پەروەردەی سێکسی

چۆن ڕووبەڕووی گێچەڵی سێکسی هاوڕێی نزیك دەبیتەوە؟

"ماوەی ٤ ساڵە هاوڕێیه‌تی كوڕێك ده‌كه‌م و هاوڕێی نزیكی یه‌كترین، بەڵام به‌م دواییانه‌ به‌رده‌وام داوام لێدەکات سێکسی له‌گه‌ڵدا بکەم، من هەر دەڵێم 'نەخێر'، بەڵام وازم لێ ناهێنێت، چی بکەم بۆ ئەوەی چیتر بێزارم نەکات؟"

ئه‌مه‌ پرسیاری گه‌نجێكه‌ له‌باره‌ی چۆنییه‌تی ره‌تكردنه‌وه‌ی ئه‌و داواكارییانه‌ی بۆ سێكس دێنه‌ به‌رده‌می. ئه‌م پرسیاره‌ به‌دڵنیاییه‌وه‌ پرسیاری به‌شێكی زۆری كچانی گه‌نجی كۆمه‌ڵگه‌یه ‌و لێره‌وه‌ هه‌وڵده‌ده‌ین وه‌ڵامی پرسیاره‌كه‌ بده‌ینه‌وه‌.

کاتێك کەسێك زۆرت لێدەکات بۆ ئەوەی شتێك بکەیت کە نائاسوودەیت پێی، مافی خۆتە بڵێیت نەخێر جا بابەتەکە سێکسی بێت یان هەر شتێکی تر بێت. هاوڕێ دەبێت هەمیشە ڕێزت بگرێت و وەڵامەکەت قبوڵ بکات.

كاتێك دەزانیت شتێك ڕاست نییە، شانازی بەخۆتەوە بکە كه‌ ڕه‌تی بكه‌یته‌وه‌. کە قسە دەکەیت دژ بەو شتە، هاوڕێکەت زۆرت لێدەکات بۆ ئەوەی شتێك بکەیت ئەو دەیەوێت هەرچەندە وەڵامیشت نەخێر بووە، وا دەکات نائاسودە بیت و لەوانەشە هەست بە بێڕێزی بکەیت.

بەڵام لە سەروو ئەمانەوە کێشە سەرەکییەکە ئەوەیه‌ هاوڕێکەت سنوری بەزاندووە، جا خۆی ئاگاداربێت لەم سنوور بەزاندنە یان نا. با هاوڕێش بن، ئەو سنووری بەزاندووە و کارێکی کردووە دەکرێت ناوی بنێین گێچەڵی سێکسی.

هەوڵی گفتوگۆیەکی تر بدە لەگەڵ هاوڕێکەتدا، پێی بڵێ ئەو شتانەی ئەو باسی دەکات نائاسوودەت دەکات. هێمنبە بەڵام لە مافی خۆت خۆش مەبە، پێی بڵێ نابێت چیتر باسی ئەو بابەتە بکات و ئەمە شتێکی گاڵتە ئامێز نییە و و وا خۆت دەربخە کە بەشیوەیەکی جدی قسە دەکەیت.

هاوڕێ نابێت زۆر لە یەکتر بکەن یان یەکتری بەکاربهێنن. بۆی روون بکەرەوە‌ ئه‌گەر جارێکی تر باسی ئەو شتەی کردەوە ئەوا بێ قسە جێی دەهێڵیت. بەهێز و خاوەن متمانە و ڕوون و ئاشکرابە لەگەڵی، هەوڵ بدە تووڕە نەبیت و داوای لێبوردنیش نەکەیت.

هاوڕێکەت دەبێت لەوە تێبگات ناتوانێت چیتر بە بەکارهێنانی کەسانی دیکە مەرامەکانی خۆی بهێنێتە دی، ئه‌گەر بە ڕاستی هاوڕێتە ئەوا دەبینێت چەنێك ئەم داواکارییە کارت لێدەکات.

پەیوەندییەکی تەندروست جا هاوڕێیەتی بێت یاخود سۆزداری دەبێت ڕێزی تێدابێت، هاوڕێیەکی ڕاستەقینە حەز دەکات هەست بە ئارامی بکەیت و ڕێزت بگیرێت و باش مامەڵەت لەگەڵ بکرێت نەك بەکاربهێنرێیت و یاریت پێبکرێت.

بە باسکردنی ئەو شتانەی سنووریان بەزاندووە یارمەتی هاوڕێکەت دەدەیت بۆ بوون بە هاوڕێیەك و خۆشەویستێکی باشتر لە داهاتوودا.

هەواڵ

موقتەدا سەدر هەڵبژاردن رەتدەکاتەوە و چاوەڕێی دوو ئەگەرە

سەرەڕای کشانەوەی لە پرۆسەی سیاسی و بەشدارینەکردنی لە هەڵبژاردنی داهاتووی پەرلەمانی عێراق، بەڵام موقتەدا سەدر هێشتا مۆتەکەی دەسەڵاتدارانی عێراقە، ئەمەش وایکردووە لەلایەک چاویان لەسەر هەڵبژاردن بێت و لەلایەکیش چاویان لەسەر سەدر بێت، خودی موقتەدا سەدریش چاوەڕێی روودانی دوو ئەگەرە لە عێراق.

موقتەدا سەدر سەرکردەی ڕەوتی سەدر، هێشتا یەکێکە لە گەورەترین مەتەڵە سیاسییەکان، کە ڕووبەڕووی نەیارەکانی دەبێتەوە لە چوارچێوەی هەماهەنگیدا، یان تەنانەت لایەنگران و هاوپەیمانە نزیکەکانی.

لەدوای بڕیارە بەناوبانگەکەی سەدر بۆ کشانەوەی کوتلە پەرلەمانییەکەی کە خاوەنی 72 کورسی پەرلەمانی بوو، لە هاوینی 2022 و راگەیاندنی ڕەتکردنەوەی کارکردن لەگەڵ "گەندەڵکاران" کە مەبەستی چوارچێوەی هەماهەنگی بوو، پێشبینیەکان سەبارەت بە هەنگاوی داهاتووی سەدر بەردەوام مشتومڕی لە نێوان سیاسەتمەداران و شیکەرەوەکان و تەنانەت هاوڵاتیانی ئاسایی دروستکردووە.

موقتەدا سەدر لە هەموو پەیامەکانیدا سەبارەت بە کشانەوەی لە پرۆسەی سیاسی و هەڵبژارد، تەنها ئاماژەی بە چینێکی گەندەڵی دەسەڵاتدار کردووە، بەبێ ئەوەی هیچ نیازێکی تری خۆی بخاتەڕوو، بەڵام سەرکردەویەکەی چوارچێوەی هەماهەنگی خواستی سەدر ئاشکرا دەکات.

سەرکردەیەک لە چوارچێوەی هەماهەنگی کە نەیویست ناوی ئاشکرا بکرێت، بە ڕۆژنامەی «الشرق الأوسط»ـى راگەیاندووە، سەدر سیستەمێکی دەوێت کە لەگەڵ تێڕوانینی خۆیدا بگونجێت، کە لەوانەیە لەگەڵ تێڕوانینی ئەوانی تردا نەگونجێت.

ئەو سەرکردەیەی چوارچێوەی هەماهەنگی پێیوایە، کشانەوەی ئێستای موقتەدا سەدر لە پرۆسەی سیاسی و بایکۆتی هەڵبژاردن، لەم دیدگایەوە سەرچاوە دەگرێت نەک ڕق لە کاری سیاسی.

ئاماژە بە پێگە و بەهێزی سەدر دەکات لە دەرەوەی پرۆسەی سیاسی و دەڵێت: لەوانەیە یارییەکە بە تەواوی بگۆڕێت تەنانەت ئەگەر لە پێشبڕکێی هەڵبژاردنیش دوور بێت، هەر بۆیە، چوارچێوەی هەماهەنگی چاوێکیان لەسەر هەڵبژاردنەکان و چاوەکەی دیکەش لەسەر سەدرە.

لەگەڵ ئەوەی لایەنەسیاسییەکان و چاودێرانی سیاسی پێیانوابوو، سەدر لە چوار ساڵی رابروودا، شەقامی لە بەرژەوەندی خۆی ساز و ئامادەکردووە بۆ چوونە سەر سندوقەکانی دەنگدان، بەڵام لە بڕیارێکی چاوەڕواننەکراودا، سەدر بایکۆتکردنی هەڵبژاردنی راگەیاند، هەرچەندە سەرۆک کۆماری عێراق بە فەرمی داوای لێکرد بە بڕیارەکەیدا بچێتەوە، بەڵام ئەو سوربوو لەسەر بڕیارەکەی.

لە ناوەڕاستی مانگی تەمووزی ساڵی ڕابردوودا، موقتەدا سەدر بڕیارێکی دەرکرد بۆ دوورخستنەوەی 31 کەس لە بزووتنەوەکە و باڵی سەربازی سەرایا سەلام، بەهۆی ئاماەکارییان بۆ بەشداریکردنیان لە هەڵبژاردنەکانی داهاتوودا.

سەرکردەیەکی رەوتی سەر بە رۆژنامەی «الشرق الأوسط»ـى وتووە، ڕەوتی سەدر پشتگیری لە هیچ لیست و کاندیدێک ناکات لە هەڵبژاردنەکانی داهاتوودا، ئەو سەرکردەیە ڕەتی دەکاتەوە پێشبینی هەنگاوەکانی داهاتووی سەدر بکات و دەڵێت: هەموو شتێک دەگونجێت، بەڵام کەس نازانێت چۆن و کەی ڕوودەدات.

ئەو سەرکردەیە ئاماژەی بەوەکردووە، کە سەدر درکپێدەکات و گرەو لەسەر ئەگەری داڕمانی چوارچێوەی هەماهەنگی دەکات بە تێپەڕبوونی کات، چونکە بڕوا وایە سیستەمی سیاسی ئێستا بە ئاسانی چاکسازی ناکرێت.

دەشڵێت: سەدر هەموو جۆرە کارێکی سیاسی تاقیکردۆتەوە. بەشداری کردن لە پەرلەمان و کشانەوەی لێی و بەشداریکردن لە حکومەت و کشانەوەی لێی و هەروەها دژایەتیکردنی چالاکی لە شەقامدا و پێدەچێت گەیشتووەتە ئەو ئەنجامەی کە ئەم سیستەمە توانای چاکسازی نییە.

یەکێکی تر لەو ئەگەرانەی کە سەدر چاوەڕێی دەکات، شوێنگرتنەوەی عەلی سیستانی مەرجەعی باڵای شیعەکانە لە عێراق، خودی سەدریش خواستی خۆی بۆ جێگرتنەوەی نەشاردووەتەوە و بەپێی بنەماکانی مەزهەبی شیعە، موقتەدا سەدر هەموو مەرجەکانی تێدایە.