هەواڵ

هەرێم بەتەمابوو پاش جەژن پرسی موچە چارەسەربکات

گرفتی موچەی فەرمانبەرانی هەرێمی کوردستان کەوتووەتە مانگێکەوە کە زۆرترین پشووی فەرمی تێدایە و پەرلەمان لە پشوی هاوینەدایە و دامەزراوە حکومیی و کارگێڕییەکان لە عێراق بە گشتیی پەکیاندەکەوێت و دەبێتە بیانوو بۆ بەرپرسە باڵاکان بۆ زیاتر دواخستنی دانوستان و کۆبوونەوەکان.

بەپێی بەدواداچوونەکانی مایک نیوز، لەم مانگی حوزەیرانەدا، نزیکەی 15 رۆژ پشوو دەبێت، بەتایبەت کە جەژنە ئاینییە گەورەکان کەوتوونەتە ئەم مانگەوە و چەندین پرسی هەڵپەسێردراو لە عێراقدا چاوەڕێی بەلاداخستن و چارەسەرکردن دەکات.

پشوو ناهێڵیت پرسی موچە چارەسەر بکرێت
بۆنمونە لەم مانگی شەشەدا 8 رۆژ بەر پشوی رۆژانی هەینی و شەممە دەکەوێت، جگە لەوەی پشوی جەژنی قوربان 5 رۆژی یەکلەدوای یەک بوو کە رۆژی هەینی و شەممەی تێکەوت، هەروەها دوو یاد و بۆنەی دیکە هەیە لە چەند رۆژی داهاتوودا کە شوێنکەوتوانی ئاینزای شیعە زۆر بە گرنگی دەزانن و پابەندن پێوەی.

جەژنی غەدیر دەکەوێتە رۆژی 18ی زیلحەجە، واتە رۆژی یەکشەممە 15ی حوزەیران دەستپێدەکات بۆ سێ رۆژی یەکلەدوای یەک، واتە پاش کۆتایی هاتنی پشووی رۆژانی هەینی و شەممە، راستەوخۆ پشووی غەدیر دەستپێدەکات و لە هەفتەکەدا تەنها رۆژانی چوارشەممە و پێنجشەممە دەوام دەکرێت و پشوو دەستپێدەکاتەوە.

هەر لەم مانگەدا و لە رۆژی پێنجشەممە، 26ی حوزیران دەکرێتە پشوو، لەبەرئەوەی دەبێتە (1ی حەرام) کە سەرەتای ساڵی کۆچیە بۆ موسڵمانان.

جگە لەوەی پەرلەمانی عێراق لە پشووی هاوینەی خۆیدایە و تا ناوەڕاستی مانگی (تەموز-7) کارەکانی دەستپێناکاتەوە.

هەروەها هەرێم پشتی بەوەبەستووە لەپاش کۆتاییهاتنی پشووەکانی جەژن پرسی موچە چارەسەر بکات لە دادگای فیدراڵیی، بەڵام 5 ئەندامی دادگاکە رۆیشتوون بۆ زیارەتی حەج و چاوەڕێ دەکرێت چەند رۆژی داهاتوو بێنەوە.

28ـی ئایاری رابردوو، وەزارەتی دارایی عێراق بە نووسراوێک حکومەتی هەرێمی کوردستانی لەوە ئاگادارکردەوە ئیتر ناتوانێت پارە بۆ موچەی مانگەکانی دیکەی ئەم ساڵ بنێرێت، لەبەرئەوەی داهاتی نەوتی و نانەوتی هەرێم رادەستنەکراوەتەوە و بەشەبودجەی هەرێم بۆ ساڵی 2025 تەواوبووە.

لە ساڵانی رابردوودا، کاتێک هەرێمی کوردستان کێشەی موچەی هەبووبێت لەگەڵ عێراق، بەرپرسانی حکومەتی فیدراڵیی بە پاساوی هەبوونی پشوو یان گەشتکردنی بەرپرسەکان، راییکردن و جێبەجێکردنی کارەکان بۆ بەلاداخستنی کارەکان دواکەوتوون، هەر بۆیە ئاسۆی گفتوگۆکان بۆ چارەسەرکردنی پرسی موچەی مانگی ئابی موچەخۆرانی هەرێم بە هەڵپەسێردراوی دەمێنێتەوە.

هەواڵ

هێرشی ئێران بۆسەر بنکەکانی ئەمریکا دەستیپێکرد.. قەتەر و ئیمارات گەشتەکانیان راگرت

هێرشی ئێران بۆسەر بنکەی سەربازی ئەمریکا لە قەتەر دەستیپێکرد و ئیمارات و قەتەریش، گەشتە ئاسمانییەکانیان راگرت.

ئێران بنکەی ئەمریکی عەدیدی لە قەتەر بە موشەک بۆردومان کرد، لە وەڵامی بۆردومانکردنی دامەزراوە ئەتۆمییەکانی لەلایەن ئەمریکاوە.

وەزارەتی دەرەوەی قەتەر بۆ ماوەیەکی کاتی هاتوچۆی ئاسمانی وڵاتەکەی ڕاگرت بۆ دڵنیابوون لە سەلامەتی هاوڵاتیان و دانیشتوان و گەشتیاران.


هاوشێەی قەتەر، ئیمارات ئاسمانی خۆی داخستووە و هێڵی ئاسمانی تورکیا سەرجەم گەشتەکانی بۆ ئیمارات هەڵوەشاندەوە.

ئیمارات و قەتەر بۆ خۆبەدوورگرتن لە زیانی هێرشەکانی ئێران بۆسەر بنکە سەربازییەکانی ئەمریکا لە ناوچەکە، ئەو بڕیارەیان داوە.

ئێوارەی ئەمڕۆ، مەسعود پزیشکیان، سەرۆک کۆماری ئێران رایگەیاند، "ئێمە بە هەموو توانامانەوە بەرگری لە ئاسایشی ئێران دەکەین و بە باوەڕ و ژیری و ئیرادە، وەڵامی هەر ئازارێک دەدەینەوە کە لە ئێران دەیچێژێت".

هێرشی ئێران بۆسەر بنکە  سەربازییەککانی ئەمریکا لە رۆژهەڵاتی ناوەڕاست، جەگی ئیسرائیل و ئێران دەباتە قۆناغێکی نوێوە و پریشکی ئاگری شەڕەکە بناوچەکە دەگرێتەوە.

رۆژی 13ـى ئەم مانگە ئیسرائیل هێرشی کردە سەر ئێران و سوپاسالار و فەرماندەی سوپای پاسداران و ژمارەیەک بەرپرسی پللەباڵای سەربازی و نۆ زانای ئەتۆمی کوژران، پاشان هێرشەکانی ئێران بۆسەر ئیسرائیل دەستی پێکرد.

لەو رۆژەوە  هێرشی ئەو دوو وڵاتە بۆسەر ەکتری بەردەوامە و بەرەبەیانی 22ـى مانگ، ئەمریکا هێرشی کردە سەر ناوەندی ئەتۆمی فۆردۆ لە ئێران، دوابەدوای هێرشەکە ئێران هەڕشەی کردنە ئامانجی بنکەکانی ئەمریکای کرد.