-18

پێنج شێوازی گفتوگۆ بۆ ئەوەی بەڕێزەوە ناڕەزایی دەرببڕیت

ڕازیبوون ئاسانترە بە بەراورد بە ناڕازی بوون، بەڵام دەکرێت لەو گفتۆگایانەی دەیانکەیت لەگەڵ دەوروبەرت زۆر شت فێر ببیت ئەگەر گوێ بۆ بەرامبەر رابگریت و دروست رەفتار بکەیت.

زۆرێک لە هەرزەکاران شەرم دەکەن لە ناڕازیبوون و دۆڕان لە گفتوگۆدا بۆیە ئەم پێنج ئامۆژگارییە دەتوانێت یارمەتیدەر بێت لە پاراستنی هەرزەکاران لە ناکۆکییەکان لەکاتێکدا قسە لەگەڵ دایک و باوک، هاوڕێ، یان هەر کەسێکی تر دەکات.

1- لە دڵی مەگرە

ئەگەر ناڕەحەت بوویت، ئەوەت بیر بێت کە تۆ لە شێوەی بیرکردنەوەی (خێزان، هاوڕێ،ڕاهێنەر و هاوکارەکەت) توڕەیت نەک لە کەسەکان خۆیان.

2- بیرۆکە و بیروباوەڕی کەسانی تر بە کەم سەیر مەکە

ئەگەر لەلایەن کەسێکەوە جنێو یاخود قسەی ناشرینت پێوترا، دەزانیت چەند گرنگە زمانێکی بەڕێز بەکاربهێنیت لەبری ئەوەی بڵێیت، "ئەوە قسەیەکی گەمژانەیە". دەتوانیت بڵێیت، "ئەمەم پێ باش نییە لەبەر ئەم هۆکارانە"...

یان شێوەیەکی گاڵتە ئامێز بەکاربهێنە یاخود بۆچوونێکی بێفیزانە دەرببڕە چونکە ئەمە چانسی گەیشتنت بە مەبەستەکەت زیاتر دەکات.

3- "من" بەکاربهێنە

جێناوی "من" بەکاربهێنە بۆ ئەوەی هەستەکانت دەربڕیت و نیشانی بدەیت کە بیر لە چی دەکەیتەوە یان چیت دەوێت و چیت پێویستە.

بۆ نمونە کاتێک بە دایک و باوکت دەڵێیت: "هەموو ڕۆژانێکی چوارشەممە کاری ماڵەوەم پێدەکەن لەکاتێکدا کە دەزانن ئەرکی ماڵەوەم زۆرە"، کە تۆنێکی زۆر جیاوازتری هەیە لەوەی بڵییت، "هەست بە ماندوێتی و فشارێکی زۆر دەکەم چونکە ئەرکی ماڵەوەم زۆر لەسەرە، دەتوانم کارەکانم بخەمە سبەینێ؟"

4- گوێ لە تێڕوانینی ئەوانی دیکە بگرە

 گوێگرتن ڕێگەیەکە بۆ ئەوەی نیشانی بدەیت کە گوێ بۆ تێڕوانینی بەرامبەرەکەت دەگریت و لێی تێدەگەیت ئەمەش وادەکات  ئەویش بە هەمان شێوە بێت بۆ تۆ.

کاتێک کەسێک قسە دەکات هەوڵبدە بوەستیت لەوەی بیر لەوە بکەیتەوە کە بۆچی لەگەڵی ناڕازیت یان دوای تەواوبونی قسەکەی چی بڵییت.

لە جیاتی ئەوە سەرنجبە سەر ئەوەی چی دەوترێت و کاتیک سەرەی تۆ دێت بۆ ئەوەی قسەکەت بکەیت.

هەوڵبدە خاڵە گرنگەکان دووبارە بکەیتەوە کە کەسەکە وتویەتی بۆ ئەوەی پیشانی بدەیت گوێت لێگرتووە و بە هێمنی بارودۆخەکەت ڕوون بکەرەوە.

5- لەسەرخۆبە

ئەمە گرنگترین شتە بیکەیت بۆ ئەوەی گفتوگۆکە لە ڕێچکەی خۆی لا نەدات. بە دڵنیاییەوە ئەوە ئاستەنگێکی گەورەیە بە هێمنی و ئاقڵی بمێنیتەوە کاتێک هەست بە توڕەیی دەکەیت، بەتایبەتی کاتێک قسە لەگەڵ کەسێکی تووڕە دەکەیت

دەکرێت تۆ ببیتە ئەو کەسەی کۆنتڕۆڵی گفتوگۆکە دەکەیت، تەنانەت گەر کەسەکەی دیکە دایک و باوک یان کەسێک بێت کە بە باشی دەیناسیت. دەکرێت هەندێک جار تۆ گەورەیی بنوێنیت و چارەسەر بدۆزیتەوە.

هەواڵ

موقتەدا سەدر هەڵبژاردن رەتدەکاتەوە و چاوەڕێی دوو ئەگەرە

سەرەڕای کشانەوەی لە پرۆسەی سیاسی و بەشدارینەکردنی لە هەڵبژاردنی داهاتووی پەرلەمانی عێراق، بەڵام موقتەدا سەدر هێشتا مۆتەکەی دەسەڵاتدارانی عێراقە، ئەمەش وایکردووە لەلایەک چاویان لەسەر هەڵبژاردن بێت و لەلایەکیش چاویان لەسەر سەدر بێت، خودی موقتەدا سەدریش چاوەڕێی روودانی دوو ئەگەرە لە عێراق.

موقتەدا سەدر سەرکردەی ڕەوتی سەدر، هێشتا یەکێکە لە گەورەترین مەتەڵە سیاسییەکان، کە ڕووبەڕووی نەیارەکانی دەبێتەوە لە چوارچێوەی هەماهەنگیدا، یان تەنانەت لایەنگران و هاوپەیمانە نزیکەکانی.

لەدوای بڕیارە بەناوبانگەکەی سەدر بۆ کشانەوەی کوتلە پەرلەمانییەکەی کە خاوەنی 72 کورسی پەرلەمانی بوو، لە هاوینی 2022 و راگەیاندنی ڕەتکردنەوەی کارکردن لەگەڵ "گەندەڵکاران" کە مەبەستی چوارچێوەی هەماهەنگی بوو، پێشبینیەکان سەبارەت بە هەنگاوی داهاتووی سەدر بەردەوام مشتومڕی لە نێوان سیاسەتمەداران و شیکەرەوەکان و تەنانەت هاوڵاتیانی ئاسایی دروستکردووە.

موقتەدا سەدر لە هەموو پەیامەکانیدا سەبارەت بە کشانەوەی لە پرۆسەی سیاسی و هەڵبژارد، تەنها ئاماژەی بە چینێکی گەندەڵی دەسەڵاتدار کردووە، بەبێ ئەوەی هیچ نیازێکی تری خۆی بخاتەڕوو، بەڵام سەرکردەویەکەی چوارچێوەی هەماهەنگی خواستی سەدر ئاشکرا دەکات.

سەرکردەیەک لە چوارچێوەی هەماهەنگی کە نەیویست ناوی ئاشکرا بکرێت، بە ڕۆژنامەی «الشرق الأوسط»ـى راگەیاندووە، سەدر سیستەمێکی دەوێت کە لەگەڵ تێڕوانینی خۆیدا بگونجێت، کە لەوانەیە لەگەڵ تێڕوانینی ئەوانی تردا نەگونجێت.

ئەو سەرکردەیەی چوارچێوەی هەماهەنگی پێیوایە، کشانەوەی ئێستای موقتەدا سەدر لە پرۆسەی سیاسی و بایکۆتی هەڵبژاردن، لەم دیدگایەوە سەرچاوە دەگرێت نەک ڕق لە کاری سیاسی.

ئاماژە بە پێگە و بەهێزی سەدر دەکات لە دەرەوەی پرۆسەی سیاسی و دەڵێت: لەوانەیە یارییەکە بە تەواوی بگۆڕێت تەنانەت ئەگەر لە پێشبڕکێی هەڵبژاردنیش دوور بێت، هەر بۆیە، چوارچێوەی هەماهەنگی چاوێکیان لەسەر هەڵبژاردنەکان و چاوەکەی دیکەش لەسەر سەدرە.

لەگەڵ ئەوەی لایەنەسیاسییەکان و چاودێرانی سیاسی پێیانوابوو، سەدر لە چوار ساڵی رابروودا، شەقامی لە بەرژەوەندی خۆی ساز و ئامادەکردووە بۆ چوونە سەر سندوقەکانی دەنگدان، بەڵام لە بڕیارێکی چاوەڕواننەکراودا، سەدر بایکۆتکردنی هەڵبژاردنی راگەیاند، هەرچەندە سەرۆک کۆماری عێراق بە فەرمی داوای لێکرد بە بڕیارەکەیدا بچێتەوە، بەڵام ئەو سوربوو لەسەر بڕیارەکەی.

لە ناوەڕاستی مانگی تەمووزی ساڵی ڕابردوودا، موقتەدا سەدر بڕیارێکی دەرکرد بۆ دوورخستنەوەی 31 کەس لە بزووتنەوەکە و باڵی سەربازی سەرایا سەلام، بەهۆی ئاماەکارییان بۆ بەشداریکردنیان لە هەڵبژاردنەکانی داهاتوودا.

سەرکردەیەکی رەوتی سەر بە رۆژنامەی «الشرق الأوسط»ـى وتووە، ڕەوتی سەدر پشتگیری لە هیچ لیست و کاندیدێک ناکات لە هەڵبژاردنەکانی داهاتوودا، ئەو سەرکردەیە ڕەتی دەکاتەوە پێشبینی هەنگاوەکانی داهاتووی سەدر بکات و دەڵێت: هەموو شتێک دەگونجێت، بەڵام کەس نازانێت چۆن و کەی ڕوودەدات.

ئەو سەرکردەیە ئاماژەی بەوەکردووە، کە سەدر درکپێدەکات و گرەو لەسەر ئەگەری داڕمانی چوارچێوەی هەماهەنگی دەکات بە تێپەڕبوونی کات، چونکە بڕوا وایە سیستەمی سیاسی ئێستا بە ئاسانی چاکسازی ناکرێت.

دەشڵێت: سەدر هەموو جۆرە کارێکی سیاسی تاقیکردۆتەوە. بەشداری کردن لە پەرلەمان و کشانەوەی لێی و بەشداریکردن لە حکومەت و کشانەوەی لێی و هەروەها دژایەتیکردنی چالاکی لە شەقامدا و پێدەچێت گەیشتووەتە ئەو ئەنجامەی کە ئەم سیستەمە توانای چاکسازی نییە.

یەکێکی تر لەو ئەگەرانەی کە سەدر چاوەڕێی دەکات، شوێنگرتنەوەی عەلی سیستانی مەرجەعی باڵای شیعەکانە لە عێراق، خودی سەدریش خواستی خۆی بۆ جێگرتنەوەی نەشاردووەتەوە و بەپێی بنەماکانی مەزهەبی شیعە، موقتەدا سەدر هەموو مەرجەکانی تێدایە.