۆسیەی پەکەکەوە لە تورکیاوە ئاوارەی ئەوروپا و وڵاتانی جیهان بوون، بەڵام دەبێت ئەم پرۆسەیە بەربەستی گەڕانەوەی ئەو کوردانە نەهێڵێت بۆ تورکیا و سودمەندبوون لە ناسنامە و وڵاتینامەی تورکیا.

هەروەها ئەو هەزاران کوردەی بەهۆی سکاڵای تورکیاوە لە ئەوروپا بڕیاری دەستگیرکردنیان بۆدەرچووە، یان بزنس و سەرمایەکانیان دەستی بەسەرداگیراوە، دەبێت سەرجەمیان پاکتاوبکرێت.

باکوری کوردستان و ئاشتی
بەهۆی هەڕەشەی تیرۆر و دۆسیەی پەکەکە، دەیان ساڵە ناوچە کوردنشینەکان پشتگوێخراون و جیاوازییەکی زۆر بەدیدەکرێت لەنێوان ناوچە کوردنشینەکان لەگەڵ ناوچەکانی دیکەی جوگرافیای تورکیا.
لە ساڵانی داهاتوودا، دەبێت پلانێکی نیشتمانیی هەبێت بۆ دووبارە گێڕانەوەی وەبەرهێنان و سەرمایەگوزارییە نیشتمانییەکان بۆ باکوری کوردستان، ئەگەرچی لە دوو دەیەی رابردوودا لەو بوارەدا هەوڵی زۆردراوە.