هەواڵ

وەزارەتی بازرگانی: تەنها چەند فەردەیەک برنج لە بەشە خۆراکی هاوڵاتییان خراپ بوون و ئاساییە

Mic
2022-05-09

وەزارەتی بازرگانی و پیشەسازی وەڵامی ئەندامێکی ئەنجوومەنی پارێزگای سلێمانی دەداتەوە کە وتبووی بەشێک لەو برنجەی دەدرێت بە هاوڵاتییان کەڕوو لێیداوە.

وەزارەتی بازرگانی و پیشەسازی لە رونکردنەوەیەکدا دەڵێت ئەو برنجە پێشتر پشکنینی بۆ دەکرێت ئینجا بەسەر ھاوڵاتییاندا دابەش دەکرێت، دەشڵێت تەنها چەند فەردەیەک لە چەندین تەن برنج خراپ بوون و ئەوە ئاساییە.

وەزارەتی بازرگانی دەشڵێت، ئەو فەردە برنجانەی کە گومانی بوونی کەڕوو تێیاندا ھەبووە دابەش نەکراون و ھەموو کات ئەم خۆراکانە گەڕێندراوەتەوە و لەناوبراون.

وتیشی، "ھاوڵاتیان دڵنیا دەکەینەوە ئەو بەشە خۆراکەی دابەش دەکرێت لە رێگەی بریکارەکان پێشتر پشکینینی بۆ دەکرێت و پاش دڵنیا بوون دابەش دەکرێت."

پێشتر ئەندامێکی ئەنجومەنی پارێزگای سلێمانی رایگەیاند بەدواداچوونی بۆ ئەو برنجە کردووە کە لەگەڵ بەشە خۆراکی مانگانە دەدرێت بە ھاوڵاتییان و دەرکەوتوە لەبەشێک لە فەردە برنجەکانی لای بریکارەکانی خۆراک کەڕو ھەیە.

کاسترۆ مەعروف، ئەندامی ئەنجومەنی پارێزگای سلێمانی لە پۆستێکدا لە لاپەڕەی تایبەتی خۆی لە فەیسبوک نوسیویەتی ئەگەر هاوڵاتیان زانیان ئەو برنجەی دابەشدەکرێت گرفتی ھەیە، باشترە وەرینەگرن.

دەشڵێت، " لەئەنجامی بەدواداچونم بۆبەشێک لەبریکارەکانی خۆراک بۆم دەرکەوت لەبەشێک لەفەردەکانی برنج کەڕو لێیداوە".

کاسترۆ مەعروف ڕاشیگەیاند، " داواکارم  لەتەواوی بریکارەکانی پارێزگای سلێمانی ئیدارەکانی گەرمیان و ڕاپەڕین ھەرفەردەیەک بەم شێوازەیان بینی دابەشی نەکەن بەسەرھاوڵاتیان لەڕێگای ئیدارەی ناوچەکەیان بیگەڕینەوە بۆبەڕێوەبەرایەتی خۆراکی سلێمانی تاوەکو بۆیان بگۆڕن".

More News

Most Popular

هەواڵ

لیای 10 ساڵ، ئەو کیژۆڵەی دووجار بەخاکسپێردرا

Mic
2022-05-23

کیژۆڵەیەکی 10 ساڵان، تەنها لە هەفتەیەکدا دووجار بەخاکسپێردرا، ئەوەش بەهۆی ئەوەی گومان لەدۆسییە کوشتنەکەیدا هەبوو، بەڵام دواجار دادگا دۆسییەکەی یەکلاییکردەوە.

باوكی لیا كە چەند رۆژێك لەمەوبەر گیانی لەدەستدا دەڵێت پزیشكی دادوەری پشتڕاستیكردوەتەوە كە كچەكەی بەهۆی پەلاماردانی سەگەوە گیانی لەدەستداوە، وتەبێژی پۆلیسی سلێمانیش دەڵێت لێكۆڵینەوە لەگەڵ بنەماڵەی منداڵەكە و خاوەنی سەگەكانیش كراوە.

عەلی ڕەحیم، باوكی لیای تەمەن 10 ساڵ، ئەو كچەی ھەفتەی رابردوو لە گەڕەكی ڕاپەڕینی شاری سلێمانی سەگ پەلاماری دا و گیانی لەدەست دا بە مایكی ڕاگەیاند: تەرمی كچەكەم لە پەیمانگەی پزیشكی دادی سلیمانی وەرگرتەوە و جارێكی دیكە بە خاكمان سپاردەوە".

وتیشی: "بەپێی ڕاپۆرتی پەیمانگەی پزیشكی دادی سلێمانی، دەركەوتووە كچەكەم بەھۆی پەلاماردانی سەگەوە گیانی لەدەست داوە و خواردوویەتی، بۆیە سبەی بنەماڵەكەمان لەسەر ئەو ھەموو تۆمەتانەی ئاڕاستەمان كراوە، لە كۆنگرەیەكی رۆژنامەوانیدا ھەڵوێستمان دەبێت".

باوكی لیای تەمەن 10 ساڵ، وتیشی: "ئەو سێ سەگەی كچەكەمیان خواردووە، كوژراون، بەڵام من سەگەكانم نەكوشتووە".

لەوبارەیەوە سەركەوتن ئەحمەد وتەبێژی پۆلیسی سلێمانی بەمایكی وت:"لەسەر دۆسیەی لیا لێكۆڵینەوە لەگەڵ بنەماڵەی لیا و ئەو بنەماڵەیەش كە سەگەكانیان هەیە كراوە".
وتیشی :"لەسەر دۆسیەكە لێكۆڵینەوەی تەواو كراوە و ئەوەی هەیە پەیوەندی بەدادوەری گشتیەوە هەیە".
هاوكات بەرزان محەمەد بەڕێوەبەری پزیشكی دادی سلێمانی بەمایكی راگەیاند: سەرجەم ئەو پرسیارانەی سەبارەت بە مردنی لیا لەپزیشكی دادوەری لەلایەن داواكاری گشتیەوە كراون وەڵاممان داونەتەوە".
پێشتریش هەر سەبارەت بەو پرسە، گوڵستان سەعید ئەندامی لیژنەی مافی مرۆڤی پەرلەمانی كوردستان بەمایكی وت:"سەبارەت بەو پرسە قسەمان لەگەڵ دەستەی مافی مرۆڤ كردووە، ئەوان پێیان وتین لەسەر دۆسیەكە لێكۆڵینەوەیان كردووە، بەڵام وەكو پەرلەمان ناتوانین دەستێوەردان لەكاروباری داواكاری گشتی بكەین".
بەڕێوەبەرایەتیی پۆلیسی سلێمانی لە روونكردنەوەیەكدا كە رۆژی هەینی رابردوو بڵاویكردەوە، رایگەیاند: بە بڕیاری دادوەر و بە ئامادەبوونی مەفرەزەكانی بنكەی پۆلیسی راپەڕین، تیمەكانی بەشی بەڵگەی تاوان و پزیشكانی دادوەری، تەرمی لیا لەناو گۆڕەكەی دەرهێنراوەتەوە و توێكاری بۆ لاشەكەی دەكرێت و لێكۆڵینەوەش لە رووداوەكە بەردەوام دەبێت".
16 یی ئەم مانگە هەواڵی گیانلەدەستدانی كچێكی 10 ساڵ لە سلێمانی بەهۆی پەلاماردانی سەگ بڵاوبویەوە، هەواڵەكە و پاشانیش لێدوانی باوكی منداڵەكە كاردانەوەی بەدوای خۆیدا هێنا بەتایبەتیش لەتۆڕە كۆمەڵایەتیەكان، بەوهۆیەشەوە لەسەر فەرمانی داواكاری گشتی گۆڕەكەی لیا هەڵدرایەوە.