تەندروستی

حكومەت پارەی كۆمپانیاكانی زبڵ و خاشاك نادات، رێگەش نادات كۆمپانیاكانی ریسایكلین كاری خۆیان بكەن

Mic
2022-08-06

دوای چەند جارێک هەڕەشەکردنی مانگرتن لە کارەکانیان، بەرپرسانی کۆمپانیاکانی پاککەرەوە لە سلێمانی دەڵێن، وەکو قەرز بڕێک پارە بە کرێکارەکانیان دراوە، ئەوەش لەكاتێكدایە بەهۆی گرێبەست لەگەڵ كۆمپانیایەك حكومەتی هەرێم رێگری لەگەورەترین كۆمپانیای ریسایكلین دەكات لەسلێمانی كارەكانی خۆی بكات.
شاری سلێمانی کراوەتە پێنج زۆنەوە و لە لایەن سێ کۆمپانیاوە لە زبڵ و خاشاک پاکدەکرێتەوە، بە وتەی خاوەنی کۆمپانیاکان، نزیکەی 15 ملیار دیناریان لای حکومەتی هەرێمی کوردستانە و بەبیانووی نەبوونی سیولە لە بانکەکانی سلێمانیدا بۆیان خەرجنەکراوە.
حكومەتی هەرێم پارەی كۆمپانیاكانی پاككەرەوە خەرج ناكات و حزب پارەیان دەداتێ، بەوتەی خالید شینكی بەڕێوەبەری كۆمپانیای خالید شینكی بافڵ تاڵەبانی سەرۆكی یەكێتی پارەی بەقەرز پێداون لەپێناو ئەوەی بەردەوام بن لەكاركردن و دەبێت دواتر قەرزەكە بگەڕێننەوە.
نزیکەی هەزار و 500 کرێکاری سێ کۆمپانیا، شاری سلێمانی و دەوروبەری لە زبڵ و خاشاک پاکدەکەنەوە. کۆمپانیای خالید شینکی بە نزیکەی 600 کرێکار لە نو سلێمانی کاردەکات، کۆمپانیای شکار 780 کرێکاری لە زۆنەکانی دووکان و چەمچەماڵ هەیە و 350 کرێکاریشی لەنێو شاری سلێمانیدا کاری پاککردنەوە دەکەن، کۆمپانیای هەرێم بە نزیکەی 500 کرێکار دوو زۆنی نێو سلێمانی لە زبڵ و خاشاک پاکدەکەنەوە.
لە پێنج زۆنەوە زبڵ و خاشاکی سلێمانی کۆدەکرێتەوە، مانگانە 1 ملیار و 300 ملیۆن دینار تێچووی کۆکردنەوەی زبڵ و خاشاکی سلێمانییە،نزیکەی 60%ـی پێکهاتەی زبڵەکان ماددەی خۆراکی و ئەندامییە، بەشەکەی دیکەشی پلاستیک و کارتۆن و تەختە و ماددەی دیکەیە. 
زبڵ و خاشاک بە زێڕی پیس ناودەبرێت و لە ئەوروپا ئەو کۆمپانیایەی کە ریسایکلینگی دەکات 50 تاوەکو 60 یۆرۆی پێدەدرێت لەلایەن حکومەتەکانەوە، بۆ ریسایکڵینی ماددەی هەستیار وەک ماددە و کەرەستەی تەندروستی نزیکەی 100 یۆرۆ دەدات.
گەورەترین کارگەی ریسایکلینی رەق لە هەرێمی کوردستان لە سلێمانی دانراوە، 60 ملیۆن دۆلاری تێچووە و دوو ساڵە کاردەکات، بەڵام بەپێی زانیاریەكان حکومەت یەک دینار پارەی پێ نەداون، بۆ هەر تۆنێکیش 18 دۆلاریان بۆ هەژمارکراوە، ئەوەشیان پێنەدراوە. 
بەرهەمی ئەو کارگەیە ماددەی RDFە، بەپێی نرخی نەوت بەرمیلی دەکاتە 20 دۆلار، رۆژێک 300 تۆن لە RDF لە خاشاکی سلێمانی بەرهەمدەهێنرێت، کێشەی ئەوەی کە خاشاکی سلێمانی پارە ناکات ئەوەیە کە بە شێوازێکی دروست کۆناکرێتەوە،  ئەگەر تەنانەت جیاش بکرێتەوە حکومەت تێکەڵی دەکاتەوە، لەبەرئەوەی ئەو کۆمپانیایەی لەگەڵ حکومەت گرێبەستی هەیە بۆ کۆکردنەوەی خاشاک تێکەڵی دەکات.
لەكاتێكدا کارگەکەی سلێمانی یەکێکە لە گەورەترین کارگەکانی رۆژهەڵاتی ناوەڕاست بۆ ریسایکڵینی خاشاکی رەق. 

More News

Most Popular

هەواڵ

ئێران و توركیا بە درۆن و تۆپخانەكانیان بەردەوامن لە بۆردوومانكردنی چەند ناوچەیەكی هەرێم

Mic
2022-10-06

كاتژمێر 11:00ی پێشنیوەڕۆی ئەمڕۆ فڕۆكەی بێفڕۆكەوانی سوپای توركیا گوندی بادانەیان لە سنووری ناحیەی ناڵپارێز لە قەزای پێنجوێنی هەرێمی كوردستان بۆردوومان كردەوە و ترس و دڵەڕاوكێی زۆری لەناو گوندنشینان بڵاوكردووەتەوە، ئەمەش سێیەم جارە لەدوو رۆژی ڕابردوودا توركیا ئەو سنوورە بۆردوومان دەكات و دوێنێش گوندی شێخەلمارێنیان لە قەزای شارباژێر بۆردوومانكرد و ئۆتۆمبێلێكیان كردە ئامانج كە بەهۆیەوە كەسێك برینداربوو.
لەلایەن خۆشیانەوە فەرماندەیی یەكینەكانی ڕۆژهەڵاتی كوردستان – یەرەكە كە باڵی سەربازی پارتی ژیانی ئازادی كوردستانە ڕایگەیاند: لە ناوچەی پێنجوێن و شارباژێڕ كە لەلایەن دەوڵەتی توركیاوە بۆردومان كراوە، هیچ هێزێكی ئێمە لەو ناوچانەدا نییە.
لە ڕاگەیەندراوەكەی یەرەكەدا هاتووە: لە ڕۆژانی سێ تا شەشی ئەیلول، فڕۆكەی چاودێری بەسەر ئاسمانی چوارتا و ئاسۆس و پێنجوێندا سوڕاوەتەوە، لە كاتژمێر دووی پاش نیوەڕۆ، فڕۆكەیەكی بێفڕۆكەوان هێرشی كردە سەر ئۆتۆمبێلێكی مەدەنی لە گوندی شێخەڵمارێن.
یەرەكە دەشڵێت: لەو ناوچانەی دەوڵەتی توركیا هێرشی تێدا ئەنجامداوە هێزی ئێمەی تێدانییە و هیچ بنەكەیەكمان لەو ناوچانەدا نییە، بەهۆی ئەو هێرشانەوە هاوڵاتیان زیانیان پێگەیشتووه.
یەرەكە لەڕاگەیەندراوەكەدا دەشڵێت: هەندێك دەزگای ڕاگەیاندن بۆ ئەوەی ڕەوایەتی بە هێرشەكانی دەوڵەتی توركیا بدەن، پەكەكە و ئێمە دەكەنە ئامانج، ئێمە داوا لە دەزگاكانی ڕاگەیاندن دەكەین، لەسەر ئەو هێرشانە ڕاستییەكان بگەیەنن.
هاوكات دوێنێ ناوەندی ڕاگەیاندن و چاپەمەنیی هێزەكانی پاراستنی گەل-هەپەگە كە باڵی سەربازی پەكەكەیە ڕوونكردنەوەیەكی لەسەر بۆردوومانكردنی ئۆتۆمبێلێك لە سنووری شارباژێڕی سەر بە پارێزگای سلێمانی بڵاوكردەوە و رایگەیاند:لە هەندێك دەزگای ڕاگەیاندنی باشووری كوردستان بڵاوكرایەوە، كە لە چواری تشرینی یەكەمدا لە ناوچەی شارباژێڕی سلێمانی دەوڵەتی توركیا هێرشێكی ئاسمانی ئەنجامداوە و بانگەشەی ئەوە كرا، كە لە ئۆتۆمبێلێكدا كە هێرشی كراوەتە، سەر دوو كەسی سەر بە پەكەكە تێدابوون.
هەپەگە دەشڵێت: لەو شوێنەی هێرشەكەی تێدا ئەنجامدراوە هێزەكانی ئێمەی لێنییە و دەبێت بزانرێت، كە ئەوە هیچ پەیوەندییەكی بە ئێمەوە نییە.
پێشتریش هێمن ئیبراهیم بەڕێوەبەری ناحیەی ناڵپارێز رایگەیاند: بەهۆی مەترسی بۆردوومانەكەوە كە لەلایەن فڕۆكەوە ئەنجامدراوە، چەندین خێزان گوندەكەیان بەجێهێشتووە و روویان لە سەنتەری شاری سلێمانی كردووە.
خەڵكی ناوچەكە داوا دەكەن لایەنە پەیوەندیدارەكان بێنە سەر خەت بەهۆی مەترسیداری بۆردوومانی ناوچەكە و بەهۆی دژواری دۆخەكەوە خوێندن لە بەشێك لە ناوچەكانی سنوری پەروەردەی شارباژێڕ تا رۆژی یەكشەممە راگیراوە.
ئەمەش لەكاتێكدایە، ماوەی چەندین رۆژە بەشێوەیەكی بەردەوام فڕۆكە و درۆن بە ئاسمانی سنوری شارباژێرو پێنجوێن و چەندین ناوچەی دیكەی هەرێمدا دەسوڕێتەوە و بۆردوومانی چەندین ناوچەیان كردووە، تۆپبارانكردنی برادۆست و باڵەكایەتی لە سنووری ئیدارەی سۆرانیش لەلایەن ئێرانەوە پێینایە 13یەمین ڕۆژەوە.
بەیانی ئەمڕۆش تۆپخانەكانی ئێران لە سنووری برادۆست، كوێستانی ناوڕوبار و گوندی گۆڕێ سایە و گوندی كەتینەی تۆپباران كرد، هاوكات لە سنوری باڵەكایەتی، تۆپخانەكانی ئیران، گوندی بەردەخڕ و هاوینەهەواری بێرمەسارد و كوێستانەكانی سەرچاڵ و بناری هەڵگۆردی تۆپباران دەكەن.