هەواڵ

شەش هەزار خاڵ بۆ پۆلێنکردن... یاسا بۆ دیاریکردنی نرخی هۆتێل لە هەرێمی کوردستان نییە

زیاتر لە 3 هەزار و 100 شوێن و بنکەی گەشتیاری لە هەرێمی کوردستان هەن، دەستەی گەشتوگوزار دەڵێت، نرخی بە کرێ گرتنیان بە یاسا دیاری نەکراوە.

هەرێمی کوردستان بە یەکێک لەو ناوچانەی عێراق دادەنرێت کە ساڵانە نزیکەی 7 ملیۆن گەشتیار سەردانی دەکەن.لە هەرێمی کوردستان زیاتر لە 3 هەزار و 100 شوێن و بنکەی گەشتیاری هەن، کە گەشتیاران سەردانیان دەکەن و تێیاندا دەمێننەوە. 

شوێن و بنکە گەشتیارییەکان بریتین لە؛ 468 هۆتێل، 282 مۆتێل، 714 کافتریا، 10 شاری یاری، 589 ڕێستۆرانت، 54 کۆمەڵگەی گەشتیاری و نزیکەی 80 گوندی گەشتاری. لەگەڵ بوونی سەدان کەپری گەشتیاریی و بنکە و ناوچەی سروشتیی گەشتیاری.
هۆتێل و مۆتێلەکان بە چەندین پێوەری جیاواز پۆلێنکراون، سەرجەمی خاڵی پۆلێنکردنەکانیش لەلایەن دەستەی گەشتوگوزاری هەرێمی کوردستانەوە دیاریکراون و بە ئاستی خزمەتگوزارییەکانیان ئەستێرەیان پێبەخشراوە. 

پۆلێنکردنی هۆتێلەکان 
لە ئاستی جیهاندا چەندین پێوەری جیاواز هەن کە هۆتێلەکانیان پێ پۆلێن دەکرێن ژمارەی ئەستێرەکانیان لە 1 تا 5 پێ دەردرێت، لە ئاستی جیهاندا هۆتێلەکان بەپێی قەبارە، شوێن، ئاستی خزمەتگوزاری، ژمارەی ژورەکان و هتد.. پۆلێن دەکرێن. لە هەرێمی کوردستانیش هەمان ڕێنمایی بۆ پۆلێنکردنی هۆتێلەکان هەیە.

دەستەی گەشتوگوزاری هەرێمی کوردستان بۆ پۆلێنکردنی هۆتێلەکان نزیکەی شەش هەزار خاڵی جیاوازی دیاریکردووە، کە خاڵەکان تایبەتن بە جیاکاری لە بوونی ئەو خزمەتگوزارییانەی پێویستن لە هۆتێلەکاندا هەبن بەپێی ژمارەی ئەستێرەکانیان. 

یەك ئەستێرە: 

لە هۆتێلەكەدا، پێوەرە بنەڕەتییەكان ڕەچاوكراون، هۆتێلەكە لە ڕووی پاكوخاوێنییەوە بێ كێشەیە. نۆژەنكراوەتەوە، دەستشۆر و خزمەتگوزاری توالێتی گونجاوە. كارمەندی وەك پێویست هەیە. چێشتخانەی تایبەتی هەیە و كراوەیە لە ژەمەكانی نیوەڕۆ و ئێوارەدا.

دوو ئەستێرە:
لە ڕووی پاكوخاوێنیی و شوێنی پشوودان و مانەوە ئاستی بەرزە، پێوەرە بنەڕەتییەكانی بە تەواوی تێدا هەن. كارمەندی بە سوود و ڕووخۆشی هەیە. چێشتخانەكەی كوالێتی بەرزی هەیە و نیوەڕۆ و ئێوارە كراوەیە.

سێ ئەستێرە:
هۆتێلگەلێكن دەكەونە شوێنە گشتییەكان، ژووری خەوتنی فراوانە، زۆر پاكە و ئامێری پێویستیی تێدایە. بۆ مانەوە گونجاوە. خزمەتگوزاری توالێت و گەرماوی باشە، كارمەندی ڕووخۆش و بەسوودی هەن، لە ژەمەكاندا خواردنی هەیە و چێشخانەكەی كوالێتییەكی بەرزی هەیە و خواردنی ئەوروپایی بەردەستە.

چوار ئەستێرە:
هۆتێل گەلێكن لە شوێنە گشتییەكان هەن، ژووری خەوتنیان فراوانە، توالێت و گەرماوی تایبەت لە ژوورەكان هەیە، لە ڕووی پاكوخاوێنییەوە زۆر كوالێتی بەرزە. شێوازی پێشكەشكردنی خزمەتگوزارییەكانی فەرمییە.
كارمەندەكانی زۆر جددین لە جێبەجێكردنی خواست و داواكاری میوانەكان. چێشتخانەی كراوەیە و لە ژەمە سەرەكییەكاندا بەردەستە. خواردن و خواردنەوەی تێدایە، لە 24 كاتژمێردا خواردنی خێرا بەردەستە بۆ میوانەكان.

پێنج ئەستێرە:
هۆتێلی گەورەن و لە ناوچە گشتییەكان هەن، ژووری خەویان زۆر فراوانە، ناوچەی دەوروبەریشیان تایبەت و ڕاقیە، بەرزترین كوالێتییان لە پێوەرەكانی پاكوخاوێنی هەیە. مانەوەی میوان ڕاقیانەیە، خزمەتگوزارییەكان زۆر فەرمین. كارمەندەكانی ڕاهێنراون و ئاستی خزمەتكردنیان بەرزە، ئاستی خواردن و چێشتخانەكەیان بەرزە، ڕوبەرێكی كراوەیان بۆ خواردن هەیە، ژەمە سەرەكییەكان دابین دەكەن، 24 كاتژمێر خواردن و خواردنەوە و ژەمە خواردنی سوك ئامادەیە، كوالێتی خواردنیان بەرزە.

پۆلێنکردنی مۆتێلەکان
جیاواز لەو پۆلێنانەی بۆ هۆتێلەکان دانراون، دەستەی گەشتوگوزار 39 خاڵی بۆ پۆلێنکردنی مۆتێلەکان دیاریکردوە، سەرجەمی خاڵەکان پەیوەستن بە پێشکەشکردنی خزمەتگوزاری جیاواز بە سەردانیکەردانی مۆتێلەکان. هاوشێوەی هۆتێلەکان مۆتێلەکانیش لەگەڵ بەرزکردنەوەی ئاستی خزمەتگوزاری و پێشکەشکردنی خزمەتی زیاتر ژمارەی ئەستێرەکانیان دیاریکراوە. 

پۆلێنکردنی ڕێستورانت
پۆلێنکردنی کافتریا
پۆلێنکردنی فاست فود
پۆلێنکردنی سناک بار

 
تێکڕای نرخی هۆتێل و مۆتێلەکانی کوردستان

 لە ئاستی جیهاندا چەند هۆکارێک هەن کاریگەریان لەسەر دیارکردنی نرخی هۆتێل و مۆتێلەکان هەیە و لەو ڕێگەیەوە نرخی مانەوە تێیاندا دیاری دەکرێت.

وەرز و بۆنەکان: لە وەرزی گەشتیاریدا هەمیشە نرخی هۆتێل و مۆتێلەکان بەرز دەبنەوە و لە بۆنە و جەژنەکانیشدا نرخیان دەگاتە لوتکە. 

شوێن: ئەو هۆتێل و مۆتێلانەی دەکەونە ناوەندی شار، نزیک شوێنە سەرنجڕاکێشەکان، یان لە گەڕەکە ڕاقییەکاندا بە گشتی نرخی مانەوە تێیاندا بەرزە.

ئەستێرە: بەهۆی پێشکەشکردنی خزمەتگوزاری زیاتر هەمیشە لەگەڵ زیادبوونی ژمارەی ئەستێرەکاندا نرخی هۆتێلەکانیش بەرز دەبنەوە. 

جیاوازییە ناوچەییەکان: لە ئەمەریکای باکور هۆتێل و مۆتێلی شارە گەورەکان و شوێنە گەشتیارییە بەناوبانگەکان زیاتر گرانترن، لە شارەکانی ئەوروپا وەک پاریس و ڕۆما نرخی هۆتێلەکان بە بەراورد بە شارۆچکە و شارە بچوکەکان زیاترە.

لە ئاسیا لە وڵاتانی وەک ژاپۆن یان سەنگاپورە نرخی شوێنی نیشتەجێبوون تاڕادەیەک بەرزە بەڵام لە باشوری ڕۆژهەڵاتی ئاسیا یان بەشێک لە چین و هیندستان، شوێنی نیشتەجێبوون هەرزانترە. ئوسترالیا و نیوزلەندا بەگشتی تێچووی شوێنی نیشتەجێبوونیان بەرزە. 

ئەگەرچی لە جیهاندا نرخی مۆتێل و هۆتێلەکان دیاریکراوە و تێکڕای نرخ هەیە بەڵام تا ئێستا لە هەرێمی کوردستان یاسایەک بۆ دیارکردنی نرخەکان نییە.

ئیبراهیم عەبدولمەجید وتەبێژی دەستەی گەشتوگوزاریی هەرێمی کوردستان لەبارەی نرخەکانەوە بە"Mic"ـی وت، “ ناتوانین تێکڕای نرخ دیاری بکەین چونکە نرخەکان بەپێی شوێن و شار و خزمەتگوزاری دەگۆڕێت”.

هەواڵ

کورد دانیشتنەکانی پەرلەمانی عێراق پەکدەخات

ئەندامێکی پەرلەمانی عێراق رایدەگەیەنێت، کە فراکسیۆنە کوردییەکان سورن لەسەر بایکۆتکردنی دانیشتنەکانی پەرلەمانی عێراق، تا ئەو کاتی پرۆژەیاسای بە پارێزگابوونی هەڵەبجە پەسەند دەکرێت.

چرۆ حەمە شەریف، ئەندامی پەرلەمانی عێراق بە MICـى راگەیاند، هەموو فراکسیۆنە کوردییەکان یەک هەڵوێستین لەسەر بایکۆتکردنی دانیشتەکانی پەرلەمانی عێراق، تا ئەوکاتەی پرۆژە یاسای بە پارێزگابوونی هەڵەبجە دەنگی لەسەر دەدرێت و پەسەند دەکرێت.

ئەو پەرلەمانتارە باسی لەوەکرد، کە فراکسۆنە کوردییەکان بایکۆتی دانیشتنەکانی پەرلەمان بکەن رێژەی یاسایی تەواونابێت و پەرلەمان ناتوانێت هیچ دانیشتنێک ئەنجامبدات، بەو پێیەی بەشێکی زۆر لە پەرلەمانتاران پابەندی دەوام نین.

بە وتەی چرۆ حەمە شەریف، هەرکاتێک دانیشتنی پەرلەمان بکرێت، پرۆژەیاسای بە پارێزگابوونی هەڵەبجە لە بەرنامەی کاردایە و وتیشی: جێگری دووەمی سەرۆکی پەرلەمان دڵنایی پێداون کە هەرکاتێک دانیشتنی پەرلەمان بکرێت، تەنها پرۆژە یاسای بە پارێزگابوونی هەڵەبجە دەخەنە بەرنامەی کارەوە.

ئەو پەرلەمانتارە جەختدەکاتەوە، کە تێپەڕاندنی پرۆژە یاسای بە پارێزگابوونی هەڵەبجە پێویستی بە ڕێککەوتنی سیاسی پێشوەختەیە و وتی: ئەو پرۆژە یاسایە بۆ ئەوەی بەبێ کێشە پەسەند بکرێت، پێویستی بەوەیە فراکسیۆنەکان پێش دانیشتنی پەرلەمان رێکبکەن و لە دانیشتەکەدا ئەندامانی پەرلەمان پابەندبکرێن بە پەسەندکردنی.

پرۆژەی بەپارێزگابوونی هەڵەبجە، ساڵی ڕابردوو خرایە دانیشتنەکانی پەرلەمانەوەو توانرا خوێندنەوەی یەکەم و دووەمی بۆ بکرێت، بەڵام بە هۆی تەواونەبوونی رێژەی یاسایی و خۆدزینەوەی ئەندامانی پەرلەمان بە بیانوی جیاواز بۆ دەنگدان بە پرۆژە یاساکە، تائێستا نەتوانراوە پرۆژە یاساکە لەلایەن پەرلەمانەوە پەسەند بکرێت.