هەواڵ

ساڵانە بە بەهای 15 ملیۆن دۆلار گوڵ دەهێنرێتە هەرێم

بازرگانەکانی گوڵ لە هەرێمی کوردستان ساڵانە بە بەهای 15 ملیۆن دۆلار گوڵ لەدەرەوە هاوردەی هەرێمی کوردستان دەکەن

هەرێمی کوردستان هەرچەندە کەشوهەوایەکی گونجاوی هەیە بۆ چاندن و گەشەکردنی جۆرە جیاوازەکانی گوڵ، بەڵام هێشتا هیچ کێڵگەیەکی بەرهەمهێنانی گوڵ لەهەرێمەکەدا نییە.

بازرگانەکانی گوڵ بۆ پڕکردنەوەی خواستەکانی سەر گوڵ، روو لەوڵاتانی دەرەوە دەکەن، وەک ئێران و تورکیا و هەندێکجاریش وڵاتانی ئەورووپا.

چەند ساڵیکە فرۆشتنی گوڵ بۆتە بازرگانییەکی باش بۆ ئەوانەی کاری تێدا دەکەن، ئەویش بەهۆی خواستە زۆرەکەی هاوڵاتیان لەسەری، بەڵام قەیرانی دارایی هەرێم و نەبوونی مووچە راستەوخۆ کارەکەی ئەوانیشی بەتەواوی لاواز کردوە و خواست لەسەر کڕینی گوڵ زۆر کەمبۆتەوە.

گوڵفرۆشەکان دەڵێن لەبۆنەکاندا خواستی کڕیاران لەسەر گوڵ زیاتر دەبێت، بەتایبەت رۆژێکی وەک ئەمڕۆ 14-2- کە بەرۆژی خۆشەویستی ناودەبرێت(ڤالانتاین)  ئەوەش وایکردوە کە بازرگانەکانی گوڵ پێشوەختە ملیۆنان گوڵ هاوردە بکەن بۆ ئەوەی خواستی هاوڵاتیان لەسەر گوڵ پڕ بکەنەوە.

14ی شوباتی هەموو ساڵێک، کە ئەم ساڵ دەکاتە ئەمڕۆ چوارشەممە، رۆژی ڤالانتاین یان رۆژی خۆشەویستییە. ئەو گوڵەی بۆ ڤالانتاین بە دیاری دەدرێت گوڵی سوورە. هەندێکجار دیارییەکان تەنیا گوڵ نین و خۆشەویست و هاوژینەکان زۆر شتی گرانبەها دەکەنە دیاری بۆ یەکدی. 

لە رۆژی خۆشەویستیدا نرخی گوڵیش بەرزدەبێتەوە، بە گوتەی ئەو بازرگانە، "پێشتر چڵی گوڵی سوور سێ هەزار دینار بوو؛ ئێستا بووە بە پێنج هەزار دینار."

هەندێک لە هاوڵاتیان پارەی زۆر دەدەن بە گوڵ بۆ دیاری و گوتی، "کڕیاریمان هەبووە گوڵی دیاری کڕیوە نرخەکەی گەیشتووەتە 20 ملیۆن دینار."

هەواڵ

"حزبی دیموکرات دەڵێت "ئاسایش بێهزاد خوسرەوی رادەستی ئیتڵاعات کردۆتەوە

حزبی دیموکراتی کوردستانی ئێران دەڵێت" ئاسایشی سلێمانی بێهزاد خوسرەوی ئەندامی ئەو حزبەیان دەستگیرکردوە و رادەستی ئیڵاعاتی ئێرانیان کردۆتەوە، بەڵام ئاسایش دەڵێت لەسەر داوای خۆی گەڕێندراوەتەوە.

دەنگۆی رادەستکردنەوەی ئەندامێکی حزبی دیموکراتی کوردستانی ئێران، کە پارتێکی ئۆپۆزسیۆن، کاردانەوەی لێکەوتۆتەوە، ئاسایشی سلێمانی رۆژی هەینی رایگەیاند کە "بێهزاد خوسرەوی ماوەی مۆڵەتی مانەوەی لە هەرێم تەواو بووە بۆیە لەسەر داوای خۆی گەڕندراوەتەوە بۆ رۆژهەڵاتی کوردستان."

بەڵام ئەمڕۆ شەممە، حزبی دیموکراتی ئێران ئەو لێدوانە ڕەتدەکاتەوە و دەڵیت" بێهزاد خوسرەوی لەلایەن ئاسایشیەوە دەستگیرکراوە و رادەستی ئیتڵاعاتی سنە کراوەتەوە.

ڕۆژی 6-9-2024، ڕێکخراوی مافی مرۆڤی هەنگاو بڵاوی کردەوە، هەفتەی ڕابردوو چالاکوانێکی خەڵکی سەقز بەناوی بێهزاد خوسرەوی تەمەن 35 ساڵ کە خاوەن پێداویستیی تایبەت بووە و ئەندامی حیزبی دیموکراتی کوردستانی ئێران بووە، هاوکات ئەندامی فەرمی کۆمیسیاری باڵای پەنابەرانی نەتەوەیەکگرتووەکان بووە، دوای دەستگیرکردن و ئەشکەنجەدانی لەلایەن هێزە ئەمنییەکانی سلێمانی ڕادەستی ئێران کراوەتەوە.

ناوەندی تەشکیلاتی حیزبی دیموکراتی کوردستانی ئێران ڕایگەیاندووە، لە ماوەی دوو هەفتەی ڕابردوودا بەهزاد خوسرەوی لە شاری سلێمانی دووجار لەلایەن ئاسایشەوە بانگ کراوە و جاری دووەم و دوای چەند ڕۆژێک لە بەندکردن و ڕاگرتن، ڕادەستی ئیدارەی ئیتلاعاتی شاری سنە کراوەتەوە.

حیزبی دیموکرات وەڵامی ئاسایشی سلێمانی داوەتەوە و ئاماژەی بەوە کردووە، کە بەهزاد خوسرەوی ماوەی زیاتر لە 10 ساڵە لەگەڵ دایک و خوشکی لە هەرێمی کوردستان لە شاری سلێمانی دەژین و بەپێ هەموو بەڵگە بەردەستەکان، لە نیشینگەی شاری سلێمانی مۆڵەتی مانەوە و نیشتەجێبوونیان وەرگرتووە، مانەوەیان لەو شارە یاسایی و بەپێی ڕێوشوێنەکانی حکومەتی هەرێمی کوردستان بووە.

ماوەی حەوت ساڵ بەهزاد و بنەماڵەکەی ئەندامی حیزبی دیموکرات بوون، لە هەموو ئەو ماوەیەشدا لە چوارچێوەی یاسا و ڕێوشوێنەکانی حکومەتی هەرێمی کوردستان لە سلێمانی ژیاون،  هیچ لادان و سەرپێچییەک لە ناوبراو ڕووی نەداوە کە لە دادگایەکدا لەسەری سەلمێندراوبێت، تەنانەت وەک پەناخوازی سیاسی لە کۆمیساریای بەرزی پەنابەران، نوێنەرایەتیی UN لە هەرێمی کوردستان ناوی تۆمار کردوە. 

حیزبی دیموکرات ڕادەستکردنی بەهزاد خوسرەوی بە کۆماری ئیسلامیی ئێران سەرکۆنە دەکات و دەڵێت، دەبوایە دۆسیەی گرتنی بەپێی یاسا لە دەزگای دادی هەرێمی کوردستاندا بڕیاری لەسەر درابا، نەک ناوبراو کە ئەندامی حیزبێکی سیاسیی دژبەری ئێران و پەناخوازی سیاسی نیشتەجێی هەرێمی کوردستانە، لەلایەن دەزگای ئاسایشی سلێمانییەوە ڕادەست بکرێتەوە.