هەواڵ

دۆسیەی سەهەندی 17 ساڵ چی بەسەرهات؟

هەرچەندە بەڕێوەبەری پۆلیسی سلێمانی داخستنی دۆسیەی سەهەندی 17 ساڵی ڕاگەیاند كە مانگی 11 ی ساڵی ڕابردوو دوای دەستگیركردنی لەبنكەی پۆلیسی سەرچنار گیانیلەدەستدا، بەڵام پارێزەرەكەی دەڵێت دۆسیەكەیان تەمیزكردووەتەوە و بەڵگەكانیان ڕەوانەی هەولێر كردووە، دەستەی سەربەخۆی مافی مرۆڤیش لەسەر دۆسیەكە هاتووەتە سەرخەت.

ئەحمەد هۆرێنی پارێزەری سەهەندی 17 ساڵ كە كەسوكارەكەی پۆلیس بە گیانلەدەستدانی تۆمەتبار دەكەن، بەمایكی وت: دۆسیەی سەهەند جارێكی دیكە تەمیزكراوەتەوە و چەند بەڵگەنامەیەكمان ئاڕاستەی هەولێر كردووە و چاوەڕێی دوا بڕیاری دادگاین لەوبارەیەوە.

وتیشی: لێكۆڵینەوەكانی لیژنەكەی وەزارەتی ناوخۆی هەرێم پشتڕاستیكردووەتەوە كە سەهەند ئەشكەنجەدراوە، بەڵام تائێستا پشتڕاستی نەكردووەتەوە كە بەهۆی ئەشكەنجەكەوە گیانیلەدەستداوە یاخودنا.

ڕۆژی 12-3-2023 سەبارەت بە دۆسیەی سەهەند بەڕێوەبەری پۆلیسی سلێمانی ڕایگەیاند دۆسیەكە داخراوە.

پێشتر ئەحمەد محەمەد پارێزەری دۆسێی سەهەند رایگەیاند: ئێستا هاردەكان وەرگیراونەتەوە نێردراونەتەوە بۆ لایەنی تایبەتمەند كە توانای گەڕانەوەی ڤیدیۆكانیان هەیە.

وتیشی: بەكاتی دۆسێكە داخراوە و لەكاتی تەواوبوونی بەڵگەكانی ئێمە دۆسێكە دەهێنینەوە جێگەی خۆی و تەمیزكردنەوەی لە رێدایە.

رۆژی 26ی 11ی 2022 لەلایەن تیمێكی وەزارەتی ناوخۆی حكومەتی موەبەسەرچووی هەرێمەوە گۆڕی سەهەندیان هەڵدایەوە و تەرمەكەیان دەرهێنا بە ئامانجی دووبارە لێكۆڵینەوە لە روودانی گیانلەدەستدانی. پۆلیسی سلێمانیش رایگەیاند ئەوان ئاگاداری هەڵدانەوەی گۆڕی سەهەند نین.

مایك چەند جارێك پەیوەندی بە كەسوكاری سەهەندەوە كرد،بەڵام ئامادەنەبوون لەوبارەیەوە لێدوان بدەن.

سابیر عەبدوڵا، بەڕێوەبەری ئۆفیسی سلێمانی كۆمسیۆنی باڵای سەربەخۆی مافی مرۆڤی هەرێم  بەمایكی وت: ئێمە سەبارەت بە دۆسیەی سەهەند ڕاپۆرتمان داوە بە سەرووی خۆمان و ڕووداوەكە بە پێشێلكاری زەقی مافی مرۆڤ دەزانین.

وتیشی: دۆسیەی سەهەند ڕاستە لەسلێمانی داخراوە، بەڵام وەزارەتی ناوخۆ دۆسیەكەی دانەخستووە و ئێمەش لەسەر ئەو ڕووداوە بەردەوامین لەبەدواداچوون چونكە داواكاری گشتیش جارێكی دیكە داوایكردووە لەسەر دۆسیەكە لێكۆڵینەوە دەستپێبكاتەوە.

بەوتەی سابیر عەبدوڵا پزیشكی دادی لەڕاپۆرتەكەیدا باسی لەوەكردووە كە سەهەند بەهۆی جەڵدەی دڵەوە گیانی لەدەستداوە، بەڵام وەك لەكامێراكانیش دەركەوتووە و ڕاپۆرتی وەزارەتی ناوخۆش ئاماژەی پێداوە پێشتر سەهەند ئەشكەنجەدراوە.

سەهەند ئەحمەد، مێردمنداڵێكی تەمەن 17 ساڵ بوو، كاری گەیاندنی خواردن (دلیڤەر)ـی بۆ ماڵان دەكرد، رۆژی (11/11/2022) لەلایەن پۆلیسی سەرچنارە وە بەتۆمەتی تەقەكردن و برینداركردنی هاووڵاتییەك دەستگیركرا، بەڵام رۆژێك دوای دەستگیركردنی، لە بنكەی پۆلیسی سەرچنار گیانیلەدەستدا، دواتر لە راپۆرتی پزیشكیدا ئاماژە بەوەدرابوو، ئەو مێردمنداڵە بە جەڵتە گیانی لەدەستداوە.

هەواڵ

پەرلەمان سێ مانگی ماوە و 130 پرۆژە یاسای پەسەند نەکردووە

لەناو رەفەکانی پەرلەمانی عێراق 130 پرۆژە یاسا هەڵگیراون، چاوەڕێی پەسەندکردنن، تەمەنی درێژی پەرلەمان سێ مانگی ترە و فریای پەسەندکردنی چوار پرۆژە یاسا ناکەوێت

پەرلەمانی عێراق 9ـى ئایار چووە پشووی یاسادانانەوە تا مانگێکی تر کۆنابێتەوە، ئەوەش لەکاتێکداتە 130 پرۆژە یاسای پێشکەش بە سەرۆکایەتی پەرلەمان کراوە و تائێستا نەخراوەتە بەرنامەی کارەوە.

پەرلەمانی عێراق لەکاتێکدا دەکەوێتە پشووی یاسادانانەوە، کە هەڵبژاردنی پەرلەمانی عێرق شەش مانگی ماوە و پەرلەمان تەنها سێ مانگی لە بەردەستدا دەبێت بۆ کۆبونەوە و دانیشتنەکانی.

ئەمیر مەعموری، ئەندامی پەرلەمانی عێراق رایگەیاندووە، پەرلەمانی عێراق بەدەست تێکچوونێکی فراوانی یاسادانان و چاودێرییەوە دەناڵێنێت و 40 پڕۆژە یاسا سەرەڕای ئامادەیی تەواویان، بەهۆی ناڕێکی دانیشتنەکانەوە پەسەند نەکراوە.

بەوتەی ئەو پەرلەمانتارە، مانگانە پەرلەمان نەیتوانیوە هەشت دانیشتن ببەستێت و دەڵێت: بەشێک لە پەرلەمانتاران ئامادەی هیچ دانیشتنێک و چالاکییەکی پەرلەمان نەبوون و بە زەحمەت دەناسرێنەوە کە پەرلەمانتارن.
مانگی 11ـی ئەمساڵ هەڵبژاردنی پەرلەمانی عێراق ئەنجام دەدرێت و بەشێک لە پەرلەمانتاران دووبارە خۆیان کاندید دەکەنەوە،زیاتر لە 100 پەرلەمانتاریش پابەندی دەوام نابن، بۆیە دانیشتنەکانی پەرلەمان تا مانگی ئەیلول بەردەوام دەبێت.