هەواڵ

ماڵپەڕی شەفافیەت بۆ Mic: 80 ملیارەکە پاکتاوکردنە بەڵام دەبوو بەشێکی بۆ سلێمانی بووایە

ماڵپەڕی شەفافیەت زانیارییەکانی دیجیتاڵ میدیای Mic لەبارەی هۆکاری زیادبوونی داهاتی سلێمانی لە ماوەی هەفتەی رابردوودا پشتراستدەکاتەوە و دەڵێت، پارەکە وەک داهات هەژمار ناکرێت. 

شوان جەبار سەپەرشتیاری ماڵپەڕی شەفافیەت بە دیجیتاڵ میدیای Micـی راگەیاند، ئەو 80 ملیارەی وەک داهاتی بڵاوکراوەتەوە پارە نییە بۆ سلێمانی، بەڵکو پاکتاوکردنە لەگەڵ کۆمپانیاییەک.

وەک پێشتر دیجیتاڵ میدیای Mic بڵاویکردەوە، کۆمپانیای ماس کە یەکێکە لە گەورەترین کۆمپانیاکانی بەرهەمهێنانی کارەبا لە هەرێمی کوردستان، باجی پارەی کارەبای سنوری پارێزگای سلێمانی داوە، بەڵام بەهۆی ئەوەی حکومەت قەرزاریەتی پارەکەی نەداوە بەڵکو باجەکەی خستووەتە بری قەرزەکانی.

سەرپەرشتیاری شەفافیەت لەبارەی هۆکاری داخڵکردنی ئەو پارەیە وەک داهاتی سلێمانی باسی لەوەکرد، "ئەو 80 ملیارە لە ئەنجامدا داهاتێکە بۆ خەزێنەی گشتی بۆیە تۆمارمان کردووە، بەڵام داهاتەکە لای حکومەتە و ئەوان خستوویانەتە بەر ئەو قەرزانەی کۆمپانیاکە لایان بووە".

بە پەپێی یاسای کارگێڕی دارایی (الاداره المالية)ـی ژمارە 6ـی ساڵی 2019 ماددەی 45ـی پاکتاوپێکردنی پار بۆ خەرجی وەبەرهێنان و فرۆشتنی وزەی کارەبا دەبێت، بەڵام نابێت هەمو خەرجیەکانی بە تەنها و بە گشتی لەسەر داهاتی یەک شار بن.

شوان جەبار سەپەرشتیاری ماڵپەڕی شەفافیەت وتی،"لەو پاکتاوانەی کە بۆ کۆمپانیا گەورەکان دەکرێت دەبێت دادپەروەری جێبەجێ بکرێت، بۆیە دەبوو ئەو پارەیەی لەسەری بووە بەشێکی بۆ نۆژەنکردنەوەی کارەبای سنوری سلێمانی تەرخان بکرایە نەوەک هەمووی بدرێتەوە قەرز، چونکە زیانە ژینگەییەکانی بۆ ناوچەکەیە".

بەپێی  ماڵپەڕی شەفافیەت، داهاتی پارێزگاکانی سلێمانی و هەڵەبجە لە 19ـی تەممووز بۆ 25ـی تەممووز، 87 ملیار و 229 ملیۆن و 625 هەزار و 390 دینار بووە.

هەفتەیەک پێشتر داهاتی هەمان سنوور، 17 ملیار و 52 ملیۆن و 233 هەزار و 425 دینار بووە، بەوەش زیاتر لە 70 ملیار دینار زیادی کردووە.

بەگوێرەی ماڵپەڕەکە، داهاتی مانگی رابردووی ئەو ناوچانە لە 25-06-2025 بۆ 25-07-2025، بریتییە لە 118 ملیار و 926 ملیۆن و 19 هەزار و 609 دینار.

بەپێی داتاکانی مالپەڕەکە داهاتی هەفتەی رابردووی پارێزگاکانی سلێمانی و هەڵەبجە زیاتر لە 411% و داهاتی مانگانەش 91% بەرز بوونەتەوە. 

هەواڵ

هۆشداریی لە دوبارە درێژکردنەوەی سزای زیندانی شێروان شێروانی دەدرێت

پارێزەری شێروان شێروانی هۆشداریی دەدات لە کردنەوەی دۆسییەی دیکە بۆ شێروان شێروانی و دەڵێت: پارتی دۆسییە لەدوای دۆسییە بۆ شێروان شێروانی دروست دەکات.

محەمەد عەبدوڵا، پاریزەری شێروان شێروانی، لە ڕاگەیەندراوێکدا هۆشداریی لە درێژکردنەوەی سزای زیندانی کردنی شێروان شێروانی دەکات و ئاماژەی بەوەکردووە، جارێکی دیکە سزای ڕۆژنامەنووس شێروان شێروانی دەدرێت.

باسی لەوەکردووە، دوای دوو ساڵ لە شاردنەوە و دەستی دەستی پێکردنی دواین دۆسیەی ناوبراو ئەمڕۆ دادوەری دادگای لێکۆلینەوەی بنەسڵاوە پێ ی ڕاگەیاندووە دۆسیەکەی شێروان ڕەوانەی دادگای تایبەت مەندکراوە بۆ سزادان و یەکلایی کردنەوە.

ڕۆژنامەنووس شێروان شێروانی ماوەی سزادانی دوایین دۆسییە کەلەسەری سزادرا بوو لە ئێستادا حکومەکەی بەسەر دەبات لە چاکسازی گەوران لە سەرەتای مانگی ئەیلولی ئەم ساڵ واتە مانگی نۆ کۆتایی دێت.

محمەد عوبدوڵا دەڵێت، "با بۆ هەموو لایەک ڕونبێت کە پارتی دۆسیە لە دوای دۆسیە بۆ شێروان دروست دەکات و  ناهێڵێت ئازاد بکرێت".

دوپاتیشی دەکاتەوە، یان دەبێت سازش لە هەڵوێست و مەبدەئەکانی بکات یان تا ئەم دەسەڵاتە مابێت ناهێڵێت شێروان شێروانی ئازاد بکرێت .

ئاشکراشیکردوە، لەدوا سەردانیدا، شێروان شێروانی لە چەکسازی گەورانی هەولێر پێی ڕاگەیاندووە، "چەند کەسێک لە یەکێک لە دەزگائەمنییەکان بەتایبەت بۆ لای هاتوون و دوای چەند پرسیارێک و گفتوگۆیەک پێیان ڕاگەیاندوە ئەگەر ئەو کارانە بکات ئەوان دەیانەوێت دۆسییەکانی دادەخرێت و ئازەد دەکرێت قەرەبووی ئەو پێنج ساڵەشی بۆ دەکرێتەوە کە لە زیندان بووە".

رۆژی 16ـی شوباتی 2021، دوای چەند مانگێک لە دەستگیرکردنیان، دادگای تاوانی هەولێر بە تۆمەتی "تێکدانی ئاسایشی نیشتمانی"، شێروان شێروانی و چوار چالاکوان و رۆژنامەنووسی بادینانی بە شەش ساڵ زیندانیکردن سزادا.

مانگی شوباتی 2022 بە فەرمانی نێچیرڤان بارزانی، سەرۆکی هەرێمی کوردستان 50%ـی سزاکەی شێروان شێروانی کەمکرایەوە.
بەگوێرەی بڕیارەکەی سەرۆکی هەرێمی کوردستان، دەبوو ئەیلوولی 2023 شێروان شێروانی ئازاد بکرایە، بەڵام لە 20ـی تەمموزی 2023، شێروانی بە مادەی 298 و 295 لە یاسای سزادانی عێراق، بە چوار ساڵ بەندکردن سزا درایەوە.

بەپێی ئەو بڕیارەی کە سەرۆکی هەرێمی کوردستانی دەریکرد بوو، چوار ساڵەکە کەمکرایەوە بۆ دوو ساڵ و بڕیاربوو، مانگی ئازاری ئەمساڵ ئازاد بکرێت، بەڵام داواکاری ئازادبوونی رەتکرایەوە بۆ شەش مانگی دیکە دواخرا.