ژیان

هۆزێكی تەواو گۆشەگیر بۆ گەڕان بەدوای خواردندا دێنە دەرەوە و دەردەكەون

بینینی ئەندامانی هۆزی “ماشكۆ پیرۆ”ی بنەڕەتی، كاتێك بوو كە لە شوێنە نیشتەجێبوونە دوورەدەستەكەیان لە دارستانە باراناوییەكانی ناوچەی ئەمازۆنی وڵاتە لاتینییەكە هاتنە دەرەوە، بۆ گەڕان بەدوای خۆراكدا.
رێكخراوی “سرفایفل ئینتەرناشیۆناڵ” رۆژی سێشەممە، وێنەیەكی دەگمەنی ئەندامانی “ماشكۆ پیرۆ” بڵاوكردەوە، كە دەیانیان لە كەنار رووبارێكی نزیك ئەو شوێنەی كۆمپانیاكانی بڕینەوەی درەختەكان كاری تیادەكەن، دەردەكەون.
كۆمەڵەی مافی دانیشتووانی رەسەنی ناوچەكە (FENAMAD) رایگەیاند، هۆزە گۆشەگیرەكە لە چەند هەفتەی رابردوودا بینراون كە لە دارستانەكەوە هاتوونەتە دەرەوە و بەدوای خۆراكدا دەگەڕێن، پێدەچێت بشیانەوێت لە داربڕەكان دووربكەونەوە.
“سرفایفل ئینتەرناشیۆناڵ” هاوكات لەگەڵ بڵاوبوونەوەی وێنەكان، رایگەیاند، ئەندامانی هۆزەكە لە كۆتایی حوزەیرانی رابردوو لە كەنار رووبارێكی ناوچەی مادری دیی دیۆس لە باشووری رۆژهەڵاتی پیرۆ و، نزیك لە سنووری بەرازیل، بینراون، بەپێی رۆیتەرز.
رێكخراوەكە، كە بەرگری لە مافی گەلە رەسەن و هۆز و گەلە دابڕاوەكان دەكات، هۆشداریشیدا لەوەی تاكەكانی ئەو هۆزانە رووبەڕووی “كارەساتی مرۆیی” دەبنەوە، لەگەڵ زیادبوونی دەستدرێژیی دابڕەكان بۆسەر خاكەكانیان، بەپێی تۆڕی “سكای نیوز”ی بەریتانی.

هەواڵ

"حزبی دیموکرات دەڵێت "ئاسایش بێهزاد خوسرەوی رادەستی ئیتڵاعات کردۆتەوە

حزبی دیموکراتی کوردستانی ئێران دەڵێت" ئاسایشی سلێمانی بێهزاد خوسرەوی ئەندامی ئەو حزبەیان دەستگیرکردوە و رادەستی ئیڵاعاتی ئێرانیان کردۆتەوە، بەڵام ئاسایش دەڵێت لەسەر داوای خۆی گەڕێندراوەتەوە.

دەنگۆی رادەستکردنەوەی ئەندامێکی حزبی دیموکراتی کوردستانی ئێران، کە پارتێکی ئۆپۆزسیۆن، کاردانەوەی لێکەوتۆتەوە، ئاسایشی سلێمانی رۆژی هەینی رایگەیاند کە "بێهزاد خوسرەوی ماوەی مۆڵەتی مانەوەی لە هەرێم تەواو بووە بۆیە لەسەر داوای خۆی گەڕندراوەتەوە بۆ رۆژهەڵاتی کوردستان."

بەڵام ئەمڕۆ شەممە، حزبی دیموکراتی ئێران ئەو لێدوانە ڕەتدەکاتەوە و دەڵیت" بێهزاد خوسرەوی لەلایەن ئاسایشیەوە دەستگیرکراوە و رادەستی ئیتڵاعاتی سنە کراوەتەوە.

ڕۆژی 6-9-2024، ڕێکخراوی مافی مرۆڤی هەنگاو بڵاوی کردەوە، هەفتەی ڕابردوو چالاکوانێکی خەڵکی سەقز بەناوی بێهزاد خوسرەوی تەمەن 35 ساڵ کە خاوەن پێداویستیی تایبەت بووە و ئەندامی حیزبی دیموکراتی کوردستانی ئێران بووە، هاوکات ئەندامی فەرمی کۆمیسیاری باڵای پەنابەرانی نەتەوەیەکگرتووەکان بووە، دوای دەستگیرکردن و ئەشکەنجەدانی لەلایەن هێزە ئەمنییەکانی سلێمانی ڕادەستی ئێران کراوەتەوە.

ناوەندی تەشکیلاتی حیزبی دیموکراتی کوردستانی ئێران ڕایگەیاندووە، لە ماوەی دوو هەفتەی ڕابردوودا بەهزاد خوسرەوی لە شاری سلێمانی دووجار لەلایەن ئاسایشەوە بانگ کراوە و جاری دووەم و دوای چەند ڕۆژێک لە بەندکردن و ڕاگرتن، ڕادەستی ئیدارەی ئیتلاعاتی شاری سنە کراوەتەوە.

حیزبی دیموکرات وەڵامی ئاسایشی سلێمانی داوەتەوە و ئاماژەی بەوە کردووە، کە بەهزاد خوسرەوی ماوەی زیاتر لە 10 ساڵە لەگەڵ دایک و خوشکی لە هەرێمی کوردستان لە شاری سلێمانی دەژین و بەپێ هەموو بەڵگە بەردەستەکان، لە نیشینگەی شاری سلێمانی مۆڵەتی مانەوە و نیشتەجێبوونیان وەرگرتووە، مانەوەیان لەو شارە یاسایی و بەپێی ڕێوشوێنەکانی حکومەتی هەرێمی کوردستان بووە.

ماوەی حەوت ساڵ بەهزاد و بنەماڵەکەی ئەندامی حیزبی دیموکرات بوون، لە هەموو ئەو ماوەیەشدا لە چوارچێوەی یاسا و ڕێوشوێنەکانی حکومەتی هەرێمی کوردستان لە سلێمانی ژیاون،  هیچ لادان و سەرپێچییەک لە ناوبراو ڕووی نەداوە کە لە دادگایەکدا لەسەری سەلمێندراوبێت، تەنانەت وەک پەناخوازی سیاسی لە کۆمیساریای بەرزی پەنابەران، نوێنەرایەتیی UN لە هەرێمی کوردستان ناوی تۆمار کردوە. 

حیزبی دیموکرات ڕادەستکردنی بەهزاد خوسرەوی بە کۆماری ئیسلامیی ئێران سەرکۆنە دەکات و دەڵێت، دەبوایە دۆسیەی گرتنی بەپێی یاسا لە دەزگای دادی هەرێمی کوردستاندا بڕیاری لەسەر درابا، نەک ناوبراو کە ئەندامی حیزبێکی سیاسیی دژبەری ئێران و پەناخوازی سیاسی نیشتەجێی هەرێمی کوردستانە، لەلایەن دەزگای ئاسایشی سلێمانییەوە ڕادەست بکرێتەوە.