هەواڵ

دوایین زانیاریی لەبارەی کشانەوەی هێزەکانی ئەمریکا لە عێراق

کشانەوەی هێزەکانی ئەمریکا لە عێراق بووەتە رۆژەڤی میدیاکان و شەقامی عێراقی کردووە بە دوو بەشەوە، بەرپرسێکی عێراق-یش دەڵێت: کشانەوەی ئەمریکا بەپێی رێککەوتنی نێوان واشنتن و بەغدایە، شرۆڤەکارێکیش کشانەوەی ئەمریکا بەدوور دەزانێت.

پرسی کشانەوەی هێزەکانی ئەمریکا، شەقامی عێراقی کردووە بە دوو بەشەوە، بەشێک لەگەڵ کشانەوەکەن بەتایبەت هەندێک لەو گروپ و سەرکردە سیاسییانەی لە ئێران نزیکن، سوورن لەسەر دەرچوونی هێزەکانی ئەمریکا لەعێراق.

بەشێکی دیکەش نیگەرانن لە کشانەوەی ئەمریکا و وەک ئاماژەیەک دەیبینن بۆ سەرەتای قۆناێکی نوێ لە تێکچوونی دۆخی ئەمنی وڵاتەکە و سەرهەڵدانەوەی داعش و دووبارەبوونەوەی سیناریۆکانی 2014.

حوسێن عەلاوی، ڕاوێژکاری سەرۆک وەزیرانی عێراق لە لێدوانێکدا دەڵێت: کۆتاییهێنان بە ئەرکی هێزەکانی ئەمریکا لە عێراق لە چوارچێوەی ئەو ڕێککەوتنەیە کە لە نێوان بەغدا و واشنتن واژۆ کراوە، دەبوو لە ساڵی 2017 جێبەجێ بکرایە.

بەپێچەوانەوە، هیوا سەید سەلیم، شرۆڤەکاری سیاسیی کشانەوەی هێزەکانی ئەمریکا بە دوور دەزانێت، ئەو بە دیجیتاڵ میدیای MICـی راگەیاند: ئەوەی لەبارەی کشانەوەی هێزەکانی ئەمریکا لە میدیاکان هەیە راست نییە.

پێشی وایە، هەتا مەترسی سەرهەڵدانەوەی داعش لە ئارادابێت هێزەکانی ئەمریکا عێراق جێناهێڵن، چونکە هێشتا سوپا و هێزە ئەمنییەکان نەگەیشتوونەتە ئاستێک توانای پاراستنی عێراق-یان هەبێت و رووبەڕووی مەترسییەکان ببنەوە.

بەشێکیش لە سەرچاوەکانی هەواڵ باس لەوە دەکەن؛ ئەمریکا دەسەڵاتدارانی عێراقی لە کشانەوەی هێزە سەربازییەکانی لە بنکەی ئاسمانیی عەین ئەسەد لە پارێزگای ئەنبار و بنکەی  و ڤیکتۆریا  ئاگادار کردووەتەوە.

دوای بڵاوبوونەوەی ئەو دەنگۆیانەش، باڵیۆزخانەی ئەمریکا لە بەغدا بەیاننامەیەکی بڵاوکردەوە و ئە هەواڵانەی رەتکردەوە کە باس لە کشانەوەی هێزەکانیان دەکات.

بۆچوونێکی دیکەش باس لەوە دەکات، ئەرکی هێزەکانی ئەمریکا لە سەربازییەوە بۆ راوێژکاری دەگۆڕێت و ئەو هێزانە بەم نزیکانە لە عێراق ناکشێنەوە و ئەو جوڵانەی هەشە تەنها جێگۆڕکێی هێزە نەک کشانەوە.

بەپێی ئەو ڕێککەوتنەی ساڵی رابردوو 2024 لە نێوان هەردوو لایەنی عێراقی و ئەمریکی واژۆ کرا، قۆناغی یەکەمی کشانەوەی هێزەکانی ئەمریکا و هاوپەیمانیی نێودەوڵەتیی بۆ شەڕی دژی داعش، لە ئەیلوولی 2025 کۆتایی دێت، قۆناغی دووەمیش لە ساڵی 2026 کۆتایی دێت.

لە ئەگەری کشانەوەی هێزەکانی ئەمریکا، بەپێی شرۆڤەکاران لە زۆرێک لەو ناوچانەی کەبۆشایی ئەمنی تێدایە داعش سەرهەڵدەداتەوە، چونکە هێزەکانی ئەمریکا لە عێراق بەردەوام زانیاریی هەواڵگرییان بە لایەنی عێراق داوە.

هێزەکانی هاوپەیمانیی نێودەوڵەتی لە ساڵی 2014ـەوە لەسەر داوای فەرمیی حکومەتی عێراق و بە مەبەستی رووبەڕووبوونەوەی رێکخراوی داعش لە عێراق جێگیرن و پێکهێنەری سەرەکی ئەو هێزەش ئەمریکایە.

هەواڵ

MIC بە نووسراوی فەرمی ئاشکرای دەکات کە سروە عەبدولواحید دەدرێتە دادگا

دوای ئەوەی مایک بڵاویکردەوە، سروە عەبدولواحید لەلایەن دادگای سلێمانییەوە داوا کراوە، دیجیتاڵ میدیای MIC بەدواداچوونی کرد بۆ ئەو بریارەی دادگای سلێمانی.

لەبەدواداچوونەکەیدا MIC دوو نوسرای فەرمی دادگای سلێمانی دەستکەوت کە ئاراستەی سروە عەبدولواحید و پارێزەرەکەی کراوە رۆژی 23ی 12ی 2025 لەبەردەم دادگا ئامادەبن.

بەپێی نوسراوەکە سروە عەبدولواحید بە مادەی 433ی سزادانی عێراقی داواکراوە ئامادەبێت لەبەردەم دادگادا، هاوکات نوسراوی فەرمیش ئاراستەی دیوانی ئەنجومەنی نوێنەرانی عیراق کراوە کە سروە عەبدولواحید لەبەردەم دادگا ئامادەبکەن چوونکە ناوبراو ئەندامی ئەنجومەنی نوێنەرانی عێراقە و پارێزبەندی هەیە.

ئەو ماددە یاساییەی كە دۆسیەی لە دژی پەرلەمانتار سروە عەبدولواحیدی پێ كراوەتەوە، ماددە 433 ـی یاسای سزاكانی عێراقییە كە باس لە تاوانی تۆمەتهەڵبەستن بە ناڕەوا دەكات بەشێوەیەكی ئاشكرا بۆ ڕای گشتی، بەبێ بوونی بەڵگەیەكی ڕاست و دروست، كە زیانی دەروونی و مەعنەوی بە كەسی تۆمەت بۆهەڵبەستراو دەگەیێنێت و سزاكەی گرتن و پێبژاردن یاخود یەكێك لەو دوو جۆرە سزایەیە.