هەواڵ

Mic Exclusive : هیچ هەوڵێک بۆ ئازادکردنی دەمیرتاش نییە

پارێزەر و راوێژکارێکی سەڵاحەدین دەمیرتاش هەواڵی ئازادکردنی ئەو سەرکردە کوردە رەتدەکەنەوە و دەڵێن، هیچ هەوڵێک بۆ ئازادکردنی دەمیرتاش نییە.

هەواڵی ئازادکردنی سەڵاحەدین دەمیرتاش هاوسەرۆکی پێشووی هەدەپە بە شێوەیەکی فراوان لە بەشێک لە میدیا و سۆشیال میدیاکان بڵاوکراوەتەوە، ئەوەیش دوای ئەوەی پارێزەرێک بە ناوی عەبدولڕەحمان کارابولوت، لە تۆڕی کۆمەڵایەتی ئێکس نووسی بووی،"پشت بەخوا جەژن لەناوماندا دەبێت".

دیجیتاڵ میدیای Mic قسەی لەگەڵ ئەو پارێزەر کرد، عەبدولڕەحمان کارابولوت وتی،” نوسینەکەی ئەو تەنها هیوایەک بووە، پشت بەستوو نەبووە بە هیچ زانیارییەک”.

بەشێک لە میدیاکان عەبدولڕەحمان کارابولوت-یان وەک پارێزەری دەمیرتاش ناساندووە، بەڵام ئەو رەتیکردەوە پارێزەری سەڵاحەدین دەمیرتاش بێت.

سەڵاحەدین دەمیرتاش لە چوارچێوەی دۆسیەی کۆبانێ لە ساڵی 2016ـەوە زیندانی کراوە، لە ماوەی رابردوو بە بڕیاری تایبەتی رەجەب تەیب ئەردۆغان سەرۆک کۆماری تورکیا رێگەی پێ درا سەردانی باشاک دەمیرتاشی هاوسەری بکات لە نەخۆشخانە، کە نەشتەرگەری بۆ ئەنجام دەدرا.


سەردانەکەی دەمیرتاش بۆ نەخۆشخانە و بڵاوبوونەوەی هەواڵ لەبارەی ئازادکردنیەوە، هاوکاتە لەگەڵ هەوڵەکانی پرۆسەی ئاشتیی لە تورکیا، بەڵام پارێزەر و راوێژکارێکی رەتییان کردەوە هیچ هەوڵێک بۆ ئازادکردنی دەمیرتاش هەبێت.

هادی جین، ئەندامی تیمی پارێزەرانی سەڵاحەدین دەمیرتاش بە micـی وت،” لەم کاتەدا هیچ هەنگاو و دەستپێشخەرییەک بۆ ئازادکردنی نییە، بڵاوکردنەوەی ئەو هەواڵانەشی باس لە ئازادکردنی دەکەن دورە لە راستییەوە”.

زنار کاراڤیل، راوێژکارێکی میدیایی سەڵاحەدین دەمیرتاش هاوشێوەی پارێزەرەکەی هەواڵەکەی رەتکردەوە و بە micـی رایگەیاند،” هیچ ئاسۆیەک نییە دەمیرتاش بەمزووانە ئازاد بکرێت”.

رۆژی 16ـی ئایاری 2024،دوای 84 دانیشتنی پرۆسەی دادگاییکردن لە دۆسیەی کۆبانێ، دەستەی دادوەران، سەلاحەدین دەمیرتاشی بە 42 ساڵ زیندانیکردن سزادا.

سەڵاحەدین دەمیرتاش لە رۆژی 4ـی کانوونی یەکەمی 2016 دەستبەسەرکرا و هەشت ساڵە لە زیندانە، ئەم هەشت ساڵە لە کۆی بڕیارەکە کەم دەکرێتەوە، بەمەش دەمیرتاش 34 ساڵی دیکە لە زیندان دەمێنێتەوە

دۆسیەی کۆبانێ
دوای ئەوەی داعش بەشی زۆربەی کۆبانێی کۆنتڕۆڵ کرد، لەسەر داوای سەرکردایەتی هەدەپە، ژمارەیەکی زۆر لە کوردانی باکوری کوردستان بە مەبەستی دەربڕینی هاوسۆزی و پشتیوانی لە هاوڵاتییانی کۆبانێ ڕژانە سەر شەقام، لە کاتی خۆپیشاندانەکاندا گرژی زۆر دروست بوو و ژمارەیەک کەس گیانیان لەدەست دا.

دواتر لایەنە پەیوەندیدارەکانی تورکیا بە تۆمەتی هاندان بۆ توندوتیژی، بڕیاری دەستگیرکردنیان بۆ ژمارەیەکی زۆر لە بەرپرسان و ئەندامانی هەدەپە کرد و لێکۆڵینەوە لە دۆسیەکە لە دادگاکان بەردەوام بوو.

هەواڵ

تورکیا بە کۆنترۆڵکردنی بنکەیەکی ئاسمانی دەیەوێت حوکمی سوریا بکات

تورکیا لە رێگەی کۆنترۆڵکردنی بنکەی ئاسمانی تیاس دەیەوێت حکومی سوریا بکات، ئسرائیل نیگەرانە و بە مەترسی بۆ سەر خۆی دەزانێت.

چەند سەرچاوەیەکی ئاگادار بە Middle East Eyeـیان راگەیاندووە، تورکیا هەوڵەکانی بۆ کۆنترۆڵکردنەوەی بنکەی ئاسمانی تیاس لە سوریا دەستپێکردووە کە بە T4 ناسراوە و ئامادەکاری دەکات بۆ جێگیرکردنی سیستەمی بەرگری ئاسمانی لە بنکەکە. 

ئەنقەرە و دیمەشق لە مانگی کانوونی دووەمی ئەمساڵەوە دانوستان لەسەر ڕێککەوتنی بەرگری دەکەن، ئەوەیش دوای دەرکردنی بەشار ئەسەد لە پۆستەکەی. لە ڕێکەوتنەکەدا تورکیا ڕووپۆشی ئاسمانی و پاراستنی سەربازی بۆ حکومەتی نوێی سوریا دابین دەکات، کە لە ئێستادا هێزێکی سەربازی کارایان نییە.

هەرچەندە پێشتر بەرپرسانی تورکیا ئەگەری ئامادەبوونی سەربازییان لە سوریا کەم کردبووەوە و پلانی لەو جۆرەیان بە پێشوەختە وەسف کردبوو، بەڵام دانوستانەکان بە بێدەنگی بەڕێوەچوو بوون.

ئیسرائیل بوونی سەربازی تورکیا لە سوریا بە هەڕەشەی جددی بۆ سەر خۆی دەزانێت، بەڵام تورکیا دەیەوێت بە بەکارهێنانی توانا سەربازییەکانی روسیا ئەو بۆشایییە پڕ بکاتەوە کە دوای کشانەوەی روسیا و ئێران لە سوریا دروست بووە.

پێگەی Middle East Eye ئاماژەی بۆ ئەوەشكردووە، تورکیا بەنیازە شەڕی خۆی لە دژی گرووپی دەوڵەتی ئیسلامی (داعش) چڕتر بکاتەوە، ئەمەش مەرجێکی سەرەکییە بۆ ئەوەی ئەمریکا بیر لە کشانەوە لە ناوچەکە بکاتەوە.

سەرچاوەیەکی ئاگادار لەو بابەتە بە MEE ی ڕاگەیاندووە، تورکیا دەستیکردووە بە جوڵە بۆ کۆنترۆڵکردنەوەی بنکەی ئاسمانی T4 کە دەکەوێتە نزیک پالمیرا لە ناوەڕاستی سوریا.

سەرچاوەکە باسی لەوەکردووە، "سیستەمێکی بەرگری ئاسمانی لە جۆری  Hisar بۆ T4 جێگیر دەکرێت بۆ دابینکردنی ڕووپۆشی ئاسمانی بۆ بنکەکە". 

دوای دامەزراندنی سیستەمەکە جارێکی دیکە بنکە ئاسمانییەکە بنیاد دەندرێتەوە و دواتر تورکیا تواناکانی هێرشکردن لەو بنکەیە فراوانتر دەکات و فڕۆکەی بێفڕۆکەوانی هێرشبەر و چاودێری جێگیردەکات. 

 ئەو بنکەیە هاوکاری تورکیا دەبێت بۆ دامەزراندنی کۆنترۆڵی ئاسمانی لە سەرانسەری ناوچەکەدا و پاڵپشتی هەوڵەکانی بۆ بەرەنگاربوونەوەی داعش دەکات، کە تا ئێستاش شانەکانی لە بیابانەکانی سوریادا کاردەکەن.

سیستەمی بەرگریی ئاسمانی و فڕۆکە بێفڕۆکەوانەکانی تورکیا دەبێتە هۆی ئەوەی ئیسرائیل سڵ بکاتەوە لە ئەنجامدانی هێرشە ئاسمانییەکانی لە ناوچەکە.  

ئیسرائیل لە چی نیگەرانە؟ 
لە دوای ڕوخاندنی حکومەتی بەشار ئەسەدەوە، ئیسرائیل بە بەردەوامی دامەزراوە سەربازییەکانی سوریا بە ئامانج دەگرێت و ئۆپەراسیۆنەکانی بۆ سەر دەوروبەری T4 زیادکردووە. 

هەفتەی رابردوو لەمەوبەر ئیسرائیل هێرشیکردە سەر T4 و بنکەی سەربازی تەدمور و فڕگە و شوێنە ستراتیژییەکانی بە ئامانج گرت.

سەرچاوەیەکی ئەمنیی ئیسرائیل رایگەیاندووە، بوونی هەر جۆرە بنکەیەکی سەربازیی تورکیا لە سوریا، ئاستەنگ لە بەرامبەر ئەنجامدانی ئۆپەراسیۆنە سەربازییەکانی ئیسرائیل دروست دەکات.

گرژییەکانی نێوان تورکیا و ئیسرائیل لە سەرەتای دەستپێکردنی شەڕی ئیسرائیل بۆ سەر غەززە لە ساڵی 2023 پەرەی سەندووە و کۆتایی بەو ئاشتییە کورتخایەنەی نێوان هەردوو وڵات هێناوە.

هەرەسهێنانی حکومەتی ئەسەد و دەرکەوتنی تورکیا وەک زلهێزێکی باڵادەست لە سوریا، ئیسرائیل زیاتر نیگەران کردووە، کە ئێستا ئەنقەرە بە مەترسییەکی گەورەتر لە ناوچەکە دەبینێت لە ئێران.

سەرچاوەیەکی ئەمنیی ئیسرائیل بە Jerusalem Postی ڕاگەیاندووە، "لە رێگەى بە ئامانجگرتنی بنکەی سەربازیی T4 لەم ماوەیەی دواییدا، پەیامی ئەوەمان گەیاند ڕێگە بە هیچ هەڕەشەیەک نادەین ببێتە بەربەست لە بەردەم ئۆپەراسیۆنە ئاسمانییەکانمان".

سەرچاوەی یەکەمی MEE ئاشکرای کردووە کە ئەنقەرە بیر لە جێگیرکردنی کاتی سیستەمی بەرگری ئاسمانی S-400 دەکاتەوە بۆ T4 یان پاڵمیرا بۆ پاراستنی ئاسمانی لە کاتی هەوڵەکانی ئاوەدانکردنەوەدا. بەڵام تا ئێستا هیچ بڕیارێکی کۆتایی نەدراوە و پێویستی بە ڕەزامەندی روسیا دەبێت.

لەلایەکی دیکەوە ئەنقەرە و واشنتۆن گفتوگۆیان لەسەر هەڵوەشاندنەوەی ئەو سزایانە کردووە کە بەهۆی کڕینی سیستمی ئێس 400ـی دروستکراوی روسیاوە بەسەر تورکیادا سەپێنراون، کە بووە هۆی دوورخستنەوەی تورکیا لە پرۆگرامی فڕۆکەی جەنگی ئێف 35 لە ساڵی 2019دا.

مانگی ڕابردوو لە پەیوەندییەکی تەلەفۆنیدا دۆناڵد ترەمپ، سەرۆکی ئەمریکا و ڕەجەب تەیب ئەردۆغان هاوتا تورکەکەی، پێدانی فڕۆکەی ئێف 35یان بە تورکیا تاوتوێ کرد.

بەپێی یاساکانی ئەمریکا، تورکیا دەبێت دەستبەرداری خاوەندارێتی سیستەمی ئێس-400 بێت بۆ ئەوەی دووبارە وەربگیرێتەوە.

ئیسرائیل بە توندی دژی هەر هەنگاوێکە کە ڕێگە بە ئەنقەرە بدات بچێتە ناو فڕۆکەی ئێف-35 و پێی وایە ئەوە لێواری سەربازی چۆنایەتی ئیسرائیل لە ناوچەکەدا دەشێوێنێت.