هەواڵ

نزیکەی سێ مانگە لیژنەی دانوستانکاری پارتی و یەکێتی کۆنەبوونەتەوە

Mic
2025-08-04

لیژنەی دانوستانکاری پارتی و یەکێتی نزیکەی سێ مانگە کۆنەبوونەوەتەوە، لیژنەی دانوستانکاری پارتی و یەکێتی دەڵێن، هیچ وادەیەک بۆ کۆبوونەوەی نوێ نییە.

لیژنەی دانوستانکاری پارتی دیموکراتی کوردستان و یەکێتی نیشتمانی کوردستان نزیکەی سێ مانگە کۆنەبوونەوەتەوە و وادەی کۆبونەوەی نوێش دیار نییە.

دوایین کۆبوونەوەی لیژنەی دانوستکاری دوو حزبەکە، 21ـی ئایاری رابردوو لە هەولێر بەڕێوەچوو، بەپێی زانیارییەکانی دیجیتاڵ میدیای Mic، کۆبونەوەکە هیچ ئەنجامێکی نەبووە.

هەر بەپێی زانیارییەکان، کۆبوونەوەکەی لیژنەی دانوستکاری پارتی و یەکێتی ئەوەندە خراپ بووە، تەنها 36 خولەکی خایاندووە.

 دیجیتاڵ میدیای Mic قسەی لەگەڵ ئەندامانی لیژنەی دانوستانکاری پارتی و یەکێتی کرد، ئەوان رەتیان کردەوە، هیچ وادەیەک بۆ کۆبوونەوەی نوێ هەبێت.

مەسعود بارزانی، بافڵ تاڵەبانی و مەسرور بارزانی لە زنجیرە کۆبونەوەیەکەدا لەگەڵ نوێنەرە دیپلۆماسییەکانی ئەمریکا و ڕۆژئاوا لە عێراق جەختیان لەوە کردوەتەوە کە پێویستە پێش هەڵبژاردنی پەرلەمانی عێراق حکومەتی نوێ پێکبهێنرێت.

ئەگەرچی پارتی و یەکێتی خواستی خۆیان بۆ پێکهێنانی کابینەی نوێ دەربڕیووە، بەڵام تا ئێستا هیچ ئەنجامێکی نەبووە.

پارتی و یەکێتی دیدگای حکومڕانی داهاتوویان داڕشتووە و گەیشتونەتە دابەشکردنی پۆستەکان؛ رۆژی 8ـی تەممووز قوباد تاڵەبانی جێگری سەرۆکی حکومەتی هەرێمی کوردستان لە پشکی یەکێتی کە هاوکات لە لیژنەی دانوستانکاری یەکێتیشە بە دیجیتاڵ میدیای Micـی راگەیاند، کێشەکە لە پۆستە سیادییەکانە، یەکێتی دەیەوێت ئەمجارە هاوبەشێکی راستەقینەی پارتی بێت.

14ـی تەمموز؛ پارتی و یەکێتی بە سەرۆکایەتی مەسعود بارزانی و بافڵ تاڵەبانی کۆبوونەوە، وەک ئەو کات دیجیتاڵ میدیای Mic بڵاویکردەوە، کۆبوونەوەکە تەنها لەسەر پرسی مووچە بووە.

کۆبوونەوەکە لەسەر پرسی مووچە ئەنجامی هەبوو، شاندێکی هاوبەشی پارتی و یەکێتی بە سەرۆکایەتی بافڵ تاڵەبانی چووە بەغدا و لەگەڵ حکومەتی عێراق لێکتێگەیشتنی کرد.

ئەگەرچی کۆبوونەوەکە لەسەر مووچە ئەنجامی هەبوو؛ هەروەها پارتی و یەکێتی یەکخست بەڵام هیچ ئەنجامێکی کۆبوونەوەکە لەسەر پێکهێنانی حکومەت نەبینراوە.

بابەتی لێکچو

More News

Most Popular

هەواڵ

لاریجانییەکان گەڕانەوە هەڕەمی دەسەڵاتی ئێران

Mic
2025-08-07


دوای چوار ساڵ دوورکەوتنەوەی لەسەر شانۆی سیاسی ئێران، جارێکی تر عەلی لاریجانی گەڕایەوە و بە فەرمانی مەسعود پزیشکیان، سەرۆک کۆماری ئێران، بە سکرتێری ئەنجومەنی ئاسایشی نیشتمانی دیاری کرا.

رۆژی دووی ئاب، میدیای نزیک لە سوپای پاسدارانی ئێران بڵاویکردەوە، لە چەند رۆژی داهاتوودا ژمارەیەک گۆڕانکاری لە دامەزراوە ئەمنییەکانی وڵاتدا دەکرێن و ئەگەری زۆرە عەلی لاریجانی، راوێژکاری عەلی خامنەیی وەکو سکرتێری ئەنجوومەنی ئاسایشی نیشتیمانی دەستنیشان بکرێت.

 بەپێی مادەی 176ی دەستووری ئێران، ئەنجوومەنی باڵای ئاسایشی نیشتمانیی ئەو وڵاتە دەتوانێت بەپێی ئەرکەکانی خۆی ئەنجوومەنی لاوەکی وەک ئەنجوومەنی بەرگری و ئەنجوومەنی ئاسایشی وڵات پێکبهێنێت.

هەروەها، سەرۆکایەتی هەریەک لە ئەنجوومەنە لاوەکییەکان یان لەلایەن سەرۆک کۆمارەوە دەکرێت یانیش ئەندامێکی ئەنجوومەنی باڵای ئاسایشی نیشتمانی، کە لەلایەن سەرۆککۆمارەوە دەستنیشان دەکرێت.

ئەمڕۆ بە فەرمی، عەلی لاریجانی، سەرۆکی پێشووتری پەرلەمانی ئێران بە بڕیاری مەسعود پزیشکیان، سەرۆک کۆماری ئێران، لاریجانی بە سکرتێری ئەنجومەنی ئاسایشی نیشتمانی دیاری کرا.

بەپێی ئاژانسی هەواڵی فارس، عەلی ئەکبەر ئەحمەدیان، سکرتێری پێشووی ئەنجوومەنەکە دەبێتە ئەندامی ئەنجوومەنەکە و بەرپرسیارێتی چەند دۆسیەیەکی تایبەت و ستراتیژیی ئێرانی پێدەدرێت.

عەلی لاریجانی، سادق لاریجانی و محەممەد جەواد لاریجانی، باوکیان، ئایەتوڵڵا میرزا هاشم ئامۆلی لاریجانی، یەکێک بوو لە مەرجەعە گەورەکانی شیعە و هاوڕێی نزیکی ئایەتوڵڵا خومەینی، کە ئەمەش ڕێگەخۆشکەرێکی سەرەکی بوو بۆ چوونەناو کایەی سیاسیی کوڕەکانی.

ئەم بنەماڵەیە یەکێکن لە بنەماڵە هەرە بەهێز و کاریگەرەکانی دوای شۆڕشی 1979، کە هێزی خۆیان لە تێکەڵەیەکی دەگمەنی نێوان "ئاینی نەریتی" و "زانستی مۆدێرن" و "پەیوەندی سیاسی"دا وەرگرتووە.


چۆن یەک بنەماڵە، بۆ ماوەیەکی درێژ، سێ جومگەی سەرەکیی دەسەڵاتی ئێرانیان بەدەستەوە بوو؟ بنەماڵەی لاریجانی، کە زیاتر لە دوو دەیە وەک "کۆڵەکەکانی ڕاگرتنی نیزام" ناسرابوون، سێکوچکەیەکی دەسەڵاتیان پێکهێنابوو کە لە مێژووی کۆماری ئیسلامیدا وێنەی نەبوو.

گۆشەی یەکەمی سێکوچکەکە: عەلی لاریجانی، سیاسەتمەدارە پراگماتییەکە، بۆ ماوەی 12 ساڵ سەرۆکی پەرلەمان بوو. ئەو دەسەڵاتی یاسادانانی لەژێر کۆنترۆڵدا بوو. کاری ئەو، ڕاگرتنی هاوسەنگیی نێوان باڵە جیاوازەکان و بەڕێوەبردنی یاساکانی وڵات بوو.

گۆشەی دووەم: سادق لاریجانی، دادوەرە دەسەڵاتدارەکە، بۆ ماوەی 10 ساڵ سەرۆکی دەسەڵاتی دادوەری بوو، ئەو هێزی دادوەری و سەرکوتکردنی بەدەستەوە بوو. لە سەردەمی ئەودا، هەزاران نەیار و ناڕازی ڕووبەڕووی حوکمی قورس بوونەوە، ئەو پارێزەری ئاسنینی نیزام بوو لەناوخۆدا.

گۆشەی سێیەم: محەممەد جەواد لاریجانی، تیۆریست و مێشکی ئایدۆلۆژیم، ئەو بەرگریکاری فەرمیی ئێران بوو لە گۆڕەپانی نێودەوڵەتیدا، بەتایبەت لە بواری مافی مرۆڤدا. کاری ئەو، داڕشتنی گوتاری فەرمی و پاساوهێنانەوە بوو بۆ کردەوەکانی نیزام.

سەرهەڵدانی نەوەیەکی نوێی توندڕەو، تۆمەتەکانی گەندەڵی، و گۆڕانی نەخشەی سیاسیی ئێران، هێزی لاریجانییەکانی کەمکردەوە، گەورەترین گورز، ڕەتکردنەوەی کاندیدبوونی عەلی لاریجانی بوو بۆ سەرۆکایەتی لە ساڵی 2021، ئەمە نیشانەی کۆتایی سەردەمی زێڕینی ئەم بنەماڵەیە بوو.






















TVPodcastهەواڵبنکۆڵکاری دەربارەی ئێمە 18-

ریکلاممان لەگەڵ بکە

+964 (0)770 153 6483

[email protected]

Designed and developed by AVESTA GROUP

Mic News. ©2021 All rights reserved