كاتی پێدانی كارەبای مۆلیدە ئەهلیەكان گۆڕانكاری بەسەردادێت و پارەكەشی كەمدەبێتەوە

 بەڕێوەبەرایەتی گشتی كارەبای سلێمانی بڵاویكردەوە، لیژنەی دیاریكردنی نرخی موەلیدە ئەهلییەكان نرخی هەر ئەمپێرێك كارەبای مۆلیدەی بۆ مانگی رابردوو دیاری كردووە و نرخەكە لە نێوان 12 هەزار و 500 دینار بۆ 13 هەزار و 500 دینار دەبێت و خشتەی پێدانی كارەبای مۆلیدەش گۆڕانكاری بەسەردا هات.
بە گوێرەی راگەیەندراوێكی بەڕێوەبەرایەتی گشتی كارەبای سلێمانی، كاتژمێرەكانی پێدانی كارەبای مۆلیدە بۆ مانگی تشرینی یەكەم دیاركراوە و لە نێوان كاتژمێرەكانی 12ی نیوەڕۆ بۆ كاتژمێر یەكی شەو كاردەكەن و هەر كاتێك كارەبای نیشتیمانی لە كاتژمێرەكانی نێوان 6:30 بۆ هەشتی بەیانی كوژرایەوە، مۆلیدەكان كارەبا بە هاوڵاتیان دەدەن.
ئەمڕۆ یەكشەممە، بەڕێوەبەرایەتی گشتی كارەبای سلێمانی بڵاویكردەوە:  دوای كۆبوونەوەی لیژنەی دیاریكردنی نرخی مۆلیدە ئەهلییەكان، بەگوێرەی نرخی گازوایل نرخی كاتژمێرێك ئەمپێری موەلیدە بە 64 دینار بۆ مانگی ئەیلول دیاریكرا و بەتێكڕایی موەلیدە ئەهلییەكان لەنێوان 190 بۆ 210 كاتژمێر كاریان كردووە، بەمەش نرخی ئەمپێرێك كارەبا لەنێوان 12 هەزار و 500 بۆ 13 هەزار و 500 دینار دەبێت.
بەڕێوەبەرایەتی گشتی كارەبای سلێمانی دەشڵێت: نرخی ئەمپێرێك لە گەڕەكێك بۆ گەڕەكێكی دیكە جیاوازە بەو پێیەی بەپێی ئەو پێوەرە هەژماردەكرێت كە بۆ مۆلیدە‌كان دانراوە و كاتژمێری كاركردنیان تۆماردەكات.
بەرێوەبەرایەتی كارەبای سلێمانی باسی لەوەشكردووە: بەرنامەی كاركردنی مۆلیدەكان بۆ ئەم مانگە (تشرینی یەكەم)، گۆڕانكاری بەسەردا دێت و لە كاتژمێر 12 نیوەڕۆ بۆ یەكی شەو كاردەكەن، لەگەڵ بەیانیان لەكاتژمێر 6:30بۆ هەشتی بەیانی ئەگەر كارەبای نیشتیمانی كوژایەوە، موەلیدە ئەهلییەكان كارەبا بۆ هاوڵاتیان دابین بكەن‌.
راگەیەندراوەكەی كارەبای سلێمانی ئەوە دەگەیەنێت، لە كاتژمێرەكانی هەشتی بەیانی بۆ 12ی نیوەڕۆ و لە كاتژمێر یەكی شەو بۆ 6:30 بەیانی ئەگەر كارەبای نیشتیمانی نەبێت ئەوا مۆلیدەش نابێت.

هەواڵ

لە2019 ەوە لەهەرێمی كوردستان 743 ژن بەڕووداوی جیاجیا گیانیان لەدەستداوە

بە پێی ئامارەكانی بەڕێوەبەرایەتی بەرەنگاربوونەوەی توندووتیژی دژی ژنان و خێزان لەهەرێمی كوردستان لەساڵی 2019 ەوە تا شەش مانگی یەكەمی 2022 ، 117 ژن كوژراون و 193 ژنیش خۆیان كوشتووە و 155 ژنیش بەهۆكاری جیاجیا "سوتاون" و 278 ژنیش خۆیان سوتاندووە كە كۆی گشتی دەكاتە 743 ژن كە بەهەر هۆكارێك بێت لەهەرێمی كوردستان گیانیان لەدەستداوە.
بەپێی ئامارەی بەڕێوەبەرایەتی بەرەنگاربوونەوەی توندوتیژی دژ ژنان و خێزان لەهەرێمی كوردستان، لەساڵی 2019 45 ژن كوژراون و لەساڵی 2020 دابەزیوە بۆ 25 ژن و لە 2021 یشدا 25 ژن كوژراون، بەڵام لەشەش مانگی یەكەمی 2022 دا 22 ژن لەهەرێم كوژراون، جگە لەوەی لە2019 دا لەهەرێم 62 ژن خۆیان كوشتووە و 155 ژن سوتاون و 104 ژنیش خۆیان سوتاندووە، لەساڵی 2020 یش 25 ژن كوژراون و 38 ژن خۆیان كوشتووە و 68 ژنیش خۆیان سوتاندووە، هاوكات لەساڵی 2021 دا 25 ژن كوژراون و 62 ژن خۆیان كوشتووە و 78 ژنیش خۆیان سوتاندووە، بەڵام لەشەش مانگی یەكەمی 2022 دا لەهەرێمی كوردستان جگە لەوەی 22 ژن كوژراون 31 ژنیش خۆیان كوشتووە و 29 ژنیش خۆیان سوتاندووە.