هەواڵ

هەرێمی کوردستان پارەی پێیە و دەتوانێت 120 ملیاری دیکە بۆ بەغدا بنێرێت

بەپێی بەدواداچونێکی دیجیتاڵ میدیای MIC، حکومەتی هەرێمی کوردستان پارەی پێویستی لە بەردەستدایە و دەتوانێت 120 ملیار دیناری دیکە وەک داهاتی نانەوتی بۆ بەغدا بنێرێت.

سەرچاوەیەکی ئاگادار لە داهاتی پارێزگای سلێمانی بە دیجیتاڵ میدیای MICـی راگەیاند، داهاتی پێویستیان لە بەردەستدایە و دەتوانن بەشی سلێمانی لە داهاتی نانەوتی رادەستی حکومەتی هەرێمی کوردستان بکەن تا بۆ بەغدای بنێرێت.

بەپێی بەدواداچوونێکی دیجیتاڵ میدیای MIC، پارێزگاکانی هەولێر و دهۆکیش پارەی پێویستیان لە بەردەستە و دەتوانرێت 120 ملیار دیناری دیکە بۆ بەغدا بنێردرێت. 

بەپێی رێککەوتنی هەرێمی کوردستان لەگەڵ حکومەتی عێراقی، دەبێت هەرێمی کوردستان مانگانە بڕی 120 ملیار دینار لە داهاتی نانەوتی بۆ بەغدا بنێرێت. 

هەرێمی کوردستان ماوەی سێ مانگ بوو داهاتی نانەوتی رادەستی بەغدا نەکردبوو، هەفتەی رابردوو 120 ملیار دیناری وەک داهاتی نانەوتی مانگی ئایار بە حکومەتی عێراقیدا، کە نزیکەی 48 ملیار دیناری پارێزگاکانی سلێمانی و هەڵەبجە بوو، 70 ملیار دینارەکەی دیکەشی داهاتی نانەوتی پارێزگاکانی هەولێر و دهۆک بوو.

بەپێی داتاکانی وەزارەتی دارایی و ئابوری، داهاتی نانەوتی هەرێمی کوردستان مانگانە نزیکەی 300 تا 350 ملیار دینارە، کە 15٪ـی کاش نییە. 

ئەگەر ئەو داتایانەی وەزارەتی دارایی بکرێت بنەما، دەبێت داهاتی نانەوتی هەرێمی کوردستان لە مانگی نیسان بۆ مانگی تەممووز نزیکەی ترلیۆنێک دینار بووبێت و تەنها بڕی 120 ملیار دیناری بۆ بەغدا نێردرا بێت. 

بەپێی رونکردنەوەی وەزارەتی هەرێمی کوردستان، داهاتی نانەوتی تەنها بەشی بەغدای لێ نادرێت بەڵکو مانگانە بڕی 160 ملیار دیناری بۆ خەرجی وەزارەتەکان خەرج دەکرێت، هەروەها نزیکەی 30 ملیار دیناریشی وەک مووچە دەدرێتە فەرمانبەرانی گرێبەست، ئەوەشی دەمێنێتەوە بۆ پرۆژەی خزمەتگوزاری خەرج دەکرێت. 

هەواڵ

هۆشداریی لە دوبارە درێژکردنەوەی سزای زیندانی شێروان شێروانی دەدرێت

پارێزەری شێروان شێروانی هۆشداریی دەدات لە کردنەوەی دۆسییەی دیکە بۆ شێروان شێروانی و دەڵێت: پارتی دۆسییە لەدوای دۆسییە بۆ شێروان شێروانی دروست دەکات.

محەمەد عەبدوڵا، پاریزەری شێروان شێروانی، لە ڕاگەیەندراوێکدا هۆشداریی لە درێژکردنەوەی سزای زیندانی کردنی شێروان شێروانی دەکات و ئاماژەی بەوەکردووە، جارێکی دیکە سزای ڕۆژنامەنووس شێروان شێروانی دەدرێت.

باسی لەوەکردووە، دوای دوو ساڵ لە شاردنەوە و دەستی دەستی پێکردنی دواین دۆسیەی ناوبراو ئەمڕۆ دادوەری دادگای لێکۆلینەوەی بنەسڵاوە پێ ی ڕاگەیاندووە دۆسیەکەی شێروان ڕەوانەی دادگای تایبەت مەندکراوە بۆ سزادان و یەکلایی کردنەوە.

ڕۆژنامەنووس شێروان شێروانی ماوەی سزادانی دوایین دۆسییە کەلەسەری سزادرا بوو لە ئێستادا حکومەکەی بەسەر دەبات لە چاکسازی گەوران لە سەرەتای مانگی ئەیلولی ئەم ساڵ واتە مانگی نۆ کۆتایی دێت.

محمەد عوبدوڵا دەڵێت، "با بۆ هەموو لایەک ڕونبێت کە پارتی دۆسیە لە دوای دۆسیە بۆ شێروان دروست دەکات و  ناهێڵێت ئازاد بکرێت".

دوپاتیشی دەکاتەوە، یان دەبێت سازش لە هەڵوێست و مەبدەئەکانی بکات یان تا ئەم دەسەڵاتە مابێت ناهێڵێت شێروان شێروانی ئازاد بکرێت .

ئاشکراشیکردوە، لەدوا سەردانیدا، شێروان شێروانی لە چەکسازی گەورانی هەولێر پێی ڕاگەیاندووە، "چەند کەسێک لە یەکێک لە دەزگائەمنییەکان بەتایبەت بۆ لای هاتوون و دوای چەند پرسیارێک و گفتوگۆیەک پێیان ڕاگەیاندوە ئەگەر ئەو کارانە بکات ئەوان دەیانەوێت دۆسییەکانی دادەخرێت و ئازەد دەکرێت قەرەبووی ئەو پێنج ساڵەشی بۆ دەکرێتەوە کە لە زیندان بووە".

رۆژی 16ـی شوباتی 2021، دوای چەند مانگێک لە دەستگیرکردنیان، دادگای تاوانی هەولێر بە تۆمەتی "تێکدانی ئاسایشی نیشتمانی"، شێروان شێروانی و چوار چالاکوان و رۆژنامەنووسی بادینانی بە شەش ساڵ زیندانیکردن سزادا.

مانگی شوباتی 2022 بە فەرمانی نێچیرڤان بارزانی، سەرۆکی هەرێمی کوردستان 50%ـی سزاکەی شێروان شێروانی کەمکرایەوە.
بەگوێرەی بڕیارەکەی سەرۆکی هەرێمی کوردستان، دەبوو ئەیلوولی 2023 شێروان شێروانی ئازاد بکرایە، بەڵام لە 20ـی تەمموزی 2023، شێروانی بە مادەی 298 و 295 لە یاسای سزادانی عێراق، بە چوار ساڵ بەندکردن سزا درایەوە.

بەپێی ئەو بڕیارەی کە سەرۆکی هەرێمی کوردستانی دەریکرد بوو، چوار ساڵەکە کەمکرایەوە بۆ دوو ساڵ و بڕیاربوو، مانگی ئازاری ئەمساڵ ئازاد بکرێت، بەڵام داواکاری ئازادبوونی رەتکرایەوە بۆ شەش مانگی دیکە دواخرا.