هەواڵ

دابەشکردنی پۆست پارتی و یەکێتی کۆدەکاتەوە

بڕیارە هەفتەی داهاتوو پارتی و یەکێتی وادەی نوێ بۆ کۆبونەوە دیاری بکەن تا دانوستان لەسەر دابەشكردنی پۆستەکانی کابینەی دەیەمی حکومەتی هەرێمی کوردستان دەست پێبکەن.

بەپێی ئەو زانیارییانەی دیجیتاڵ میدیای Mic لە ئەندامانی لیژنەی دانوستانکاری پارتی دیموکراتی کوردستان و یەکێتیی نیشتمانی کوردستانەوە دەستیکەوتووە، بڕیارە هەفتەی داهاتوو وادەی کۆبونەوەی نوێ دیاری بکەن.

چاوەڕوان دەکرێت، کۆبونەوەکەی پارتی و یەکێتی هەر لەناو ئەو هەفتەیەدا ئەنجام بدرێت، کە تایبەت دەبێت بە دابەشكردنی پۆستەکان.

رۆژی 18ـی ئازاری 2025، دوایین کۆبونەوەی نێوان پارتی و یەکێتی لە لە بارەگای مەکتەبی سیاسیی یەکێتی لە هەولێر کرا. دوای کۆبوونەوەکە، پارتی و یەکێتی راگەیەندراوێکی هاوبەشدا بڵاویانکردەوە ، "گەیشتونەتە دواڕەشنووسی دیدگای هاوبەش بۆ قۆناغی داهاتوو کە دەبێتە ئامرازێک بۆ پێکهێنانی حکومەت و دامەزراوەکانی تر و باشتر خزمەتکردنی هاوڵاتییان".

دوو حزبەکە بەبۆنەی هاتنی جەژنی رەمەزان نەیتوانی کۆبونەوەی دیکە ئەنجام بدەن، هەر بۆیە پرسی دابەشکردنی پۆستەکانیان خستە دوای جەژن.

دابەشکردنی پۆستەکان، تەوەری سەرەکی کۆبونەوەکەی داهاتوو دەبێت، سەرەتا دوو حزبەکە سەرجەم پۆستەکان لە نێوان خۆیاندا یەکلایی دەکەنەوە، دواتر ئەو پۆستانەی دەمێنەوە بەو لایەنانەی دەدەن کە بەشداری حکومەت دەکەن. 

رۆژی 20ـی تشرینی یەکەمی 2024، هەڵبژاردنی خولی شەشەمی پەرلەمانی کوردستان ئەنجامدرا، دوای زیاتر لە پێنج مانگ تا ئێستا کابینەی دەیەمی حکومەتی هەرێمی کوردستان پێکنەهێنراوە.

رۆژی 30ـی ئازاری 2025، دوای بەشداریکردنی لە نوێژی جەژن سەربەست لەزگین، ئەندامی مەکتەبی سیاسی و بەرپرسی مەکتەبی رێکخستی پارتی دیموکراتی کوردستان لە دهۆک لە کۆنگرەیەکی رۆژنامەنوسیدا رایگەیاند، ''ئینشاڵڵا لە مانگی نیساندا شتی باش روودەدات، لە کاتێکی نزیکدا کابینەی دەیەمی حکومەتی هەرێمی کوردستان پێکدەهێندرێت". 

لیژنەی باڵای دانوستانی پارتى دیموکراتى کوردستان و یەکێتیی نیشتمانیی کوردستان لەگەڵ ئەوەی چەندین کۆبونەوەیان کردووە، دووجاریش بافڵ تاڵەبانی سەرۆکی یەکێتی و مەسرور بارزانی کاندیدی پارتی بۆ سەرۆکی کابینەی دەیەم سەبارەت بە پێکهێنانی حکومەت کۆبوونەتەوە.

مەسرور بارزانی و بافڵ تاڵەبانی لە دوایین کۆبوونەوەیان کە 16ـی ئازاری 2025 بەڕێوەچوو، کۆبوونەوەکەیان بە ''ئەرێنی و زۆر باش'' ناوبرد.

هەواڵ

کورد دانیشتنەکانی پەرلەمانی عێراق پەکدەخات

ئەندامێکی پەرلەمانی عێراق رایدەگەیەنێت، کە فراکسیۆنە کوردییەکان سورن لەسەر بایکۆتکردنی دانیشتنەکانی پەرلەمانی عێراق، تا ئەو کاتی پرۆژەیاسای بە پارێزگابوونی هەڵەبجە پەسەند دەکرێت.

چرۆ حەمە شەریف، ئەندامی پەرلەمانی عێراق بە MICـى راگەیاند، هەموو فراکسیۆنە کوردییەکان یەک هەڵوێستین لەسەر بایکۆتکردنی دانیشتەکانی پەرلەمانی عێراق، تا ئەوکاتەی پرۆژە یاسای بە پارێزگابوونی هەڵەبجە دەنگی لەسەر دەدرێت و پەسەند دەکرێت.

ئەو پەرلەمانتارە باسی لەوەکرد، کە فراکسۆنە کوردییەکان بایکۆتی دانیشتنەکانی پەرلەمان بکەن رێژەی یاسایی تەواونابێت و پەرلەمان ناتوانێت هیچ دانیشتنێک ئەنجامبدات، بەو پێیەی بەشێکی زۆر لە پەرلەمانتاران پابەندی دەوام نین.

بە وتەی چرۆ حەمە شەریف، هەرکاتێک دانیشتنی پەرلەمان بکرێت، پرۆژەیاسای بە پارێزگابوونی هەڵەبجە لە بەرنامەی کاردایە و وتیشی: جێگری دووەمی سەرۆکی پەرلەمان دڵنایی پێداون کە هەرکاتێک دانیشتنی پەرلەمان بکرێت، تەنها پرۆژە یاسای بە پارێزگابوونی هەڵەبجە دەخەنە بەرنامەی کارەوە.

ئەو پەرلەمانتارە جەختدەکاتەوە، کە تێپەڕاندنی پرۆژە یاسای بە پارێزگابوونی هەڵەبجە پێویستی بە ڕێککەوتنی سیاسی پێشوەختەیە و وتی: ئەو پرۆژە یاسایە بۆ ئەوەی بەبێ کێشە پەسەند بکرێت، پێویستی بەوەیە فراکسیۆنەکان پێش دانیشتنی پەرلەمان رێکبکەن و لە دانیشتەکەدا ئەندامانی پەرلەمان پابەندبکرێن بە پەسەندکردنی.

پرۆژەی بەپارێزگابوونی هەڵەبجە، ساڵی ڕابردوو خرایە دانیشتنەکانی پەرلەمانەوەو توانرا خوێندنەوەی یەکەم و دووەمی بۆ بکرێت، بەڵام بە هۆی تەواونەبوونی رێژەی یاسایی و خۆدزینەوەی ئەندامانی پەرلەمان بە بیانوی جیاواز بۆ دەنگدان بە پرۆژە یاساکە، تائێستا نەتوانراوە پرۆژە یاساکە لەلایەن پەرلەمانەوە پەسەند بکرێت.