هەواڵ

شەش ساڵ بەسەر تیرۆركردنی رۆژنامەنوس وەدات حسێن تێپەڕدەبێت

شەش ساڵ بەسەر تیرۆر كردنی ڕۆژنامەنووس وەدات حسێن تێپەڕ دەبێت و تا ئێستا هیچ كەسێك لەسەر تیرۆركردنی دەستگیر نەكراوە، بەپێی زانیاریەكانیش هێزە ئەمنییەكانی سنوورەكە دۆسیەكەیان داخستووە، سەنتەری میترۆ بۆ داكۆكی لەمافی رۆژنامەنوسانیش دەڵێت شەش ساڵە  عەدالەت و یاسا لە تاوانی تیرۆركردنی رۆژنامەنوس (ودات حسێن)دا، بێ دەسەڵاتە.
وەدات حسێن عەلی، ناسراو بە وەدات دهۆكی، ساڵی 1988 لە گوندی ئەلەكانی سەر بە شارۆچكەی گەڤەری پارێزگای جولەمێرگی باكووری كوردستان لە دایكبووە و  حەوت خوشك و 11 برای هەیە.
بنەماڵەی وەدات خەڵكی دهۆكن، بەڵام لە دوای ئاشبەتاڵی ساڵی 1975، باوكی وەدات ڕوو دەكاتە باكووری كوردستان و لەوێ ژیانی هاوسەریی پێكدەهێنێت، پاشان بەهۆی دۆخی ئەوكاتەی توركیاوە، لە ساڵی 1990دا دەگەڕێنەوە بۆهەرێمی كورستان و لە دهۆك نیشتەجێ دەبنەوە.
وەدات قۆناغەكانی خوێندنی سەرەتایی، ناوەندیی و ئامادەیی تا پۆلی 12 لە دهۆك بە سەركەوتوویی تێدەپەڕێنێت، بەڵام بەهۆی گوشارەكانی سەریەوە، لە پۆلی 12ی ئامادەییدا ناچاردەبێت واز لە خوێندن بهێنێت.
وەدات بۆ ماوەی چەند ساڵێك وەك چالاكوانی مەدەنیی لە دهۆك كار و چالاكیی دەبێت و هەر لەو ماوەیەشدا چەندین چالاكیی بۆ پشتیوانیی شۆڕشی پارچەكانی دیكەی كوردستان ڕێكدەخات و بەشدارییش لە هەموو بۆنە و چالاكییە نیشتمانیی و نەتەوەییەكاندا دەكات.
وەدات ساڵی 2016 وەك پەیامنێری ئاژانسی رۆژنیوز لە دهۆك دەست بەكاربووە، هێشتا لە مانگەكانی سەرەتای كاركردنی بوو لەو ئاژانسە، لە 13ی ئابی 2016دا ڕفێندرا و دواتر بە برینداریی دۆزرایەوە، شوێنەواری زۆری ئەشكەنجە بە جەستەیەوە بوو، بەڵام نەیتوانی هیچ قسەیەك بكات و بەشێوەیەكی گوماناویی لە نەخۆشخانە گیانی لەدەستدا.
دوای 103 ڕۆژ لە تیرۆركردنی لە كۆنگرەیەكی ڕۆژنامەنووسییدا هەر یەكە لە سۆران عومەر، سەرۆكی ئەوكاتی لیژنەی مافی مرۆڤ لە پەرلەمانی هەرێمی كوردستان و مونیرە عوسمان ئەندامی هەمان لیژنە، لە خولی پێشووی پەرلەماندا، ڕاپۆرتی خۆیان لەسەر تیرۆرەكە بۆ دەزگاكانی ڕاگەیاندن ئاشكراكرد.
لەو كاتەدا مونیرە عوسمان وتی: لە هەر وڵاتێكدا كەسێك تیرۆربكرێت، ئەگەر دەسەڵات یان هێزێكی گەورە لە پشتیەوە نەبێت ئەوە بەئاسانی بكەرانی دەدۆزرێنەوە.
سۆران عومەر لەوبارەیەوە وتی: هیچ سەرەداوێك لە تیرۆری وەدات حسێنی ڕۆژنامەنووس نەدۆزراوەتەوە.
وەدات چۆن رفێندرا 
رۆژی 13ی  ئاب، دوای ئەوەی وەدات براكەی دەگەیەنێتە شوێنی كارەكەی و 100 مەتر دووردەكەوێتەوە، لەلایەن دوو ئۆتۆمبێلەوە كە پێش و دوا لە وەدات دەگیرێت و دەمانچە لەسەر سەری دادەنێن و دایدەبەزێنن تورەكە بەسەریدا دەكەن و دەیڕفێنن.
بەپێی زانیاریەكان كە خەڵكی پرسیویانە بۆكوێی دەبەن، وتویانە گوایە لە منداڵێكی داوە، لەوێشدا خەڵكێكی زۆر بە موبایل دیمەنی ڕفاندنەكەیان گرتووە، بەڵام ئەوەی جێگای سەرنجە، لەلایەن چەند ئاسایشێكی مەدەنیەوە هەموویان دەستگیركراون و ڤیدیۆكانیان پێ سڕاوەتەوە و هەڕەشەشیان لێكراوە، كە هیچ شاهیدییەك لەسەر كەیسەكە نەدەن.
لەو شوێنەی ئەو ڕۆژنامەنوسە تیرۆركراوەی لێ دەرچووە تا شوێنی ڕفاندنەكەی، بە دوكان و شوێنە گشتیەكانەوە نزیكەی 200 كامێرای چاودێریی هەبووە، بەڵام هێزێكی بەناو بەرەنگاربوونەوەی تاوان لەوێ دەبن، خاوەنی ماركێتەكان شاهیدییان بۆ بنەماڵەی شەهید داوە، كە ئەو هێزەی پۆلیس دوای ڕووداوەكە تەواوی ڤیدیۆی كامێراكانیان سڕیوەتەوە، دواتریش هەڕەشە لە تەواوی ئەو كەسانە كراوە، كە هیچ قسەیەك لەسەر كەیسەكە نەكەن، هەربۆیە ئێستا ئەوان ناوێرن هیچ بڵێن.
بنەماڵەكەی كاتیك چوونەتە نەخۆشخانە، وەدات لە ژیاندا بووە، دەبینن ئەفسەرێكی پۆلیس و دوو ئاسایشی مەدەنی بە دیارەوە وەستاون، كۆمەڵێك لەو كەسانەی ئەوكاتە لەوێ بوون شاهیدییان داوە، هیچ پزیشكێك بانگهێشت نەكراوە بۆ چارەسەری و بینویانە دەرزییەك لە ژێر پەراسوی وەدات دراوە و كارەباش لە لاملی دراوە، دواتر ژیانی لەدەستداوە، ئەوانەشی ئەم ڕوداوە دەگێڕێننەوە هەڕەشەیان لێكراوەو ئێستاش ناتوانن هیچ شتێك لەو بارەیەوە بڵێن.
دوای لێكۆڵینەوە لە چۆنیەتی تیرۆركردنی ئەو ڕۆژنامەنووسە جەستەی شوێنی ئەشكەنجە و كارەبای پێوە دیاربووە، شیشێك كراوە بە چاوی راستیدا و لە پشتەوە دەرچووە، پەنجەكانیشی هەمووی شكاوە، قۆڵی ڕاستیشی بە گیرەی ئاسنگەری شكێندراوە و هەموو ئەو بەڵگەنامانە لە بەردەستی پەرلەمانی هەرێمی كوردستان بوون، بەڵام جگە لە كۆنگرەیەكی ڕۆژنامەوانی دوو پەرلەمانتار هیچ هەڵویستێكی دیكەی پەرلەمان ڕانەگەیەندرا.
وەدات پێش تیرۆركردنی سێ جار بانگهێشتی ئاسایش كراوە دواین جاریان مانگێك پێش تیرۆركردنەكەی بووە لە ئاسایش پێیان وتووە بۆ ئاژانسی ڕۆژنیوز كاردەكەیت بیكە، بە مەرجێك بۆ ئێمەش كاربكەیت و ئۆتۆمبێل و پارەی باشت پێدەدەین. 

هەواڵ

یەکەم هەنگاوی ئۆپۆزسیۆن بۆ دروستکردنی لیستی هاوبەش بێ ئەنجام بوو

لایەنەکانی دەرەوەی پارتی و یەکێتی لە یەکەم هەنگاوییان بۆ دروستکردنی بەرەیەکی هاوبەش بۆ هەڵبژاردن نەگەیشتنە ئەنجام، داهاتووی هاوپەیمانێتییەکە و سەرۆکەکەی دوو لە گرفتە سەرەکییەکانن.

نەوەی نوێ، یەكگرتوی ئیسلامی، كۆمەڵی دادگه‌ری، بەرەی گەل، ڕه‌وتی هەڵویست، بزوتنەوەی پەیوەندی ئیسلامی و ژمارەیەک کەسایەتی سیاسی کە لە ناویاندا یوسف محەمەد سەرۆکی پێشووتری پەرلەمان هەیە، سەرقاڵی دروستکردنی لیستێکی هاوبەشن بۆ هەڵبژاردنی داهاتووی عێراق. 

ئەو لایەنانە تا ئێستا دوو کۆبونەوەی فروانیان کردووە، بەڵام تا ئێستا نەگەیشتونەتە هیچ ئەنجامێک و تاکە خاڵی رێککەوتنیان ئەوەیە کە کۆبوونەوەکانیان بەردەوام دەبێت. 

عه‌بدولستار مه‌جید، ئه‌ندامی شاندی كۆمه‌ڵی دادگه‌ری كوردستان دوای کۆوبونەوەی دووەمیان لە کۆنگرەیەکی رۆنامەنووسیدا ڕایگه‌یاند، هێشتا له‌سه‌ر هیچ پرسێك رێكنه‌كه‌وتون ئه‌وه‌ی كراوه‌ گفتوگۆیه‌ و ئومێد ده‌كه‌ن سبه‌ینێ كه‌ جارێكی دیكه‌ كۆبونه‌وه‌، بگه‌نه‌ ڕێكه‌وتن.

ئامانجی لایەنەکانی دەرەوەی پارتی و یەکێتی دروستكردنی هاوپه‌یمانێتیه‌كه‌ بۆ هه‌ڵبژاردنی په‌رله‌مانی عێراق، بەڵام وەک ئەندامەکەی شاندی کۆمەڵ وتی،" جارێ بڕیار نەدراوە كه‌ ئایا هاوپەیمانێتییەکە تەنها لە ناوچە دابڕێندراوەکان دەبێت یان لە هەرێمی کوردستانیش".

سەرۆکی هاوپەیمانێتیەکە و داهاتووی هاوپەیمانێتیەکە یەکێکە لە گرفتەکانی بەردەم لایەنەکان بۆ دروستکردنی لیستی هاوبەش، د. رێبوار كه‌ریم، ئه‌ندامی شاندی ڕه‌وتی هه‌ڵوێست به‌ ڕۆژنامه‌نوسانی وت، "گرفتێكی دیاریكراو نیه‌، به‌ڵام هه‌ندێك پرسیار هه‌یه‌، ئێمه‌ پرسیارمان هه‌یه‌ به‌تایبه‌تی بۆ قۆناغی دوای هه‌ڵبژاردن، كه‌ ئایا چی ده‌كرێت له‌دوای هه‌ڵبژاردن؟".

ئامانجی دروستکردنی ئەو بەرەیە لەلایەن حزبەکانی دەرەوەی پارتی و یەکێتییەوە، بە دەستهێنانی زۆرترین کورسی پەرلەمانی عێراق لە هەڵبژاردنی داهاتوودا، چونکە ئەو یاسایەی هەڵبژاردنەکەی پێ ئەنجام دەدرێت لە بەرژوەندی لایەنە بچوکەکان نییە.
بەپێی خشتەی کارەکانی کۆمسیۆن، تۆمارکردنی پارت و هاوپەیمانێتییەکان تا 14ـی ئایار بەردەوام دەبێت، بۆیە دەبێت ئەو لایەنانە تا ئەو کاتە بگەنە رێککەوتن.

هەڵبژاردنی ئەمجارەی ئەنجومەنی نوێنەرانی عێراق، دەبێتە شەشەمین هەڵبژاردن لە دوای ساڵی 2004ـەوە، سیستمى یەک بازنەیی و دواتر فرەبازنەیی لەسەر ئاستی پارێزگاکانە چوار هەڵبژاردندا پەیڕەوکرا، لە کاتێکدا دوایین هەڵبژاردنى ساڵی 2021 بەپێی سیستمى فرە بازنەیی ئەنجامدرا و عێراق بۆ سەر 83 بازنەی هەڵبژاردن دیاری کرا.