پەروەردەی سێکسی

فەرامۆشکردنی هەست و سۆز لە پەروەردەی سێکسی راگەیاندنەکاندا

هۆشیاری دەربارەی سێکس بۆ هەموو تاکەکان گرنگییەکی زۆری هەیە، هەر لە منداڵییەوە تا دەگاتە قۆناغی هەرزەکاری و پاش هەرزەکاری، تۆڕی كۆمه‌ڵایه‌تی تاکە سەرچاوەی زانیاری بووه‌ بۆ زۆربەی ئەو کەسانەی کە پەروەردەیەکی سێکسی گشتگیریان وەرنەگرتووە.

هۆشیاری و پەروەردەی سێکسی یارمەتیدەرە بۆئەوەی مرۆڤەکان به‌ پرۆسه‌‌یه‌كی سێكسی ته‌ندروستدا تێبپەڕن له‌گه‌ڵ هاوبه‌شه‌كانیاندا، بەڵام ڕاگه‌یاندنه‌كان بوونەتە سەکۆیەك بۆ بڵاوکردنەوەی زانیاری هەڵە لەسەر پەروەردەی سێکسی.

ئەگەر سەرنجی ئەو بابەتانە بدەین کە لە کەناڵە تەلەفزیۆنییەکان قسەیان لەسەر دەکرێت و لە ماڵپەڕ و تۆڕە کۆمەڵایەتییەکان بڵاودەکرێنەوە، به‌گشتی  باس لە نەهێشتنی سکپڕی و نەخۆشییە گواستراوە سێکسییەکان دەکەن و به ‌ده‌گمه‌ن باس لە هەست و سۆز و ئارەزووەکان دەکەن.

هەرچەندە زانیاری لەبارەی ئەوانیشەوە گرنگە، بەڵام بابەتی هەست و ئارەزووەکانیش بە هەمان شێوە گرنگن و زۆرجار ڕاگەیاندنەکان خۆیانی لێ دەبوێرن‌.

یەکێک لەو بابەتانە چێژوەرگرتنە. زۆرکات وێنای سێکس و چێژ لە میدیای پۆڕندا لەگەڵ حەقیقەتی سێکس ناگونجێت و یەکناگرێتەوە. راگەیاندنەکان سەرنج ناخەنەسەر  چێژی تایبەتی چونکە لە کەسێكەوە بۆ کەسێکی تر جیاوازە و  بۆ هەمووان بەیەك جۆر نییە، بەڵام چۆن دەتوانین لە بارەی هەست و ئارەزووەکانمانەوە بزانین کاتێک دامەزراوە میدیاییەکان تەنها دیوێکمان پیشاندەدەن و دیوەکانی تر ون دەکەن؟

بۆ ده‌ستكه‌وتنی وه‌ڵامی ئه‌و پرسیارە پێویستە بزانین ئەو شێوازه‌ی میدیا و به‌رنامه‌ پۆڕنۆگرافییه‌كان بەکاریدەهێنن بۆ پیشاندان و خستنەڕووی سێکس و بابەتە پەیوەندیدارەکانی پەیوەست بەم بابەتە، کاردەکاتە سەر بیرکردنەوە و سایکۆلۆژیای خەڵک، به‌جۆرێك گەورەکردن و نادروست پیشاندانی وێنە سێکسییه‌كان دیاریدەکەن و وا لە خەڵک دەکەن بەو جۆرە بیر لە سێکس بکەنەوە.

بۆ نموونە ئەگەر باس لە پۆڕن بکەین، پسپۆڕان پێیانوایە پۆرن ده‌بێته‌ هۆی دروستكردنی وه‌هم له‌ژیانی ڕاستیدا، هەرچەندە لایەنگرانی باس لەوە دەکەن دەکرێت پۆڕن ڕێگایەک بێت بۆ گەڕان بەدوای  پاڵنه‌ره‌ وروژێنەرە سێکسیەکان.

جگەلەوە، بەرنامە پۆرنۆگرافییەکان ناتوانن زانیاری ببەخشن بە بینەر سەبارەت بە چێژ، بەڵکو دەگونجێت بەلاڕێشیاندا ببەن چونکە ئەگەر باس لە چێژ بکەین، ئەو شتانه‌ی کە كه‌سێكی دیاریكراو چێژی لێوه‌رده‌گرێت ڕەنگە بۆ کەسێکی تر نەبێتە مایەی چێژ لێوەرگرتن بەو پێیەی هه‌ركه‌سێك خولیای دیاریكراوی خۆی هه‌یه‌، ئەمەش بینەری ئەو بابەتانە دەخاتە گومانەوە لەسەر ئارەزووەکانی.

کەواتە بۆچی گرنگە میدیاکان گرنگی بەم بابەتانە بدەن؟ وەڵامەکەی ئاسانە، کاتێک کەسێك زانیاری تەواوی دەبێت  سەبارەت بە سێکس و چێژ و چ ڕێگایەک هەستێکی خۆشی پێدەدات، ئەوکات دەتوانێت لەم ڕێگەیەوە هەڵسوکەوتەکانی دیاری بکات و هەوڵ دەدات بەشێوازێکی دروست مامەڵە بکات کاتێك هاوەڵێکی بۆ پەیدا دەبێت یان هاوسەرگیری دەکات.

بەتایبەت ئەگەر رۆژنامەنوسان ڕاستگۆیانە لەڕێگای میوانداری پسپۆڕانەوە لە بارەی سێکس و هەست و ئارەزووەکانەوە له‌گه‌ڵ گه‌نجاندا بدوێن و پەروەردەی هەرزەکاران بکەن، بە شێوەیەکی ڕاست و دروست وەڵامی پرسیارەکان بدەنەوە و بابەتە پەروەردەییە سێکسییەکان لە ڕێگەی بەرنامەکانیانەوە بڵاو بکرێنەوە، ئەوان ئەمە دەبێتە هۆی کەمکردنەوەی شەرم  و ڕێگەیەکی باش دەبێت بۆ زانیاری بەخشین و وەڵامدانەوەی پرسیاری تازە پێگەیشتوان.

هەواڵ

لایەنەکانی هەرێمی کوردستان هەڕەشەی وەرگرتنی هەڵوێست دژی بەغدا دەکەن

پارتی و یەکێتی بەهۆی بڕیاری نەناردنی پارە بۆ هەرێمی کوردستان، هەڕەشەی راگەیاندنی هەڵوێستی نوێ دژی بەغدا دەکەن، فراکسیۆنە کوردییەکانی پەرلەمانی عێراق هەڵوێستی هاوبەش رادەگەیەنن و محەمەد حاجی مەحمودیش دەڵێت، باشترین کاتە ئێستا دەوڵەتی کوردی رابگەیەنین. 

 بڕیارەکانی حکومەتی عێراق بۆ نەناردنی پارەی مووچە ناڕەزایەتی لایەنە سیاسییەکانی هەرێمی کوردستانی لێکەوتەوە، مەکەبی سیاسی پارتی دیموکراتی کوردستان رایگەیاند، تا پێش جەژنی قوربان وەزارەتی دارایی عێراق شایستە داراییەکانی هەرێمی کوردستان نەنێرێت، هەڵوێستی جیددییان دەبێت. 

پارتی حکومەتی فیدراڵی بە "پێشێلکردنی مافە دەستوورییەکانی هەرێمی کوردستان" تۆمەتبار کردووە، نوسراوەکەی وەزارەتی دارایی عێراقیشی بۆ نەناردنی مووچە بۆ هەرێمی کوردستان وەک دوا پێشلکاری دژی دەستوور و بنەماکانی ڕێککەوتنی پێکهێنانی حکومەت وەسفکردووە. 

بڕیارە رۆژی 2ـی حوزەیرانی 2025، کۆمیتەی ناوەندیی پارتی لەسەر پرسەکە کۆبێتەوە تاتوێی پرسەکە بکات، وەک لە راگەیەندراوەکەی پارتیدا هاتووە، ئەگەر ماف و شایستە داراییەکانی خەڵکی هەرێمی کوردستان ڕەوانە نەکرێت هەڵوێستی جدییان دەبێت". 
یەکێتیی نیشتمانی کوردستان تا ئێستا بە فەرمی هەڵوێستی خۆی  لەسەر بڕیارەکانی وەزارەتی دارایی عێراق رانەگەیاندووە، تەنها هەرێم كەمال ئاغا سەرۆكی فراكسیۆنی یەكێتی لە پەرلەمانی عێراق بە میدیای حزبەکەی راگەیاندووە، بڕیارەكەی تەیف سامی وەزیری دارایی نایاساییە و دژی بڕیارەكانی دادگای فیدڕاڵییە.

باسی لەوەشكردووە، هێشتا خشتەی یاسای بودجەی 2025 رەوانەی پەرلەمان نەکراوە و پەسند نەکراوە، ئەم ساڵ مانگی پێنج تەواو نەبووە، بە چ پێوەرێک مووچەی فەرمانبەران و مووچەخۆرانی و شایستەی هەرێمی کوردستان دەبڕێت؟. 
رۆژی 21ـی شوباتی 2024، دادگای فیدراڵی عێراق لەسەر سکاڵایەکی یەکگرتوو، دادگای فیدراڵی چەند بڕیارێکی لەبارەی مووچەی مووچەخۆرانی هەرێمی کوردستانەوە دەرکرد، یەکێک لە بڕیارەکان پابەندکردنی بەغدا و هەولێر بوو بە خەرجکردنی مووچە دور لە ملمانێ سیاسییەکان.

دارا سێکانیانی، ئەندامی پەرلەمانی عێراق فراکسیۆنی یەکگرتووی ئیسلامی کوردستان، هەولێر و بەغدا بە وەلانانی بڕیارەکانی دادگای فیدراڵی تۆمەتبار کرد و وتی،" نووسراوەکەی تەیف سامی، وەزیری دارایی عێراق پێچەوانەی بڕیاری دادگای فیدراڵییە و  هۆکارەکەی بێ متمانەیی و پابەند نەبوونە بەبڕیارەکانی دادگای فیدراڵیەوە".

باسی لەوەشکرد، زمانی هەڕەشەی سەرکردە سیاسییەکان خزمەت بە هیچ بوارێک و سەقامگیریی کەرتی ئابوری ناکات، ناکرێت مووچەخۆران باجی هەڵەکانی حکومەت بدەن. 
بڕیارە، فراکسیۆنە کوردستانییەکان بۆ رونکردنەوەی نیگەرانییەکان یاداشتێکی ناڕەزایەتیی لە دژی بڕیاری تەیف سامی، وەزیری دارایی عێراق بۆ نەناردنی مووچەی فەرمانبەرانی حکوومەتی هەرێمی کوردستان، بدەنە محەمەد شیاع سودانی، سەرۆک وەزیرانی عێراق. 

پارتی چاکسازیی تورکمان لەگەڵ داواکاری بۆ راگەیاندنی هەڵوێستی توندی هاوبەش دژ بە بڕیارەکانی حکومەتی عێراق، لە راگەیەندراوێکدا راگەیاندووە، " حکومەتی فیدراڵی عێراق بەردەوامە لە سزادانی هاووڵاتیانی هەرێمی کوردستان و ماددەکانی دەستوور پێشێڵ دەکات  و پاشگەز دەبێتەوە لە ڕێککەوتنەکان بە بیانوی بێ پاسا و بێ بنەما کە لەسەر مووچە و شایستە داراییەکان ئەنجام درابوون. 

باسی لەوەیشکردووە، بەغدا مووچەی کردووەتە کارتێکی سیاسی بۆ لاوازکردن و دژایەتیکردنی حکومەتی هەرێمی کوردستان و خەڵکەکەی.

نەوەی نوێ و کۆمەڵ حکومەتی هەرێمی کوردستان بە هۆکار دەزانن
جوڵانەوەی نەوەی نوێ کە لەناو هێزە ئۆپۆزسیۆنەکاندا خاوەنی زۆرترین کورسییە، تا ئێستا بە شێوەیەکی فەرمی هەڵوێستی خۆی رانەگەیاندووە، بەڵام لە رێگەی میدیاکانییەوە حکومەتی هەرێمی کوردستانی وەک هۆکار دیاریکردووە و بە پابەندنەبوو بە داواکارییەکانی حکومەتی عێراقەوە تۆمەتباری کردووە. 

کۆمەڵی دادگەری کوردستان لە راگەیەندراوێکدا بڵاویکردەوە، "ئۆباڵی کێشەی مووچە بە پلەی یەکەم دەکەوێتە ئەستۆی بەرپرسانی حکومەتی کاربەڕێکەری هەرێمی کوردستان، بەڵام بێگومان حکومەتی فیدراڵیش بەشێکی تاوانەکەی دەکەوێتە ئەستۆ، بەو پێیەی مووچە وەک کارتی سیاسی بەکار دەهێنێت و دەشزانێت کە خەڵک باجەکەی دەدەن".

باس لەوەیشکراوە، بابەتی مووچە کراوەتە چەکی ململانێی نێوان دەسەڵاتدارانی هەرێم و بەغداد و هاوڵاتییانی هەرێمی پێوە گیرۆدە کراوە و دەبێت جارێکی دیکە هاوڵاتیان دەبێت باجی هەڵەی بەرپرسانی هەردوولا بدەن و بە گیرفانی خاڵی جەژن بەڕێ بکەن.

عەلی حەمەساڵح بڕیاردەری رەوتی هەڵوێست بڵاویکردەوە، ئەوان دەڵێن داهاتی نەوت و ناوخۆ نەگەڕاوەتەوە، لەبری سزای بەرپرسانی هەرێم بدەن و ڕێکاری یاسایی بگرنەبەر هاتون سزای موچەخۆرێک دەدەن، کە چەندین ساڵە قوربانیە. 

بڕیاردەری رەوتی هەڵوێست پێی وایە، عێراقیش بێ خەتا نییە و وەک خۆی نوسیوویەتی،" ئەوان بە دەسەڵاتدارانی پارتی و یەکێتی دەڵێن، لە بازرگانی نەوت و قاچاخی و بردنی پارەی هەرێم بەردەوام بن و نەینێرنەوە بۆ عێراق، ئێمەش سزای موچەخۆران دەدەین".

محەمەدی حاجی مەحمود داوای راگەیاندنی دەوڵەتی کوردی دەکات
محەمەد حاجی مەحمود، سکرتێری گشتیی پارتی سۆسیال دیموکراتی کوردستان جارێکی دیکە پرسی ریفراندۆمی ورژاندووە و پێی وایە، ڕیفراندۆم هەیە و دەبێت هەرێمی کوردستان بڕیاری خۆی بدات، چونکە ڕیفراندۆم دەنگی پێویستی بۆ جیابوونەوەی کورد لە عێراق بەدەستهێناوە.

باسی لەوەشکردووە، ئەوەی بەرامبەر بە کورد دەکرێت بڕیاری هەموو سیاسییەکانی عێراقە نەک تەنها وەزیری دارایی، ئەوەی عێراق دەیکات کاردانەوەی واژۆکردنی گرێبەستەکانی کوردستانە لە ئەمریکا.

محەمەد حاجی مەحمود بۆچوونی وایە، عێراق زۆر لاوازە و کورد زۆر بەهێزە، بۆیە عێراق بەبێ کورد هەڵبژاردنی بۆ ناکرێت، بەبێ بەشداریی کورد لە پرۆسەی سیاسیدا هەموو شتێک لە عیراق تێکدەچێت.

نوسراوەکەی تەیف سامی
تەیف سامى، وەزارەتى دارایی عێراق، بە نووسراوێکی فەرمی حکومەتی هەرێمى کوردستانى ئاگادار کردووەتەوە لەوەى چیدیکە ناتوانێت لە ناردنى پارەی مووچە بەردەوام بێت، بە پاساوى ئەوەى بڕى پشکى دیاریکراوى خۆى لە یاسای بودجە تێ پەڕاندووە