هەواڵ

Mic Exclusive: یەکێتی پێشنیازێک بۆ رادەستکردنی نەوت دەداتە پارتی

یەکێتیی نیشتمانی کوردستان لە کۆبونەوەکەی ئەمڕۆی پیرمام پێشنیازێک بۆ رادەستکردنی نەوت دەداتە پارتی دیموکراتی کوردستان؛ رێککەوتنیش وەک تاکە رێگەی چارەسەری پێشنیاز دەکات. 

 بەپێی ئەو زانیارییانەی دیجیتاڵ میدیای Mic لە سەرچاوەیەکی ئاگادار لە یەکێتی دەستی کەوتووە؛ مەکتەبی سیاسی یەکێتیی نیشتمانی کوردستان بڕیاریداوە پشتیوانی رادەستکردنی نەوت بە حکومەتی عێراق بکات. 

بڕیارە ئەمڕۆ مەکتەبی سیاسی پارتی دیموکراتی کوردستان و یەکێتیی نیشتمانی کوردستان لە پیرمام بە سەرۆکایەتی مەسعود بارزانی و بافڵ تاڵەبانی کۆببنەوە، دیجیتاڵ میدیای Mic زانیویەتی لەو کۆبوونەوەیەدا یەکێتی پێشنیازەکەی بۆ رادەستکردنی نەوت دەداتە پارتی.

پێشتر، قوباد تاڵەبانی جێگری سەرۆکی حکومەتی هەرێمی کوردستان لە پشکی یەکێتی دیجیتاڵ میدیای Micـی راگەیاندبوو، رێککەوتن لەگەڵ بەغدا بەدیلی نییە و دەبێت رێککەوتن بکرێت. 

لێدوانەکەی قوباد تاڵەبانی بۆچوونی فەرمی یەکێتییە؛ مەکتەبی سیاسی حزبەکەش وەک بەرزترین دەسەڵاتی ناو حزب پشتیوانی ئەو بۆچوونە دەکات. 

پرسی کشانەوە لە بەغدا، یەکێکە لەو کارتە فشارانەی پارتی لەم ماوەیدا زیاتر لە جارێک باسی کردووە، بەڵام تا ئێستا بڕیارەکەی پەسەند نەکردووە. 

یەکێتی پشتیوانی ئەم بۆچوونە ناکات، بەغدا بە چەقی ستراتیژی بۆ کورد لە هەرێمی کوردستان دەزانێت، وەک سەرچاوەیەکی ئاگاداری یەکێتی بە دیجیتاڵ میدیای Micـی وت؛ یەکێتی بڕیاری بەردەوامبوونی لە بەغدا داوە و لە کشانەوەدا پشتیوانی پارتی ناکات.

ئەگەرچی بڕیارەکانی بەغدا بۆ نەناردنی پارەی مووچە هەرێمی کوردستانی روبەڕوی قەیرانێکی قوڵی دارایی کردوەتەوە و دوو مانگە زیاتر مووچە دابەشنەکراوە، بەڵام دابەشبوونی ناوخۆیی لەناو هێزە سیاسییەکانی هەرێمی کوردستانیش دەبینرێت. 

 دیجیتاڵ میدیای Mic زانیویەتی، یەکێتی بڕیارداوە بە مەرجی رادەستکردنی نەوت بە حکومەتی عێراق هاوهەڵوێستی پارتی بێت و پشتیوانی بکات. 

حکومەتی عێراقی لە مانگی ئایارەوە بڕیاریداوە پارەی مووچە رەوانەی هەرێمی کوردستان نەکات، هەردوو حکومەتی عێراق و هەرێمی کوردستان لە گفتوگۆدان بە تایبەت لەسەر پرسی رادەستکردنی نەوت بە کۆمپانیای سۆمۆ، بەڵام تا ئێستا لەسەر وردەکاری و ژمارەکان رێککنەکەوتوون. 

هەواڵ

دوو کۆبونەوەی باڵا نەیتوانی مووچە دابەشبکات و ئەنجامی دوو کۆبونەوەی دیکە ماوە

کۆبونەوەی دادگای باڵای فیدراڵی و کۆبونەوەی لوتکەی یەکێتی و پارتی هیچ هەواڵێکی خۆشیان بۆ مووچە خۆران پێنەبوو، بڕیارە لە 24 کاتژمێری داهاتوودا دوو کۆبونەوەی باڵا لە بەغدا بەڕێوەبچێت و تێدا پرسی موچەی هەرێم تەوەری سەرەکی دەبێت.

ئەمڕۆ 14ـى تەمموز، دادگای باڵای فیدراڵی عێراق تایبەت بە دوو سکاڵا لەبارەی نەناردنی مووچەی هەرێمی کوردستانەوە کۆبووەوە، هەرچەندە موچە خۆران چاوەڕێبوون دادگا بڕیاری ناردنی مووچە بدات، بەڵام دادگاکە بڕیاردانی لەسەر سکاڵاکان بۆ 28ـی تەمموز دواخست.

پرسی مووچەی مووچە خۆرانی هەرێم، ئەمڕۆ پارتی و یەکێتی لە ئاستی باڵادا کۆکردەوە، شاندی یەکێتی بە سەرۆکایەتی بافڵ تاڵەبانی، سەرۆکی یەکێتی لەگەڵ شاندی پارتی بە سەرۆکایەتی مەسعود بارزانی، سەرۆکی پارتی کۆبونەوە.

دوای کۆتاییهاتنی کۆبونەوەکە، راگەیەندراوێکیان بڵاوکردەوە کە بەشێکی تایبەتبوو بە پرسی مووچە و ئاماژە بەوەکراوە، هەموو هەوڵەکان چڕ بکرێنەوە بۆ چارەسەری کێشە و دابینکردنی مووچە شایستە داراییەکانی هەرێمی کوردستان
وابڕیارە ئەمشەو، کۆبونەوەی چوارچێوەی هەماهەنگیی بەڕێوەدەچێت، کە لە لایەنە سەرەکیە شیعەکانی ناو حکومەت پێکهاتووە، سەرۆک وەزیرانی عێراق ئامادەی کۆبونەوەکە دەبێت و پرسی ناردنی مووچەی هەرێم تەواوەرێکی کۆبونەوەکە دەبێت.

سبەینێ، ئەنجومەنی وەزیرانی عێراق کۆدەبێتەوە و تاوتوێی ئەو راپۆرتە دەکات، کە لیژنە وەزارییەکەی حکومەتی عێراق ئامادەی کردووە لەسەر پرسی مووچەی هەرێم.

شێروان دووبەردانی، پەرلەمانتاری فراکسیۆنی پارتی لە پەرلەمانی عێراق بە میدیای حزبەکەی راگەیاندووە، دواخستنی دانیشتنەکەی ئەمڕۆی دادگای فیدراڵی هیچ یاسایی نەبوو، تەنیا نەیانویست بڵێن لە تواناماندا نییە بڕیار بدەین، دواخستنی دادگای فیدراڵی بۆ 28 مانگ پەیامێکی ناراستەوخۆیە کە ناتوانن مووچە بنێرن.

لەبارەی هەڵوێستی فراکسیۆنی پارتی لە بەرامبەر دواخستنی مووچەی فەرمانبەرانی هەرێمی کوردستان وتی: کۆتا وادەی چاوەڕوانیمان یەک هەفتەی دیکەیە و ئەگەر تا ئەو کاتە پرسی مووچەی فەرمانبەرانی هەرێمی کوردستان چارەسەر نەکرێت، هەڵوێستمان دەبێت.